Say Panaglingkor ed si Jehova so Lapuay Liket Ko

Unong ed salaysay nen Fred Rusk

Ugaw ak ni et naeksperiensyak la ’may imbalikas nen David ed Salmo 27:10: “Bangno paulyan ak na amak tan inak, si Jehova ed satan ampopoen to ak.” Istoryaen kod sikayo no panon.

BINMALEG ak ed cotton farm nen lakik diad Georgia, U.S.A., kaleganay Great Depression nen 1930’s. Naermenan a maong si tatay ko ed impatey nen nanay ko tan kapangyanak ya agik. Intilak to ak ed kinen lakik ya abalo met la, tan linmad arawin syudad pian mantrabaho. Nen kien, nanggaway paraan pian nakaiba to ak, balet ta ag-atuloy.

Saray panguloan ya bibiin ilalak nen lakik so mangaasikasod abung. Anggaman sikatoy aliwan relihyoso, saray panginaen ko et saradon Southern Baptist. Antakot koy nalewet kanian napipilitan ak ya mimisa kada Simba. Kanian ugaw ak ni et singa anggapoy interes kod relihyon. Balet labalabay koy maneskuela tan isports.

Imbisitan Anguman ed Bilay Ko

Sakey a ngarem nen 1941, sanen 15 años ko, walay maedad lan laki kaibay asawa to ya linmad abung mi. Sikato kuno si “uncle kon Talmadge Rusk.” Diad saman ko ’ra labat akabat, tan naamtaan kon Tasi nen Jehova ira. Say impaliwawa to nipaakar ed gagala na Dios ya manbilay so totoo ya andi-angga diad dalin et midumaan a maong ed nadngelan kod simbaan. Ag-anisiaan na saray kapamilya mi so imbaga ra, binalaw da ni ingen. Agda la ran balot inabuloyan ya ompawil. Ingen, inawat nen auntie Mary, panguloan labat na taloy taon ed siak, so Biblia tan saray publikasyon ya mangipapalinew ed satan.

Akombinsin tampol si auntie’k ya aromog to lay katuaan tan sikatoy abautismoan nen 1942 bilang sakey a Tasi nen Jehova. Naeksperiensya to met so impasakbay nen Jesus ya: “Say magmaliw a kakabusol na sakey a too et saray kabiangan na dilin sankaabungan to.” (Mat. 10:34-36) Pirmi isusumpa na pamilya mi. Akikomplot ed mayor so sakey ed saray atsi nen auntie’k ya maimpluensyad lugar mi pian ipaarestoy Uncle Talmadge. Say inkaso da et panaglako ya anggapoy lisensia. Sikatoy asentensiaan.

Inreport na dyaryo ed lugar mi ya oniay imbaga na mayor, ya huis met ed korte na syudad: “Saray literaturan ibubunog na sayan laki . . . et mapeligron singa samal.” Analoy uncle ko nen inyapela toy kaso, balet sakbay to ’tan et samploy agew nin apriso.

 No Panon Ak ya Tinulongan nen Auntie Mary

Aliwan siak labat so anginabangan nen auntie’k na balon sisiaen to, pinulongan to met iray kakaabay mi. Akila ak ed sikato nen inyaralan toy sakey ya lakin angawat ed libron The New World. * Inkuan na misis to ya sanlabin binasa itan nen asawa to. Anggano agko labay so manisian tampol ed sakey a relihyon, agustoan ko balet so nanaaralan ko. Ingen, aliwan saray bangat na Biblia so manunan akakombinsid siak ya saray Tasi et talagan totoo na Dios, noagta say panagtrato na arum ed sikara.

Singa bilang, aminsan sanen pasempet ak a nanlapud tanemay kamatis, nalmoan mi nen auntie Mary ya pinoolan na saray atsi to iray literatura to, kaiba lay ponograpo tan saray akarekord ya paliwawa ed Biblia. Agaylay pansyodot ko balet ta mamaong nin imbaga na samay sakey ya auntie’k, “Onsabi panaon, pisalamatan mo kami lanlamang ed ginawa mi.”

Pinataynan day auntie Mary ed abung mi nen 1943 lapud agto ikbanan so balon pananisia to tan itunday pampupulong to. Diad saman, aliketan ak ta agko labat naaralan ya walay ngaran na Dios, Jehova. Naamtaan ko met a sikatoy maaro, maabagey, tan agto dudusaey totoo ed mandarlang ya impierno. Naaralan ko met ya walay maaron organisasyon to, anggan agko ni asali inmatendid pantitipon da.

Ag-abayag, sanen manpapalaspas ak na dika ed sular, walay kotsin tinmunda tan tinepetan ak na sakey ed duaran lakin akalugan no siak si Fred. Nen naamtaan kon Tasi ira, inkuan ko, “Onlugan ak, tan onla tayo dimad agda tayo nanengneng a mantongtong.” Imbaki ira nen auntie Mary ya mitongtong ed siak. Say sakey ed sikara et si Shield Toutjian, ombiabiahen ministro ya angiter ed siak na panamaseseg tan espiritual a panangigiya a kakkaukolan ko. Siak la natan so susumpaen na pamilya mi lapud idedepensak iray sisiaen na saray Tasi nen Jehova.

Sinulatan ak nen auntie Mary a wala lad Virginia, tan inkuan to ya no desidido ak ya manlingkor ed si Jehova, sarag koy onlad man ya miayam ed sikato. Nandesisyon ak ya tampol. Biernes na labi, Oktubre 1943 ed saman, inkargak ed sakey ya kahon iray importantin gamit ko tan insabit kod kiew ya medyo arawid abung mi. Kaimbuasan, inalak ’may kahon insan ak dinmalan ed kaabay min abung, tan linmugan ak paonlad baley. Linma ak ed syudad na Roanoke tan nalmok si auntie Mary ed abung nen Edna Fowlkes.

 Inyaligwas ed Espiritual, Bautismo, Bethel

Si atsi Edna et sakey ya mapangasin alanaan, singa si Lydia nensaman. Sikatoy nanrenta na baleg ya abung a panayaman to kaibay auntie Mary tan say ayro to kaibay duaran anak ton bibii. Sarayan mamarikit​—di Gladys tan Grace Gregory​—et nagmaliw ed saginonor ya misionera. Si Gladys a masulok lan 90 años natan et siansia nin matoor a manlilingkor ed Japan branch.

Nen mimiayam ak ed abung nen atsi Edna, regular ak ya makakapiaral tan nipapasal ed ministeryo. Lapud agak nasesebelan a manaral na Salitay Dios tan onatendid saray Kristianon pantitipon, napepenek so pilalek kon mas nakabat si Jehova. Nen Hunyo 14, 1944, abautismoan ak. Ginmapon nampayunir si auntie Mary tan sanagin Gregory tan inawat day asainmin ed northern Virginia. Baleg so nitulong dad impangiletneg na kongregasyon ed Leesburg. Kagapoy 1946, ginmapo ak a nampayunir ed teritoryan asingger ed sikara. Diad saman a taon, saniiba kamin nambiahe paonlad makatantandan internasyonal a kombension ya agawad Cleveland, Ohio nen Agosto 4-11.

Diad saman a kombension, impaamta nen Nathan Knorr, say mangidadaulod organisasyon, so planon pamaawang ed Brooklyn Bethel. Kaibad satan so pangipaalagey na balon residence building tan extension na panag-imprintaan. Kaukolan so dakel ya kalangweran a lalaki. Naisip kon diman so labay kon panlingkoran ed si Jehova. Kanian nanaplay ak, tan kayari pigaran bulan, nen Disyembre 1, 1946, atawag ak ed Bethel.

Kayari manga sakey taon, linmad opisinak ed Mailing Deparment si Max Larson, say printery overseer. Impaamta tod siak ya niyasain ak ed Service Department. Ditan et dakel so naaralan ko nipaakar ed aplikasyon na saray prinsipyo ed Biblia tan say ikukurang na organisasyon na Dios, lalo la nen akatrabahok si T. J. (Bud) Sullivan, say department overseer mi.

Aminpiga ak ya binisita nen tatay ko ed Bethel. Sikatoy nagmaliw ya relihyoso nen maedad la. Diad sampot ya imbisita to nen 1965, inkuanto, “Sarag mo ak ya pasyaren, balet agak lan balot onla dia.” Aminpigak nin binisita antis na impatey to. Parad sikato, diad tawen so seguradon laen to. Parad siak balet, iilaloan ko a sikatoy walad pakanodnonotan nen Jehova tan no ontan bilang, sikatoy napaoli aliwan diad iisipen ton laen to, noagta diad dalin a walaan na ilalon manbilay ya andi-angga diad nipawil a Paraiso.

 Arum Niran Agnalingwanan ya Kombension tan Panagpaalagey

Saray kombension et lawas importantin pankanawnawa parad espiritual ya iyaaligwas. Tudtua itan nagkalalo lad saray internasyonal a kombension ya agawad Yankee Stadium ed New York nen 1950’s. Diad sakey a sesyon nen 1958, napno so Yankee Stadium tan Polo Grounds na 253,922 a delegadon nanlapud 123 a bansa. Walay agawad saman a kombension ya agkon balot nalingwanan. Legan ya ontutulong ak ed convention office, manapuran inmasingger ed siak si Brother Knorr. Inkuan to, “Fred, alingwanan ko manayay angiyasain na manpaliwawad saray pioneer ya wadman la natan ed baleg a restawran ya nirentaan. Sarag ton onla ka diman natan tan paliwawaan mo ra, akauley ka la no antoy nanonotan mod dalan.” Pinasyay impanpikasik nen paarap ak diman, manpukal so pagew ko.

Lapud maples ya indakel na saray kongregasyon ed New York City nen 1950’s tan 1960’s, saray rerentaan ya pasilidad parad Kingdom Hall et agla kombeniente. Kanian manlapud 1970 anggad 1990, taloran bilding ed Manhattan so sinaliw tan ni-renovate pian walay marakep a pantitiponan. Siak so tsirman na saray building committee parad sarayan proyekto tan dakel so agko nalingwanan ya inkagawa no panon ya daakan a benendisyonan nen Jehova iray kongregasyon ya akitulongan ed gastos tan impanumpal ed sarayan bilding a siansia nin uusaren bilang sentro na tuan panagdayew.

Pananguman ed Bilay

Sakey ya agew nen 1957, legan kon manaakar ed parke a walad baetan na Bethel Home tan printery paonlad trabaho, biglan inmuran. Walay anengneng kon magangganan balon Bethelite ya manaakar ed bandad unaan ko. Anggapoy payong to kanian inasinggeran ko tan pinayongan ko. Ontan so impankabat mi nen Marjorie, tan manlapu lad impankasal mi nen 1960, saniba kamin malikeliket a manlilingkor ed si Jehova, onuran man o onagew. Inselebra mi koma-50 a taon na impankasal mi nen Setyembre 2010.

Kakkasabi mi ni labat ya nanlapud honeymoon mi, imbaga nen Brother Knorr a niyasain ak ya manbangat ed Gilead School. Alay abig itan ya pribilehyo! Manlapud 1961 anggad 1965, inyuksoy so limaran mas andukey iran klase parad saray branch personnel ya naikdan na espisyal a panangipasal ed panangipakurang na sangan opisina. Nen autumn na 1965, impawil ed limaran bulan iray klase tan say akasentroan lamet na satan et say pangipasal ed saray misionero.

 Nen 1972, inyalis da ak ed Writing Correspondence Department a ditan et nanlingkor ak bilang overseer. Say pan-research pian ebatan so nanduruman tepet tan problema so akatulong ed siak a mas natalosan iray bangat na Biblia tan aplikasyon na saray atagey a prinsipyo na Dios diad panulong ed arum.

Insan nen 1987, niyasain ak ed balon departamento a tatawagen ya Hospital Information Services. Walaray seminar ya inyuksoy pian ibangat iray elder a membro na Hospital Liaison Committee no panon ya ipaliwawad saray doktor, huis, tan saray social worker so Makasulatan a talindeg tayo nipaakar ed dala. Say baleg a problema, basta-basta labat la sasaksakan na dala na saray doktor iray anak na saray Tasi, tan kaslakan lan mangaala iray ganggan na korte pian nagawaan itan.

Sano walaray isusuherin alternatibo parad panagpasaksak na dala, say kaslakan ya ebat na saray doktor et anggapoy nasaliw odino masyadon mabli. Say iyeebat ko balet et, “Piyunat mo pa tay limam.” Kapangiyunat to, oniay ibabagak, “Amtak ya wadtan so sakey ed saray sankaabigan ya alternatibo na dala.” Sayan pangirayew so mangipanonot ed bengatlan kabkabisado to​—naparaisetan so ompaway ya dala diad maalwar a pangusar na scalpel odino surgical knife.

Legay apalabas ya duaran dekada, daakan ya benendisyonan nen Jehova irayan sagpot pian nabangatan iray doktor tan huis. Anguma-uman so awawey da nen mas atalosan day pananisia tayo. Naaralan dan papaneknekan na impan-research ed medikal ya epektibo iray alternatibo parad dala tan dakerakel so mikokooperan doktor tan ospital a nayarin pangiyalisan ed saray pasyente.

Manlapu nen 1996, manlilingkor kamin dua nen Marjorie ed Watchtower Educational Center diad Patterson, New York, manga 110 kilometro ed norte na Brooklyn. Dia et nantrabaho ak ya agano ed Service Department tan nambangat ak met ed saray branch personnel tan ombiabiahen manangasikaso. Diad apalabas ya 12 taon, nanlingkor ak lamet bilang overseer na Writing Correspondence, ya inyalis diad Patterson nanlapud Brooklyn.

Problema Lapud Itatatken

Nen masulok lan 80 so edad ko, nairapan ak lan manumpal ed saray pribilehyok ed Bethel. Masulok lan samploy taon kon susungdoay cancer ko. Singa ak si Hezekias ya inaruman nen Jehova so bilay to. (Isa. 38:5) Onkakapuy met lay laman nen asawak, tan mantutulongan kami pian nasungdoay Alzheimer’s disease to. Si Marjorie et marundunong a ministro nen Jehova, maabig ya alimbawa ed saray kalangweran, tan matoor a katulongan tan kaibak ed bilay. Sikatoy maseet ya estudyante na Biblia tan maong a manbangat, tan dakerakel so espiritual ya ananak mi ya maapit ed sikami anggad natan.

Inatey si auntie Mary nen Marso 2010 diad edad ya 87. Sikatoy marundunong a managbangat na Salitay Dios tan tinmulong ed arum ya ondapag ed tuan panagdayew. Nanlingkor ya full-time ed dakel a taon. Misalsalamat ak ed impanulong tod siak a naaralay katuaan ed Salitay Dios tan magmaliw a singa sikato, sakey a lingkor na maaron Dios tayo, si Jehova. Imponpon si auntie Mary ed abay na asawa to a nanlingkor bilang misionero ed Israel. Matalek ak a sikaray walad pakanodnonotan nen Jehova tan walaan na ilalon kioli.

No nodnonoten koy 67 a taon ya impanlingkor kod si Jehova, misalsalamat ak ed dakerakel a panamendisyon tod siak. Talagan say panggaway linawa nen Jehova so lapuay liket ko! Lapud manmamatalek ak ed agnaparaan a kaabigan to, masimoon kon iilaloan a sakey ak ed saray minabang ed sipan na Anak to: “Balang sakey ya anaynan na kaabungan to odino agagi ton lalaki odino agagi ton bibii odino ama to odino ina to odino ananak to odino daldalin to nisengeg ed ngaran ko et mangawat na mas dakel ni tan manawir na bilay ya andi-anggaan.”​—Mat. 19:29.

[Paimano ed leksab]

[Litrato ed pahina 19]

Diad farm nen lakik ed Georgia, U.S.A., 1928

[Litrato ed pahina 19]

Si Auntie Mary tan Uncle Talmadge

[Litrato ed pahina 20]

Auntie Mary, Gladys, tan Grace

[Litrato ed pahina 20]

Sanen nampabautismo ak, Hunyo 14, 1944

[Litrato ed pahina 20]

Diad Service Department ed Bethel

[Litrato ed pahina 21]

Sikamin dua nen Auntie Mary diad internasyonal a kombension ed Yankee Stadium, 1958

[Litrato ed pahina 21]

Kasal mi nen Marjorie

[Litrato ed pahina 21]

Nen 2008