Ipasal Iray Lalaki Parad Pribilehyo ed Kongregasyon

“Siopaman ya abangatan a maong et magmaliw a kapara na managbangat to.”​—LUC. 6:40.

1. Legan na ministeryo nen Jesus diad dalin, panon ton inletneg so pundasyon na kongregasyon?

DIAD sampot na Ebanghelyo nen Juan et oniay insulat to: “Diad tua et amayamay met niray ginawa nen Jesus, a no isulat ya ami-amin so detalye na saratan, ompano agnakarga na mundo iray lukot a pansulatan.” (Juan 21:25) Dakel so agawaan nen Jesus legay antikey balet ta impasyan ministeryo to diad dalin. Kaleganan na satan, sikatoy nananap, angipasal, tan angorganisa na lalakin mangituloy ed kimey to sano sikatoy ompawil lad tawen. Kapawil tod tawen nen 33 C.E., niletneg la nen Jesus so pundasyon na kongregasyon a maples ya dinmakel, anggad nagmaliw a libolibo.​—Gawa 2:41, 42; 4:4; 6:7.

2, 3. (a) Akin et talagan kakkaukolan iray agagin lalaki ed kongregasyon? (b) Antoy aralen tayo ed sayan artikulo?

² Natan et masulok lan pitoran milyon so aktibon mangipupulong ed maong a balita, a kabiangan irad masulok ya 100,000 ya kongregasyon diad interon mundo. Kakkaukolan iray lalakin mangidaulo ed sarayan kongregasyon. Singa bilang, kakkaukolan iray elder. Nakomendaan iray lalakin manggugunaet a nawalaay pribilehyo ed kongregasyon ta “maabig a kimey so pipilaleken” da.​—1 Tim. 3:1.

³ Balet, ag-automatikon onkualipika iray brother parad saray pribilehyod kongregasyon. Aliwan say sekular ya edukasyon odino eksperiensyad bilay so mangiparaan ed sikara parad  sayan kimey. Imbes, kaukolan a nipapatnag da la ray espiritual a kualipikasyon, ta mas importante iray espiritual a kualidad nen say abilidad. Panon a natulongan ya onkualipika iray agagin lalaki ed kongregasyon? “Siopaman ya abangatan a maong et magmaliw a kapara na managbangat to,” so kuan nen Jesus. (Luc. 6:40) Diad sayan artikulo, aralen tayo no panon ya impasal na Sankamaongan a Managbangat a si Jesu-Kristo iray disipulo to, tan nengnengen tayo no antoy naaralan tayod alimbawa to.

“Tinawag Ta Kayon Kakaarok”

4. Panon ya impanengneng nen Jesus ya sikatoy tuan kaaro na saray disipulo to?

⁴ Kakaaro nen Jesus iray disipulo to tan agto ra trinaton abebbeba nen say sikato. Akiulop ed sikara, pinanmatalkan to ra, tan ‘impaamta tod sikara so amin a nadngel tod Ama to.’ (Basaen so Juan 15:15.) Nonot yo pa labat so liket na saray disipulo nen Jesus sanen inebatan to so tepet dan: “Anto naani so tanda na kiwawalam tan say kasampotan na sistema na mundo?” (Mat. 24:3, 4) Ontan met, labay ton naamtaan day walad nonot tan puso to. Singa bilang, diad samay labi antis na impangarestod sikato, intagar toy Pedro, Santiago, tan Juan diad hardin na Getsemani. Ditan et talagan imbesngaw tod Jehova so liknaan to. Nayarin agmet arengel na samay taloran apostol no antoy impikasi nen Jesus, balet ta seguradon anengneng tan alikna ray pakakagonigon to. (Mar. 14:33-38) Isipen pa met so epektod sikara sanen “anguman so itsura to ed arap da” tan ‘anengneng day karlangan to.’ (Mar. 9:2-8; 2 Ped. 1:16-18) Say impikaaro nen Jesus ed saray disipulo to et amabiskeg ed sikara pian nagawaan day importantin kimey ya inmatalek to.

5. Antoray paraan ya natulongan na saray elder iray agagi?

⁵ Singa si Jesus, pikakaaroan na saray elder natan iray agagi tan tutulongan da ra. Iyaasingger day liknaan da diad pangipapanengneng day personal ya interes. Tua, wala ray kompidensyal a bengatlan agda nepeg ya itongtong ed arum, balet ta inanabang dad saray agagi iray nanaaralan dad Salitay Dios. Panmamatalkan na saray elder iray agagi. Agdan balot iisipen a mas atagey ira nen saray ministeryal a lingkor a nayarin mas ugaw nen say sikara. Imbes, nononoten dan baleg so potensyal na sarayan maespiritual a lalaki, tan importante so kimey a gagawaen dad kongregasyon.

“Angitilak Ak na Aligen Yo”

6, 7. Anton ehemplo so intilak nen Jesus ed saray disipulo to tan antoy epekto na satan ed sikara?

⁶ Anggaman aapresyaen na saray disipulo nen Jesus iray espiritual a bengatla, no maminsan et naiimpluensyaan ira na binalegan dan pananisia tan kultura. (Mat. 19:9, 10; Luc. 9:46-48; Juan 4:27) Balet ta ag-iran balot binalaw o nampasnokan nen Jesus. Agto met impagawad sikara iray bengatlan agda sarag ya gawaen odino saray bengatlan sikaton mismo et agto labay a gawaen. Imbes, imbangat to ra panamegley na alimbawa to.​—Basaen so Juan 13:15.

⁷ Anton ehemplo so intilak nen Jesus a pangaligan da? (1 Ped. 2:21) Pinansiansia ton simpli so bilay to pian nausar toy panaon ton manlingkor ed arum. (Luc. 9:58) Say imbangat to et saray naaralan tod si Jehova, aliwan say sarili ton ideya. (Juan 5:19; 17:14, 17) Sikatoy mainomay ya asinggeran tan maomaong so pidedeneng to. Ipapanengneng na saray kiwas to ya inaro to ray totoo. (Mat. 19:13-15; Juan 15:12) Sayan alimbawa nen Jesus et maabig so epekto to ed saray apostol to. Singa bilang, tinmulong itan pian ag-ontakot si Santiago tan mansiansian matoor ed Dios anggad sanen impapatey nen Herodes. (Gawa 12:1, 2) Tan diad loob na masulok ya 60 taon, matoor met ya tinumbok nen Juan so ehemplo nen Jesus.​—Apo. 1:1, 2, 9.

8. Anton maabig ya alimbawa so nipanengneng na saray elder ed tobonbalon lalaki?

⁸ Saray elder a masakripisyo, mapaabeba, tan maaro et mangipapanengneng na maabig ya ehemplo ed saray tobonbalon lalaki. (1 Ped.  5:2, 3) Sakey ni, maliket iray elder ya napanuliranan so pananisia, panagbangat, Kristianon kabibilay, tan ministeryo ra lapud amta ran say alimbawa ra et maong ya aligen na saray agagi.​—Heb. 13:7.

Angiter na Instruksion, Insan To Ra Imbaki

9. Panon tayon amta ya impasal nen Jesus iray disipulo to parad panagpulong a kimey?

⁹ Kayari na ngalngali duay taon ya impasyan ministeryo nen Jesus, imbaki to met iray 12 apostol ton manpulong. Antis to ran imbaki, inikdan to ni ra na saray instruksion. (Mat. 10:5-14) Ontan met, antis ton mamilagron pakanen so nilibon totoo, imbaga tod saray disipulo no panon da ran organisaen pian nabunogan so amin. (Luc. 9:12-17) On, inikdan nen Jesus iray disipulo to na malinew tan espisipikon instruksion. Lapud sayan klase na panangipasal tan ed tulong na masanton espiritu, ayarian na saray apostol ya organisaen so malaknab a panagpulong a kimey a ginmapo nen 33 C.E.

10, 11. Panon a tuloytuloy a nipasal iray balo ni ed kongregasyon?

¹⁰ Diad panaon tayo, onggapoy pangiter tayo na espiritual ya instruksion ed sakey a laki sano awaten toy panangiyaral na Biblia. Ompan kaukolan tayon tulongan pian napaaligwas toy panagbasa to. Legan tayon itutuloy so pangiyaral ed sikato, tulongan tayo met diad arum nin paraan. Sano mimiaral la, kaukolan ton naamtaan no antoy nepeg ton gawaen pian onkualipika ed Teokratikon Eskuelaan Parad Ministeryo, tan pian magmaliw ya agbautismadon manangipalapag. Sano abautismoan la, sikatoy ipasal parad arum nin kimey, a singa say panagmantini Kingdom Hall. Diad ilalabas na panaon, sikatoy tulongan na saray elder ya nanengneng iray kaukolan ton gawaen pian onkualipikan magmaliw a ministeryal a lingkor.

¹¹ Sano say sakey ya bautismadon agin laki et naikdan na responsabilidad ed kongregasyon, maliket ya ipaliwawa na elder so dugan paraan na panggawa tod satan. Kaukolan a natalosan na sayan agin laki no antoy iilaloan ed sikato. No nanairapan ed sayan asainmin to, agtampol isipen na elder a sikatoy aliwan kualipikado. Imbes, maaron ipaliwawad sikato no anto ni ray papaaligwasen to, ya ipanonot ed sikato iray kaukolan ton gawaen tan no panon ton nagawaan iratan. Panliliketan na saray elder so itulong ed saray brother ya asikasoen iray responsabilidad da ta amta ran say panlingkor ed kongregasyon et mangiter ed sikara na liket.​—Gawa 20:35.

“Say Makabat Ontalineng ed Pananimbawa”

12. Akin et epektibo so simbawa nen Jesus?

¹² Diad impangipasal nen Jesus ed saray disipulo to, sinimbawa to ra sano kaukolan day nasimbawa. Singa bilang, binaat toy Santiago tan Juan ta labay dan napelag so apoy manlapud tawen ed saray Samaritanon ag-angawat ed si Jesus. (Luc. 9:52-55) Diad sakey nin pankanawnawa, inmasingger ed si Jesus so ina ra tan kinerew ton naikdan komon si Santiago tan Juan na importantin posisyon ed Panarian. Amta nen Jesus ya sikaran sanagi so mismon makanlabay ed saya kanian imbaga tod sikara: “Sayay iyurong diad kawanan ko tan kawigik et aliwan siak so mandesisyon, noagta para itan ed saramay angiparaanan nen Amak ed satan.” (Mat. 20:20-23) Lanang a say simbawa nen Jesus et malinew, praktikal, tan base ed Salita na Dios. Imbangat to ray disipulo ton mankatunongan unong ed prinsipyo na Salita na Dios. (Mat. 17:24-27) Amta nen Jesus ya aliwan perpekto iray patumbok to kanian wala ray bengatlan agda nagawaan. Sinimbawa to ra ta inad-aro to ra.​—Juan 13:1.

13, 14. (a) Siopay mankaukolan na simbawa? (b) Antoray nayarin isimbawa na saray elder ed sakey a brother ya naaamper so iyaaligwas tod espiritual?

¹³ Walan wala ray pankanawnawa a say sakey ya brother a malabay a nawalaan na responsabilidad ed kongregasyon et mankaukolan na simbawa. “Say makabat ontalineng ed pananimbawa,”  so kuan na Uliran 12:15. Imbaga na sakey a tobonbalon brother ya nensaman et isipen ton aliwan magenap so abilidad ton manlingkor ed kongregasyon. Say simbawa na sakey ya elder so tinmulong pian namoria ton sarag toy manlingkor anggano aliwan perpekto.

¹⁴ No naimano na saray elder ya naaamper so iyaaligwas na sakey a brother lapud kondukta to, sikatoy tampol dan ‘ipetek tekep na inkaulimek.’ (Gal. 6:1) No maminsan, kaukolan a simbawaen so sakey lapud awawey tan ugali to. Singa bilang, no naimano na saray elder a say sakey a brother et agto gagawaey anggaay nayarian to diad ministeryo, pasesegen da ya nonoten toy alimbawa nen Jesus. Makulin nampulong si Jesus nensaman tan ingganggan to ray disipulo to ya aligen day alimbawa to. (Mat. 28:19, 20; Luc. 8:1) No walay brother ya singa mapaatagey so awawey to, ipaimano na saray elder imay simbawa nen Jesus ed saray disipulo to nipaakar ed peligro na pampilalek ed pagmaliw a manunaan. (Luc. 22:24-27) Panon to balet no say brother et nanairapan a mamerdona? Maabig no ipanonot na saray elder imay ilustrasyon nipaakar ed aripen ya agto kinasian so kapara ton aripen ya akautang na melag ed sikato anta sikaton mismo et akautang na baleg ed ari, balet ta agla itan impabayaran na ari. (Mat. 18:21-35) No say sakey et kaukolan toy nasimbawa, maabig no anggad posible et simbawaen ya tampol na saray elder.​—Basaen so Uliran 27:9.

“Ipasal Moy Inkasika”

15. Panon a say sakey a brother et nasuportaan na pamilya to diad panlingkor tod kongregasyon?

¹⁵ Saray elder so manunan makapangipasal ed saray lalaki parad saray responsabilidad ed kongregasyon, balet ta makasuporta met so arum. Singa bilang, say sakey a brother et nasuportaan na mismon pamilya to diad panlingkor tod kongregasyon. No sakey lan elder, baleg so nitulong na suporta na asawa tan ananak to. Agda isiblet ed kongregasyon, noagta abuloyan dan usaren toy panaon tan biskeg to pian nagawaan to ray responsabilidad to. Sayan masakripisyon awawey da et mamaliket ed sikato tan talagan apresyaen na saray agagi.​—Uli. 15:20; 31:10, 23.

16. (a) Say pilalek ya lingkoray kongregasyon et akadepende ed siopa? (b) Antoy nepeg a gawaen na brother no labay toy nawalaan na pribilehyo?

¹⁶ Anggaman makatulong so arum, say pampilalek ya lingkoray kongregasyon et akadependi ed mismon brother. (Basaen so Galacia 6:5.) Tua, agmet kaukolan a say sakey et ministeryal a lingkor odino elder pian natulongan to ray agagi tan sigpot a makapibiang ed ministeryo. Anggaman ontan, no say sakey a brother et pipilaleken toy nawalaan na pribilehyo, kaukolan ton ipanengneng a nagagawaan to la ’ramay ibabaga na Kasulatan a kualipikasyon. (1 Tim. 3:1-13; Tito 1:5-9; 1 Ped. 5:1-3) No labay toy magmaliw a ministeryal a lingkor odino elder balet ta agni nirekomenda, nepeg ton nengnengen  no anto ni ray papaaligwasen to. Antoy makatulong ed sikato? Say regular tan maseet a pambasa tan panaral na Biblia, impapuson pandalepdep, masimoon a pampikasi, tan maseseg a pampulong. No ontan so gawaen to, niyaaplika to imay simbawa nen Pablo ed si Timoteo: “Ipasal moy inkasika, a say gagalam et pian nipatnag moy maridios a debosyon.”​—1 Tim. 4:7.

17, 18. Antoy makatulong ed sakey a brother no isipen ton agmagenap so abilidad to odino anggapoy pilalek ton nawalaay pribilehyo?

¹⁷ Panon to balet no isipen na brother ya agkualipikado ed saray pribilehyo ta agmagenap so abilidad to? Maabig no nodnonoten to so tulong ya iiter nen Jehova tan Jesu-Kristo ed sikatayo. Isisipan nen Jehova ya ‘inagew-agew ton libiten so awit tayo.’ (Sal. 68:19) Kanian tulongan nen Aman Jehova so brother ya sakbaten iray responsabilidad ed kongregasyon. Maabig met no nodnonoten to ya talagan kakkaukolan iray maespiritual a lalakin mangidaulo ed saray kongregasyon. No dalepdepen to irayan punto, nayarin sikatoy napakiwas ya labanan so negatibon liknaan. Marakep met no sikatoy onkerew ed si Aman Jehova na masanton espiritu, ta kaibad bunga na satan so deen tan panangontrol ed dili. Ontulong irayan kualidad pian naekal toy liknaan ya agmagenap so abilidad to. (Luc. 11:13; Gal. 5:22, 23) Napapaseguroan itayo ya bendisyonan nen Jehova so siopaman ya mamipilalek a nawalaay pribilehyo tekep na dugan motibo.

¹⁸ Panon to no anggapoy pilalek na brother a nawalaay pribilehyo? Antoy makatulong ed sikato? Oniay insulat nen apostol Pablo: “Say Dios so mamapabiskeg ed sikayo, ya iiter to ed sikayo so pampilalek tan pakayarin manggaway panlabayan to.” (Fil. 2:13) Say Dios a mismo so ontulong ed sakey a too pian niwalad sikato so “pampilalek tan pakayarin” manlingkor tan gawaey linawa To. (Fil. 4:13) Ontan met, sarag toy onkerew na tulong ed Dios diad pikakasi pian nagawaan toy duga.​—Sal. 25:4, 5.

19. Antoy ipapaseguro na panuro nen Jehova na “pitora a pastol, tan walora a manunaan a lalaki”?

¹⁹ Bendisyonan nen Jehova so pansasagpot na saray elder ya ipasal so arum. Bebendisyonan to met iray brother ya pipilaleken day nawalaan na pribilehyo ed kongregasyon. Ibabaga na Biblia ya si Jehova et manuro na “pitora a pastol, tan walora a manunaan a lalaki.” (Miq. 5:5) Ipapaseguro na saya a mangiter si Jehova na magenap a lalakin mangasikasod saray kongregasyon. Talagan baleg a bendisyon so dakel ya mapaabeban brother ya nipapasal tan mamipilalek ed saray pribilehyo parad kirayewan nen Jehova!

Antoy Ebat Mo?

• Panon a tinulongan nen Jesus iray disipulo to pian nayarian da iray ambelat a responsabilidad?

• Panon a naalig na saray elder si Jesus diad pangipapasal dad saray brother ed kongregasyon?

• Panon a nasuportaan na mismon pamilya na brother so panlingkor tod kongregasyon?

• Antoy nepeg a gawaen na brother no labay toy nawalaan na pribilehyo?

[Tepetepet Parad Panagaral]

[Saray litrato ed pahina 31]

Panon mon nipasal so iyaaralan mo legan ton onaaligwas ed espiritual?

[Litrato ed pahina 32]

Panon a nipanengneng na saray brother a pipilaleken day nawalaay pribilehyo?