Tulongan ya Onaligwas ed Espiritual Iray Lalaki

“Manlapud natan et mansigay ka la na totoon mabilay.”​—LUC. 5:10.

1, 2. (a) Antoy ginawa na dakel a lalaki sanen nadngel day impanpulong nen Jesus? (b) Antoy aralen tayod sayan artikulo?

AMINSAN diad pampupulong nen Jesus tan saray disipulo to diad Galilea, nambaloto ira tan linmad nisulinek a pasen. Balet ta tinumbok ira na dakel a totoo, a “ngalngalin limanlibo a lalaki, nilikud ed bibii tan ugugaw.” (Mat. 14:21) Diad sananey nin inkagawa, si Jesus et inasinggeran na dakel a totoo ta labay day onabig ed sakit da tan ondengel ed sikato. Say bilang na saraya et “apat a libon lalaki, nilikud ed bibii tan ugugaw.” (Mat. 15:38) On, dakel so lalaki diad limog na sarayan totoon malabay ya ondengel ed si Jesus tan interesadod saray bangat to. Diad tua, iilaloan ton mas dakel ni so mangawat ed katuaan. Nibaga tayo itan ta oniay imbaga nen Jesus ed disipulo ton si Simon sanen mamilagro iran akarel na dakdakel a sira: “Manlapud natan et mansigay ka la na totoon mabilay.” (Luc. 5:10) Inyaliling nen Jesus so panagpulong ed panagsigay. Diad pangipelag na saray disipulo ed iket da, a singa panangibaga, nailaloan dan dakel so ‘nasigay’ da, tan kaibad satan so dakel a lalaki.

² Diad panaon tayo, wala ray lalakin interesado ed mensahen ipupulong tayo tan papaiyaralan iray Biblia. (Mat. 5:3) Balet ta dakel ed sikara et ag-onaaligwas ed espiritual. Panon tayo ran natulongan? Anggaman anggapo met so nikaduman paraan na impanpulong nen Jesus ed saray lalaki, tinulongan to rad saray kapagaan da. Diad panaral tayod alimbawa to, naamtaan tayo no panon tayon natulongan iray lalaki pian natalonaan day taloran kaslakan a pampapagaan da: (1) pananap na pambilay, (2) takot ed ibagay arum, tan (3) pakaliknan aliwan magenap so abilidad da.

Pananap na Pambilay

3, 4. (a) Antoy mas importante ed dakel a lalaki natan? (b) Akin et wala ray lalakin mas iyuuna ray pananap na pambilay nen say espiritual iran bengatla?

³ “Managbangat,” so kuan na sakey ya eskriba ed si Jesus, “ontumbok ak ed sika anggan iner so laen mo.” Balet, sanen imbagad sikato nen Jesus ya “say Anak na too et anggapoy anggan napangidanganan toy ulo to,” angumay isip to ’yan eskriba. Anggapoy nabasad Biblia ya sikatoy nagmaliw a patumbok nen Kristo. Ompan sayan laki et mapaga ed no iner so panayaman to tan no antoy pambilay to.​—Mat. 8:19, 20.

⁴ Diad sayan mundo, iisipen na dakel a lalaki ya mas importante so kuarta tan trabaho nen say espiritual iran bengatla. Iyuuna ray pangalay atagey ya aral tan pakalmoy trabahon baleg so sueldo. Parad sikara, mas baleg so napinabangan da ed pananap na kuarta nen say gunggonan naala da ed panaral na Biblia tan pikaaro ed Dios. Nayarin labalabay da met so nanaaralan dad Biblia, balet ta naaamper so interes da lapud “kapagaan ed sayan mundo tan say mapalikdon pakayari na kaykayamanan.” (Mar. 4:18, 19) Imanoen tayo pa no panon ya tinulongan nen Jesus iray disipulo to pian mangumay prayuridad da.

5, 6. Antoy tinmulong ed si Andres, Pedro, Santiago, tan Juan pian namoria ra no antoy nepeg a prayuridad da?

⁵ Mankasosyo si Andres tan say agi ton si Simon Pedro diad negosyo ran panagsigay, tan kaiba da met si Juan, say agi ton si Santiago, tan say ama ran si Zebedeo. Maong so anap na  negosyo ra ta sarag da ni mangupay lalaki. (Mar. 1:16-20) Sanen akabat di Andres tan Juan si Jesus panamegley nen Juan ya Managbautismo, akombinse ira ya si Jesus so Mesias. Imbalita iya nen Andres ed si Simon Pedro, tan nayarin imbalita met iya nen Juan ed si Santiago. (Juan 1:29, 35-41) Diad tinmumbok iran bulan, akiulop iran apat ed si Jesus diad impanpulong tod Galilea, Judea, tan Samaria. Insan lanlamang ira pinmawil ed panagsigay da. Tua, walay interes dad espiritual iran bengatla, balet ta aliwan say panagpulong so prayuridad da.

⁶ Diad saginonor et oniay imbitasyon nen Jesus ed si Pedro tan Andres: “Tumbok kayo ed siak, tan gawaen ta kayon sumisigay na totoo.” Antoy reaksion da? “Tampol a tinaynan da iray iket tan tinmumbok ira ed sikato.” Ontan met so ginawa di Santiago tan Juan. “Tampol a tinaynan da so baloto tan say ama ra, tan tinmumbok ira ed sikato.” (Mat. 4:18-22) Antoy tinmulong ed sarayan lalaki pian mandesisyon iran manfull-time ed ministeryo? Biglaan labat kasi itan a desisyon da? Andi! Akaiba day Jesus na pigaran bulan, nadngel da ray bangat to, anengneng dan nanmilagro, naimatonan day seseg tod inkatunong, tan atasian day positibon reaksion na totoo ed impanpulong to. Bilang resulta, binmiskeg so pananisia tan talek dad si Jehova!

7. Panon tayon natulongan iray iyaaralan tayon manmatalek ed si Jehova?

⁷ Panon tayon naalig si Jesus sano tutulongan tayo ray iyaaralay Biblia a manmatalek ed si Jehova? (Uli. 3:5, 6) Baleg so epekto na paraan na panagbangat tayo. Sano iyaaralan tayo ra, idanet tayo so sipan na Dios ya bendisyonan to itayo na daakan no iyuna tayo so Panarian. (Basaen so Malaquias 3:10; Mateo 6:33.) Tua, sarag tayon usaren so Biblia pian ipanengneng ed sikara ya agbalot paulyan nen Jehova iray lingkor to. Balet, tandaan ya baleg so nagawaan na mismon ehemplo tayo. No istoryaen tayod sikara iray mismon eksperiensya tayo no panon itayon tinulongan nen Jehova, natulongan met iran manmatalek ed sikato. Isalaysay tayo met ed sikara iray makapaseseg ya eksperiensyan abasa tayod saray literatura tayo. *

8. (a) Akin et importante ya ‘natawayan tan nanengneng’ na iyaaralan tayo so kamaongan nen Jehova? (b) Panon tayon natulongan so iyaaralan tayo ya nalikna ton mismo so kamaongan nen Jehova?

⁸ Pian ombiskeg so pananisiay iyaaralan tayo, agmagenap ya nabasa tan narengel to labat iray eksperiensya na arum. Kaukolan ya naeksperiensya ton mismo so kamaongan nen Jehova. Oniay inkanta na salmista: ‘O tawayan yo tan nengneng yo a si Jehova et maong; mapalar so too a manmatalek ed sikato.’ (Sal. 34:8) Panon tayon natulongan so iyaaralan tayon ‘tawayan tan nengnengen’ a si Jehova et maong? Iyan tayo lan say iyaaralan tayo et walaay problemad pinansyal tan labay to met lan itunday bisyo to, a singa say panagsigarilyo, panagsugal, tan alabas a kakainum na alak. (Uli. 23:20, 21; 2 Cor. 7:1; 1 Tim. 6:10) Maabig no ibangat tayon manpikasi parad tulong na Dios diad pangitunda toy bisyo to. Sano nanengneng ton wala lay inaligwasan to, napaneknekan ton si Jehova et maong. Insan tayo  pasesegen ya iyuna to ray espiritual a bengatla diad pangiyeskedyul toy panaon parad sinimban panagaral na Biblia, pamparaan parad saray aral, tan anggan say mismon pipiaral. Sano nanengneng na iyaaralan tayo a bebendisyonan nen Jehova iray sagpot to, mas lalon ombiskeg so pananisia to!

Takot ed Ibagay Arum

9, 10. (a) Akin et inyamot di Nicodemo tan Jose a taga Arimatea a patumbok ira nen Jesus? (b) Akin et wala ray lalaki natan ya natatakot iran magmaliw a patumbok nen Kristo?

⁹ Wala ray lalaki nensaman a mapagad ibaga na arum a too, kanian natatakot iran magmaliw a patumbok nen Kristo. Singa bilang, inyamot di Nicodemo tan Jose a taga Arimatea a patumbok ira nen Jesus ta natatakot irad ibaga odino gawaen na arum a Judio no naamtaan da itan. (Juan 3:1, 2; 19:38) Natural met labat itan a liknaan da. Kabkabusol na saray lider na relihyon si Jesus kanian siopaman a manisia ed sikato et ekalen dad sinagoga.​—Juan 9:22.

¹⁰ Diad arum a lugar natan, no say sakey a laki et interesado ed Dios, ed Biblia, odino ed relihyon, nayarin sikatoy balawen na saray katrabaho, kakaaro, tan kakanayon to. Diad arum ni ingen ya lugar, delikado no naamtaan na arum a say sakey et salatan toy relihyon to. Mas grabe so balaw ya narengel na laki no walay posisyon tod militar, politika, odino diad mismon komunidad da. Singa bilang, oniay inamin na lakin tagad Germany: “Amtak ya sikayo ran Tasi et tua so ipupulong yo. Balet no man-Tasi ak natan, nabuas amta la na amin. Anto kasi ibaga na saray katrabahok, iray kakaabay mi, tan arum nin makankabat ed siak tan say pamilyak? Singa agko ’tan sarag.”

11. Panon ya tinulongan nen Jesus iray disipulo to ya ag-ontakot ed too?

¹¹ Anggano makpel so linawa na saray apostol nen Jesus, nilabanan da met so takot dad too. (Mar. 14:50, 66-72) Panon iran tinulongan nen Jesus pian onaligwas irad espiritual anggano susumpaen ira na arum? Imparaan nen Jesus iray disipulo to parad isusumpa ya sagmaken da. “Maliket kayo sano busolen kayo na totoo,” so kuan to, “tan sano ipulisay da kayo tan balbalawen da kayo tan pagpaugesen da so ngaran yo nisengeg ed Anak na too.” (Luc. 6:22) Pinasakbayan la nen Jesus iray papatumbok to a sagmaken dan sagmaken so isusumpa. Nasagmak da iya “nisengeg ed Anak na too.” Balet ta impaseguro nen Jesus ya ag-ira paulyan na Dios no kerewen day tulong tan panamabiskeg To. (Luc. 12:4-12) Ontan met, pinaseseg nen Jesus iray balobalo nin patumbok to ya miulop ed saray disipulo to tan mikaaro ed sikara.​—Mar. 10:29, 30.

12. Diad antoran paraan ya natulongan tayo ray iyaaralan tayon ag-ontakot ed too?

¹² Kaukolan tayo met a tulongan so iyaaralan tayo ya ag-ontakot ed too. Mas mainomay a natalonaan so sakey a subok no iilaloan la itan. (Juan 15:19) Singa bilang, maabig no tulongan tayoy iyaaralan tayon mangiparaan na simplin ebat ya base ed Biblia no bilang ta kuestionen na saray katrabaho to tan arum ni so balon pananisia  to. Anggaman kaaro to itayo la, ikabat tayo met ed arum diad kongregasyon, lalo lad saray agagin kapareho toy situasyon tan hilig. Sankaimportantian ed amin, ibangat tayon manpikasi ya regular tan impapuso. Ontulong iya pian magmaliw ya maapit ed Dios tan ipasen toy Jehova bilang Salimbeng tan Batondampay to.​—Basaen so Salmo 94:21-23; Santiago 4:8.

Pakaliknan Aliwan Magenap so Abilidad Da

13. Akin et wala ray lalakin naaamper so iyaaligwas dad espiritual?

¹³ Wala ray lalakin iisipen da ya agda sarag a gawaen so gagawaen na arum a lalakid kongregasyon. Ompan aliwa ran maong a manbasa, odino aliwa ran maong a mansalita, odino mabaing ira. Say arum et agda labay ya itongtong so pananisia ra diad arap na dakel a totoo. Parad sikara et aliwan mainomay so panaral, pankomento, odino pampulong. Inamin na sakey ya agin laki ya sikatoy nairapan ed panagpulong sanen tobonbalo ni. Imbaga ton sikatoy onasingger met ed puerta, kunwari et ontoktok, insan la balet kalkalnan onalis, ya isipen ton anggapo komoy akarengel odino akanengneng ed sikato. Inkuan ton: “Nononoten ko ni labat so pankabkaabungan et aliwdiwa lay liknaan ko.”

14. Akin et ag-apaabig na saray disipulo nen Jesus imay ugaw ya aselepay demonyo?

¹⁴ Nonot yo pay posiblin alikna na saray disipulo nen Jesus sanen agda napaabig so ugaw ya aselepay demonyo. Samay ama na ugaw et nila toy Jesus tan imbaga ton: “[Say ana’ko et] dumurulot tan mair-irap so kipapasen to, ta mabetbet a natutumba ed apoy tan ed danum, tan sikatoy inyakar ko ed saray disipulom, balet agda napaabig.” Pinapaway nen Jesus imay demonyo kanian inmabig imay ugaw. Kayari na satan, sikatoy inasinggeran na saray disipulo tan tinepetan da: “Akin et agmi napapaway?” Oniay ebat nen Jesus: “Lapud melmelag so pananisia yo. Tua kuan ko ed sikayo, No walay pananisia yo a singa kamelag na bukel na mustasa, ibaga yo ed sayan palandey, ‘Onalis ka diman,’ et onalis itan, tan anggapo so imposible ed sikayo.” (Mat. 17:14-20) Kaukolan so pananisia ed si Jehova pian nasarag tayo ray pinmalandey a subok. Panon to balet no say sakey a too et manmatalek ed dilin abilidad to? Agto natalonaan iray subok, kanian bilang resulta et lalon liknaen to ya aliwan magenap so abilidad ton manlingkor ed si Jehova.

15, 16. Panon tayon natulongan so iyaaralan tayo no liknaen ton aliwan magenap so abilidad to?

¹⁵ No nalilikna na iyaaralan tayon aliwan magenap so abilidad to, pasesegen tayon iyapasakey toy nonot to ed si Jehova, imbes ya diad sarili to. Insulat nen Pedro: “Manpaabeba kayo . . . ed silong na mabiskeg a lima na Dios, ta pian iyatagey to kayo ed manepeg a panaon; tan ipaawit yo met ed sikato so amin a kapagaan yo.” (1 Ped. 5:6, 7) Pian nagawaan to iya, tulongan tayon magmaliw ya maespiritual a too. No say sakey et maespiritual, pablien to ray espiritual a bengatla. Aroen to ray nanaaralan tod Salitay Dios tan ipatnag toy “bunga na espiritu” ed bilay to. (Gal. 5:22, 23) Importante met ed sikato so panagpikasi. (Fil. 4:6, 7) Tan sikatoy matalek ya say Dios so mangiter ed sikato na inkakpel tan biskeg pian natalonaan so antokaman a situasyon odino pian nagawaan toy antokaman ya kimey a niiter ed sikato.​—Basaen so 2 Timoteo 1:7, 8.

¹⁶ Wala met iray iyaaralan a kaukolan day praktikal a tulong pian napaaligwas day panagbasa, pitotongtong, odino panagpaliwawa ra. Say arum et liknaen dan ag-ira makanepegan a  manlingkor ed Dios lapud makapuy iran ginawa ra antis dan akabat si Jehova. Antokaman so kipapasen da, natulongan tayo ira no maaro tan maanos tayod sikara. Oniay inkuan nen Jesus: “Saray totoon maksil so laman da et agmankaukolan na managtambal, noagta saraman labat so mansasakit.”​—Mat. 9:12.

Tulongan so Dakel Nin Lalaki

17, 18. (a) Panon a mas dakel nin lalaki so napulongan tayo? (b) Antoy aralen tayo ed ontumbok ya artikulo?

¹⁷ Labay tayon mas dakel ni ran lalaki so mangawat ed mensahe na Biblia. (2 Tim. 3:16, 17) Kanian, panon a mas dakel nin lalaki so napulongan tayo? Maabig no mas malaem a panaon so usaren tayon pampulong diad labi, diad ngarem na Sabado tan Simba, odino legan na saray holiday ta diad saratan a panaon et walad abung so maslak a lalaki. No posible, say anapen tayon katongtongen et say ulo na pamilya. Pulongan tayo met iray katrabaho tayon lalaki. Wala ray sister ed kongregasyon ya agmananisia iray kaasawaan da. Panggunaetan tayo met a tulongan irayan lalaki pian nawalaan iray interes ed katuaan.

¹⁸ Diad pampupulong tayod amin a klase na totoo, matalek itayon onkiwas iramay talagan manaanap ed katuaan. Maanos tayo sirin a tulongan so amin ya interesado. Balet, panon tayon natulongan iray bautismado lan lalaki ya mandampot tan onkualipika ed saray responsabilidad ed organisasyon na Dios? Pantongtongan tayo iya ed ontumbok ya artikulo.

[Paimano ed leksab]

Antoy Ebat Mo?

• Panon tayon natulongan iray lalaki ya iyuna iray espiritual a bengatla?

• Panon tayon natulongan iray iyaaralan ya agtakotay ibaga na arum?

• Panon tayon natulongan iramay say pakalikna ra et aliwan magenap so abilidad da?

[Tepetepet Parad Panagaral]

[Litrato ed pahina 25]

Manggagawa ka ’tay paraan pian napulongan iray lalaki?

[Litrato ed pahina 26]

Panon mon natulongan so iyaaralan mo pian akaparaan ed isusumpa?