Kasin Nanonotan Yo?

Binasam ta iray agano nin isyu na Say Panag-bantayan tan The Watchtower? Salim pa sirin ya ebatan iray onggendan a tepet:

• Siopa si Olivétan, tan akin a saray ginawa to et makapainteres ed sikatayo?

Kabkabat ed satan a ngaran si Pierre Robert, sakey a taga Pransya. Legan na Repormasyon nen koma-16 a siglo, impatalos toy Biblia ed Pranses. Inusar toy “manangasikaso” imbes ya “obispo” tan “kongregasyon” imbes a “simbaan.” Inusar to met so ngaran na Dios a “Jehova” diad pigaran teksto.​—9/1-E, pahina 18-20.

• Antoy labay ya ibaga na Dios sanen imbaga tod saray Levita ya: “Siak so apag mo”?

Kada tribu na Israel et walay apag dan dalin, balet saray Levita et si Jehova so “apag” da. (Num. 18:20) Ag-ira naikdan na tawir a dalin, balet awalaan iray mabmablin pribilehyo diad panaglingkor. Tan intarya nen Jehova iray manunan pankaukolan da. Diad panaon tayo, saramay mangiyuuna ed Panarian et makapanmatalek ya nitarya iray inagew-agew a pankaukolan da.​—9/15, pahina 7-8, 13.

• Panon tayon naamtaan no kapigan sinakop na Babilonia so Jerusalem nensaman?

Saray historyador nensaman et nandurumay imbaga ran impormasyon nipaakar ed saray arari na Babilonia tan say impanuley da. Balet, mipakna iray scholar ya sinakop nen Cyrus II so Babilonia nen 539 B.C.E., sakey ya importantin petsa. Nibulos iray Judio tan pinmawil irad dalin da nen 537 B.C.E. Ibabaga na Biblia ya sikaray naaripen ed loob na 70 taon. Kanian say inkaderal sirin na Jerusalem et nen 607 B.C.E. (2 Awa. 36:21, 22; Jer. 29:10; Dan. 9:1, 2)​—10/1, pahina 26-31.

• Antoy ontulong ed sakey a Kristiano a mandesisyon no kasin say sakey a klase na panagligliwaan et makagunggona odino andi?

Pian naseguro no kasin say sakey a klase na panagligliwaan et makagunggona tan makapaliket ed Dios, maabig no itepet: Anto itan? Kaunongan so usaren kon panaon parad satan? Siopa ray kaibak?​—10/15, pahina 9-12.

• Akin et mauges so manpaekal?

Ipapasen na Dios a sagrado so bilay, tan anggan lukon ni labat et walaan la na dilin personalidad, sakey a mabilay a pinalsa. (Sal. 139:16) Say pangekal ed lukon et panagpatey, singa ipapanengneng na Ganggan ya siopaman a makasakit ed agni nianak ya ugaw et nepeg a manbayar. (Exo. 21:22, 23)​—11/1-E, pahina 6.

• Panon ya ontulong ed sikatayo so salaysay a walad Uliran 7:6-23 a paliisay pambantay na pornograpiya?

Satan a salaysay et manutukoy ed sakey a kalangweran a manaakar ed karsadan paonlad abung na paabang a bii. Sikatoy sinagyat na bii. Natan, nepeg tayon paliisan iray Internet site ya walay makapaayat iran litrato, tan kaukolan so pampikasi ed si Jehova antis nin nalukasan iratan a site.​—11/15, pahina 9-10.

• Panon tayon amta no kasin makaliktar so mundo no 2012?

Base ed kalendaryo na saray Maya nensaman, iisipen na arum a say mundo et mangangga no 2012. Balet imposible itan, lapud ginawa nen Jehova a Dios so dalin pian panayaman. Ibabaga na Biblia a say dalin et mansiansia lawas. (Ecl. 1:4; Isa. 45:18)​—12/1-E, pahina 10.

• Siopad saray nansulat na Biblia so wadman ed agew na Pentecostes 33 C.E.?

Nayarin anemira ed saray nansulat na Kristianon Griegon Kasulatan so wadman. Taloran apostol so wadman​—si Mateo, Juan, tan Pedro. Wadman met so duaran agagi nen Jesus ed ina​—si Santiago tan Judas. Tan posiblin wadman met so tobonbalon si Marcos.​—12/1-E, pahina 22.