“Say salitam et katuaan.”​—JUAN 17:17.

1. Sanen unaan mon akatongtong iray Tasi nen Jehova, antoy naimanom ya duma ed sikara?

NONOT yo pa imay sankaunaan ya impakapitongtong yod saray Tasi nen Jehova. Antoy natandaan yo? Nayarin say ikuan na dakel et, ‘Say pambiliban ko, inusar na samay Tasi so Biblia diad impangebat tod amin a tepet ko.’ Malikeliket itayo ta naamtaan tayoy gagala na Dios ed dalin, kipapasen na saray inaatey, tan say ilalo na saray inad-aro tayon naandi lad bilay!

2. Anto ray pigaran rason akin et aapresyaen mo so Biblia?

² Diad indakel na kakabatan tayo, naaralan tayon aglabat eebatan na Biblia iray tepet nipaakar ed bilay, ipapatey, tan arapen. Imbes, apaneknekan tayo met ya baleg so naitulong na Biblia ed sikatayo nen say anggan anton libro. Say simbawa na Biblia et praktikal tan agbalot ondaan, tan saramay manguunor ed satan et nawalaay maliket a bilay. (Basaen so Salmo 1:1-3.) Manlapu la nensaman, aawaten na saray tuan Kristiano a say Biblia et “salita na Dios, aliwan salita na totoo, ta saya so katuaan.” (1 Tes. 2:13) Aralen tayo natan iray agawa nensaman ya mangipanengneng ed pandumaan na saramay talagan manrerespeto ed Salita na Dios tan saramay agmanrerespeto ed satan.

ARESOLBE KOMPLIKADON PROBLEMA

3. Anton problema so posiblin maneral ed pankakasakey na Kristianon kongregasyon nen inmunan siglo, tan akin ya aliwan mainomay itan a resolbien?

³ Diad inlabas na 13 taon kayarin alanaan so unonan ag-asegat ya Gentil a si Cornelio, walay linmesan problema ya posiblin maneral ed pankakasakey na Kristianon kongregasyon. Ondarakel so Gentil ya nakokombertin Kristiano.  Say tepet et, Kasin kaukolan nin nasegat irayan Gentil unong ed tradisyon na saray Judio antis iran nabautismoan? Parad sakey a Judio, talagan mairap ya ebatan itan a tepet. Saray Judion manguunor ed Ganggan et ag-anggan onloloob ed abung na saray Gentil. No ultimon satan et agda gawaen, di lalo lan agda labay a tratoen ya agi so sakey a Gentil! Napapasegsegang la ray Judion Kristiano ta tinaynan day Judion relihyon. Natan ta aawaten da la ray ag-asegat ya Gentil bilang agagi ra, lalo iran napasegsegang. Tan lalon onloor so pambusol ed sikara na saray membro na Judion relihyon.​—Gal. 2:11-14.

4. Siopa ray nantitipon pian resolbien imay problema, tan anto ran tepet so posiblin iisipen na saray wadman?

⁴ Nen 49 C.E., saray apostol tan mamasiken ed Jerusalem, ya sikaran mismo et asegat, et ‘nantitipon pian pantongtongan iyan bengatla.’ (Gawa 15:6) Sayan miting et aliwan makapaugip ya diskusyon nipaakar ed relihyon, noagta mabilabilay ya pantotongtong nipaakar ed saray bangat na Biblia. Diad sayan miting, imbaga na balang sakey so opinyon to. Panon dan resolbien iyan problema? Kasin abuloyan day personal ya panlabayan odino panaglabi ya mangimpluensyad desisyon da? Kasin alagaren na sarayan apostol tan mamasiken ya ontunda ni panamasegsegang antis iran mandesisyon? Odino kasin manggawa la ray sakey a desisyon ya agda met panisiaan ya duga, pian labat nibagan walay nampapaknaan da?

5. Diad anto ran paraan ya duma imay miting ed Jerusalem nen 49 C.E. no ikomparad saray miting na saray lider na simbaan?

⁵ Diad saray miting na saray lider na simbaan, mabetbet la ’tay awaten na sarayan lider so ideya ya agda met papanisiaan pian labat nibagan walay apampaknaan da. Aliwan ontan so agawa diad samay miting ed Jerusalem. Say desisyon da et talagan nankakasakeyan tan nampapaknaan dan amin. Akin et nagmaliw itan a posible? Lapud anggano nanduruma so opinyon da, amin dan wadman et manrerespeto ed Salitay Dios, tan inusar da so Kasulatan pian naresolbe problema.​—Basaen so Salmo 119:97-101.

6, 7. Panon ya inusar so Kasulatan pian resolbien so isyu nipaakar ed panagpasegat?

⁶ Say tekston tinmulong pian naresolbe problema et samay walad Amos 9:11, 12. Oniay nabasa ditan unong ed impangaon na Gawa 15:16, 17: “Ompawil ak tan iletneg ko lamet so nagban abung nen David; tan apigeren ko iray deral na satan tan ipaalagey ko lamet itan, ta pian saramay nakeraan ed sarayan totoo et masimoon dan anapen si Jehova, pati saray totoo na amin a nasyones, saray totoon tatawagen ed ngaran ko, kuan nen Jehova.”

⁷ Balet, ompan isipen yon agmet asalambit ditan ya agla kaukolan ya segaten iray mananisian Gentil. Tua, ag-itan asalambit, balet ta atalosan na saray Judion Kristiano so punto. Akin? Ta momoriaen na saray Judion Kristiano iray asegat ya Gentil bilang agagi da, aliwan bilang ‘totoo na saray nasyones.’ (Exo. 12:48, 49) Singa bilang, oniay nabasad Ester 8:17 unong ed Bagster’s version na Septuagint: “Dakel ed saray Gentil et nampasegat, tan nagmaliw iran Judio.” Kanian, sanen impropesiya na Kasulatan ya saray nakekeraan ed Israel (saray Judio tan saray asegat ya Judion proselita) pati “saray totoo na amin a nasyones” (saray ag-asegat ya Gentil) et magmaliw ya totoon natawag ed ngaran nen Jehova, malinew so punto. Agla kaukolan a segaten iray Gentil a malabay a magmaliw a Kristiano.

8. Akin et kaukolan na saray Judion Kristiano so pakpel diad samay desisyon ya ginawa ra?

⁸ Lapud tulong na Salitay Dios tan espiritu to, saraman a Kristiano et akagaway desisyon ya “nankakasakeyan tan nampapaknaan” da. (Gawa 15:25) Tua, nayarin panlapuan itan na mas graben panamasegsegang, balet ta makpel  ya sinuportaan na saray matoor a Kristiano itan ya desisyon a base ed Biblia.​—Gawa 16:4, 5.

MAPATPATNAG SO PANDUMAAN

9. Antoy sakey a manunan rason no akin ya alaokan na palson bangat so tuan panagdayew, tan anton importantin doktrina so pinikewet da?

⁹ Impropesiya nen apostol Pablo ya kayari ipatey na saray apostol, say tuan panagdayew et nalaokan na palso iran bangat. (Basaen so 2 Tesalonica 2:3, 7.) Anggan saramay walaan na responsabilidad ed kongregasyon et agmangawat ed “suston bangat.” (2 Tim. 4:3) Oniay impasakbay nen Pablo ed saray mamatatken nen panaon to: “Diad limog yo et walaray lalakin ontalindeg tan mansalita na pikewet iran bengatla pian tangguyoren iray disipulo ya ontumbok ed sikara.” (Gawa 20:30) Ibabaga na The New Encyclopædia Britannica so sakey ed saray manunan rason no akin ya akaloob iray palson bangat. Ibabaga na satan ya wala ray Kristianon nanaral na Griegon pilosopiya tan inusar da itan pian ipaliwaway papanisiaan da. Labay dan ipasirayew so inaral da tan inisip dan lapud saya et nakomberte iray paganon de-aral. Say alimbawa na importantin doktrina ya pinikewet da et say bangat nipaakar ed si Jesu-Kristo. Ibabaga na Biblia ya sikatoy Anak na Dios, balet ta ipipilit na sarayan manisiad Griegon pilosopiya ya sikato so Dios.

10. Panon komon ya aresolbe so isyu nipaakar ed no siopa si Kristo?

¹⁰ Sayan doktrina et pinandebatian diad pigaran miting na saray lider na simbaan. Mainomay komon iyan aresolbe no talagan kinmonsulta irad Kasulatan, balet ta agda itan ginawa. Diad tua, kaslakan ed sikara et wala lay dilin desisyon to antis ni ran manmiting, tan anggapon balot so makapanguman ed satan. Mataltalag ingen ya atukoy so Kasulatan diad saray resolusyon ya apantongtongan ed sarayan miting.

11. Antoy basiyan na saray lider na simbaan diad samay desisyon da, tan akin?

¹¹ Akin et ngalngali agkinmonsulta ed Kasulatan irayan lider na simbaan? Unong ed scholar ya si Charles Freeman, say rason et lapud agda nakuestion iramay mismon imbaga nen Jesus ya mas atagtagey so Dios nen say sikato. Bilang resulta, nagmaliw ya mas importante so tradisyon na simbaan tan saray opinyon na too nen say ibabagay Ebanghelyo. Diad tua, parad dakel a totoo ed sayan panaon tayo, mas importante ni ray salita na Saray Ama na Simbaan nen say Salita na Dios! Nayarin naimanom itan no akapitongtong ka lad sakey a seminarista nipaakar ed doktrina na Trinidad.

12. Antoy impluensya na emperador na Roma ed simbaan?

¹² Say sakey nin sankaimano ed sarayan miting et say impibabali na saray emperador na Roma. Oniay insulat nen Professor Richard E. Rubenstein nipaakar ed samay Miting ed Nicaea: “Talagan pinaboran tan pinayaman nen Constantino [iray obispo]. Ag-asabi sakey taon et impawil odino impaalagey lamet na sayan balon emperador so amin lawarin simbaan da, tan inter to lamet so trabaho tan titulo [da] . . . Inikdan to ray [obispo] na saray kanepegan ya datin inter tod saray paganon papari.” Bilang resulta, “walay pakayari nen Constantino ya impluensyaan odino idikta ni ingen so magmaliw a desisyon diad miting ed Nicaea.” Onia ni inyarum nen Charles Freeman: “Lapud saman ya miting, mas binmaleg so posibilidad ya say emperador et ikdan toy pakayari so Simbaan tan pibalian to ni ingen so doktrina na Simbaan.”​—Basaen so Santiago 4:4.

13. Parad sika, akin et agnaawat na saray lider na simbaan iray malinew a katuaan ed Biblia?

¹³ Agpanisiaan na saray lider na simbaan ya si Jesu-Kristo et Anak na Dios, balet dumay pananisia na ordinaryon totoo. Lapud ag-ira interesadod kayamanan na emperador odino ed  posisyon diad simbaan, mas akalukas so nonot da ed no anton talagay suston ibabaga na Kasulatan. Sakey ya lider na simbaan a si Gregory ya taga Nyssa et oniay impamalaw tod saray ordinaryon totoo diad saman a panaon: “Saray managlakoy kawes, managsalat na kuarta, tan saray aripen et singa ra met ekspertod relihyon. No tepetan mo ra no sampigay salat na kuarta, singa ra pilosopon mangikuan ya say Anak et duma ed Ama. No tepeten mo met no sampigay tinapay, say iyebat da et mas atagtagey so Ama nen say Anak. No tepeten mo no akaparaan lay panames mo, ibaga ran say Anak et pinalsa.” On, aliwan singa saray lider na simbaan, sarag na saray ordinaryon totoo ya ipaliwawa irayan katuaan panamegley na Salita na Dios. No komon ta dinengel labat nen Gregory tan saray kaiba to irayan ordinaryon totoo!

BANSAG YA TINMUBO IRAY “TRIGO” TAN “SISANYAS”

14. Akin a nibaga tayon manlapud unonan siglo a manpatuloy et walan wala ray pigaran tuan alanaan a Kristiano diad dalin?

¹⁴ Diad sakey a parabolo, impaliwawa nen Jesus ya manlapud unonan siglo a manpatuloy, walan wala ray pigaran tuan alanaan a Kristiano diad dalin. Inkompara to ra ed “trigo” ya bansag a tinmubo kaiba na “sisanyas.” (Mat. 13:30) Siempre, agtayo makaseguro no siopa ray indibidual odino grupo ya kabiangan ed saray trigo. Balet ta amta tayon walan wala ray makpel ya angidepensa ed Salita na Dios tan angiwalwal ed saray palson bangat na simbaan. Pantongtongan tayo pa iray pigaran alimbawa.

15, 16. Mangiter na saray alimbawa na lalakin nanrespetod Salita na Dios.

¹⁵ Say sakey ed saraya et say arsobispon si Agobard a taga Lyons, France (779-840 C.E.). Sikatoy nansalita sumpad panagdayew ed imahen, pangingaran ed saray simbaan diad sasanto, tan ed saray agmakasulatan ya ritual tan kagagawa na simbaan. Sakey ed saray kapanaonan to et say obispon si Claudius, ya nansalita met sumpad tradisyon na simbaan tan ed pampikasi ed saray sasanto tan pandayew ed saray reliko. Nen koma 11 ya siglo, say diakonon si Berengarius ya taga Tours, France, et inekal bilang membro na simbaan lapud agto panisiaan so doktrinan transubstantiation (unong ed sayan Katolikon bangat, samay ostia tan alak et mamilagron magmamaliw a literal a laman tan dala nen Kristo.) Imbangat to met a mas superyor so Biblia nen say tradisyon na simbaan.

¹⁶ Duara nin lalaki ya mangaarod katuaay Biblia so nambilay nen koma 12 ya siglo, si Peter ya taga Bruys tan si Henry ya taga Lausanne. Nan-resign si Peter bilang pari ta agto panisiaan ya mitunosan ed Kasulatan so Katolikon bangat ya panagbinyag ed ugaw, transubstantiation, pampikasi parad inaatey, tan panagdayew  ed krus. Lapud saya, sikatoy pinoolan nen 1140. Si Henry balet et sakey ya monghe ya nansalita sumpad aliwan kagagawa na simbaan tan ontan met ed agmakasulatan iran ritual. Sikatoy inaresto nen 1148 ya anggad diad prisoan la inatey.

17. Anton importantin bengatla so ginawa nen Waldo tan saray papatumbok to?

¹⁷ Diad samay panaon ya pinoolan si Peter ya taga Bruys, nianak so sakey a toon diad saginonor et balbaleg so agawaan to pian nikayat so katuaan. Say apelyido to et Valdès, odino Waldo. * Aliwan singa si Peter tan Henry, si Waldo et ordinaryon too labat. Balet ta pabpablien ton maong so Salita na Dios kanian impakerew to ray kaykayarian to tan nanggaway paraan pian nipatalos so pigaran kabiangan na Biblia ed lenguahe na ordinaryon totoo diad southeast France. Agaylay liket na saray totoo ta arengel day mensahe na Biblia diad dilin lenguahe ra, kanian arum ed sikara et impakerew da met iray kaykayarian da tan inusar day bilay da pian inabang ed arum so katuaan. Ag-iya agustoan na simbaan. Nen 1184, sarayan masetseseg ya lalaki tan bibii, ya diad saginonor et akabkabat bilang Waldenses, et inekal bilang membro na simbaan tan pinataynan ed saray kaabungan da. Anggaman ontan, lapud saya et lalon nikayat so mensahe na Biblia diad arum ya lugar. Diad saginonor, saray papatumbok nen Waldo, Peter, tan Henry, tan arum nin inmekal ed simbaan et wala lad nanduruman parte na Europa. Diad tinmutumbok iran siglo, wala ni ray arum ya angidepensa ed katuaay Biblia: si John Wycliffe (manga 1330-1384), William Tyndale (manga 1494-1536), Henry Grew (1781-1862), tan George Storrs (1796-1879).

“SAY SALITA NA DIOS ET AG-ABALOR”

18. Ipaliwawa no antoy metodo na panagaral na saray Estudyante na Biblia nen 1800’s, tan no akin ya epektibo itan.

¹⁸ Anggan antoy gawaen na saray mamubusol ed Biblia, agda sarag ya amperen so ikayat na katuaan. “Say salita na Dios et ag-abalor,” so kuan na 2 Timoteo 2:9. Nen 1870, walay sakey a grupo na saray estudyante na Biblia ya impapuson nanaral pian natalosan so katuaan. Antoy metodo na panagaral da? Unona, walay mantepet nipaakar ed sakey ya tema, insan da itan pantongtongan. Aralen da so amin ya teksto ya mikonektaan ed satan. Sano nampapaknaan da la so pantutunosan na saratan a teksto, mandesisyon ira no antoy ebat ed samay tepet, insan da itan irekord. Maabig iyan paraan na panagaral da ta tinumbok da imay alimbawa na saray apostol tan mamatatken nen inmunan siglo. Makapaseseg so pakaamtan sinegurado na sarayan matoor ya lalaki ya saray papanisiaan da et sigpot ya akabase ed Salita na Dios.

19. Antoy teksto parad taon 2012, tan akin et matukoy itan?

¹⁹ Siansia nin say Biblia so basiyan na pananisia tayo. Satan so rason no akin ya pinili na Mananguley ya Ulop na saray Tasi nen Jehova bilang teksto parad taon 2012 iyan imbaga nen Jesus: “Say salitam et katuaan.” (Juan 17:17) Amin a malabay a makagamor na panangabobon na Dios et nepeg a manbilay unong ed katuaan, kanian komon et gawaen tayoy anggaay nayarian tayon paigiya ed Salita na Dios.

[Paimano ed leksab]

[Tepetepet Parad Panagaral]

[Blurb ed pahina 8]

Say teksto tayo parad 2012: “Say salitam et katuaan.”​—Juan 17:17

[Litrato ed pahina 7]

Waldo

[Litrato ed pahina 7]

Wycliffe

[Litrato ed pahina 7]

Tyndale

[Litrato ed pahina 7]

Grew

[Litrato ed pahina 7]

Storrs