Manbilay Unong ed Espiritu Pian Nagamoray Bilay tan kareenan

“[Manbilay] tayo unong ed espiritu, ya aliwan unong ed laman.”​—ROMA 8:4.

1, 2. (a) Antoy resulta no say drayber et ag-akapokus ed panmamaneho to? (b) Antoy resulta no ag-itayo akapokus ed panagdayew tayod si Jehova?

“DAKDAKEL so drayber ya ag-akapokus ed pandadrayb da tan kada taon et onloloor iyan situasyon.” Ontan so imbaga na Secretary of Transportation na United States. Say sakey a rason et lapud manguusar na cellphone iray drayber legan dan manmamaneho. Diad sakey a survey, masulok a 30% ed saray ininterbyu so angibagan adumbo ira odino ngalngali ira adaplis na luluganan ya say drayber to et manti-text odino walay katongtong tod cellphone. Parad arum ya totoo et singa praktikal so pangusar na cellphone legan dan manmamaneho ta makatipid iray oras, balet ta mapeligro so resulta to.

² Say drayber ya ag-akapokus ed dalan et agto naimanoy peligro. Nagawa met itan ed espiritualidad tayo. No ag-itayo akapokus ed panagdayew tayod si Jehova, onkapuy so pananisia tayo. (1 Tim. 1:18, 19) Impasakbay nen  Pablo iyan peligro sanen sinulatan to ray agagi to diad Roma: “Say pannonot nipaakar ed laman et mangitonton ed ipapatey, balet say pannonot nipaakar ed espiritu et mangitonton ed bilay tan kareenan.” (Roma 8:6) Antoy labay ya ibaga nen Pablo? Panon tayon napaliisan so “pannonot nipaakar ed laman” tan panggunaetan so “pannonot nipaakar ed espiritu”?

‘Ag-ira Naukom Bilang Nankasalanan’

3, 4. (a) Anton pipupuligesgesan nen Pablo so insulat to? (b) Akin et interesado tayo ed situasyon nen Pablo?

³ Diad sulat nen Pablo ed saray taga Roma, abitla to so nipaakar ed mismon pipupuligesgesan to​—say pansumlangan na laman tan nonot to. (Basaen so Roma 7:21-23.) Diad sayan teksto, agmanbabaraan si Pablo. Agto met papapawayen a pakaskasi lay situasyon to, a singa imposible lan nagawaan toy duga. Tandaan, si Pablo et maespiritual tan alanaan ya Kristiano, ya pinili pian magmaliw ya “apostol ed saray nasyon.” (Roma 1:1; 11:13) Anto sirin so rason no akin et insulat nen Pablo iyan pipupuligesgesan to?

⁴ Ipapabitar nen Pablo ya agto nagawaan so linawa na Dios diad paraan ya talagan labay to. Akin? “Ta amin et nankasalanan tan agmakadampot ed gloria na Dios,” so kuan to. (Roma 3:23) Bilang ilalak nen Adan, si Pablo et agperpekto tan walaan met na makapuy iran pilalek. Tan natatalosan tayoy liknaan to ta amin tayo et agperpekto tan mipupuligesgesan ed saray makapuy ya pilalek diad inagew-agew. Ontan met, dakel so mangibalang ed imano tayo tan mangisuawi ed sikatayo diad ‘makisir a dalan ya ompugtad bilay.’ (Mat. 7:14) Balet, singa si Pablo, sarag tayo met so manalo ed pipupuligesgesan tayo.

5. Panon ya atulongan tan nainawaan si Pablo?

⁵ Oniay insulat nen Pablo: “Siopa so mangisalba ed siak . . . ? Salamat ed Dios diad panamegley nen Jesu-Kristo a Katawan tayo!” (Roma 7:24, 25) Insan, tinukoy nen Pablo iramay “akikasakey ed si Kristo Jesus,” saray alanaan a Kristiano. (Basaen so Roma 8:1, 2.) Diad panamegley na masanton espiritu, tinagibi ira nen Jehova bilang ananak to, a tinawag to ran “tomatawir a kaiba nen Kristo.” (Roma 8:14-17) Diad tulong na espiritu na Dios tan panamegley na pananisia rad dondon bagat nen Kristo, analo irad samay pipupuligesgesan ya sinalambit nen Pablo, kanian ‘ag-ira naukom bilang nankasalanan.’ Nibulos la rad “ganggan na kasalanan tan ipapatey.”

6. Akin et nepeg tayon talosan iray imbaga nen Pablo?

⁶ Anggaman sayan sulat nen Pablo et parad saray alanaan a Kristiano, say imbaga to nipaakar ed masanton espiritu na Dios tan dondon bagat nen Kristo et makagunggona ed amin a lingkor nen Jehova, antokaman so ilalo ra. Say simbawan inter nen Pablo et impuyan na Dios, kanian importantin natalosan tan unoren iya na amin a lingkor na Dios.

No Panon ya ‘Inukom na Dios so Kasalanan Diad Laman’

7, 8. (a) Akin et nibagan ‘makapuy so Ganggan’? (b) Antoy ginawa na Dios panamegley na espiritu to tan na dondon?

⁷ Diad kapitulo 7 na Roma, impaliwawa nen Pablo ya saray agperpekton totoo et walad pakayari na kasalanan. Diad kapitulo 8, tinukoy to so pakayari na masanton espiritu. Impaliwawa to no panon ya natulongan na espiritu na Dios iray Kristiano pian nalabanan day pakayari na kasalanan, diad ontan et nagawaan da so linawa nen Jehova tan nagamoray panangabobon to. Indanet nen Pablo ya inusar na Dios so espiritu to tan say dondon bagat na Anak to pian gawaen so bengatlan ag-agawaan na Mosaikon Ganggan.

⁸ Imposiblin natulok na totoo so amin a kabiangan na Mosaikon Ganggan, kanian aliling to et inukom na Ganggan iray managkasalanan. Sakey ni, saray manlilingkor ya atagey a saserdote diad Israel et agperpekto tan ag-ira makapangiyapay na magenap a bagat parad kasalanan. Kanian imbaga nen Pablo ya ‘makapuy so Ganggan.’ Balet, “imbaki na Dios so  mismon Anak to a kaulibay na makasalanan a totoo” tan inyapay to bilang bagat “pian ukomen so kasalanan diad laman.” Lapud bagat nen Jesus, nibulos iray totoo ed kasalanan. Kanian agawaan na bagat nen Jesus imay ‘agnayarian na Ganggan.’ Bilang resulta, saray alanaan a Kristiano et niyabawag lan matunong lapud pananisia rad dondon bagat nen Jesus. Pinaseseg ira nen Pablo a ‘manbilay unong ed espiritu, aliwan unong ed laman.’ (Basaen so Roma 8:3, 4.) On, kaukolan day mansiansian matoor anggad panganggay bilay dad dalin pian naawat da so “korona na bilay.”​—Apo. 2:10.

9. Antoy labay ya ibaga na salitan “ganggan” ya inusar ed Roma 8:2?

⁹ Abitla met nen Pablo so nipaakar ed “ganggan na samay espiritu” tan “ganggan na kasalanan tan ipapatey.” (Roma 8:2) Anto irayan ganggan? Diad sayan teksto, say salitan “ganggan” et ag-ontutukoy ed espisipikon totontonen, a singa saray kabiangan na Mosaikon Ganggan. Nipaakar ed sayan bersikulo, imbaga na sakey a reperensya a samay Griegon salita ya inusar parad ganggan et ontutukoy ed saray maong odino mauges ya gagawaen na totoo, ya aliling to et singa ganggan a mangokontrol ed sikara. Ontutukoy met iya ed saray sarili dan prinsipyo ed bilay.

10. Akin et nibagan amin tayo et walad kontrol na ganggan na kasalanan tan ipapatey?

¹⁰ Insulat nen apostol Pablo: “Linmoob so kasalanan ed mundo lapud sakey a too tan say ipapatey lapud kasalanan, tan ompapatey so amin a totoo lapud nankasalanan iran amin.” (Roma 5:12) Lapud ilalak itayo nen Adan, amin tayo et walad kontrol na ganggan na kasalanan tan ipapatey. Naynay itayon sasagyaten na makasalanan a laman tayo a gawaen iray bengatlan ag-aabobonan na Dios, tan saraya et manresultad ipapatey. Diad sulat nen Pablo ed saray taga Galacia, tinukoy to irayan bengatla a “gawa na laman.” Insan to imbagan: “Saramay manggagawa ed saraya et agda natawir so panarian na Dios.” (Gal. 5:19-21) Saray totoon ontan so kagagawa ra et manbibilay “unong ed laman.” (Roma 8:4) Say tutumboken da et say ididikta na makasalanan a pilalek da. Kasin ontutukoy labat iya ed saramay manggagaway seryoson kasalanan a singa say pilalawanan, idolatriya, tan espiritismo? Andi, ta kalaktip met ed saray gawa na laman iray ipapasen na arum ya angkekelag a kakapuyan, singa say imon, sanok, balingaan, tan ib-ibeg. No ontan sirin, wala tay makapangibaga ya sikatoy sigpot lan agmanbibilay unong ed laman?

11, 12. Antoy ginawa nen Jehova pian nibulos itayod ganggan na kasalanan tan ipapatey, tan antoy nepeg tayon gawaen pian nagamoray panangabobon na Dios?

 ¹¹ Maliket itayo ta nanggaway paraan si Jehova pian nibulos itayod ganggan na kasalanan tan ipapatey! Imbaga nen Jesus: “Ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” No awaten tayoy panangaro na Dios tan ipanengneng so pananisia ed dondon bagat nen Jesu-Kristo, nibulos itayod panangukom ya resulta na atawir tayon kasalanan. (Juan 3:16-18) Mipara sirin so liknaan tayod si Pablo sanen imbaga ton: “Salamat ed Dios diad panamegley nen Jesu-Kristo a Katawan tayo!”

¹² Aliling to ’tan et manpapatambal itayo lapud graben sakit. No talagan labay tayoy onabig, nepeg tayon unoren so amin ya ibaga na doktor. Tua, say pananisia tayod bagat et mangibulos ed sikatayod ganggan na kasalanan tan ipapatey, balet siansia nin ag-itayo ayadyari tan makasalanan itayo ni. Wala ni kaukolan tayon gawaen pian magmaliw itayon maapit ed Dios tan gamoray bendisyon tan panangabobon to. Likud ed panumpal ed “matunong a kakaukolanen na Ganggan,” imbaga nen Pablo ya nepeg met a manbilay itayo unong ed espiritu.

Pambilay Unong ed Espiritu​—Panon?

13. Antoy labay ya ibaga na pambilay unong ed espiritu?

¹³ Pian makapambilay itayo unong ed espiritu, nepeg a mantultuloy itayon onaligwas ed espiritual. (1 Tim. 4:15) Aglabay ya ibaga na saya ya agtayo lan balot nalingo. Imbes, kabaliksan na saya a gawaen tayoy anggaay nayarian tayon tumboken so panangigiya na espiritu diad kada agew. No ‘manakar itayo unong ed espiritu,’ nagamoran tayoy panangabobon na Dios.​—Gal. 5:16.

14. Panon so panagnonot tan kakikiwas na saray manbibilay “unong ed laman”?

¹⁴ Diad sulat nen Pablo ed saray taga Roma, tinukoy toy duaran klase na totoo ya mansumlangan so panagnonot da. (Basaen so Roma 8:5.) Diad sayan teksto, say salitan “laman” et aglabat ontutukoy ed kabalgan na too. No maminsan diad Biblia, say “laman” et ontutukoy ed agtayo inkaperpekto. Satan so rason no akin a walay pansumlangan na laman tan nonot. Nilabanan nen Pablo so “laman” to, odino say agto inkaperpekto. Balet, dakel a totoo natan so agda anggan sasalien a labanan iray mauges a pilalek da, kanian manbibilay ira  “unong ed laman.” Imbes ya amtaen da no antoy linawa na Dios tan awatey tulong to, “iyaapasakey da iray nonot da ed saray nipaakar ed laman.” Anggapo lay arum ya iisipen da noag say pamenek ed pilalek na laman da tan no antoy pakainawaan da. Duma balet iray manbibilay “unong ed espiritu” ta say pangiyaapasakeyan day nonot da et “saray nipaakar ed espiritu”​—saray espiritual a probisyon tan saray kimey tayo bilang Kristiano.

15, 16. (a) Antoy epekto na pangiyapasakey tayoy nonot tayo ed sakey a bengatla? (b) Antoray pipilaleken na maslak a totoo natan?

¹⁵ Basaen so Roma 8:6. Antis tayon gawaen so sakey a bengatla, maong man o mauges, iyaapasakey tayo ni nonot tayo ed satan. No say sakey et lanang ton iyaapasakey so nonot to ed saray bengatlan nipaakar ed laman, say resulta et labay to lan gawaen iray kagagawan unong ed laman. Satan la so iyuulo tan pipilaleken to.

¹⁶ Antoray pipilaleken na maslak a totoo natan? Oniay insulat nen apostol Juan: “Say amin a walad mundo​—say pilalek na laman tan say pilalek na mata tan say panangipangta na sakey ed saray kaykayarian to ed bilay​— et agmanlalapud Ama, noagta manlalapud mundo.” (1 Juan 2:16) Say tutukoyen dia nen Juan et say imoralidad, pagmaliw a sikat, tan say pampilalek ed kaykayarian. Ontan so lanang ya nanenengneng ed saray libro, magasin, dyaryo, pelikula, palabas ed TV, tan diad Internet. Labalabay iratan na saray totoo kanian saratan so pangiyaapasakeyan day nonot da. Imbaga nen Pablo a “say pannonot nipaakar ed laman et mangitonton ed ipapatey.” Akin? “Lapud say pannonot nipaakar ed laman et mangitonton ed pibubusolan ed Dios, ta say laman et agpapauleyan ed ganggan na Dios, tan ag-itan nayarian na laman. Kanian saramay mitutunosan ed laman et agda napaliket so Dios.”​—Roma 8:7, 8.

17, 18. Panon tayon nipanengneng a say nononoten tayo et nipaakar ed espiritu, tan antoy resulta no gawaen tayo itan?

¹⁷ Balet, “say pannonot nipaakar ed espiritu et mangitonton ed bilay tan kareenan”​—bilay ya andi-anggaan diad arapen tan deen na nonot tan pikakareenan ed Dios natan. Panon tayon nipanengneng a ‘say nononoten tayo et nipaakar ed espiritu’? Panamegley na pangiyapasakey tayod nonot tayo tan pampilalek ed saray bengatlan nipaakar ed espiritu. Diad panggawa tayod satan, say nonot tayo et ‘papauleyan ed ganggan na Dios’ tan “mitutunosan” ed kanonotan to. Sano nipapaarap itayod tukso, kaukolan ya amta tayo la no antoy nepeg tayon gawaen. Napakiwas itayon manggawa na dugan desisyon​—unong ed espiritu.

¹⁸ Kanian, importantin iyapasakey tayoy nonot tayo ed saray bengatlan nipaakar ed espiritu. Nagawaan tayo iya diad ‘pangiparaan tayod nonot tayo parad impasyan kimey,’ salanti, say pangiyuna tayod saray espiritual ya aktibidad a singa say regular a panagpikasi, panagbasa tan panagaral na Biblia, pipiaral, tan pibibiang ed Kristianon ministeryo. (1 Ped. 1:13) Imbes ya abuloyan tayon kontrolen itayo na saray pilalek na laman, iyapasakey tayoy nonot tayod saray bengatlan nipaakar ed espiritu. No gawaen tayo iya, makapantultuloy itayon manbilay unong ed espiritu. Tan manresulta iyad dakerakel a bendisyon, ta say pannonot nipaakar ed espiritu et mangitonton ed bilay tan kareenan.​—Gal. 6:7, 8.

Kasin Nipaliwawam?

• Antoy agnayarian a gawaen na Ganggan, balet panon itan ya ginawa na Dios?

• Anto so “ganggan na kasalanan tan ipapatey,” tan panon itayon nibulos ed satan?

• Antoy nepeg tayon gawaen pian nitultuloy tayoy “pannonot nipaakar ed espiritu”?

[Tepetepet Parad Panagaral]

[Saray litrato ed pahina 12, 13]

Manbibilay ka ta unong ed laman odino unong ed espiritu?