Akin et Paigiya Itayod Espiritu na Dios?

“Sika so Dios ko. Say espiritum et maomaong; komon ta iwanwan ak na satan.”​—SAL. 143:10, NW.

1. Ipaliwawa no panon ya nigiya na agnanengneng a puersa so sakey a too.

ASALIM ta lay angusar na kompas pian naamtaan mo so direksion ya laen mo? Say kompas et simplin gadyet ya walay dagum ton sensitibod puersa na magnet, tan satan a dagum et akaturon lanang ed norte. Say manpapagalaw ed satan et say agnanengneng ya puersan tatawagen a magnetism. Pigaran siglo lan uusaren na totoo so kompas a mangigiyad sikara diad pambabaroy da diad dalin odino diad dayat.

2, 3. (a) Anton makapanyarin puersa so inusar nen Jehova nensaman? (b) Panon tayon amta ya sarag itayon igiya na aktibon puersa na Dios natan?

² Wala ni mas importantin agnanengneng a puersa ya nepeg a mangigiyad sikatayo. Anto itan? Satan imay puersan adeskribe diad unona iran bersikulo na Biblia. Oniay imbaga na Genesis nipaakar ed ginawa nen Jehova nensaman: “Sanen gapo say Dios pinalsa to so saray tawen tan say dalin.” Amta tayon say Dios et angusar na makapanyarin puersa diad impamalsa to, ta oniay intuloy ya imbaga na Biblia: “Say espiritu na Dios ginmalaw.” (Gen. 1:1, 2) Anton makapanyarin puersa so inusar na Dios diad impamalsa to? Say masanton espiritu to. Niwala itayo lapud inusar nen Jehova so espiritu to pian palsaen so amin a bengatla.​—Job 33:4; Sal. 104:30.

³ Amta tayon inusar nen Jehova so aktibon puersa to pian palsaen itayo, balet kasin walay epekto na sayan puersa diad bilay tayo natan? Amta na Anak na Dios ya wala, ta oniay imbaga tod saray disipulo to: “Say espiritu . . . iwanwan to kayo diad amin a katuaan.” (Juan 16:13) Antoy tutukoyen nen Jesus ya espiritu, tan akin et nepeg a paigiya tayod satan?

No Anto so Masanton Espiritu

4, 5. (a) Anton aliwan ideya so iisipen na saray totoon manisia ed Trinidad? (b) Panon mon nipaliwawa no anton talaga so masanton espiritu?

⁴ Ompan wala ray napupulongan yon aliwan base ed Biblia so pananisia rad masanton espiritu. Singa bilang, iisipen na saray totoon manisia ed Trinidad a say masanton espiritu et personan mipara ed Dios, say Ama. (1 Cor. 8:6) Balet, satan a doktrina et mapatpatnag ya sumlang ed ibabangat na Biblia.

⁵ Anto sirin so masanton espiritu? Diad Genesis 1:2, say Hebreon salita ya ruʹach et nipatalos ya “espiritu,” balet diad arum a bersikulo et nipatalos a “dagem.” (Gen. 8:1) Singa say dagem ya agnanengneng balet ta mabiskeg so puersa to, say masanton espiritu et agmet nanengneng tan agnabembenan, balet ta nalikna tayo so epekto to. Sayan espiritu et enerhiyan manlalapud Dios ya iiter tod saray totoo tan uusaren tod saray bengatla pian nasumpal so linawa to. Mairap kasin panisiaan a say Makapanyarin-amin a Dios et makapawala na ontan a makapadinayew a puersa? Siempre andi!​—Basaen so Isaias 40:12, 13.

6. Antoy kinerew nen David ed si Jehova?

⁶ Kasin usaren met nen Jehova so espiritu to pian igiya itayo? Oniay insipan tod si salmistan David: “Bilinen ta ka tan ibangat ta ka ed dalan a nepeg mo a laen.” (Sal. 32:8) Labay kasi nen David so paigiya ed Dios? On, ta oniay kinerew tod Jehova: “Ibangat mo ak pan manggaway linawam, ta sika so Dios ko. Say  espiritum et maomaong; komon ta iwanwan ak na satan.” (Sal. 143:10, NW) Nepeg ya labayen tayo met so paigiya ed espiritu na Dios. Akin? Ikonsidera tayo so apatiran rason.

Agtayo Sarag ya Igiyay Inkasikatayo

7, 8. (a) Akin et agtayo sarag ya igiyay inkasikatayo? (b) Anton ilustrasyon so ontulong ed sikatayon natalosan no akin a kaukolan tayoy panangigiya na Dios ed sayan mauges a mundo?

⁷ Unona, nepeg tayon labayen so paigiya ed espiritu na Dios ta agtayo sarag ya igiyay inkasikatayo. Say “pangigiya” et kabaliksan toy “pangitonton ed sakey a dalan odino pangipanengneng ed basbas a kaukolan a tumboken.” Balet, ag-itayo pinalsa nen Jehova a walaay abilidad ya igiyay inkasikatayo. Sakey ni, ag-itayo perpekto kanian nalilingo itayo. Oniay insulat nen propetan Jeremias: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jer. 10:23) Akin et agtayo sarag ya ‘itonton so kurang tayo’? Diad panamegley nen Jeremias et oniay imbaga nen Jehova a rason: “Say puso manamalingo alabas nen saray amin a bengatla, et sikato so mapalalo a mauges; siopa so makaamta ed sikato?”​—Jer. 17:9; Mat. 15:19.

⁸ Imadyin yo pan walay toon labay toy man-hiking ed palandey ya agto kabisado. Mapeligro no onlan bukor ya anggapoy mangigiyad sikato, odino anggapo labat so awit ton kompas. No agto amtay gawagawaen to tan agto amtay dalan pian makasabid laen to, iiyan tod peligroy bilay to. Ontan met so kipapasen na toon iisipen ton sarag ton igiyay sarili to diad sayan mauges a mundo. No agto paigiyad Dios diad dugan dalan, ipepeligro toy bilay to. Say alenleneg a paraan a matalona tayon nalampasan iyan sistema na bengatla et kerewen tayoy tulong nen Jehova a singa samay impikasi nen David: “Iparungtal mo ed siak so saray dalan mo, O Jehova; ibangat mo ed siak so saray basbas mo.” (Sal. 25:4; 23:3) Panon tayon naawat itan a panangigiya?

9. Base ed litrato diad pahina 17, panon tayon naseguro a nigiya itayo na espiritu na Dios?

⁹ No mapaabeba tan mabulos itayon ondepende ed si Jehova, iter tod sikatayo so masanton espiritu a mangigiyad sikatayo. Panon itayon natulongan na satan ya aktibon puersa? Oniay impaliwawa nen Jesus ed saray disipulo to: “Say mananulong, say masanton espiritu, ya ibaki na Ama diad ngaran ko, so mangibangat ed sikayo na amin a bengatla tan mangipanonot ed sikayo ed amin ya imbagak ed sikayo.” (Juan 14:26) Diad regular tan atekepay pikakasin panaral na Salitay Dios, pati saray bangat nen Kristo, tulongan itayo na masanton espiritu ya natalosan so aralem a karunongan nen Jehova pian nagawaan tayoy linawa to. (1 Cor. 2:10) Ontan met, no wala ra bilang so nagawad bilay tayo ya ag-iilaloan, tulongan itayo na espiritu na Dios pian amta tayoy gawaen tayo. Ipanonot na espiritu iray naaralan tayon prinsipyoy Biblia tan ontulong itan pian natalosan tayo no panon tayon  niyaplika iratan a prinsipyo diad saray desisyon tayo.

Si Jesus et Inggiyay Espiritu na Dios

10, 11. Antoy iilaloan nen Jesus ya gawaen na masanton espiritu parad sikato, tan antoy naeksperiensya to kayari ton nampabautismo?

¹⁰ Say komaduan rason no akin a nepeg tayon labayen so paigiyad masanton espiritu et lapud inggiya na satan so mismon Anak na Dios. Antis ya linmad dalin so bogbogtong ya Anak na Dios, amta to iyan propesiya: “Say espiritu nen Jehova manayam naani ed tapew to, say espiritu na kakabatan tan pakatalos, say espiritu na pananimbawa tan pakapanyari, say espiritu na pikakabat tan say takot ed Jehova.” (Isa. 11:2) Amta nen Jesus ya aliwan mainomay so magmaliw a bilay to diad dalin, kanian isipen pa labat so pankaliktan ton paigiya ed espiritu na Dios!

¹¹ Tinmua so salita nen Jehova. Unong ed Ebanghelyo, oniay nabasa tayon agawa sanen kakkapampabautismo nen Jesus: “Natan et tinmaynan ed Jordan si Jesus, a napno na masanton espiritu, tan sikatoy inwanwan na espiritu sanen walad kalawakan.” (Luc. 4:1) Legan a nan-ayunal, nampikasi, tan nandalepdep si Jesus ed kalawakan, nayarin sikatoy inikdan nen Jehova na saray instruksion tan imparaan To parad saray nagawad sikato. Pinakiwas na aktibon puersa na Dios so isip tan puso nen Jesus, tan inggiya na satan so panagnonot tan saray desisyon to. Bilang resulta, amta nen Jesus no antoy gawaen tod kada situasyon, tan sinumpal to so linawa nen Ama to.

12. Akin et kaukolan tayon kerewen ya igiya itayo na espiritu na Dios?

¹² Amta nen Jesus no panon kaimportante so espiritu na Dios ed mismon bilay to, kanian pinaseseg to met iray disipulo to ya kerewen da itan ed Dios tan paigiya irad satan. (Basaen so Lucas 11:9-13.) Akin et kaukolan tayon kerewen ya igiya itayo na espiritu na Dios? Ta pasimbaloen na satan so kanonotan tayo, pian niwalad sikatayo so “kanonotan nen Kristo.” (Roma 12:2; 1 Cor. 2:16) No paigiya tayod espiritu na Dios, say kanonotan tayo et miparad kanonotan nen Kristo tan naalig tayoy alimbawa to.​—1 Ped. 2:21.

Sarag Itayon Palikdoen na Espiritu na Mundo

13. Anto so espiritu na mundo, tan antoy epekto na satan ed saray totoo?

¹³ Say komatlon rason no akin a nepeg tayon labayen so paigiyad espiritu na Dios et lapud sarag itayon palikdoen na espiritu na mundo a mangokontrol ed dakel a totoo natan. Sayan mundo et walay sarili ton puersa ya mangiimpluensya ed saray totoo ya gawaen iray bengatlan sumlang ed panangigiya na masanton espiritu. Agtutulongan na espiritu na mundo iray totoo ya aligen so kanonotan nen Kristo, imbes iimpluensyaan to ran manisip tan onkiwas a singa si Satanas, say manuley na sayan mundo. (Basaen so Efeso 2:1-3; Tito 3:3.) No say sakey a too et paimpluensyaan ed espiritu na mundo  tan gagawaen to ray gawa na laman, talagan makapuy so resulta lapud agto natawir so Panarian na Dios.​—Gal. 5:19-21.

14, 15. Panon tayon nalabanan so espiritu na mundo?

¹⁴ Tutulongan itayo nen Jehova pian nalabanan so espiritu na mundo. Imbaga nen apostol Pablo ya nepeg itayon ‘mantultuloy a mangalay biskeg ed Katawan tan diad mabiskeg a pakayari to.’ Akin? Oniay intuloy to: “Pian makalaban kayo sano onsabi so mauges ya agew.” (Efe. 6:10, 13) Papabiskegen itayo nen Jehova panamegley na espiritu to pian sarag tayon labanan iray panamalikdo nen Satanas. (Apo. 12:9) Mabiskeg so espiritu na sayan mundo, tan agtayo itan sigpot ya napaliisan. Balet ta nalabanan tayo itan ta mas mabiskeg so masanton espiritu ya ontulong ed sikatayo!

¹⁵ Onia so imbaga nen apostol Pedro ed saramay angikaindan ed katuaan nen inmunan siglo: “Lapud inkaindan da so maptek a dalan, nibalang ira.” (2 Ped. 2:15) Talagan misalsalamat itayo ta “inawat tayo so espiritu a nanlapud Dios, aliwan say espiritu na mundo”! (1 Cor. 2:12) No paigiya tayod satan tan anamoten tayoy amin a probisyon nen Jehova pian mansiansian mabiskeg so relasyon tayod sikato, nagawaan tayo so duga tan nalabanan tayo so espiritu na sayan mauges a mundo.​—Gal. 5:16.

Say Masanton Espiritu et Mamapawala na Maabig a Bunga

16. Anton bunga so papawalaen na masanton espiritu ed sikatayo?

¹⁶ Say komapat a rason no akin a nepeg tayon labayen so paigiyad espiritu na Dios et lapud mamapawala itan na maabig a bunga diad saramay paigigiyad satan. (Basaen so Galacia 5:22, 23.) Agta amin tayo et malabay a magmaliw a mas maaro, maliket, tan nawalaay mareen a relasyon ed arum? Siopad sikatayo so agto labay a mas nipatnag toy andukey a panag-anos, kaabigan, tan kamaongan? Agta nagunggonaan itayo no mas napabiskeg tayoy pananisia tayo, tan mas nipanengneng tayoy inkaulimek tan panangontrol ed dili? Papawalaen na espiritu na Dios ed sikatayo iray maabig a kualidad a makagunggonad sikatayo tan ontan met ed pamilya tan kongregasyon tayo. Kaukolan a tuloytuloy tayon bayuboan so bunga na masanton espiritu ta agmet ageteran no kaunongay bunga ya sarag na espiritun pawalaen ed sikatayo.

17. Panon tayon mas napansagpotan so pamayubo ed bunga na espiritu?

¹⁷ Maabig no isipen tayo iya: Kasin ipapanengneng na saray salitak tan saray gagawaen ko ya paigigiya ak ed masanton espiritu tan ipapanengneng koy bunga na satan? (2 Cor. 13:5a; Gal. 5:25) Panon to no anengneng tayon kaukolan tayo nin paaligwasen so pigaran kualidad a kabiangan na satan a bunga? Nepeg a nagkalalo tayon gawaen so anggaay nayarian tayon paigiyad masanton espiritu pian nipanengneng tayo iratan a kualidad. Nagawaan tayo iya no sansakey tayon aralen so kada kualidad panamegley na Biblia tan saray publikasyon tayo. Diad ontan et natalosan tayo no panon tayon nipanengneng so bunga na espiritu diad inagew-agew a bilay tayo tan insan mas pansagpotan tayon bayuboan itan. * Sano naimano tayoy resulta na panangigiya na espiritu na Dios ed mismon bilay tayo tan ed bilay na saray agagi, ditan tayo napaneknekan a talagan kakkaukolan tayoy tulong na masanton espiritu.

Paigigiya Ka Ta ed Espiritu na Dios?

18. Antoy naaralan tayod impanumbok nen Jesus ed panangigiya na espiritu na Dios?

¹⁸ Si Jesus so “uloen a komikimey” na Dios sanen pinalsa Toy uniberso, kanian amta nen Jesus so nipaakar ed magnetism na dalin, say  puersan mamapagalaw ed dagum a walad kompas. (Uli. 8:30; Juan 1:3) Balet, anggapoy nabasad Biblia ya inusar nen Jesus itan a puersa pian mangigiyad sikato sanen wadiad dalin. Isasalaysay na Biblia ya baleg so impluensya na masanton espiritu na Dios ed si Jesus sanen nambilay bilang too. Talagan labay toy paigiyad satan. Sanen sikatoy pinakiwas na espiritu, tinumbok toy panangiwanwan na satan. (Mar. 1:12, 13; Luc. 4:14) Ontan ka met kasi?

19. Antoy nepeg tayon gawaen pian nigiya itayo na masanton espiritu?

¹⁹ Diad panaon tayo, siansia nin igigiya na aktibon puersa na Dios iramay mabulos ya paigigiyad satan. Antoy nagawaan mo pian nigiya ka na satan ed dugan direksion? Lanang mon ipikasid si Jehova ya ikdan to kay espiritu to tan tulongan to kan awaten so panangigiya na satan. (Basaen so Efeso 3:14-16.) Pankimeyan mo ray pikakasim diad panaral mod saray simbawa na Biblia, ya impuyan na Dios panamegley na masanton espiritu. (2 Tim. 3:16, 17) Tuloken iray makabat ya instruksion na satan, tan panggunaetan mon tumbokey panangigiya na masanton espiritu. No gawaen mo iraya, ipapatnag mon matalek kad abilidad nen Jehova a mangigiyad sika ed sankaabigan a dalan diad sayan mauges a mundo.

[Paimano ed leksab]

Atandaan Mo Ray Manunan Punto?

• Panon a makaapekto so masanton espiritu ed bilay tayo?

• Anto ray apatiran rason no akin a nepeg tayon labayen so paigiya ed espiritu na Dios?

• Antoy nepeg tayon gawaen pian sigpot itayon nagunggonaan ed panangigiyay masanton espiritu?

[Tepetepet Parad Panagaral]

[Litrato ed pahina 15]

Say espiritu na Dios so angigiyad panagnonot tan panagdesisyon nen Jesus

[Litrato ed pahina 17]

Igigiya na espiritu na Dios iramay mabulos ya paigigiyad satan