“Walay Sakit Ko Natan, Balet Naandi ’ya Lanlamang!”

Unong ed salaysay nen Sara van der Monde

Mabetbet ya ibabaga na arum ed siak, “Sara, balibali lanti imis mo. Akin et lanang kan maliket a?” Ibabagak ed sikara ya walay marakep ya ilalok. Say labay kon ibaga et, “Walay sakit ko natan, balet naandi ’ya lanlamang!”

INYANAK ak ed Paris, France nen 1974. Walaray problema diad impangiyanak ed siak, tan nalmoan ya walay sakit kon cerebral palsy. Ngalngali agko nigalaw iray limak tan salik, tan mairap ya talosan so panagsalitak. Awalaan ak met na epilepsy tan magmainomay ak ya naimpeksion.

Nen duay taon ko, inmalis kamid Melbourne, Australia. Kayari duay taon, sikami nen Mommy so tinaynan nen Daddy. Diman ko unaan ya alikna ya maapit ak ed Dios. Si Mommy, ya sakey ed saray Tasi nen Jehova, et lanang to ak ya ipipilad saray aral tan ditan ko naaralan ya inaro tan aasikasoen ak na Dios. Saratan a naaralan ko, ontan met ed panangaro tan panamaseguro nen Mommy’k so akatulong pian naliknak so inkaligen anggano anguman so situasyon mi.

Imbangat ak met nen Mommy no panoy pampikasid si Jehova. Diad tua, mas mainomay koy manpikasi nen say mansalita. No manpipikasi ak, agko la panirapan ya ibalikas iray salita, singak “narerengel” iratan a malinlinew ed nonot ko. Tan anggano mairap ya talosan so panagsalitak, makaseguro ak ya natatalosan ya amin nen Jehova itan, balanglan ibabagak labat ed nonot ko odino ibabalikas kon agmalinew.​—Sal. 65:2.

Panalona ed Saray Problema

Nen limay taon ko, linmoor so sakit ko kanian kaukolan koy mangusar na caliper splint pian makaakar ak. Mantungging balet so panangakar ko! Nen 11 años ko, agak la makaakar. Ag-abayag, agak la makarukol tan makabangon no anggapoy electric hoist ya mangagwat ed siak pian makayurong ak ed de-motor ya wheelchair ko.

Aminen ko ya no maminsan et naeermenan ak. Balet iisipen ko may motto na pamilya mi: “Agpanaburidoay agmo nagawaan. Basta gawam iray sarag mon gawaen.” Akatulong yad siak pian nasarag koy onlugan ed kabayo, manbaloto, man-camping, tan manmaneho ya onliberliber ed sakey ya pasen! Nipapaway koy hilig kod art diad painting, panagdait, panaggaway quilt, panagburda, tan panaggaway ceramics.

Lapud dakel so liliknaen ko, kukuestionen na arum so abilidad kon manggaway makabat a desisyon diad panagdayew ed Dios. Nen 18 años ko, sinugsogan ak na sakey ya maestrak ya ontaynan ed abung pian “natakasan” ko kunoy  relihyon nen Mommy’k. Imbaga to ni ingen ya tulongan to ak ya mananap na napanayaman. Balet ta imbagak ed sikato ya agkon balot taynanan so pananisiak tan ombiig ak labat no sarag ko la.

Ag-abayag kayari na satan, abautismoan ak bilang Tasi nen Jehova. Kayari duay taon, inmalis ak ed sakey ya melag ya apartment. Maliket ak ta awalaan ak na suportan kaukolan ko tan inka-independente.

Ag-iilaloan ya Proposal

Diad inlabas na pigaran taon, wala ni ray arum ya inarap kon subok ed pananisiak. Aminsan ya agew, abigbigla ak sanen samay kaeskuelak​—ya kaparak a walay sakit​—et nanpropose na kasal ed siak. Nen unaan et manlikliket ak. Siempre singa arum ya bibii, labay ko met so nawalaay kaparehad bilay. Balet aliwan lapud ta pareho kami kipapasen et segurado lan magmaliw a maliket so panamaley mi. Sakey ni, dumay pananisia to. Nandumaan ya maong iray sisiaen, gagawaen, tan kalat mi. Kanian panon kamin makapambilay a saniba? Determinado ak met ya unorey malinew ya ganggan na Dios ya miasawa labat ed kapananisiaan. (1 Cor. 7:39) Kanian imbagak ed sikato ya agko awaten so proposal to.

Anggad natan, amtak ya dugay desisyon ko. Tan segurado ak ya magmaliw ak a maliket diad insipan na Dios ya balon mundo. (Sal. 145:16; 2 Ped. 3:13) Legan kon aalagaren itan, determinado ak ya mansiansian matoor ed si Jehova tan manliket anggaman ed kaplesan ya kipapasen ko.

Pirpirawaten ko ’may agew sano agak la mangusar na wheelchair tan makabatik ak la. Insan ko iyeyag ed satan, “Dati walay sakit ko, balet natan maong ak la​—tan agla ’ya mangangga!”