Liknaan ya Makasamal ed Nonot Tayo​—Ibeg

Wala itan ed si Napoleon Bonaparte. Anggan si Julius Caesar. Tan pati si Alexander the Great. Anggano makapanyari tan bantog irayan lalaki, inem-eman day liknaan ya makasamal ed nonot. Walay inibegan na balang sakey ed sikara.

“Inibegan nen Napoleon si Caesar, inibegan nen Caesar si Alexander [the Great], tan panisiaan kon inibegan nen Alexander si Hercules, anta agmet talagan nambilay,” so insulat na English philosopher ya si Bertrand Russell. Nayarin biktimaen na sayan liknaan so anggan siopa, anggano mayamyaman, maomaong, odino maaligwas so bilay to.

Say toon ibeg et ambelat so liknaan tod arum lapud kaykayarian, kayamanan, posisyon, tan arum nin walad sikara. Unong ed sakey ya Biblical reference, say toon ibeg et agto labat labay a niwala ed sikato so bengatlan walad arum, noagta pipilaleken to met a samsamen itan.

Maabig no amtaen tayo no anto ray sengegan na ibeg tan no anto ray resulta na satan. Nagkalalo la, nepeg tayon amtaen no antoy nagawaan tayo pian ag-itayo kontrolen na ibeg.

UGALIN PALOOREN TOY TENDENSIAN ONIBEG

Lapud aliwa itayon perpekto, walay “tendensia [tayon] onibeg,” balet wala ray posiblin mamaloor ed satan a tendensia. (Sant. 4:5) Insulat nen apostol Pablo so sakey ed saratan: “Ag-itayo komon magmaliw a mapaatagey, mangilagyat na panlalaslasan, tan maniibegan.” (Gal. 5:26) No labay tayoy milaslasan odino palumbasan so arum, onloor so tendensia tayon onibeg. Apaneknekan iyan mismo na agagi tayon di Cristina tan José. *

Oniay inkuan nen Cristina, sakey ya regular pioneer: “Naynay ak ya makakaibeg ed arum. Say nenengnengen ko et no antoy walad sikara ya anggapod siak.” Aminsan, akapidungo si Cristina ed manangasikaso na sirkito ra tan ed asawa to. Lapud amta ton mankakaedaran ira nen asawa ton Eric tan parehoy pribilehyo da nensaman, inkuan nen Cristina: “Elder pa met si mister ko! Akin et nala yo itan ya pribilehyo ey, sikami balet anggapo?” Akaibeg si Cristina tan labay ton palumbasay arum kanian agnankontentod kipapasen da tan agto naapresyay maabig ya nagagawaan dan dua nen Eric.

Labay nen José so magmaliw ya ministeryal a lingkor ed kongregasyon. Sanen wala la ray nagmaliw ya MS balet ta sikato et andi, inmibeg tan kinabusol to ’may coordinator da. “Lapud ibeg et binusol ko iyan brother tan kinuestion koy motibo to,” so inamin nen José. “No abuloyan mon kontrolen na ibeg so bilay mo, magmaliw kan makasarili tan agka makanonot na maabig.”

 NO ANTOY NAARALAN TAYOD SARAY ALIMBAWAD BIBLIA

Diad Biblia, dakel so nabasan alimbawa ya onkanan pasakbay ed sikatayo. (1 Cor. 10:11) Nanengneng tayod pigara ed saraya no panon ya ontubod puso so ibeg tan no panon ya nasamalan so bilay na saramay manpakontrol ed satan.

Singa bilang, sinmanok so panguloan ya anak di Adan tan Eva ya si Cain sanen ag-inawat nen Jehova so bagat to balet ta inawat To ’may bagat nen Abel. Wala ni komoy nagawaan nen Cain pian awaten nen Jehova so bagat to, balet ta nampakontrol ed ibeg kanian apatey toy agi to. (Gen. 4:4-8) Agpankelawan ya sikatoy deniskribe na Biblia ya “walad dapag na samay sakey a mauges,” si Satanas!​—1 Juan 3:12.

Inibegan na samploran kuya nen Jose so inkamaasingger tod si ama ra. Lalo ran binusol si Jose sanen inistorya tod sikara imay mapropetikon kugip to. Labay da ni ingen ya pateyen. Diad kaunoran, inlako day Jose bilang aripen tan pinanisia day ama ra ya sikatoy inatey la. (Gen. 37:4-11, 23-28, 31-33) Asabi panaon, inamin day kasalanan da, tan oniay imbaga ra: “Peteg ya akapankasalanan itayo a nipaakar ed agi tayo, ta anengneng tayo so irap na linawa to, nen akikaskasi ed sikatayo, et agtayo labat la dinengel.”​—Gen. 42:21; 50:15-19.

Diad sikara balet di Kora, Datan, tan Abiram, tinmubod puso ra so ibeg sanen inkompara dad kinen Moises tan Aaron so pribilehyo ra. Inakusaan day Moises ya ‘impagmaliw toy inkasikato ya pangulo’ tan ipapasen to kunon sikatoy mas atagey nen say arum. (Num. 16:13) Aliwan tua itan. (Num. 11:14, 15) Si Jehova ya mismo so anurod si Moises. Balet inibegan na sarayan rebelde so posisyon to. Diad kaunoran et pinatey ira nen Jehova lapud ibeg da.​—Sal. 106:16, 17.

Anengneng a mismo nen Arin Solomon so graben epekto na ibeg. Imbaga na sakey a bii ya inatey so anak na samay kaiba to anta say inatey et samay anak to. Legay bista, inmabuloy ni ingen iyan matilan bii ya pankaduaen imay mabilay ya ugaw. Balet, sinegurado nen Solomon ya niiter so ugaw ed samay peteg ya ina.​—1 Ara. 3:16-27.

Talagan grabe so epekto na ibeg. Ipapanengneng na sarayan alimbawad Biblia ya nayarin manresulta itan ed pambusol, ag-inkahustisya, tan pamatey. Sakey ni, anggapo met so mauges a ginawa na saramay inibegan. Wala kasi nagawaan tayo pian agnasamalan na ibeg so bilay tayo? Anto ray nagawaan tayo pian nakontray ibeg?

MABISKEG A PANGONTRA ED IBEG!

Aralen ya aroen tan pablien iray agagi. Pinaseseg nen apostol Pedro iray Kristiano: “Natan ta nilinisan yo la iray kamarerwa yo diad intulok yo ed katuaan a nanresulta ed masimoon a panangaro ed agagi, manaaroan kayon maong manlapud puso.” (1 Ped. 1:22) Balet, anto so aro? Insulat nen apostol Pablo: “Say aro et walaan na andukey a panag-anos  tan mapangasi. Say aro et aliwan maimon, agmanlalastog, agmanpapaatagey, ag-onkikiwas a mabanday, agmanaanap na pankaabigan ton dili.” (1 Cor. 13:4, 5) On, no aralen tayo ya impapuson aroen iray agagi, ekalen na satan so tendensian onibeg. (1 Ped. 2:1) Singa si Jonatan, imbes ya inibegan toy David, ‘inaro ton singa dilin kamarerwa to.’​—1 Sam. 18:1.

Milimog ed saray lingkor na Dios. Inmibeg so kompositor na Salmo 73 ed saray mauges ya mainaway bilay da tan singa anggapoy problema da. Balet, alabanan to itan ya liknaan diad inyakar tod “santuaryo na Dios.” (Sal. 73:3-5, 17) Say impilimog tod saray kapara ton lingkor na Dios so tinmulong ed sikaton naapresya iray bendisyon na ‘iyasingger ed Dios.’ (Sal. 73:28, Maung a Balita) Ontan met so epektod sikatayo no regular itayon milimog ed saray agagi diad saray Kristianon pantitipon.

Panggunaetan so panggaway maong. Sanen anengneng na Dios ya tinmuboy ibeg tan pambusol ed puso nen Cain, oniay imbaga To: “Manggawa ka na maong.” (Gen. 4:7) Diad saray Kristiano, antoy kabaliksan na ‘panggaway maong’? Inkuan nen Jesus ya kaukolan tayon ‘aroen si Jehova a Dios ed interon puso tan ed interon kamarerwa tan ed interon nonot tayo tan aroen tayoy kapara tayon too a singa ed sikatayon dili.’ (Mat. 22:37-39) Say liket ya nalikna tayod pangiyunad panaglingkor ed si Jehova tan itulong ed arum et mabiskeg a pangontrad ituboy ibeg. Say maseseg a pibiang ed panagpulong tan panaggaway babangatan et maabig a paraan pian napanlingkoran tayoy Dios tan saray kapara tayon totoo tan nagamoran tayoy “bendisyon nen Jehova.”​—Uli. 10:22.

‘Miliket ed saray manliliket.’ (Roma 12:15) Akiliket si Jesus ed maabig a resultay impanpulong na saray disipulo to, tan imbaga to ni ingen ya mas baleg ni nagawaan da nen say sikato. (Luc. 10:17, 21; Juan 14:12) Walay pankakasakey tayo ran lingkor nen Jehova. Kanian no walay maabig ya agawaan na sakey, maliket itayon amin. (1 Cor. 12:25, 26) Agta mas maabig sirin no miliket itayod saramay akaawat na kaaruman a responsabilidad, imbes ya onibeg itayo?

AGMAINOMAY A LABANAN!

Nakaukolay tuloytuloy a sagpot pian nalabanay ibeg. Inamin nen Cristina: “Anggad natan et main-inomay ak ya makaibeg. Anggano agko labay iyan liknaan, wadtan nin siansia, kanian kaukolan kon tuloytuloy a labanan.” Ontan met so kipapasen nen José. “Tinulongan ak nen Jehova ya nanengneng iray maabig a kualidad na coordinator mi,” so kuan to. “Talagan baleg so nitulong na maapit a relasyon ed Dios.”

Say ibeg et sakey ed saray “gawa na laman” a kaukolan tayon labanan. (Gal. 5:19-21) No agtayo abuloyan ya kontrolen na ibeg so bilay tayo, magmaliw itayon mas maliket tan napaliket tayoy Aman Jehova.

[Paimano ed leksab]

[Blurb ed pahina 17]

‘Miliket ed saray manliliket’