“Antokaman so gagawaen yo, gawa yo itan ed interon kamarerwa a singa parad si Jehova.”​—COL. 3:23.

1-3. (a) Lapud imbagat la nen Jesus so bilay to, kabaliksan kasi na satan ya agla kakaukolanen nen Jehova so antokaman ya panagbagat natan? Ipaliwawa. (b) Antoy nayarin itepet tayo nipaakar ed panagbagat natan?

NEN inmunan siglo C.E., impaamta nen Jehova ed saray totoo to ya impanampot la na dondon bagat nen Jesus so Mosaikon Ganggan. (Col. 2:13, 14) Agla nakaukolan so pangiyapay na saray bagat a singa gagawaen na saray Judio diad nilasus lan taon. Asumpal lay gagala na Ganggan bilang ‘manangibangat a mangitonton ed Kristo.’​—Gal. 3:24.

² Balet, agkabaliksan na satan ya agla interesado iray Kristiano ed saray bagat. Diad tua, imbaga nen Pedro a nakaukolan so “mangiyapay na makapaliket iran espiritual a bagat ed Dios diad panamegley nen Jesu-Kristo.” (1 Ped. 2:5) Niarum ni, impalinew nen Pablo a nayarin ipasen ya “bagat” so kada aspekto na bilay na sakey a dedikadon Kristiano.​—Roma 12:1.

³ Kanian, say sakey a Kristiano et nibagan manbabagat no mangiyaapay na pigaran bengatla ed si Jehova odino mangisasakripisyo na pigaran bengatla diad panaglingkor to. Based saray naaralan tayon kakaukolanen ed saray Israelita, panon tayon naseguro a makapaliket ed si Jehova iray bagat tayo natan?

DIAD INAGEW-AGEW YA PANAGBILAY

4. Antoy kaukolan tayon tandaan nipaakar ed inagew-agew a panagbilay tayo?

⁴ Diad inagew-agew ya panagbilay tayo, singa mairap a talosan no panon itayon makapanbagat ed si Jehova diad saray aktibidad tayo. Singa anggapoy koneksion na kimey ed abung, aktibidad ed eskuelaan, trabaho, pitindaan,  tan arum ni diad panagdayew tayo. Balet no indedikam lay bilay mo ed si Jehova odino plaplanoen mon gawaen itan, lawas nonoten a talagan walay epekto na saratan ya aktibidad ed relasyon mod sikato. Kada agew, 24 oras itayon Kristiano. Kaukolan tayon iyaplika iray prinsipyo na Biblia diad amin ya aspekto na bilay tayo. Kanian, oniay impaseseg nen Pablo: “Antokaman so gagawaen yo, gawa yo itan ed interon kamarerwa a singa parad si Jehova, tan aliwan parad totoo.”​—Basaen so Colosas 3:18-24.

5, 6. Antoray nepeg tayon ikonsidera no nipaakar ed inagew-agew ya panangawes tan kondukta tayo?

⁵ Saray inagew-agew ya aktibidad tayo et agkabiangan na sagradon serbisyo. Balet, pinaseseg itayo nen Pablo a mankimey ya “interon kamarerwa a singa parad si Jehova” kanian kaukolan tayon asikasoen so kondukta tayo ed amin a panaon. Panon tayon nagawaan itan? Kasin masimpit so kakikiwas tan panangawes tayo ed amin a panaon? Odino diad saray inagew-agew ya aktibidad tayo, kasin nababaingan tayon ipaamta ya sakey tayon Tasi nen Jehova, lapud saray kondukta o panangawes tayo? Agkomon itan nagawa! Aglabay na saray totoo nen Jehova so manggawa na antokaman ya pakabalawan na ngaran na Dios.​—Isa. 43:10; 2 Cor. 6:3, 4, 9.

⁶ Aralen tayo no panon ya aapektaen na pilalek tayon manbilay ya “interon kamarerwa a singa parad si Jehova” so panagnonot tan kakikiwas tayo. Legan na satan, tandaan a say nepeg ya ibagat na saray Israelita ed si Jehova et samay sankaabigan.​—Exo. 23:19.

NO PANON YA NAAPEKTAAN SO BILAY MO

7. Antoy lalanoren na dedikasyon tayo ed Dios?

⁷ Sanen indedikam so bilay mo ed si Jehova, agta ginawam itan ya anggapoy panduaruwa? Insipan mo a diad amin ya aspekto na bilay mo, iyunam si Jehova. (Basaen so Hebreos 10:7.) Maabig itan ya ginawam. Seguradon apaneknekan mon mismo ya no ikonsideram so linawa nen Jehova ed sakey a pamaakaran tan panggunaetan mon tumboken, lawas sankaabigan iray resulta. (Isa. 48:17, 18) Masanto tan maliket iray totoo na Dios lapud aaligen da ‘may Sakey ya mangibabangat ed sikara.​—Lev. 11:44; 1 Tim. 1:11.

8. Akin ya kaukolan tayon tandaan a say bagat na saray Israelita nensaman et impasen a masanto?

⁸ Saray bagat ya inyapay na saray Israelita ed si Jehova et impasen ya masanto. (Lev. 6:25; 7:1) Say Hebreon termino ya impatalos a “kasantosan” et ipapasabi toy ideya na pagmaliw ya nisian, nikabkabiig, odino pamasanto ed Dios. Pian awaten nen Jehova iray bagat tayo, nepeg ya saratan et nisian tan agkontaminado na mundo. Agtayo aaroen iray bengatlan kabusol na Dios. (Basaen so 1 Juan 2:15-17.) On, kabaliksan  na satan a kaukolan tayon paliisan so pilimog odino pibiang ed saray nayarin pakarutakan tayo diad imaton na Dios. (Isa. 2:4; Apo. 18:4) Kabaliksan met na satan ya agtayo onnenengneng ed saray marutak odino imoral odino abuloyan tayoy isip tayon manpantasya ed saratan a bengatla.​—Col. 3:5, 6.

9. Panon kaimportante so panagtrato na sakey a Kristiano ed arum, tan akin?

⁹ Oniay impaseseg nen Pablo ed saray kapananisiaan to: “Agyo lilingwanan so panggawa na maabig tan say panginabang na saray bengatla ed arum, ta diad panamegley na saratan a bagat et napapaliket a maong so Dios.” (Heb. 13:16) Kanian say pagmaliw ya maomaong tan pangiyugali panggaway kamaongan et ipapasen nen Jehova bilang naabobonan ya bagat. Say maaron panangiyansakit ed arum et pakabidbiran ed saray tuan Kristiano.​—Juan 13:34, 35; Col. 1:10.

SARAY BAGAT ED PANAGDAYEW

10, 11. Antoy panmoria nen Jehova ed ministeryo tan panagdayew tayo, tan antoy nepeg ya epekto na satan ed sikatayo?

¹⁰ Say sakey ed saray paraan a makapanggawa tayoy kamaongan ed arum et diad ‘pangiyabawag na ilalo tayo ed amin a totoo.’ Kasin aanamoten mo so amin a pankanawnawa pian makapantasi? Tinawag nen Pablo iyan importantin kimey bilang “bagat a panangidayew, salanti, say bunga na saray bibil tayo a mangipapakabat ed ngaran [na Dios].” (Heb. 10:23; 13:15; Os. 14:2) Maabig ya nonoten tayo no panon tayon napaaligwas so kalidad na panagpulong tayo tan say karakel na panaon ya uusaren tayod satan. Makatulong iray parte ed Pantitipon Parad Panagserbi pian nagawaan tayo itan. On, lapud say pibibiang tayod lawak na kimeyan tan impormal a panagtasi et “bagat a panangidayew,” salanti, kabiangan na panagdayew tayo, kaukolan tayon iter so sankaabigan tayo. Anggaman nandurumay sirkumstansya tayo, kaslakan lan nanengneng ed karakel na panaon ya uusaren tayod panagpulong so panamabli tayod saray espiritual a bengatla.

¹¹ Regular ya ipapanaon na saray Kristiano so panagdayew da, balanglan diad abung odino diad kongregasyon. Kakaukolanen nen Jehova itan ed sikatayo. Tua ya agtayo la ngingilinan so Sabaton odino regular ya oonlad Jerusalem parad saray piesta. Balet, walay piparaan na saratan ed kabibilay na saray Kristiano. Siansia nin iilaloan na Dios ya itunda tayo ray kimey tayo  pian nipanaon so panaral ed Salita to, pampikasi, tan iyatendid saray aral. Tan responsabilidad na saray ulo na pamilya so pangidaulo ed panagdayew na pamilya ra. (1 Tes. 5:17; Heb. 10:24, 25) Kanian maabig no itepet tayod sarili tayo, ‘Kasin napaaligwas ko ni kalidad na panagdayew ko?’

12. (a) Antoy piparaan na panangiyapay na insenso nensaman ed panaon tayo? (b) Antoy nepeg ya epekto na satan ed saray pikakasi tayo?

¹² Inkanta nen David ed si Jehova: “Pasabien mo so pikakasik ed arap mo a singa insenso.” (Sal. 141:2) Isip mo pan magano iray pikakasim​—no panon kabetbet tan say kalidad na saratan. Inyaliling na libron Apocalipsis iray “pikakasi na saray masanto” ed insenso. Inkuan to a saray naabobonan ya pikakasi et onsasabid si Jehova a singa ambalbalingit tan balibali angob to. (Apo. 5:8) Diad Israel nensaman, say insenso ya regular dan iyaapay ed altar nen Jehova et nepeg a maalwar tan susto so inkagawa to. Abobonan labat itan nen Jehova no iyapay unong ed totontonen ya inter to. (Exo. 30:34-37; Lev. 10:1, 2) Ontan met, no saray impapuson pikakasi tayo et gawaen tayo diad paraan a labay nen Jehova, seguradon awaten to iratan.

PANGITER TAN PANGAWAT

13, 14. (a) Anton kamaongan so ginawa nen Epafrodito tan kongregasyon na Filipos ed si Pablo, tan antoy alikna nen Pablo ed satan? (b) Panon tayon naalig so alimbawa nen Epafrodito tan saray taga Filipos?

¹³ Saray pinansyal a kontribusyon tayo parad sankamundoan a kimey et nayarin ikompara ed bagat, balanglan baleg o melag so niiter tayo. (Mar. 12:41-44) Nen inmunan siglo C.E., imbaki na kongregasyon ed Filipos si Epafrodito ya onla ed Roma pian itaryay pankaukolan nen Pablo. Mapatnag ya angipawit iray kuarta bilang regalo. Aliwan saya so sankaunaan ya impanengneng na saray taga Filipos so inkamabunlok dad si Pablo. Agda labay ya problemaen to ni gastosen to pian mas dakel so panaon ya nausar tod ministeryo. Antoy alikna nen Pablo ed saman a regalo? Tinukoy to itan ya “ambalbalingit, sakey a naabobonan a bagat, a makapaliket ed Dios.” (Basaen so Filipos 4:15-19.) Talagan inapresya nen Pablo so kamaongan na saray taga Filipos, ontan met nen Jehova.

¹⁴ Mipadpara met natan, aapresyaen nen Jehova iray kontribusyon tayo parad sankamundoan a kimey. Sakey ni, isisipan to ya no itultuloy tayon iyuna so interes na Panarian ed bilay tayo, itarya toy amin a nakaukolan tayo, diad espiritual tan pisikal.​—Mat. 6:33; Luc. 6:38.

IPANENGNENG SO PISASALAMAT MO

15. Anto iray bengatlan pisalsalamatan mo ed si Jehova?

¹⁵ Dakerakel so rason tayo pian pisalamatan si Jehova. Agta diad kada agew et nepeg tayon pisalamatan so regalon bilay? Iiter ton amin so nakaukolan tayo pian manbilay​—tagano, kawesen, tan ayaman ontan met ed dagem ya susungapen tayo. Awalaan tayo met na pananisia tan ilalo ed arapen lapud suston pikakabat. On, manepeg labat ya dayewen tan mangiyapay tayoy bagat na panangidayew ed si Jehova lapud sikato so amalsa tan angitarya na amin a nakaukolan tayo.​—Basaen so Apocalipsis 4:11.

16. Panon tayon nipanengneng so pisasalamat tayo ed dondon bagat nen Kristo?

¹⁶ Singa naaralan tayo ed imbeneg ya artikulo, say sankablian a regalo na Dios ed totoo et say dondon bagat nen Kristo. Baleg itan ya ebidensya na panangaroy Dios ed sikatayo. (1 Juan 4:10) Panon tayon nipanengneng so pisasalamat tayod satan? Inkuan nen Pablo: “Say aro na Kristo so mamapakiwas ed sikami, lapud  onia so inisip mi, ya inatey so sakey a too parad amin; . . . tan sikatoy inatey parad amin pian saramay manbibilay et agla ra manbilay parad inkasikaran dili, noagta parad samay sakey ya inatey parad sikara tan pinaoli.” (2 Cor. 5:14, 15) Singa ibabaga nen Pablo ya no talagan aapresyaen tayoy agnaparaan a kaabigan na Dios, usaren tayoy bilay tayo parad kirayewan To tan say Anak To. Nipanengneng tayoy panangaro tan pisasalamat tayod Dios tan si Kristo panamegley na katutulok tayo tan diad seseg tayon manpulong tan manggaway babangatan.​—1 Tim. 2:3, 4; 1 Juan 5:3.

17, 18. Panon ya pinaaligwas na arum so bagat na panangidayew dad si Jehova? Mangiter na alimbawa.

¹⁷ Sarag mo kasin paaligwasey bagat na panangidayew ya iyaapay mod Dios? Kayari dan dinalepdep so amin a kamaongan nen Jehova ed sikara, dakel so apakiwas a manggaway pananguman ed eskedyul da pian mas dakel so panaon dad panagpulong a kimey tan arum ni ran teokratikon aktibidad. Walaray nan-auxiliary payunir na sakey odino pigaran bulan diad sakey taon, tan saray arum et nan-regular payunir. Wala met iray namboluntaryod panagpaalagey na saray pasilidad parad panaglingkor. Agta alay abig iratan a paraan pian nipanengneng so pisasalamat tayo? No duga so motibo tayod panggawad saratan, salanti, pian ipanengneng so apresasyon tan pisasalamat, saratan ya sagradon serbisyo et makapaliket ed Dios.

¹⁸ Bibidbiren na dakel a Kristiano ya akautang irad si Jehova kanian kinmiwas ira. Sakey ed sikara si Morena. Sikatoy pinabaleg ya Katoliko balet ta dakel so tepet to nipaakar ed Dios tan kabaliksan na bilay. Inanap toy ebat ed saratan diad relihyon to tan diad pilosopiya na saray Asyano, balet ta anggapoy nalmo ton makapnek ya ebat. Insan labat apenek so espiritual ya pankaukolan to sanen ginapoan toy manaral na Biblia diad saray Tasi nen Jehova. Misalsalamat si Morena ed si Jehova lapud malinew a naebatan na Biblia so amin a tepet to tan awalaan na maliket a bilay, kanian labay ton ipanengneng itan diad pangusar ed amin a biskeg to diad panaglingkor. Kayari bautismo to, sikatoy tampol ya nan-regular auxiliary payunir, tan sanen inyabuloy la na sirkumstansya to, sikatoy nan-regular payunir. Agawa itan 30 taon lay apalabas, tan natan et siansia nin walad sigpot-panaon a panaglingkor si Morena.

19. Panon mon napaaligwas so panagbagat mod si Jehova?

¹⁹ Siempre, dakel a lingkor nen Jehova so agmakapanpayunir lapud ag-iyabuloy na sirkumstansya ra. Antokaman so nagawaan tayo ed panaglingkor ed si Jehova, sarag tayon amin so mangiyapay na espiritual a bagat ed sikato. Diad kondukta tayo, kaukolan tayon iyaplika iray matunong ya prinsipyo, tan naynay tayon tandaan ya irerepresenta tayoy Jehova ed amin a panaon. Diad pananisia, sigpot itayon manmatalek ed pakasumpal na saray gagala na Dios. Diad maabig iran gawa, mitulongan tayo ed pangiyabawag na maong a balita. Bilang panangipatnag na impapuson pisasalamat tan panangapresya ed amin ya ginawa to parad sikatayo, itultuloy tayoy manbagat ya interon kamarerwa ed si Jehova.

[Tepetepet Parad Panagaral]

[Blurb ed pahina 25]

Lapud kamaongan nen Jehova, kasin napapakiwas kan paaligwasey bagat na panangidayew mo?

[Litrato ed pahina 23]

Kasin aanamoten moy amin ya pankanawnawa pian makapantasi?