Inggiyay Espiritu na Dios Iray Matoor a Lingkor To Nensaman

“[Say] Katawan a Jehova imbaki to ak, tan say espiritu to.”​—ISA. 48:16.

1, 2. Antoy kaukolan pian nipatnag tayoy pananisia, tan panon itayon napaseseg na alimbawa na saray matoor a lingkor nensaman?

ANGGAMAN manlapu lad panaon nen Abel et dakel lay angipanengneng na pananisia, “aliwan amin a totoo et walaan na pananisia.” (2 Tes. 3:2) Panon ya niwalad sakey a too iyan kalidad? Kakkaukolan so pikakabat ed Salita na Dios, ta oniay ibabaga na satan: “Manisia so sakey kayari ton narengel so salita.” (Roma 10:17) Say pananisia et kabiangan na bunga na masanton espiritu na Dios. (Gal. 5:22, 23) Kanian kaukolan tayoy masanton espiritu pian nawalaan tayoy mabiskeg a pananisia.

² Ag-itayo niyanak a sipor lan walaay pananisia. Saray matoor a lingkor ya nabasa tayod Biblia et nanduaruwa tan tinmakot met, tan wala ray kakapuyan da. On, sikaray “walaan na liknaan a singa sikatayo.” (Sant. 5:17) Balet ta ‘pinabiskeg ira’ na espiritu na Dios pian nasarag da iray mairap a kipapasen. (Heb. 11:34) Diad panaral tayo ed no panon a kinmiwas so espiritu na Dios ed sikara, napaseseg itayon lawas manmatoor, lalo la ta dakel so nayarin mamakapuy ed pananisia tayo natan.

Say Espiritu na Dios so Angiter na Pakayari ed si Moises

3-5. (a) Panon tayon amta ya tinulongan na masanton espiritu si Moises? (b) Antoy naaralan tayod alimbawa nen Moises nipaakar ed pangiiter nen Jehova na espiritu to?

³ Diad amin a totoon nambilay nen 1513 B.C.E., anggapo lay mas “mauyamon tuloy” nen say si Moises. (Num. 12:3) Sayan mauyamon lingkor so angimatalekan nen Jehova na baleg a responsabilidad ed Israel. Say espiritu na Dios so angiter na pakayari ed si Moises ya manpropesiya, mangukom, mansulat, mangidaulo, tan manggaway milagro. (Basaen so Isaias 63:11-14.) Balet aminsan et imbalikas nen Moises so pakabebelatan to lapud karakel na kimey to. (Num. 11:14, 15) Kanian si Jehova et ‘angala na espiritu’ ya walad si Moises tan inter tod 70 lalaki ya ontulong ed sikaton mangasikasod kimey. (Num. 11:16, 17) Anggaman inisip nen Moises ya singa ambelbelat so responsabilidad to, diad tua et agto itan sasakbaten a bukor. Tan anggan saramay 70 lalaki ya apilin ontulong ed sikato et agda met kaukolan a sakbaten itan a bukor.

⁴ Magenap so masanton espiritu ya inter nen Jehova ed si Moises parad kimey to. Kayarin naikdan na masanton espiritu iramay 70 lalaki, magenap nin siansia so espiritun walad si Moises. Sikatoy agkinmulang na masanton espiritu tan agmet sobsobra so inter ed saramay 70 lalaki. Iikdan itayo nen Jehova na magenap ya espiritu to, depende ed pankaukolan tan sirkumstansya tayo. “Aliwan sinukat so pangiiter to na espiritu” noagta “daakan.”​—Juan 1:16; 3:34.

⁵ Wala ta ray susungdoan mon subok? Kasin naliliknam ya ondarakel lan ondarakel iray responsabilidad mo tan satan la so manguupot na oras mo? Kasin panggugunaetan mon legpetey pamilyam tan iter so espiritual a pankaukolan da legan mon aarapey problema ed ibibili sasaliwen odino ikakapuy na laman? Wala ta ray ambelat ya responsabilidad mod kongregasyon? Antokaman so situasyon mo, makaseguro kan sarag ya iter nen Jehova so biskeg ya kaukolan mo panamegley na masanton espiritu to.​—Roma 15:13.

 Say Masanton Espiritu so Tinmulong ed si Besaleel

6-8. (a) Diad anton kimey tinulongan na espiritu na Dios si Besaleel tan Oholiab? (b) Antoy mangipanengneng ya inggiya na espiritu na Dios si Besaleel tan Oholiab? (c) Akin et makapaseseg so alimbawa nen Besaleel?

⁶ Si Besaleel so sakey nin lingkor nen Jehova a kapanaonan nen Moises ya akaawat na tulong na espiritu na Dios. (Basaen so Exodo 35:30-35.) Pinili nen Jehova si Besaleel ya mangidaulod panggawa na saray kagawaan tan dekorasyon na tabernakulo. Wala la kasi amta tod onian kimey antis ni na sayan baleg a proyekto? Ompan wala met. Balet, diad Ehipto, nayarin say trabaho to et managgaway laryo. (Exo. 1:13, 14) Panon sirin ya sumpalen nen Besaleel iyan mairap a kimey? Sikatoy “pinano [nen Jehova] na espiritu [to], pinano to na karunongan, pakatalos, tan kakabatan, amin a nengneng na panagkimey.” No bilang ta wala lay sipor ya abilidad nen Besaleel, mas pinaaligwas ni itan na masanton espiritu. Tan anggan si Oholiab. Seguradon nagmaliw ya eksperto si Besaleel tan Oholiab ed kimey da ta agda labat itan agawaan noagta nibangat da met so arum. On, ‘impasen itan na Dios ed puso ra pian nayarian day mangibangat.’

⁷ Say sakey nin paneknek ya inggiya na espiritu na Dios si Besaleel tan Oholiab et say matibay tan marakdakep ya kimey da. Anggan linmabas lay ngalngali 500 a taon et uusaren ni na saray Israelita iramay ginawa ra. (2 Awa. 1:2-6) Aliwan singa saray managpabrikay kagawaan natan, agpinilalek nen Besaleel tan Oholiab a napagalangan ira lapud kimey da. Labay da ya say amin a dayew et onlad si Jehova.​—Exo. 36:1, 2.

⁸ Diad panaon tayo, nayarin wala ray kimey a mankaukolan na espisyal ya abilidad, singa say panagpaalagey, panag-imprinta, pangorganisay kombension, pangiyuksoy na saray relief committee, tan pangipaliwawad saray doktor tan empleyadoy ospital no antoy Makasulatan ya pananisia tayo nipaakar ed dala. No maminsan, sarayan kimey et niiter ed saramay walaan na espisyal ya abilidad. Balet, kaslakan et gagawaen itan na saray volunteer ya anggapo met so datin eksperiensya rad ontan iran kimey. Say espiritu na Dios so ontutulong ed sikaran nagawaan itan. Kasin natatakot kan awaten so sakey a pribilehyo ta liknaen mon mas kualipikado so arum nen say sika? Tandaan, napaaligwas na espiritu nen Jehova so kakabatan tan abilidad mo, tan ontulong itan pian nagawaan moy antokaman ya asainmin ya iter tod sika.

Tinulongan na Masanton Espiritu si Josue ya Idauloy Israel

9. Antoy kaukolan ya gawaen na saray Israelita ag-abayag kayari iran nibulos ed Ehipto, tan antoy tepet ya kaukolan ya ebatan?

⁹ Inggiya met na espiritu na Dios so sakey nin kapanaonan di Moises tan Besaleel. Ag-abayag kayarin nibulos iray Israelita ed Ehipto, nilusob ira na saray Amalekita. Agnin balot asali na saray Israelita so akibakal. Balet ta kaukolan da la natan so milaban bilang bulos a totoo. (Exo. 13:17; 17:8) Kaukolan a walay mangidaulo ed sikara diad pibakal da. Siopa kasi?

10. Akin et analo so Israel ed bakal diad panangidaulo nen Josue?

¹⁰ Say pinili nen Jehova et si Josue. Balet, antoy amta tod bakal? Anto tay datin trabaho to a, agta aripen labat ed Ehipto? Manag-alay dayami? Tan diad kalawakan et inagew-agew a mandodokdok na mana? Tua, si Josue et apo nen Elisama ya pangulo na tribu na Efraim tan angidaulo ed 108,100 a sundalon nanlapud taloran tribu na Israel. (Num. 2:18, 24; 1 Awa. 7:26, 27) Balet, agpinili nen Jehova si Elisama odino say anak ton si Nun. Imbes, imbaga Tod Moises a say mangidaulod armada na Israel pian taloen so kalaban et si Josue. Ngalngali sanagew so agawan laban. Lapud tinmulok si Josue ed Dios tan nampaiwanwan ed espiritu, analo so Israel.​—Exo. 17:9-13.

11. Singa si Josue, panon tayon napanlingkoran so Dios diad sankaabigan a paraan?

¹¹ Kayari impatey nen Moises, indaulo nen Josue iray Israelita. Sikatoy ‘napno na espiritu na karunongan.’ (Deu. 34:9) Ag-inter na masanton espiritu ed sikato so pakayarin manpropesiya ni say manggaway milagro a singa ginawa  nen Moises. Balet tinmulong itan pian nayarian nen Josue ya idaulo so Israel diad dakel a bakal pian nasakop day Canaan. Diad panaon tayo, nayarin isipen tayon anggapoy eksperiensya odino ag-itayo kualipikadon gawaen so pigaran aspekto na panaglingkor tayod Dios. Balet, no panon a tinulongan na Dios si Josue nensaman, makaseguro itayon tulongan itayo met na Dios no matulok itayo tan awaten tayoy panangiwanwan to.​—Jos. 1:7-9.

“Say Espiritu nen Jehova Linma ed Gideon”

12-14. (a) Antoy naaralan tayod impanalo na 300 ya sundalo na Israel diad impilaban dad dakdakel a Midianitan sundalo? (b) Panon a pinabiskeg nen Jehova so liknaan nen Gideon? (c) Panon tayon naawat so tulong na Dios natan?

¹² Kayari impatey nen Josue, siansia nin inusar nen Jehova so espiritu to pian pabiskegen iray matoor a lingkor to. Dakel so nabasa tayod libro na Uko-ukom nipaakar ed totoon ‘apabiskeg sanen makapuy ira.’ (Heb. 11:34) Inusar na Dios so masanton espiritu to pian tulongay Gideon diad pilaban to parad Israel. (Uko. 6:34) Say armada na kalaban dan Midianita et mamipat a mas dakel nen say armada nen Gideon. Balet, parad si Jehova et kaukolan nin bawasan so armaday Israel. Amidua ton impabawasan so sundalo nen Gideon, ya anggad 300 labat la ra, komparad 135,000 a kalaban. (Uko. 7:2-8; 8:10) Labay nen Jehova a daiset labat so sundalo na Israel, ta no manalo ira anggapoy makapangilastog a satan et lapud pakayari odino dunong na too.

¹³ Akaparaan lan milaban si Gideon tan saray sundalo to. Imadyin mo pan sakey kan sundalo ed satan a melag ya armada. Kasin liknaen mon manalo kayo ta pinasempet la iramay matakot tan aliwan alerto ed peligro? Odino anggan panon et natatakot ka met ed no antoy nagawa? Seguradon nanmatalek ed Dios si Gideon. Ginawa to no antoy pagagawa nen Jehova ed sikato! (Basaen so Uko-ukom 7:9-14.) Agnampasnokan nen Jehova si Gideon sanen kinmerew na tanda a mamaneknek ya sikatoy suportaan na Dios. (Uko. 6:36-40) Imbes, pinabiskeg toy pananisia nen Gideon.

¹⁴ Anggapoy limitasyon na pakayari nen Jehova ya mangiliktar. Sarag ton iliktar iray lingkor tod antokaman a mairap a kipapasen. Sarag to ni ingen ya usaren iramay diad pakanengneng na arum et makapuy odino agmakayari. No maminsan, nayarin liknaen tayon amayamay so onsusumpad sikatayo odino mair-irap lan maong so kipapasen tayo. Agtayo iilaloan natan ya ikdan itayo na Dios na mamilagron tanda. Balet ta igigiya tan papabiskegen toy liknaan tayo panamegley na Salita to tan say kongregasyon ya iwawanwan na espiritu to. (Roma 8:31, 32) Saray maaron sipan nen Jehova so mamabiskeg ed pananisia tan talek tayo a talagan sikato so Mananulong tayo!

“Say Espiritu nen Jehova Linma ed Jefte”

15, 16. Akin et niwalad anak nen Jefte so inkamasakripisyo, tan antoy ipapaseseg na saya ed saray atateng?

¹⁵ Ikonsidera tayoy sananey nin alimbawa. Sanen kaukolan a mibakal iray Israelita sumpad saray Ammonita, “say espiritu nen Jehova linma ed Jefte.” Lapud pirpirawat nen Jefte a manalo ira pian nidayew si Jehova, sikatoy angisipan ed si Jehova. Insipan to a no sikatoy panaloen na Dios, say unonan too ya ompaway ed abung to ya onabet ed sikato et magmaliw a kayarian nen Jehova. Tinalo na Israel iray Ammonita, tan kasempet nen Jefte ed abung, say inmunan pinmaway ya inmabet et say anak ton bii, say alenleneg ya anak to! (Uko. 11:29-31, 34) Abigla kasi Jefte? Nayarin andi, ta sanen angisipan si Jefte, amta ton posible ya say anak to so unonan onabet ed sikato. Tinoor toy sipan to diad impangibaki tod marikit to ya manlingkor ed santuaryo nen Jehova diad Siloh. Lapud matoor a mandadayew ed si Jehova so marikit nen Jefte, sikaton mismo et kombinsido ya nepeg a tooren nen ama to so sipan to. (Basaen so Uko-ukom 11:36.) Inter na espiritu nen Jehova so biskeg na linawa a kaukolan dan sanama.

¹⁶ Panon ya niwalad anak nen Jefte iyan inkamasakripisyo? Seguradon apabiskeg so pananisia  tod nanenengneng ton seseg tan debosyon nen ama to ed Dios. Sikayo ran atateng, tandaan a naiimatonan na ananak yo so alimbawa yo. Nanenengneng dad saray desisyon yo no talagan papanisiaan yoy ibabaga yo. Oobserbaan na ananak yo iray masimoon a pikakasi yo, iimanoen day panagbangat yo, tan amta day pansasagpot yo pian napanlingkoray Jehova diad interon puso. Saraya so ontulong pian talagan pilaleken day manlingkor ed si Jehova. Tan saya so mamaliket ed sikayo.

“Say Espiritu nen Jehova Linma a Sankamakapanyarian” ed si Samson

17. Antoy agawaan nen Samson lapud tulong na espiritu na Dios?

¹⁷ Say sakey nin alimbawa ya tinulongan na espiritu na Dios et si Samson. Sanen asakop na saray Filisteo so Israel, ‘tinenyeg na espiritu nen Jehova’ si Samson pian ilaban so Israel. (Uko. 13:24, 25) Sikatoy inikdan nen Jehova na nikadkaduman biskeg pian makapanggawa na makapakelaw iran bengatla. Sanen sikatoy binalor na saray kapara ton Israelita lapud pakana na saray Filisteo, “say espiritu nen Jehova linma a sankamakapanyarian ed sikato, et saray lubir ya wala ed saray taklay to nagmaliw ira a singa lino ya apoolan ed apoy, tan saray balor to naplag ira manlapu ed saray lima to.” (Uko. 15:14) Diad saginonor, naandi so biskeg nen Samson lapud aliwan desisyon to. Balet anggano makapkapuy, sikatoy binmiskeg lamet “lapud pananisia” to. (Heb. 11:32-34; Uko. 16:18-21, 28-30) Nikadkaduma so paraan na intulong na espiritu ed kinen Samson. Anggaman natan et ag-itayo iikdan nen Jehova na biskeg a singa inter tod Samson, napaseseg itayo ed alimbawa to. Panon?

18, 19. (a) Akin et napaseseg itayo na alimbawa nen Samson? (b) Panon kan agunggonaan diad impangonsidera ed saray alimbawa na matoor iran lingkor diad sayan artikulo?

¹⁸ Manmamatalek itayo ed satan met lanlamang ya espiritun tinmulong ed si Samson. Matalek itayon tulongan itayo na satan pian nasumpal so kimey ya inter nen Jesus, say ‘pampulong ed totoo tan sigpot a pantasi’ nipaakar ed sikato. (Gawa 10:42) Kaukolan so dunong ed sayan kimey, a nayarin agnisipor ed sikatayo. Misalsalamat itayod si Jehova ta iiter toy espiritu to pian nagawaan tayoy nanduruman kimey  ya inmatalek to! Diad panusumpal tayod kimey, nibaga tayo met imay imbaga nen propeta Isaias: “[Say] Katawan a Jehova imbaki to ak, tan say espiritu to.” (Isa. 48:16) On, diad impangibaki na Dios ed sikatayo, ibabaki to met so espiritu to ya ontulong ed sikatayo! Panggugunaetan tayon sumpalen so kimey ta amta tayon paaligwasen nen Jehova iray abilidad tayo, a singa ginawa tod si Moises, Besaleel, tan Josue. Usaren tayo so “espada na masanton espiritu, salanti, say salita na Dios,” ta matalek itayon ikdan to itayo na pakayari, a singa ginawa tod si Gideon, Jefte, tan Samson. (Efe. 6:17, 18) No manmatalek tayod tulong nen Jehova, ikdan to itayo na pakayarin sumpalen so kimey, no panon ya inikdan toy biskeg si Samson.

¹⁹ On, seguradon bendisyonan nen Jehova iray makpel a lingkor to. Lalon ombiskeg so pananisia tayo no paigiya itayod masanton espiritu na Dios. Maabig sirin no rebyuen tayo met so pigaran alimbawa diad Kristianon Griegon Kasulatan. Nabasa tayo ditan no panon a tinulongan na espiritu nen Jehova iray matoor a lingkor to nen inmunan siglo, antis tan kayari Pentecostes 33 C.E. Pantongtongan tayo iraya diad ontumbok ya artikulo.

Akin et apaseseg kad naamtaan mo ya inusar na Dios so espiritu to ed si . . .

• Moises?

• Besaleel?

• Josue?

• Gideon?

• Jefte?

• Samson?

[Tepetepet Parad Panagaral]

[Blurb ed pahina 22]

Say espiritu na Dios so mangiter ed sikatayo na pakayarin sumpalen so kimey, a singa impamabiskeg na satan ed si Samson

[Litrato ed pahina 21]

Atateng, say maong ya alimbawa yo so ontulong ed ananak yo a pilaleken so panlingkor ed si Jehova