Kasin say Alimbawa To et Maong, Odino Onkanan Pasakbay?

“[Say] Dios nen Jacob . . . ibangat to itayo ed saray dalan to, tan manakar itayo dia ed saray basbas to.”​—ISA. 2:3.

1, 2. Diad antoran paraan a makagunggona iray alimbawa diad Biblia?

SEGURADON miabobon ka ya makagunggona iray akasulat diad Biblia. Ditan et nabasa tayoy alimbawa na matoor a lalaki tan bibii ya manepeg tayon aligen. (Heb. 11:32-34) Nabasa tayo met ditan so nipaakar ed saramay say kagagawa tan ugali ra et nepeg tayon paliisan. Saray alimbawa ra et onkanan pasakbay ed sikatayo.

² Diad tua, wala ray pigaran indibidual diad Biblia ya say alimbawa ra et maong ya aligen balet ta onkana met a pasakbay ed sikatayo. Nonoten pay David, sakey ya mapaabeban pastol a diad saginonor et nagmaliw a makapanyarin ari. Sikatoy maabig ya alimbawa ed panangaro tod katuaan tan panagmatalek tod si Jehova. Balet, akagawa met si David na seryoso iran kasalanan​—say impikalugoran tod si Bat-sheba, impangipapatey tod Urias, tan say makapuy ya desisyon to nipaakar ed sensus. Balet say aralen tayod sayan artikulo et say alimbawa na anak ton si Solomon, a nagmaliw met ya ari tan sakey ed saray angisulat ed Biblia. Aralen tayo nin unona so duaran rason no akin a sikatoy maabig ya alimbawa.

Say “Karunongan nen Solomon”

3. Akin et nibaga tayon maabig ya alimbawa si Solomon?

³ Impabitar na Matalonggaring a Solomon, si Jesu-Kristo, ya si Arin Solomon et maabig ya alimbawa. Oniay imbaga nen Jesus ed saray manduaruwan Judio: “Say reyna ed abalaten et napaoli diad panangukom a kaiba iyan kailalakan tan ibaga ton nepeg iyan nadusa, ta sikatoy nanlapu ed kasampotan na dalin pian ondengel ed karunongan nen Solomon, balet, nia! wadia so sakey a babaleg nen si Solomon.” (Mat. 12:42) On, bantog si Solomon lapud karunongan to, tan pinaseseg to itayon onggamor met na karunongan.

4, 5. Panon ya niwalad si Solomon so kakabatan, balet panon ya duma so pakagamor tayo ed satan?

⁴ Sanen ginmapon nanari si Solomon, akitongtong so Dios ed sikato panamegley na kugip tan imbaga Ton kerewen to so antokaman a labay to. Amta nen Solomon a kulang ni eksperiensya to kanian say kinerew to et kakabatan. (Basaen so 1 Arari 3:5-9.) Aliketan so Dios ta kakabatan so kinerew na ari imbes ya kayamanan tan kagalangan, kanian inikdan toy Solomon na “makabat tan makatalos a puso,” tan inikdan to met na maaligwas ya bilay tan uley. (1 Ara. 3:10-14) Singa imbaga nen Jesus, ontan la kabantog so kakabatan nen Solomon kanian nadngelan itan na reyna na Sheba tan nambaroy na arawi pian napaneknekan ton mismo.​—1 Ara. 10:1, 4-9.

⁵ Agtayo iilaloan natan ya ikdan itayo nen Jehova na kakabatan diad mamilagron paraan. Anggaman imbagan mismo nen Solomon ya “si Jehova [et] mangiter na kakabatan,” insulat to met ya kaukolan tayoy mansagpot pian niwalad sikatayo itan. Inkuan ton: ‘Ikiling mo so layag mo ed kakabatan, tan ipeket mo so pusom ed pakatalos.’ Imbaga met nen Solomon a nepeg tayon “anapen” tan “usisaen” so kakabatan. (Uli. 2:1-6) On, sarag tayoy nawalaan na kakabatan.

6. Diad antoran paraan ya nipanengneng tayon aaligen tayoy maong ya alimbawa nen Solomon nipaakar ed kakabatan?

 ⁶ Maabig no tepetay inkasikatayo, ‘Singa si Solomon, kasin papablien ko met so kakabatan?’ Lapud irap na bilay natan, say sankanonot na totoo et say kuarta, pananap na pambilay, tan no anton kurso so laen da. Sika tan say pamilyam ey? Ipapanengneng kasi na saray desisyon yo a papablien tan aanapen yoy kakabatan a nanlapud Dios? Kasin nepeg yon umanen so panmoria yo nipaakar ed kuarta tan edukasyon pian mas napansagpotan yoy nawalaan na kakabatan? Say igamor tan pangiyaplika yoy kakabatan et parad andi-anggaan ya pankaabigan yo. Oniay imbaga nen Solomon ya resulta no anapen moy kakabatan: “Natalosan mo naani so inkaptek tan inkatunong, . . . on, balang sakey a maong a basbas.”​—Uli. 2:9.

Nanresultad Kareenan so Impangiyuna Tod Dugan Panagdayew

7. Panon a nipaalagey so marakdakep a templo na Dios?

⁷ Nen ginmapon nanuley si Solomon, sikatoy angipaalagey na marakdakep a templo ya onsalat ed samay tabernakulon uusaren diad panaon ni nen Moises. (1 Ara. 6:1) Tinawag itan ya templo nen Solomon. Balet ta agto itan impaalagey pian sikatoy magmaliw a bantog. Diad tua, aliwan sikato so akan-ideya ed satan. Si David so akanonot ya manpaalagey na templo tan si David so angiteran na Dios na detalyadon plano na templo tan saray kabiangan na satan. Tan angiter met si David na baleg a kontribusyon parad panagpaalagey. (2 Sam. 7:2, 12, 13; 1 Awa. 22:14-16) Balet, say mismon proyekto na panagpaalagey et niiter ed si Solomon tan asumpal itan diad pitora tan kapalduan taon.​—1 Ara. 6:37, 38; 7:51.

8, 9. (a) Anton maabig ya alimbawa so impanengneng nen Solomon nipaakar ed ag-itunda ed panggaway maabig? (b) Antoy resulta sanen inyuna nen Solomon so dugan panagdayew?

⁸ Maong ya alimbawa si Solomon ed agto intundad panggaway maabig ta sinumpal to imay proyekto, tan inyuna toy dugan panagdayew. Sanen asumpal so templo tan niloob la ditan so kaban na sipan, indaulo nen Solomon so pikakasi. Oniay kabiangan na satan a pikakasi to: ‘Saray matam onnengneng ira komon ed sayan abung ed labi tan agew, ed pasen ya inkuan mon, Say ngaran ko wala naani diman, ya ondengel ed pikakasi ya ipikasi na aripen mo ed sayan pasen.’ (1 Ara. 8:6, 29) Saray Israelita tan anggan saray dayo et makapanpikasi ed sayan templo ya impaalagey pian mamagalang ed ngaran na Dios.​—1 Ara. 8:30, 41-43, 60.

 ⁹ Antoy resulta sanen inyuna nen Solomon so dugan panagdayew? Kayari na selebrasyon ed impangidedika ed templo, saray totoo et “malikeliket tan magaygayaga ed puso lapu ed amin a kaabigan ya impatnag nen Jehova ed David ya aripen to, tan ed Israel.” (1 Ara. 8:65, 66) Legay 40 taon ya impanuley nen Solomon, talagan mareen tan maaligwas so bilay na saray totoo. (Basaen so 1 Arari 4:20, 21, 25.) Adeskribe iya diad Salmo 72, tan no basaen tayo itan et singa tayo naiimadyin iray bendisyon ed uley na Mas Matalonggaring a Solomon, si Jesu-Kristo.​—Sal. 72:6-8, 16.

Saray Ginawa nen Solomon ya Onkanan Pasakbay

10. Anton lingo nen Solomon so nanonotan tayon tampol?

¹⁰ Akin et nibaga tayo balet a say paraan na impanbilay nen Solomon et onkana met a pasakbay? Ompan say nanonotan mon tampol et saray asawa tan onkokomaduan asawa to a tagad arum a bansa. Oniay nabasa tayo: “Ta agawa, sanen si Solomon masiken la a saray asawa to [inayat] da so puso to ya ontumbok ed saray dirios da; et say puso to sikato so aliwa a naskey ed Jehova a Dios to.” (1 Ara. 11:1-6) Seguradon agmo labay ya aligen iyan makapuy a ginawa to. Balet kasin satan labat so ginawa nen Solomon ya onkanan pasakbay ed sikatayo? Pantongtongan tayo ray detalye ed bilay to ya agtayo tanton naiimano, tan nengnengen no antoy naaralan tayod satan.

11. Antoy resulta na unonan impangasawa nen Solomon?

¹¹ Nanuley si Solomon diad loob na 40 taon. (2 Awa. 9:30) Anto sirin so nibagam ed samay nabasad 1 Arari 14:21? (Basaen.) Unong ed sayan teksto, sanen inatey si Solomon, say anak ton si Rehoboam so sinmalat ya ari, a say edad tod saman et 41 años. Say ina to et si “Naama ya Ammonita.” Antis ni sirin a nagmaliw ya ari si Solomon et sikatoy angasawa la na bii a nanlapud bansan kalaban na saray Israelita tan mandadayew ed saray idolo. (Uko. 10:6; 2 Sam. 10:6) Agtayo amta no kasin sayan Ammonita et intuloy toy pandayew ed saray idolo odino diad saginonor et nandayew ed si Jehova, a singa si Rahab tan Rut. (Rut 1:16; 4:13-17; Mat. 1:5, 6) Antokaman so agawa, lapud angasaway Ammonita si Solomon, seguradon akikanayon ed saray agmandadayew ed si Jehova.

12, 13. Anton makapuy a desisyon so ginawa nen Solomon diad gapoy uley to, tan antoy nayarin inrason to?

¹² Linmoor so situasyon sanen nagmaliw ya ari si Solomon. Sikatoy “akikanayon ed Faraon ya ari na Ehipto, tan inala to so bii ya anak nen Faraon, tan sikato so inyakar to ed syudad nen David.” (1 Ara. 3:1) Kasin sayan biin taga Ehipto et nandayew ed si Jehova, a singa si Rut? Anggapoy nabasad Biblia ya ontay ginawa to. Imbes, nabasa tayon diad saginonor, sayan Ehipsio (tan ompan pati saray igaganggan to) et impagawaan nen Solomon na abung diad paway na Syudad nen David. Akin? Ta agnayarin manayam so sakey a pagano diad pasen ya asingger ed kaban na sipan.​—2 Awa. 8:11.

¹³ Nayarin naisip nen Solomon ya say pangasawa tod prinsesa na Ehipto et mamaelet ed relasyon na Israel tan Ehipto. Duga kasi ’tan ya iisipen to? Abayag lan ingganggan na Dios ed saray Israelita ya ag-ira mangaasawa na saray paganon Canaanita, ya sinansakey to nin imbaga no dinan iran nasyon ed Canaan so nepeg dan paliisan. (Exo. 34:11-16) Kasin inrason nen Solomon ya agmet kaiba so Ehipto ed sarayan nasyon? No ontan bilang, awaten kasi nen Jehova itan a rason to? Diad tua et imbaliwala nen Solomon so peligron impasakbay nen Jehova ya no say sakey ya Israelita et mangasaway tagad arum a bansa, posiblin sikatoy natangguyor ya ikaindan so dugan panagdayew.​—Basaen so Deuteronomio 7:1-4.

14. Panon tayon nipanengneng ya akaaral tayod makapuy ya alimbawa nen Solomon?

¹⁴ Panon tayon nipanengneng ya akaaral tayod sayan makapuy ya alimbawa nen Solomon? Nayarin igawaay baraan na sakey a sister so piinaroan tod agkapananisiaan tan ibaliwala to imay ganggan na Dios ya miasawa “dia labat  ed Katawan.” (1 Cor. 7:39) Tan nayarin manggawa tayo met na baraan diad arum a pamaakaran, singa say pibiang ed extracurricular iran isport o club diad eskuelaan, agpangibagay tuan naaalmo sano manbabayar na income tax, odino pantila sano walay ginawa tayon makapabaing. Nia ay so punto: Nayarin inggawaan nen Solomon na baraan so agto impangunor ed ganggan na Dios, tan ompan satan a peligro et nagawa met ed sikatayo natan.

15. Panon ya akideneng si Jehova ed si Solomon tekep na panangasi, balet antoy nepeg tayon tandaan?

¹⁵ Makapainteres ta kayarin imbaga na Biblia imay impangasawa nen Solomon ed prinsesa na Ehipto, insan tayo nabasa so salaysay nipaakar ed impangiter na Dios ed sikato na kakabatan tan ontan met ed kayamanan. (1 Ara. 3:10-13) Anggaman imbaliwala nen Solomon iray instruksion na Dios, anggapoy nabasad Biblia ya sikatoy dinusa nen Jehova odino tampol ton inkaindan bilang ari. Akin? Ta amta na Dios ya sikatayo ran agperpekton totoo et gawad dabok. (Sal. 103:10, 13, 14) Balet tandaan: Saray gagawaen tayo et apektoen toy bilay tayo natan odino diad arapen.

Dakdakel so Asawa To!

16. Anton ganggan so imbaliwala nen Solomon sanen angasawa na dakel a bibii?

¹⁶ Diad Kanta nen Solomon, indaydayew na ari so sakey a marikit ya imbaga ton sikatoy mas maganggana ni nen saray 60 reyna tan 80 onkokomaduan asawa to. (Kanta nen Sol. 6:1, 8-10) Nayarin diad saman a panaon et aya so bilang na asawa tan onkokomaduan asawa nen Solomon. Iyan ti’ lan amin odino karaklan ed saraya et mandadayew ed Jehova. Balet, agta imbaga na Dios ed si Moises a say ari na Israel et nepeg ya ‘agto parakelen so asawa to, pian say puso to agkomon onsian’? (Deu. 17:17) Anggaman ontan, diad saya met a pankanawnawa et ag-inkaindan nen Jehova si Solomon. Diad tua et siansia nin benendisyonan na Dios si Solomon tan impaisulat Tod sikato so libro na Biblia a Kanta nen Solomon.

17. Anton katuaan so nepeg tayon tandaan?

¹⁷ Labay kasin ibaga na saya ya ayos labat ya ibaliwala nen Solomon so ganggan na Dios ta agmet lanlamang nadusa, tan sarag tayo met ya aligen iyan alimbawa to? Andi. Ipapatnag na saya a talagan maan-anos so Dios. Tua, ompan agtampol sagmaken na sakey so negatibon resulta na pangibaliwala tod ganggan na Dios. Balet agto labay ya ibagan anggapo lay makapuy ya epekto na satan diad arapen. Tandaan iyan insulat nen Solomon: “Akin et maininomay ya manggaway kaugsan iray totoo? Lapud agnadudusan tampol so kaugsan.” Insan to inyarum: “No unoren moy Dios maong ya amin so kasumpalan na bilay mo.”​—Ecl. 8:11, 12, Maung a Balita.

18. Panon ya ipapanengneng na samay agawad si Solomon ya tua imay nabasad Galacia 6:7?

¹⁸ No komon ta inunor nen Solomon so Dios! Tua, dakel met so agawaan ton maong tan dakel so naawat ton bendisyon ed si Jehova. Balet diad inlabas na panaon, nantutumbokan so agawaan ton lingo ya anggad apasalan to lay agpangunor ed si Jehova. Talagan duga so pinuyanan ya imbaga nen apostol Pablo: “Agkayo palilingo: Say Dios et agnayarin napalikdo. Ta antokaman so itatanem na sakey a too, saya met so anien to”! (Gal. 6:7) Asabi met lanlamang so panaon ya inani nen Solomon so makapuy a resulta na impangibaliwala tod ganggan na Dios. Oniay nabasa tayo: “Si Arin Solomon angaro na dakel a sangkaili a bibii, pati say anak nen Faraon, bibii ed saray Moabita, Ammonita, Edomita, Sidonio, tan Heteo.” (1 Ara. 11:1) Dakel ed sarayan bibii et posiblin nantultuloy ed panagdayew ed palson dirios, tan inimpluensyaan day Solomon. Kanian “ginawa to so mauges ed pakanengneng nen Jehova” tan abalang toy panangabobon na maan-anos a Dios tayo.​—Basaen so 1 Arari 11:4-8.

Makaaral ed Saray Maong tan Makapuy a Ginawa To

19. Antoran maong ya alimbawa so nabasad Biblia?

¹⁹ Pinuyanan nen Jehova si Pablo ya isulat irayan balikas: “Amin ya insulat nensaman  et insulat pian nibangat itayo, ta pian diad panagsungdo tayo tan panagligliwa na Kasulatan et nawalaan itayo na ilalo.” (Roma 15:4) Kaibad sarayan insulat nensaman so maabig ya alimbawa na dakel a lalaki tan bibii a walaay mabiskeg a pananisia. Oniay inkuan nen Pablo: “Anto ni so ibagak? Kulang so panaon no ituloy ko nin isalaysay so nipaakar ed si Gideon, Barak, Samson, Jefte, David, ontan met ed si Samuel tan arum niran propeta, a lapud pananisia et tinalo da iray panarian a kalaban da, ginawa ra no anto so matunong, agamoran da iray sipan, . . . binmiskeg ira sanen makapuy ira.” (Heb. 11:32-34) Makaaral itayo ed sarayan salaysay ed Biblia tan nepeg tayon aligey alimbawa ra.

20, 21. Akin et labay moy makaaral ed saray alimbawan nabasad Salita na Dios?

²⁰ Balet, wala ray alimbawan nabasad Biblia ya onkanan pasakbay ed sikatayo. Say arum ed sikara et datin lingkor nen Jehova ya aabobonan to. Diad pambabasa tayoy Biblia, imanoen tayo no antoy rason akin et akagawa iray lingo, diad ontan et agtayo naalig so ginawa ra. Nanengneng tayo ya say arum ed sikara et kalkalnan awalaan na makapuy ya panagnonot tan awawey, a diad saginonor et makapaermen so nansumpalan da. Panon itayon makaaral ed sarayan salaysay? Tepetan tayoy sarili tayo: ‘Panon a ginmapo so makapuy ya panagnonot tan awawey na sayan too? Posible kasin nagawa met itan ed siak? Panon ak a natulongan na sayan salaysay pian agko naalig so lingo a ginawa na sayan too?’

²¹ Nepeg tayon ipapuso irayan alimbawa, ta oniay pinuyanan ya insulat nen Pablo: “Agawa irayan bengatla ed sikara bilang alimbawa, tan nisulat iraya bilang pasakbay ed sikatayo ya asabian na anggaan na saray sistema na mundo.”​—1 Cor. 10:11.

Antoy Naaralan Mo?

• Akin et nibaga tayon wala ray maong ya alimbawad Biblia tan wala ra met so onkanan pasakbay ed sikatayo?

• Akin ya diad inlabas na panaon et apasalan la nen Solomon so agpangunor ed Dios?

• Panon mon nipanengneng ya akaaral kad lingo nen Solomon?

[Tepetepet Parad Panagaral]

[Litrato ed pahina 9]

Inusar nen Solomon so kakabatan ya inter na Dios ed sikato

[Saray litrato ed pahina 12]

Panon mon nipanengneng ya akaaral kad lingo nen Solomon?