Tepetepet na Saray Manbabasa

Antoy gawaen ko no walay tepet ko nipaakar ed sakey ya abasak ed Biblia odino nakaukolan koy simbawad problemak?

Papasesegen na Uliran 2:1-5 so balang sakey ed sikatayo ya “usisaen” so pakatalos tan pakatebek a singa ed pananap na “inyamot a kayamanan.” Say labay ya ibaga na saya et nepeg a mansagpot itayo diad pan-research na ebat ed saray tepet tayod Biblia tan diad pananap na solusyon ed saray personal a problema tayo. Panon tayon gawaen itan?

Ipapaliwawa na Minabang ed Edukasyon na Teokratikon Eskuelaan Parad Ministeryo, pahina 33 anggad 38, “No Panon so Pansukimat” ya usaren iray publikasyon ya intarya na “matoor tan makabat ya aripen.” (Mat. 24:45) Nanengneng ed pahina 36 no panon ya usaren so Watch Tower Publications Index. Naapag so kada edisyon na satan ed subject index tan scripture index. Kanian nayari man-research balanglan diad panamegley na saray key word odino bersikulo na Biblia, a ditan et nanengneng so listaan na saray reperensyan tuplegan. Anosan yon anapen iray espisipikon ebat odino panangiwanwan a nakaukolan yo. Tandaan, say aanapen yo et “inyamot a kayamanan,” kanian nakaukolan so panaon tan sagpot.

Siempre, walaray tema tan teksto ya ag-espisipikon nipaliwawad saray publikasyon tayo. Tan anggano kinomentoan mi so sakey ya teksto ed Biblia, nayarin aliwan say espisipikon tepet yo so impalinew mi. Ontan met, talagan walaray onlesan tepet ed pigaran salaysay ed Biblia lapud ag-akasulat ditan iray amin a detalye. Kanian aliwan tampolan so pakaromog mi na ebat ed kada tepet ya onlesa. No ontan so situasyon, nepeg tayon paliisan ya palbengan iray bengatlan agtalaga naebatan, ta ompan pansengegan labat itan na pansusuppiatan ed “tepetepet a sukimaten imbes a mangitarya na antokaman a manlapud Dios nipaakar ed pananisia.” (1 Tim. 1:4; 2 Tim. 2:23; Tito 3:9) Anggapoy pakayari na sangan opisina odino world headquarters ya analisaen odino ebatan so amin a tepet ya agni nipaliwawad saray literatura tayo. Makapanmatalek tayo a mangitatarya so Biblia na magenap ya impormasyon a mangigiyad sikatayo, balet ta agkarga na satan so amin a detalye pian walay pankanawnawa tayon nipanengneng so mabiskeg a pananisiad Dios ya Autor na satan.​—Nengnengen so pahina 185 anggad 187 na libron Onapit ed si Jehova.

Panon to no ginawam lay anggaay nayarian mo pian i-research so sakey a bengatlan mangaapektad sika balet ta anggapo ni aromog mon panangiwanwan odino solusyon? Sarag moy onasingger ed sakey ya agin matatken ed espiritual, nayarin diad sakey ya elder ed kongregasyon yo. Walaan iray malaknab a kakabatan ed Biblia tan eksperiensyad bilay bilang Kristiano. Nayarin dugaruga so niiter dan simbawa nipaakar ed problemam odino dedesisyonan mo, lapud kabat da ka tan amta ray kipapasen mo. Tan agmo lilingwanan ya espisipikon ipikasi ed si Jehova so kapagaan mo tan kerewen ya iwanwan to ka panamegley na masanton espiritu to, “ta si Jehova mangiter na kakabatan . . . tan pakatalos.”​—Uli. 2:6; Luc. 11:13.