Saray Inggiya na Espiritu na Dios nen Inmunan Siglo tan Anggad Panaon Tayo
Saray Inggiya na Espiritu na Dios nen Inmunan Siglo tan Anggad Panaon Tayo
“Amin irayan kimkimey et gagawaen na saksakey ya espiritu.”—1 COR. 12:11.
1. Antoy aralen tayo ed sayan artikulo?
DAKEL iray makapalikliket ya agawa nen Pentecostes 33 C.E. (Gawa 2:1-4) Inkalbo na Dios so masanton espiritu tod satan ya agew tan gapoan la itan na makatantandan pananguman ed pidedeneng tod saray lingkor to. Diad imbeneg ya artikulo, inaral tayo no panon ya tinulongan na espiritu na Dios iray matoor a lingkor to nensaman pian nagawaan da iray mairap ya kimey. Anto balet so pandumaan na impangigiya na espiritu na Dios ed saray lingkor to antis a ginmapoy Kristianon kongregasyon no ikompara nen inmunan siglo? Tan panon a nagunggonaan iray Kristiano ed panangigiya na masanton espiritu na Dios natan? Satan so pantongtongan tayo ed sayan artikulo.
“Nia! Siak so Biin Aripen nen Jehova!”
2. Panon ya naeksperiensya nen Maria so pakayari na masanton espiritu?
2 Kaibay Maria sanen nikalbo so masanton espiritu ed saramay walad kuarto ed tagey dimad Jerusalem. (Gawa 1:13, 14) Balet, masulok a taloran dekada antis na satan, naeksperiensya to lay makapadinayew a pakayari na espiritu nen Jehova. Inyalis nen Jehova so bilay na Anak to diad dalin. “Diad panamegley na masanton espiritu” et inlukon nen Maria si Jesus anggaman sikato et sakey a birhen.—Mat. 1:20.
3, 4. Anton awawey so impanengneng nen Maria, tan panon tayon naalig itan?
3 Akin et si Maria so angiteran nen Jehova na sayan nikadkaduman pribilehyo? Kayarin imbaga na anghel ed si Maria ya ilukon toy anak na Dios, oniay inkuan nen Maria: “Nia! Siak so biin aripen nen Jehova! Nagawa komon ed siak so unong ed imbagam.” (Luc. 1:38) Ipapanengneng na sarayan balikas no antoy inkatoo nen Maria. Nanengneng ed tampol ya inyebat to ya sikatoy akaparaan ya awaten no antoy linawa na Dios parad sikato. Agla nantepet no anto kasi ibagay totoo ed lugar da diad panlukon to, odino anto kasi magmaliw ya reaksion nen Jose. Diad samay imbaga nen Maria ya sikatoy “biin aripen nen Jehova,” impatnag to a sigpot so panagmatalek tod Katawan ton Jehova.
4 Kasin no maminsan et naliliknam ya agmo sarag ya gawaen iray responsabilidad mo diad panaglingkor ed Dios? Maabig no tepetan tayoy inkasikatayo: ‘Talaga kasin manmamatalek ak ya si Jehova so akauley ed amin a bengatla pian nasumpal so linawa to? Talaga kasin mabulos kon gagawaen so kimey ya pagagawad siak nen Jehova?’ Nailaloan mon iter na Dios so espiritu to ed saramay manmamatalek ed sikato diad interon puso tan ed “saramay manguunor ed sikato bilang manuley.”—Gawa 5:32.
Tinulongan na Masanton Espiritu si Pedro
5. Diad antoran paraan ya naeksperiensyan mismo nen apostol Pedro so pakayari na masanton espiritu antis ni na Pentecostes 33 C.E.?
5 Singa si Maria, naeksperiensyan mismo nen apostol Pedro so pakayari na masanton espiritu antis ni na Pentecostes 33 C.E. Si Pedro tan saray arum nin apostol et inikdan nen Jesus na pakayarin mamapaway na saray demonyo. (Mar. 3:14-16) Tan anggano agmet tanton detalyado so Biblia nipaakar ed saya, mapatnag ya inusar nen Pedro iyan pakayari. Ontan met, sanen pinaasingger nen Jesus si Pedro pian manakar diad tapew na saray danum na Dayat na Galilea, agawaan to iya diad tulong na masanton espiritu. (Basaen so Mateo 14:25-29.) On, agawaan nen Pedro iray makapadinayew a bengatla ta nanmatalek ed tulong na masanton espiritu. Agmanbayag et iter na espiritu ed si Pedro tan ed arum nin disipulo so pakayarin manggawa na dakel ni ran bengatla.
6. Diad tulong na espiritu na Dios, antoy agawaan nen Pedro legan tan kayari na Pentecostes 33 C.E.?
6 Nen Pentecostes 33 C.E., si Pedro tan saray kaiba to et inikdan na masanton espiritu na abilidad a mansalitay lenguahe na saramay dinmayo ed Jerusalem. Kayari to et nampaliwawa si Pedro ed arap na saray totoo. (Gawa 2:14-36) On, sayan too ya no maminsan et matakot tan bengatbengat ya mansalita et awalaay pakpel a manpulong anggano papagyawen tan papasegsegangen. (Gawa 4:18-20, 31) Inusar na Dios so espiritu to pian ikdan si Pedro na nikadkaduman kakabatan. (Gawa 5:8, 9) Sikatoy naikdan ni ingen na pakayarin paolien so inatey.—Gawa 9:40.
7. Antoran bangat nen Jesus so atalosan labat la nen Pedro kayari impakalanaan to?
7 Antis ni na Pentecostes 33 C.E., atalosan la nen Pedro so dakel a katuaan ya imbangat nen Jesus. (Mat. 16:16, 17; Juan 6:68) Balet, wala ray katuaan ya siansian agmalinew ed si Pedro antis na Pentecostes. Alimbawa, agto ni atalosan ya say Kristo et onoli bilang espiritu diad komatlon agew tan agto met atalosan a say Panarian et diad tawen. (Juan 20:6-10; Gawa 1:6) Ni agto anggan naisip ya saray totoo et posiblin magmaliw ya espiritu tan makapiuley diad Panarian ed tawen. Atalosan labat nen Pedro irayan bangat nen Jesus sanen sikatoy nilanaan na masanton espiritu tan apili pian manuley ed tawen.
8. Anton kakabatan so parehon walad saray alanaan tan ‘arum a karnero’?
8 Atalosan labat na saray disipulo nen Jesus iramay bangat ya datin agda natalosan kayari dan naawat so masanton espiritu. Pinuyanan met na saya iray nansulat na Kristianon Griegon Kasulatan pian ipaliwawa iray makapadinayew ya aspekto na gagala na Dios, parad pakagunggonaan tayo met natan. (Efe. 3:8-11, 18) Diad panaon tayo, sarayan katuaan et aaralen tan natatalosan na saray alanaan tan ontan met ed saray ‘arum a karnero.’ (Juan 10:16) Kasin papablien mo so kakabatan tan pakatalos mod Salita na Dios ya niwalad sika lapud tulong na masanton espiritu?
Si Pablo et “Apano na Masanton Espiritu”
9. Antoy agawaan nen Pablo lapud tulong na masanton espiritu?
9 Manga sakey taon kayari Pentecostes 33 C.E., wala ni akaawat na masanton espiritu na Dios. Satan et si Saulo, ya diad saginonor et akabkabat bilang Pablo. Sikatoy tinulongan na espiritu pian nagawaan to ray bengatlan makagunggona anggad panaon tayo. Alimbawa, sikatoy pinuyanan a mangisulat na 14 a libro na Biblia. Singa met ed si Pedro, tinulongan na espiritu na Dios si Pablo pian natalosan tan malinew ton nisulat so nipaakar ed imortalidad tan agnaderal a bilay diad tawen. Panamegley met na masanton espiritu et apapaway nen Pablo iray demonyo, apaabig to iray mansasakit, tan akapaoli ni ingen na inatey! Anggaman ontan, say pakayarin naawat nen Pablo panamegley na masanton espiritu et tinmulong ed sikaton sumpalen so mas importantin asainmin, ya susumpalen met natan na saray lingkor na Dios, balet ta aliwan diad mamilagron paraan.
10. Panon ya tinulongan na masanton espiritu si Pablo ya mansalita?
10 Aminsan, si Pablo et “apano na masanton espiritu” kanian makpel ya akapansalita sumpad sakey a managparles. Mandengdengel so prokunsol na Ciprus ed impantongtong da. Pandinayewan toy imbaga nen Pablo tan inawat toy katuaan, “lapud nikelawan ed bangat nen Jehova.” (Gawa 13:8-12) On, amta nen Pablo ya say espiritu na Dios labat so makatulong ed sikato pian makmakpel ton salitaey katuaan. (Mat. 10:20) Diad saginonor, kinerew tod kongregasyon ed Efeso ya sikatoy ipikasi da pian say “abilidad a mansalita” et niiter ed sikato.—Efe. 6:18-20.
11. Panon ya inggiya na masanton espiritu si Pablo?
11 Say masanton espiritu so tinmulong ed si Pablo ya mansalita, balet wala ray pankanawnawan sinebelan na satan si Pablo ya manpulong ed pigaran lugar. Inggiya na masanton espiritu si Pablo diad saray impanbiahe to bilang misionero. (Gawa 13:2; basaen so Gawa 16:6-10.) Siansia nin igigiya nen Jehova so panagpulong a kimey natan panamegley na espiritu to. Singa si Pablo, amin ya matulok a lingkor nen Jehova et gagawaen day anggaay nayarian da pian makpel tan maseseg dan nipulong so katuaan. Anggaman say pangigigiya na Dios ed sikatayo natan et duma ed paraan na impangigiya tod si Pablo, makaseguro itayon uusaren nin siansia nen Jehova so masanton espiritu to pian iyasingger ed katuaan iray totoon makanepegan.—Juan 6:44.
“Nanduruman Kimey”
12-14. Kasin parepareho so ikukurang na espiritu na Dios ed amin a lingkor to? Ipaliwawa.
12 Seguradon napapaseseg itayo natan sano babasaen tayo ray salaysay no panon ya benendisyonan nen Jehova so kongregasyon na saray alanaan nen inmunan siglo. Diad saman ya panaon, inikdan na masanton espiritu iray Kristiano na nikadkaduma iran abilidad, odino “langkap.” Oniay insulat nen Pablo ed kongregasyon diad Corinto nipaakar ed sarayan langkap: “Natan et walaray nanduruman langkap, balet walay saksakey ya espiritu; tan walaray nanduruman ministeryo, ingen ta walay saksakey a Katawan; tan walaray nanduruman kimey, ingen ta saksakey a Dios so manggagawa ed amin a kimey ed amin a totoo.” (1 Cor. 12:4-6, 11) On, nandurumay paraan na ikukurang na masanton espiritu diad saray lingkor na Dios, depende ed gagala to. Parehon igigiya na masanton espiritu so “melag a pulok” nen Kristo tan say ‘arum a karnero’ to. (Luc. 12:32; Juan 10:16) Balet, aliwan pareparehon lanang so ikukurang na satan diad kada membro na kongregasyon.
13 Alimbawa, saray elder et tinuro na masanton espiritu. (Gawa 20:28) Balet, aliwan amin ya alanaan et manlilingkor bilang elder ed kongregasyon. Anto siri’ labay ya ibaga na saya? Kabaliksan na sayan nanduruma so paraan na ikukurang na espiritu na Dios diad saray membro na kongregasyon.
14 Say espiritu ya mangipapasegurod saray alanaan ya “tinagibi [ira] bilang ananak” na Dios et sikato lanlamang imay inusar nen Jehova pian paolien si Jesus tan ikday imortal ya bilay diad tawen. (Basaen so Roma 8:11, 15.) Satan met ya espiritu so inusar nen Jehova diad impamalsa tod interon uniberso. (Gen. 1:1-3) Satan met so inusar ton amaaligwas ed abilidad nen Besaleel parad kimey ed tabernakulo, angiter ed si Samson na nikadkaduman biskeg, tan tinmulong ed si Pedro diad impanakar tod danum. Agtayo sirin iisipen ya saray alanaan labat so walaan na espirituy Dios, ta say pakalanaan na espiritu et sakey labat ed saray nikadkaduman ikukurang na espiritu. Say Dios so mamipili no siopay lanaan to na espiritu to.
15. Kasin lawas mantultuloy so panaglanay masanton espiritu na Dios? Ipaliwawa.
15 Say masanton espiritu et lawas lan onkikiwas ed saray matoor a lingkor na Dios diad nanduruman paraan. Onkikiwas la itan ed saray lingkor to pigaran libon taon lay apalabas antis to nin inusar so espiritu pian lanaan iray pinili to. Ginmapo so panaglanay espiritu nen Pentecostes 33 C.E., balet ag-itan lawas mantultuloy. Mangangga met lanlamang so panaglanay espiritu, balet ta mantultuloy ya onkiwas so masanton espiritu ed saray lingkor na Dios pian nagawaan day linawa to diad andi-anggaan.
16. Antoy nagagawaan na saray lingkor na Dios natan diad tulong na masanton espiritu?
16 Antoy nagagawaan na saray lingkor na Dios natan diad tulong na masanton espiritu? Oniay ebat na Apocalipsis 22:17: “Ibabaga na espiritu tan say nobya: ‘Gala!’ Tan siopaman ya onderengel et ikuan to komon: ‘Gala!’ Tan siopaman a napgaan et ondago komon; siopaman a malabay et mangala komon na libren danum na bilay.” Diad tulong na masanton espiritu, iyaabawag na saray Kristiano natan so imbitasyon nen Jehova ed “siopaman a malabay” a mangala na danum na bilay. Saray alanaan a Kristiano so mangidadaulo ed sayan kimey, tan mitutulongan iray arum a karnero. Sayan duaran grupo et parehon igigiya na masanton espiritu. Amin da et angisimbolo ed dedikasyon dad si Jehova panamegley na bautismo “ed ngaran na Ama tan ed ngaran na Anak tan ed ngaran na masanton espiritu.” (Mat. 28:19) Tan ipapatnag da met so bunga na espiritu diad kabibilay da. (Gal. 5:22, 23) Singa saray alanaan, manmamatalek met iray arum a karnero ed tulong na espiritu na Dios. Diad tulong na satan, gagawaen day anggaay nayarian dan nawalaay malinis a kabibilay a mamaliket ed Dios.—2 Cor. 7:1; Apoc. 7:9, 14.
Mantultuloy ya Onkerew na Masanton Espiritu
17. Panon mon nipanengneng a walad sika so espiritu na Dios?
17 Balanglan say ilalom et bilay ya andi-anggaan diad tawen odino diad dalin, sarag ya iter ed sika nen Jehova so “pakayari a mas mabiskeg nen say pakayari na too” pian napansiansiam so katooran mo tan naawat moy tumang mo. (2 Cor. 4:7) Nayarin balawen ka na arum lapud pampupulong moy maong a balita na Panarian. Balet, tandaan mo ya “no papabandayen [ka] nisengeg ed ngaran nen Kristo, maliket [ka], ta walad [sika] so maglorian espiritu, salanti, say espiritu na Dios.”—1 Ped. 4:14.
18, 19. Panon kan tulongan nen Jehova panamegley na masanton espiritu, tan anto sirin so determinadom a gawaen?
18 Say masanton espiritu et regalon mabulos ya iiter na Dios ed saramay masimoon ya onkekerew ed satan. Aglabat paaligwasen na satan iray abilidad mo, noagta tulongan to ka met ya gawaey anggaay nayarian mod panaglingkor ed Dios. “Say Dios so mamapabiskeg ed [sika], ya iiter to ed [sika] so pampilalek tan pakayarin manggaway panlabayan to.” Say mablin regalo a masanton espiritu tan saray sagpot tayon ‘ombemben a malet ed salita na bilay’ so ontulong ed sikatayon ‘itultuloy ya pansagpotan so dilin kilalaban tayo tekep na takot tan giwgiw.’—Fil. 2:12, 13, 16.
19 Tekep na sigpot a panagmatalek ed espiritu na Dios, pankimeyan mon maong sirin so antokaman a pagagawa nen Jehova ed sika, paspasyam itan, tan kerew moy tulong to. (Sant. 1:5) Tulongan to ka pian natalosan moy Salita to, nasungdoan mo ray problema ed bilay, tan nipulong moy maong a balita. Oniay insipan nen Jesus: “Mantultuloy kayon onkerew, tan naikdan kayo; mantultuloy kayon mananap, tan makaromog kayo; mantultuloy kayon ontoktok, tan nalukasan kayo.” Kaiba ed saya so ikerew na masanton espiritu. (Luc. 11:9, 13) Kanian, itultuloy mo sirin ya ipikasi ed si Jehova a naalig mo ray matoor a lingkor to nensaman, tan ontan met ed saray lingkor to natan a paigigiya ed masanton espiritu.
Kasin Nipaliwawam?
• Singa si Maria, anton awawey so ipanengneng tayo pian nabendisyonan itayo?
• Panon ya inggiya na espiritu na Dios si Pablo?
• Panon ya igigiya na espiritu na Dios iray lingkor to natan?
[Tepetepet Parad Panagaral]
[Litrato ed pahina 24]
Say espiritu na Dios so tinmulong ed si Pablo pian makpel a makapansalita sumpad sakey a managparles
[Litrato ed pahina 26]
Diad panaon tayo, tutulongan na masanton espiritu iray Kristiano, antokaman so ilalo ra
