Agkomon Naandi so Liket Mo Lapud Sakit

IMADYIN mo pan kabangon mod kabuasan et labay mo lan nasumpal a tampol so agew. Akin? On, ta sanagew mo lamet ya itepel so sakit ed pisikal odino ed emosyon. Ompan naliliknam so singa samay alikna nen Job, sanen inkuan ton: “Mas labay ko ni ompatey nen say manirap.” (Job 7:15, The New English Bible) Panon to balet no ongragrabe so sakit diad ilalabas na taon?

Ontan so situasyon nen Mefiboset, ya anak nen Jonatan a kaaro nen Arin David. Sanen mantaon na limara, sikatoy ‘naplag, kanian alupoy.’ (2 Sam. 4:4, Maung a Balita) Anta alupoy la lanti, akaaru-arum ni sakit tod emosyon sanen apalsaan ya nantraidor ed ari ya sengegay impakaandi kaykayarian to. Anggaman ontan, agnaandi liket to tan lawas a sikatoy maabig ya alimbawa no panon ya arapen iray probleman singa say deperensyad laman, panagpauges, tan pakadismayaan.​—2 Sam. 9:6-10; 16:1-4; 19:24-30.

Sakey met ya ehemplo si apostol Pablo. Insulat to so nipaakar ed “sakey a sabit ed laman” a kaukolan ton labanan. (2 Cor. 12:7) Say sabit ya binitla to et nayarin sakit a manbayag, odino nayarin saray totoon mangukuestion ed inka-apostol to. Antokaman itan, linmoor so problema, tan kaukolan ton arapen so sakit ed pisikal tan ed emosyon.​—2 Cor. 12:9, 10.

Saray makapakapuy tan manbayag a sakit ed pisikal tan ed emosyon so mangaapekta met ed arum ed saray lingkor na Dios natan. Sanen 18 años nen Magdalena, nalmoan ya walay sakit ton systemic lupus erythematosus, a no iner et saray organ na sakey a too et singa aatakien lanlamang na immune system to. Inkuan to: “Natatakot ak. Diad ilalabas na agew, ompapalaloy kondisyon ko tan onloloor itan lapud agak natutunawan, lanang ya walay sengaw ko, tan walay sakit kod thyroid.” Saray aanosan balet nen Izabela et agnapatnagan. Inkuan to: “Ugaw ak ni labat et wala lay depression ko. Kanian siak so biglan natataranta, nanairapan ya onengas, tan manawet so eges ko. Talagan ikakapuy ko iya.”

Pangawat ed Limitasyon Mo

Talagan makapaermen no walay sakit mod pisikal tan ed emosyon. No nagawa itan, marakep no matuan usisaen so situasyon mo. Siempre, mairap mon awaten iray limitasyon mo. Oniay imbaga nen Magdalena: “Ongragrabe lan ongragrabe sakit ko. Nanairapan ak ya ombangon ed dukolan. Agko amtay isigi na sakit ko kanian nairapan ak a mangiyeskedyul na gawaen ko. Tan lalo ak ya naeermenan lapud say nagagawaan kon panaglingkor ed si Jehova et aliwa lan singa samay dati.”

Inkuan nen Zbigniew: “Diad ilalabas na taon, uupoten na rheumatoid arthritis so  biskeg ko, papakapuyen toy pukel ko. No linmarag a maong et agko anggan nagawaan so sankainomayan a kimey. Liknaen kon anggapoy kanak.”

Pigay taon lay apalabas, nalmoan ya si Barbara et walay brain tumor to ya ongragrabe. Inkuan to: “Wala ray biglan pananguman ed laman ko. Maletletey ak, lanang ya onsasakit so ulok, tan agko niyapasakey so nonot ko. Lapud inmarum iran limitasyon ko, kaukolan koy manggawa na pananguman unong ed kipapasen ko.”

Amin iraya et dedikadon lingkor nen Jehova. Say prayuridad da et say panggaway linawa to. Sigpot iran manmamatalek ed Dios tan nagugunggonaan irad pananulong to.​—Uli. 3:5, 6.

Panon ya Ontutulong si Jehova?

Agtayo nononoten a say sengegan na paniirap tayo et lapud agnaliliketan so Dios ed sikatayo. (Tag. 3:33) Isipen pa labat so adalan nen Job anggaman sikatoy “naskey tan matunong.” (Job 1:8) Agsusuboken na Dios so siopaman ed panamegley na mauges iran bengatla. (Sant. 1:13) Amin ya sakit, kaiba la ray graben sakit tan sakit ed emosyon, so tawir tayod inmunan atateng tayo, si Adan tan Eva.​—Roma 5:12.

Balet, agpaulyan nen Jehova tan Jesus iray matunong. (Sal. 34:15) Lalo la no say bilay tayo et walad sankairapan a situasyon, diman tayo naapresya a say Dios so ‘salimbeng tan kiagelan tayo.’ (Sal. 91:2) Kanian, no walay sakit mo ya singa agla natambal, anto ray makatulong ed sika pian napansiansiam so liket mo?

Pikakasi: Singa saray matoor a lingkor na Dios nensaman, sarag mo met ya ipaawit ed Ama tayon walad tawen iray pakabebelatan mo diad pikakasi. (Sal. 55:22) No oniay gawaen mo, naliknam so “deen na Dios a palumbasan toy amin a kanonotan.” Satan a deen so “manbantay ed saray puso tan nonot” mo. (Fil. 4:6, 7) Lapud panmamatalek ed Dios tan panamegley na pikakasi, nayayarian nen Magdalena so ongragraben sakit to. Inkuan to: “No ibabagak ed si Jehova iray naliliknak, naiinawaan  ak tan maliket ak lamet. Natatalosan ko la natan so labay ya ibaga na panmatalek ed Dios diad inagew-agew.”​—2 Cor. 1:3, 4.

Bilang ebat ed saray pikakasim, sarag kan ikdan nen Jehova na biskeg panamegley na masanton espiritu to, Salita to, tan na saray agagi. Tua, agmamilagron ekalen na Dios so sakit mo. Balet, makapanilalo kan ikdan to ka na karunongan tan biskeg a kaukolan mo pian nayarian moy paniirap mo. (Uli. 2:7) Sikay pabiskegen to, ikdan to ka na “pakayari a mas mabiskeg nen say pakayari na too.”​—2 Cor. 4:7.

Pamilya: Say maaro tan mapangasin pamilya so ontulong ed sikan nasungdoay sakit. Balet, nonot mo ya naiirapan met iray inad-arom. Anggano labay da kan tulongan et anggapoy nagawaan da. Siansia ni balet ya wadtan ira parad sika, anggan antoy nagawa. Makatulong so pampikasin saniba pian mansiansian kalmadoy pusom.​—Uli. 14:30.

Oniay imbaga nen Barbara nipaakar ed anak ton bii tan ed arum ya agagin bibii ed kongregasyon: “Iibaan da ak ed ministeryo. Napapabiskeg tan naliliketan ak ed seseg da.” Pisalsalamatan met nen Zbigniew so suporta na asawa to. “Amin lawarin trabaho ed abung et sikatoy manggagawa. Iibaan to ak met ya manpales tan mangawit na bag ko parad aral tan pampulong.”

Agagi: No kaiba tayo ray agagi, sikatayoy napaseseg tan naligliwa. Balet panon to no agka makapiaral lapud sakit mo? Imbaga nen Magdalena: “Seseguroen na agagi ya makapinabang ak ed aral panamegley na audio recording. Lanang da ak met ya tatawagan pian amtaen no anto ni nitulong da. Papawitan da ak met na makapaseseg iran sulat. Lapud amtak ya nononoten da ak tan mapaga rad siak, akatulong iya pian makapansungdo ak.”

Inkuan nen Izabela ya nadedepress: “Diad kongregasyon, dakel so ‘tatay’ tan ‘nanay’ ko ya ondedengel tan makakatalos ed siak. Say kongregasyon so pamilyak​—diak alikna so deen tan liket.”

 Saramay maniirap ed nanduruman subok et agda nepeg ya ‘isian so inkasikara.’ Imbes, panliketan day pilimog ed kongregasyon. (Uli. 18:1) Sikaray lapuan na panamaseseg ed arum. Nayarin diad unaan et agmo labay ya ipaamtay kaukolan mod saray agagi. Balet, apresyaen da no ibagam iratan. Pankanawnawa dad satan ya mas nipanengneng so “masimoon a panangaro.” (1 Ped. 1:22) Agta maabig no ibagam ya kaukolan moy napiluganan no aral, ya labay mo ran nakaiba diad ministeryo, odino labay mo ran napiistoryaan? Siempre, agtayo ra nepeg ya obligaen noagta pisalamatan ira lapud tulong da.

Magmaliw ya positibo: Sikan mismoy makatulong ed sarilim ya anggaman mansasakit ka et napansiansiam so liket mo. No maer-ermen tan nadedepress ka, makanonot ka laingey aliwa. Inkuan na Biblia: “Say espiritu na too itepel to so kabeblayan to; balet say nabtag ya espiritu siopa so makakpel?”​—Uli. 18:14.

Imbaga nen Magdalena: “Gagawaen koy anggaay nayarian kon ibalang so problemak. Iyi-enjoy ko iramay agew ya balibali liknaan ko. Napapaseseg ak no nababasak so istoryay bilay na saramay nansiansian matoor anggano grabe sakit da.” Apabiskeg si Izabela lapud amta ton sikatoy inaro tan papablien nen Jehova. Inkuan to: “Amtak ya aapresyaen nen Jehova so panlilingkor kod sikato, tan walay rason kon manbilay. Wala met so marakep ya ilalok ed arapen.”

Inkuan nen Zbigniew: “Lapud sakit ko, naaralan koy manpaabeba tan ontulok anggaman ed mairap iran kipapasen. Nagmaliw ak ya maong ya ontebek ontan met ed pamerdona a manlapud puso. Mas panliliketan koy panlingkor ed si Jehova tan agko iisipen ya pakaskasi situasyon ko. Diad tua, labay ko ya lalo ak nin onaligwas ed espiritual.”

Lawas nonoten ya amta nen Jehova so pansusungdom. Sikatoy mililikna ed paniirap mo tan iyaansakit to ka. Agto “lingwanan . . . so gawa yo tan say aro ya impanengneng yo parad ngaran to.” (Heb. 6:10) Onia so sipan tod amin ya ontatakot ed sikato: “Agta kan balot taynanan tan agta kan balot paulyanan.”​—Heb. 13:5.

Diad saramay panaon ya maer-ermen ka, nonot mo so marakdakep ya ilalon pambilay diad balon mundo. Asingsingger mo lan nanengneng iray bendisyon na Panarian na Dios diad dalin!

[Kahon/Saray litrato ed pahina 28, 29]

Manpupulong Ni Ran Siansia Anggano Grabe Sakit Da

“Agko la sarag so manakar ya bukor, kanian iibaan ak na asawak odino arum ya agagi diad ministeryo. Ipapatlep ko ray presentasyon tan teksto ed Biblia.”​—Jerzy, walay deperensya na mata to.

“Likud ed pantelephone witnessing, misusulatan ak ed saray interesado. Legan kon walad ospital, ikakargak ed abay ko so Biblia tan saray publikasyon tayo. Akatulong itan pian makapangigapo ak na tongtongan.”​—Magdalena, nalmoan ya walay systemic lupus erythematosus to.

“Labay koy manpulong ed kabkaabungan, balet no aliwliway liknaan ko, mantelephone witnessing ak.”​—Izabela, walay clinical depression to.

“Labalabay koy man-rv tan miulop ed study. No balibali liknaan ko, manpulong ak.”​—Barbara, walay brain tumor to.

“Alemew labat ya bag so aawiten ko. Basta sarag na pueg ko, makapanpulong ak na mabayag.”​—Zbigniew, walay rheumatoid arthritis to.

[Litrato ed pahina 30]

Amin tayo et nayarin manpaseseg