Makagunggona Iray Ginawa Min Pananguman

Unong ed salaysay nen James A. Thompson

Inyanak ak nen 1928 diad bandad abalaten na United States. Diad saman et walay ganggan ya sebel a manulop iray amputi tan andeket. No agka ontulok ed sayan ganggan, nipriso ka odino mas grabe ni.

DIAD satan a panaon, wala ray pasen ed United States a nandumaay kongregasyon, sirkito, tan distrito na saramay amputi tan andeket ya Tasi nen Jehova. Nen 1937, si tatay et nagmaliw ya company servant (say tawag natan et coordinator na ulop na mamatatken) ed kongregasyon na saray andeket diad Chattanooga, Tennessee. Si Henry Nichols balet so company servant na saray amputi.

Nen ugaw ak ni walay agko nalingwanan ya agawa. Sakey a labi, akayurong ak ed beranda na abung mi tan ondedengel ak ed tongtongan di tatay tan Brother Nichols. Anggano agko natatalosay amin ya ibabaga da, mani-enjoy ak balet ed abay nen tatay legan dan pantotongtongay maabig a gawaen pian nitultuloy so panagpulong diad saraman a panaon.

Sakbay na 1930, walay agawan trahedya ed pamilya mi. Inatey si nanay, a manedad labat na 20. Bukbukor la nen tatay so mangasikaso ed si atsik Doris ya apat taon, tan siak ya duay taon ni labat. Anggaman agano ni labat ya abautismoan si tatay, maabig so iyaaligwas tod espiritual.

Saray Maabig ya Ehemplo ed Siak

Nen 1933, akabat nen tatay so maomaong ya agin bii a si Lillie Mae Gwendolyn Thomas, tan agnambayag et nankasal ira. Pareho ran maabig ya ehemplo ed sikamin dua nen atsik Doris diad matoor a panlingkor ed si Jehova.

 Nen 1938, kinerew ed saray kongregasyon na Tasi nen Jehova a suportaan day resolusyon ya say manuro lad saray elder ed kongregasyon et say headquarters diad Brooklyn, New York, imbes ya idalan ed botos na agagi. Anggano ag-inawat na arum ed Chattanooga iyan pananguman, si tatay balet et sigpot ya sinmuporta ed sayan pananguman na organisasyon. Say ehemplo tod katooran, ontan met ed maaron pikokoopera nen nanay, so akatulong na baleg ed siak anggad natan.

Bautismo tan Panlingkor a Full-Time

Nen 1940, dakel ed kongregasyon mi so nanrenta na bus pian onatendi ed kombension diad Detroit, Michigan. Pigarad sikara so abautismoan diman. Mankelaw iray arum no akin ya agak nampabautismo, anta manpupulong ak met la nanlapu nen limay taon ko tan makulikuli ak ed ministeryo.

Sanen tinepetan da ak, inkuan kon, “Agko natatalosan no akin a kaukolan ni manpabautismo.” Nadngel iya nen tatay tan sikatoy nikelawan. Manlapud saman, ginawa nen tatay so anggaay nayarian to pian natalosan ko so kabaliksan na bautismo tan no akin ya importante itan. Kayari apat bulan, nen Oktubre 1, 1940, anggano sobray betel ed saman, siak so nampabautismo ed melag ya ilog asingger ed Chattanooga.

Nen 14 años ko, ginapoan koy nampayunir legan na bakasyon. Nampulong ak ed pigaran baley na Tennessee tan diad asingger iran lugar ed Georgia. Ombangon ak a masakbay, ipreparak so balon ko parad ugto, tan samboten koy ala-sais a biahe na tren odino bus paonlad teritorya. Manga ala-sais na labi lay isempet ko. Agni asabi panangugto et naupot ko lay balon ko. Anggano walay kuartak, agak makaloob ed tindaan pian mangaliw na naakan ta andeket ak. Aminsan, linmoob ak ed sakey a tindaan pian mangaliw na ice-cream cone balet ta pinapaway da ak. Maong labat ta walay amputin bii ya angiderew ed siak na sakey.

Sanen haiskul ak la, ompapalalo so civil rights movement diad Abalaten. Saray organisasyon a singa say NAACP (National Association for the Advancement of Colored People) so angipaseseg ed saray estudyante ya ilaban so kanepegan na balang sakey. Kaukolan mi kunoy mimiembro ed saya. Dakel ed saray eskuelaan na andeket, kaibay eskuelaan mi, so anuporta ed saya. Pinilit da ak ya suportaan so rasa mi. Agak balet inmabuloy, imbagak ya say Dios et agmanangidumaduma tan anggapoy papaboran ton rasa. Kanian say Dios labat so iilaloan kon mangekal na ag-inkahustisya.​—Juan 17:14; Gawa 10:34, 35.

Ag-abayag kayari haiskul, nandesisyon ak ya manayam ed New York City. Balet antis ak ya makasabid man, sinmamar ak nid Philadelphia, Pennsylvania pian bisitaen iray kaarok ya akabat kod kombension. Say kongregasyon diman so sankaunaan ya inatendian ko a mankaiba iray amputi tan andeket. Dugarugan bisitad saman na ombiabiahen manangasikaso, tan inkuan ton ikdan to ak na betang diad ontumbok ya aral. Kanian nandesisyon ak ya diman ak la manayam.

Sakey ed saray akaarok ed Philadelphia et si Geraldine White​—Gerri so tawag kod sikato. Sikatoy marundunong ed Biblia tan maong ya mitongtong ed saray unabung. Balet say agusgustoan kod sikato et lapud pareho min  kalat so panagpayunir. Nankasal kami nen Abril 23, 1949.

Naimbitaan ed Gilead

Say kalat mi nen unaan et say panaral ed Gilead School tan manserbi bilang misionero ed arum a bansa. Nanggawa kami na pananguman pian onkualipika kami parad Gilead. Ag-abayag, tinawag da kamin onlan manserbi diad Lawnside, New Jersey; insan diad Chester, Pennsylvania; tan say sampot et diad Atlantic City, New Jersey. Legan min walad Atlantic City, naimbitaan kami parad Gilead, duay taon kami lan kasal ed saman. Balet agkami ni atuloy ed sayan imbitasyon. Say rason?

Diad bandad gapo na 1950, dakel a kalangweran ya lalaki so pinilit a manserbid militar tan milaban ed nagagawan gulo ed Korea. Say draft board (panagparehistroan parad serbisyo militar) et sumpad saray Tasi nen Jehova lapud neutral ira. Balet diad kaunoran et impaamtad siak na huis ya inimbestigaan ak na FBI tan apaneknekan ya talagan neutral ak. Kanian nen Enero 11, 1952, inaprobaan na Presidential Appeal Board so agko panserbi ed militar lapud sakey ak a ministro.

Nen Agosto ed satan lanlamang a taon, akaawat kami nen Gerri na imbitasyon a manaral ed 20th class na Gilead, ya onggapo ed Setyembre. Legan na panaaral mi, pitalaran mi so asainmin ya nibakid arum a bansa. Singa si atsik Doris ya nan-graduate ed 13th class na Gilead tan nanserbid Brazil. Agmi balet iilaloan nen Gerri a say naawat min asainmin et kimey ed sirkito​—ya bisitaen iray kongregasyon na saray andeket ed bandad abalaten na Alabama! Medyo adismaya kami ta say talagan iilaloan mi et manserbi ed arum a bansa.

Say primeron kongregasyon ya binisita mi et say Huntsville. Kasabi mid man, linma kamid abung na agin bii ya tuloyan mi. Nen iyeepas mi ray gamit mi, nadngel min ibabaga tod telepono ya, “Wadia la ra may ugugaw.” Manedad kami labat na 24 tan mas ugaw so nengneng mi. Manlapu lad saman, say tawag na sirkito ed sikami et Ugugaw.

Say Abalaten et kabkabat ya Bible Belt lapud maslak a totoo diman et baleg so respeto dad Biblia. Kanian naynay min igagapo so tongtongan panamegley na sayan presentasyon:

(1) Mangibaga na saray probleman nagagawad mundo.

(2) Say ilalon naromog ed Biblia.

(3) No antoy ibabaga na Biblia a nepeg ti’n gawaen.

Insan mi iyopresi so matukoy a publikasyon ya ontulong pian naaralan so Biblia. Lapud epektibo iyan metodo, naikdan ak na betang nen 1953 ed New World Society Assembly diad New York. Diman ko indemostra iyan presentasyon.

 Ag-abayag, nen tiagew na 1953, niasain kami ed sirkito na saray andeket bilang manangasikaso na distrito diad Abalaten. Teritorya mi so interon Virginia anggad Florida, ontan met ed Alabama tan Tennessee. On, kaukolan ya akaparaan iray ombiabiahen manangasikaso ed mairap iran situasyon. Singa bilang, maslak ed saray abung ya tutuloyan mi et anggapoy komportablen panamesan, kanian diad abay na panaglutoan so panaamesan mi tan manguusar kami batya. Makapaliket ta diman so sankapetangan a parte na abung!

Saray Subok Lapud Panangidumaduma

Sanen manseserbi kamid saray kongregasyon ed Abalaten, kaukolan ya madiskarte kami. Sesebelan iray andeket a mangusar na laundry shop. No onlad may Gerri, ibaga ton parad si “Mrs. Thompson” iramay kawes. Kanian isipen na arum ya sikatoy katulong tan si “Mrs. Thompson” so amo to. Ontan met, sano ipabantay na saray manangasikaso na distrito imay palabas ya The New World Society in Action, ontawag ak ed sakey a rental shop tan manpareserba ak na baleg ya screen parad si “Mr. Thompson.” Insan ak onlad shop pian ipick-up man. Tan lapud magalang kami, anggapoy problema mid panagpulong.

Wala ni sakey ya panangidumaduma diad Abalaten, kabusol da ray walad Amianen. Sakey a dyaryo so angibalita ya si James A. Thompson, Jr. na Watchtower Bible and Tract Society ed New York so espiker ed sakey ya asemblea. Inisip na arum ya taga New York ak kanian kinansela na school auditorium so kontrata mi. Akitongtong ak ed school board tan impaliwawak ya nan-eskuela ak ed Chattanooga. Kanian inabuloyan da kamin ituloy so sirkiton asemblea mi.

Linmoor so tensyon na panangidumaduma nen kapegleyan na 1950, tan no maminsan et manggugulo ra. Nen 1954, naopende iray arum ya agagi lapud anggapoy espiker ya andeket ed programa diad pigaran distriton kombension. Pinaseseg mi ray agagin andeket ya mananos ni. Diad tinmumbok a tiagew, naikdan ak na betang a manpaliwawa. Manlapu lad saman, dakel met lan agagin andeket diad Abalaten so naikdan na betang ed programa.

Asabi panaon, kinmepa so gulo ed Abalaten tan ginmapon nanuulop ed kongregasyon iray agagin amputi tan andeket. Kanian arum ya agagi so inyalis ed arum a kongregasyon tan inuman met so teritorya tan saray responsabilidad na agagin manangasikaso. Arum ya agagin amputi tan andeket so agmipakna ed sayan balon uksoyan. Maslak balet et agmanangidumaduma, singa say Ama tayon walad tawen. Diad tua, dakel so sankakaaro anggano mandumaay kolor da. Naeksperiensya itan na pamilyak nen manga 1930 tan 1940 legan kon ombabaleg.

Say Balon Asainmin

Nen Enero 1969, naimbitaan kami nen Gerri ya onlad Guyana, South America, tan maliket min inawat itan. Nila min unona so Brooklyn, New York, diman ak nan-training parad pangasikaso na panagpulong a kimey diad Guyana. Sinmabi kamid man nen Hulyo 1969. Kayari 16 taon ed panagbiahen  kimey, baleg a pananguman so panayam ed saksakey a lugar. Naynay a walad pulongan si Gerri bilang misionera, tan siak balet et diad sangan opisina.

Kabiangan ed trabahok so pangatli na dika, tan pangipawit na literatura parad 28 ya kongregasyon, tan pansulat ed Brooklyn headquarter. Mankikimey ak na 14 anggad 15 oras kada agew. Baleg iyan sagpot parad sikamin dua, balet malikeliket kami. Nen sinmabi kamid Guyana, walay 950 labat a manangipalapag; natan balet et wala lay 2,500.

Anggaman nanliketan mi iray marakep a tiempo tan nikadkaduma iran prutas tan pisipising, say talagan panliliketan mi et saray mapaabeban totoon malabay a makaaral ed katuaan nipaakar ed Panarian na Dios. Kada simba, walay 20 ya iyaaralan nen Gerri, tan dakel ed saray inyaralan mi so nampabautismo. Asabi panaon, arum ed sikara et nagmaliw ya payunir, elder, tan nanaral ni ingen ed Gilead tan nagmaliw a misionero.

Saray Problema, Lalo la ed Bunigas

Nen 1983, kaukolan ya asikasoen so atateng mid United States. Nantongtong kami di atsi Doris tan Gerri. Si atsi Doris, a nanserbi ed loob na 35 taon bilang misionera ed Brazil, so nambulon ya onla tan mangasikasod sikara. Inkuan ton, akin et kaukolan nin taynanan min dua so panmisionero, no sarag met la na sakey? Manlapu la nen inatey iray ateng mi, si atsi Doris et nanayam lad Chattanooga tan nanserbi bilang espisyal payunir.

Nen 1995, nalmoan ya walay prostate cancer ko tan kaukolan mi ompawil ed United States. Nanayam kamid Goldsboro, North Carolina, lapud pareho iyan asingger ed pamilya mid Tennessee tan Pennsylvania. Atempey la natan so cancer ko, tan manseserbi kami lad sakey a kongregasyon ed Goldsboro bilang infirm ya espisyal payunir.

Sano nanonotan ko so masulok a 65 taon kod full-time, misalsalamat ak a maong ed si Jehova lapud benendisyonan to kami nen Gerri ed ginawa min pananguman pian sikatoy panlingkoran. Tudtua imay imbaga nen David: “Dia ed matoor et onkiwas [si Jehova] ed katooran”!​—2 Sam. 22:26, NW.

[Saray litrato ed pahina 3]

Maabig ya ehemplo ed siak si tatay tan si Brother Nichols

[Saray litrato ed pahina 4]

Kaibak si Gerri, akaparaan kami la parad Gilead, 1952

[Saray litrato ed pahina 5]

Kayari impanaral ed Gilead, niyasain kamid panagbiahen kimey diad Abalaten

[Litrato ed pahina 6]

Saray ombiabiahen manangasikaso tan saray kaasawaan da, antis na distriton kombension ya manulop iray amputi tan andeket, 1966

[Litrato ed pahina 7]

Makapaliket so impanmisionero mid Guyana