‘Agka Manmamatalek ed Dilin Pakatalos Mo’

“Manmatalek ka ed Jehova ed simoon a pusom, tan agka onsaral ed . . . dili a pakatalos mo.”​—ULI. 3:5.

1, 2. (a) Antoran situasyon so nayarin naeksperiensya tayo? (b) Sano walay dadalanen tayon makapagonigon a situasyon, mandedesisyon itayo, odino lalabanan tayoy tukso, siopay nepeg tayon panmatalekan, tan akin?

INSARA la na boss nen Cynthia * so pigaran negosyo to tan angekal lay pigaran empleyado. Iisipen nen Cynthia ya ompan sikato lay onsublay a naekal. Panon to la kasi no naekal ed trabaho? Panon to la ray babayaran to? Walay agin bii a say ngaran to et Pamela ya labay toy onalis ed pasen a mas kakkaukolan so manangipulong na Panarian. Duga kasi ’tan a desisyon to? Sananey met so problema na kalangweran a si Samuel. Sikatoy naadik ed pornograpiya sanen ugaw ni. Natan ya 20 años to lan masulok, singa natutukso lamet a pawilen itan a bisyo. Panon ton nalabanan itan?

² Siopay panmamatalekan mo sano walay dadalanen mon makapagonigon a situasyon, manggagawa kay importantin desisyon, odino lalabanan moy tukso? Kasin mandedepende kad sarilim, odino ‘ipapaawit mod si Jehova’ iray problemam? (Sal. 55:22) “Saray mata nen Jehova wala ra ed matunong a too,” so kuan na Biblia, “tan saray layag to akalukas ira ed saray akis da.” (Sal. 34:15) Talagan importante sirin a manmatalek tayod si Jehova ed interon puso tayo tan agtayo mandedepende ed dilin pakatalos tayo!​—Uli. 3:5.

3. (a) Antoy kabaliksan na panmatalek ed si Jehova? (b) Akin et wala ray totoon panmamatalkan day sarili da?

³ No panmamatalkan tayoy Jehova diad interon puso, onkiwas itayo unong ed paraan tan linawa to. Pian nagawaan tayo itan, kaukolan ya onasingger itayod sikato panamegley na pikakasi tan impapuson kerewen so panangigiya to. Balet parad dakel, aliwan mainomay so sigpot a panmatalek ed si Jehova. Oniay imbaga na agin si Lynn: “Manlapu la nensaman, talagan nanairapan ak a manmatalek ed si Jehova.” Akin? “Binmaleg ak ya anggapoy ama,” so kuan to, “tan anggapoy pibabali nen inak ed siak. Kanian apasal ak ya akauley ak ed sarilik.” Lapud saya, nanairapan si Lynn a manmatalek ed anggan siopa. Ontan met, nayarin say sakey et mataletalek ed sarili to lapud saray abilidad to tan eksperiensya tod bilay. Singa bilang, ompan say sakey ya elder et mandedependid eksperiensya to kanian tampol to lan asikasoen iray bengatla diad kongregasyon ya agto ni balet impikasi ed si Jehova.

4. Antoy aralen tayod sayan artikulo?

⁴ Labay nen Jehova ya pankimeyan tayo ray ipipikasi tayo tan onkiwas itayo unong ed linawa to. Panon tayo sirin ya ipaawit ed si Jehova iray kapagaan tayo tan gawaen tayo met balet so biang tayo diad panresolbid saray problema? Antoy nepeg tayon panalwaran sano mandedesisyon itayo? Akin et importanti so pampikasi sano lalabanan tayoy tukso? Ebatan tayo iratan a tepet legan tayon ikokonsidera iray alimbawa diad Kasulatan.

Sano Nagogonigon

5, 6. Antoy ginawa nen Ezekias sanen wala ray imbaki na ari na Asirya a manaktakot ed sikato?

⁵ Oniay ibabaga na Biblia nipaakar ed si  Arin Ezekias: “Pinmeket ed Jehova; agpinmaliis a manlapu ed itutumbok ed sikato, noag ingen inunor to so saray ganggan to, a si Jehova ingganggan to ed panamegley nen Moises.” On, sikatoy “nanmatalek ed Jehova, a Dios na Israel.” (2 Ara. 18:5, 6) Aminsan, wala ray imbaki nen Arin Senakerib na Asirya diad Jerusalem, kaibay Rabsaces tan amayamay a sundalo. Diad saman et dakel la ran syudad na Juda so akubkob na makapanyarin armada na Asirya, tan say Jerusalem so pupuntiryaen la natan nen Senakerib. Antoy ginawa nen Ezekias? Sikatoy linmad abung nen Jehova tan impikasi ton: “O Jehova a Dios mi, ilaban mo kami, kerewen ko ed sika, . . . pian amin iray nanarian ed dalin naamtaan da a sika si Jehova a Dios a bukbukor.”​—2 Ara. 19:14-19.

⁶ Kinmiwas si Ezekias unong ed pikakasi to. Antis ni ingen ya linmad templo pian manpikasi, ingganggan to ray totoo ya agda eebatan iray panagbalaw nen Rabsaces. Wala ra met so imbaki nen Ezekias ed si propetan Isaias pian amtaen day nibaga to ed sayan pamaakaran. (2 Ara. 18:36; 19:1, 2) Ginawa nen Ezekias iray posiblin makatulong ed sayan situasyon. Balet ta agto nanisip na solusyon ya sumlang ed linawa nen Jehova, a singa say ikerew na tulong ed Ehipto odino ed kaabay da iran bansa. Agnandepende si Ezekias ed dilin pakatalos to, noagta nanmatalek ed si Jehova. Diad saman a mismon labi et pinatey na anghel nen Jehova so 185,000 a sundalo nen Senakerib, tan ‘si Senakerib et sinmener tan pinmawil ed Ninive.’​—2 Ara. 19:35, 36, Maung a Balita.

7. Panon itayon napabiskeg na pikakasi di Hana tan Jonas?

⁷ Si Hana, ya asawa na Levitan si Elkana, et nanmatalek met ed si Jehova sanen nagogonigon lapud ag-onanak. (1 Sam. 1:9-11, 18) Ontan met, si propetan Jonas et nisalba manlapud eges na baleg a sira kayari impangipikasi ton: “Tinmawag ak ed Jehova lapu ed kairapan ko, et sikato inmebat ed siak. Nanlapu ed eges na Sheol tinmawag ak, et dinengel mo so boses ko.” (Jon. 2:1, 2, 10) Napapabiskeg so liknaan tayo ta amta tayon sarag tayoy ontawag ed si Jehova pian kerewey tulong to diad antokaman a kipapasen.​—Basaen so Salmo 55:1, 16.

8, 9. Antoy imbalikas di Ezekias, Hana, tan Jonas diad pikakasi ra, tan antoy naaralan tayod satan?

⁸ Naaralan tayo met ed alimbawa di Ezekias, Hana, tan Jonas no antoy agtayo nepeg a lingwanan diad pikakasi sano nagogonigon itayo. Amin da et nanermen lapud mairap ya kipapasen. Balet, ipapanengneng na pikakasi ra ya aliwan say sarili da labat tan say pakaandi problema ra so iisipen da. Say sankaimportantian ed sikara et say ngaran na Dios, say pandayew dad sikato, tan say panggaway linawa to. Asakisakitay Ezekias sanen abalaw so ngaran nen Jehova. Insipan nen Hana ya say kekerewen ton anak a laki et panlingkoren tod tabernakulo diad Siloh. Tan oniay imbaga nen Jonas: “Sumpalen ko so insipan ko.”​—Jon. 2:9, MB.

⁹ Sano onkekerew tayoy tulong ed si Jehova diad pakakagonigon tayo, maabig no usisaen tayoy motibo tayo. Kasin say sankanonot tayo labat et say pakaandi problema tayo, odino sankanonot tayoy Jehova tan say gagala to? No wala ray problema, ompan masyado itayon mapagpaga, a lapud satan et napaulyanan tayo lay espiritual iran bengatla. Kanian sano onkekerew tayoy tulong ed Dios, iyapasakey tayoy nonot tayod si Jehova, say pamasanto ed ngaran to, tan say kiyalangon na soberanya to. No ontan so gawaen tayo, mansiansia itayon positibo anggano ag-aresolbe so problema diad paraan ya iilaloan tayo. Nayarin say ebat ed pikakasi tayo et kaukolan tayon sungdoan so situasyon diad tulong na Dios.​—Basaen so Isaias 40:29; Filipos 4:13.

 Sano Manggaway Desisyon

10, 11. Antoy ginawa nen Josafat sanen walay situasyon ya agto amtay gawaen to?

¹⁰ Panon kan manggagaway importante iran desisyon ed bilay mo? Kasin mandedesisyon ka nin unona insan mo ipikasi ed si Jehova a bendisyonan to itan a desisyon mo? Nengnengen tayo no antoy desisyon nen Josafat ya ari na Juda sanen naniiba so puersa na saray Moabita tan Amonita pian miguerra ed Juda. Anggapoy pakayari na Juda sumpad sikara. Antoy gawaen nen Josafat?

¹¹ “Si Josafat tinmakot, tan impasen to so inkasikato a mananap ed Jehova,” so kuan na Biblia. Ingganggan ton manayunal so amin a totoo ed Juda tan impandaragup to ra pian “mananap na tulong ed Jehova.” Insan sikatoy inmalagey ed arap da tan nampikasi. Oniay kuan to: “O Dios mi, agmo ra ta ukomen? Ta andian kami na pakapanyari sumpa ed saya a baleg ya ulop ya onsabi a sumpa ed sikami; agmi met amta no anto so gawaen mi, balet saray mata mi wala ra ed sika.” Dinengel na tuan Dios so pikakasi nen Josafat tan mamilagro to ran inliktar. (2 Awa. 20:3-12, 17) Sano manggagawa itayoy desisyon, lalo la no apektoen toy espiritualidad tayo, agta nepeg a manmatalek itayod Jehova imbes ya mandepende ed dilin pakatalos tayo?

12, 13. Sano manggaway desisyon, antoy naaralan tayo ed alimbawa nen Arin David?

¹² Panon to balet no say problema tayo et asali ti’ la nensaman kanian singa mainomay a resolbien ta makanonot tayon tampol na solusyon? Makatulong so sakey a salaysay ya agawa ed bilay nen Arin David. Sanen nilusob na saray Amalekita so syudad na Siklag, inaala da iray asawa tan ananak nen David ontan met ed saray kaasawaan tan ananak na sundalo to. Oniay intepet nen David ed si Jehova: ‘Kasin usilan ko ra?’ Inmebat si Jehova: “Unosil ka; ta petepeteg a sikara so [nausilan] mo, tan andi-duaruwa a nabawim so amin.” Tinmulok si David, tan “abawi to so amin ya inala na saray Amalekita.”​—1 Sam. 30:7-9, 18-20.

¹³ Kayari na sayan inkagawa, akiguerra iray Filisteo ed Israel. Impanon iya lamet nen David ed si Jehova tan oniay malinew ya ebat na Dios: “Ontatdang ka; ta petepeteg ya iyawat ko so saray Filisteo ed limam.” (2 Sam. 5:18, 19) Ag-abayag, linmusob lamet iray Filisteo. Anto kasi gawaen nen David? Sarag to pan ikatunongan ya, ‘Amidua la iyan agawa. Lusoben ko irayan kalaban na Dios a singa ginawak nen imbebeneg.’ Odino, kasin mantepet lamet ed si Jehova? Imbes ya mandepende si David ed eksperiensya to, nampikasi lamet. Maong labat ta ontan so ginawa to ta diad sayan pankanawnawa et duma so instruksion nen Jehova! (2 Sam. 5:22, 23) Sano walay probleman asali tayo la nensaman, manalwar itayo ta ompan mandepende tayo labat ed saray eksperiensya tayo.​—Basaen so Jeremias 10:23.

14. Antoy naaralan tayo ed impideneng nen Josue tan saray mamatatken ed Israel ed saray Gabaonita?

¹⁴ Lapud ag-itayo perpekto, amin tayo​—anggan saray abayag lan elder​—et nepeg a manalwar ta ompan makapandesisyon itayo ya agtayo ni impikasi ed si Jehova. Laen tayo pan alimbawa imay ginawa nen Josue tan saray mamatatken ed Israel sanen sikaray nila na saray Gabaonita a nankuankuanan a nanlapud arawin pasen. Akipaknaan si Josue tan saray mamatatken ed sarayan Gabaonita, balet ta agda impanon ed si Jehova iyan desisyon da. Diad saginonor et sinuportaan nen Jehova iyan paknaan, balet siansia nin impairekord to diad Kasulatan so nipaakar ed agda inkerew na panangigiya to pian pakaaralan tayo.​—Jos. 9:3-6, 14, 15.

Sano Lalabanay Tukso

15. Ipaliwawa no akin ya importante so pikakasi sano lalabanay tukso.

¹⁵ Lapud ‘aripen itayo na kasalanan,’ kaukolan tayon labanan iray makasalanan a pilalek  tayo. (Roma 7:21-25) Sarag tayoy manalo ed sayan laban. Panon? Imbaga nen Jesus ed saray papatumbok to a kakkaukolan so pampikasi pian nalabanay tukso. (Basaen so Lucas 22:40.) No bilang ta wadtan nin siansia iray mauges a pilalek odino kanonotan anggano nampikasi ti’ la, kaukolan ya ‘itultuloy tayoy onkerew na karunongan ed Dios’ pian nalabanan iratan. Napapaseguroan itayo a “sikatoy mabunlok a mangiiter ed amin tan agmamabalaw.” (Sant. 1:5) Inyarum ni nen Santiago: “Wala ta ed sikayo so mansasakit [ed espiritual]? Patawag to komon iray mamasiken ed kongregasyon, tan sikatoy ipikasi ra, a puyokan day larak diad ngaran nen Jehova. Tan say pikakasi ya atekepan na pananisia et mamaabig ed samay mansasakit.”​—Sant. 5:14, 15.

16, 17. Sano lalabanay tukso, kapigan so sankaabigan a pampikasi?

¹⁶ Kaukolan so pampikasi pian nalabanay tukso, balet nepeg tayon tandaan ya importante no kapigan so pampikasi. Nengnengen tayo pay agawa ed sakey a kalangweran ed salaysay na Uliran 7:6-23. Sanen mansirunget la, sikatoy nanakar ed karsadan paonlad abung na paabang a bii. Sikatoy apalikdo ed impanangguyor tan makapaayat iran salita na bii, kanian akilad sikato iyan balolaki, a singa toro a mamapaarap ed panagpateyan. Akin et linma diman iyan laki? Sikatoy “andian na pakatalos,” tan nayarin lalabanan toy mauges iran pilalek. (Uli. 7:7) Diad sayan kipapasen, kapigan so sankaabigan a pampikasi? Siempre, maabig no sayan balolaki et nampikasi sanen wadman lad saman a situasyon. Balet, say sankaabigan komon ya impanpikasi to et sanen sinmebang ni labat ed isip to so pilalek ya onlad saman a karsada.

¹⁷ Iyan tayo lan lalabanan na sakey so pilalek ton manbantay na pornograpiya. Balet, no lukasan to ray site ed Internet ya amta ton kawalaan na makapaayat iran litrato tan video, agta parehoy situasyon tod samay kalangweran ya atukoy ed Uliran kapitulo 7? Talagan mapeligro itan a gawaen to! Pian nalabanan toy tukson manbantay na pornograpiya, nepeg a sikatoy manpikasi ed si Jehova antis to nin nalukasan iratan a site.

18, 19. (a) Akin et aliwan mainomay a labanay tukso, balet panon itayon manalo ed sayan laban? (b) Antoy determinadom a gawaen?

¹⁸ Aliwan mainomay a labanay tukso tan saray kakapuyan odino aliwan kagagawa. “Say pilalek na laman et sumlang ed espiritu,” so kuan nen apostol Pablo, “tan say espiritu et sumlang ed laman.” Saya so rason no akin ya ‘agtayo nagagawaan iray labay tayon gawaen.’ (Gal. 5:17) Pian manalo tayo sirin  ed sayan laban, kaukolan ya tampol itayon manpikasi a masimsimoon diad bektan onsebang ed isip tayo so mauges a pilalek, tan onkiwas tayo unong ed pikakasi tayo. “Anggapo ni sinmabin tukso ed [sikatayo] ya agni asali na arum a totoo,” tan diad tulong nen Jehova et makapansiansia itayon matoor.​—1 Cor. 10:13.

¹⁹ Sano walay dadalanen tayon makapagonigon a situasyon, manggagawa itayoy importantin desisyon, odino lalabanan tayoy tukso, nonoten tayon angiter si Jehova na mablin regalo ya ontulong ed sikatayo​—say pikakasi. No kerewen tayoy tulong to diad sarayan situasyon, ipapanengneng tayon manmamatalek itayod sikato. Nepeg met ya itultuloy tayon kerewen ed Dios so masanton espiritu to a mangigiya tan mamabiskeg ed sikatayo. (Luc. 11:9-13) On, gawaen tayo siri’ anggaay nayarian tayon manmatalek ed si Jehova tan ag-itayo mandedepende ed dilin pakatalos tayo.

[Paimano ed leksab]

Kasin Natandaan Mo?

• Antoy naaralan mod si Ezekias, Hana, tan Jonas nipaakar ed panagmatalek ed si Jehova?

• Base ed alimbawa di David tan Josue, antoy nepeg tayon panalwaran sano mandedesisyon itayo?

• No nipaakar ed tukso, kapigan ya talagan mas makatulong so pikakasi?

[Tepetepet Parad Panagaral]

[Litrato ed pahina 9]

Sano lalabanay tukso, kapigan so sankaabigan a pampikasi?