Makpel dan Inyabawag so Salita na Dios!

Saray tuan Kristiano et makmakpel anggano susumpaen. Nanengneng iya ed saray publikasyon a singa say “Bearing Thorough Witness” About God’s Kingdom tan Jehovah’s Witnesses​—Proclaimers of God’s Kingdom. Singa saray agagi tayo nen inmunan siglo, kekerewen tayod si Jehova diad pikakasi ya iter to komon so espiritu tan tulong to pian makpel tayon niyabawag so salita to.​—Gawa 4:23-31.

Oniay insulat na sakey a brother nipaakar ed panagpulong a kimey nen inmunan sankamundoan a guerra: “Maligligsan imbunog na saray lingkor na Dios so koma-piton volume na Studies in the Scriptures, ya apauloan na The Finished Mystery. Agnaparaan so inkibunog na satan. In-release nen 1918 so Kingdom News No. 1. Sinmublay so Kingdom News No. 2, a mangipapaliwawa no akin ya insebel na saray autoridad so The Finished Mystery. Tinumbokan iya na Kingdom News No. 3. Sarayan publikasyon et malaklaknab ya imbunog na matoor ya alanaan. Talagan kaukolan so pananisia tan pakpel pian nipalima iray Kingdom News.”

Natan, kaslakan lan nipapasal ed ministeryo iray balon manangipalapag na Panarian, balet aliwan lanang ya ontan nensaman. Nanonotan ni na brother a taga Poland so sankaunaan ya impanpulong to nen 1922 diad United States, insulat to: “Lapud agko amtan ipresenta iray literatura tan ngalngali agak makapan-english, basta ak labat inmalagey a bukor ed arap na opisina na sakey a doktor tan tinmoktok. Pinmaway so sakey a nurse. Agkon balot nalingwanan iman ya eksperiensyak ta alaokay nerbiyos so inka-eksayted ko. Nen kuan ko lan lukasay bag ko, abalasubos iray libro ed salian na nurse. Agko la nanonotan no antoy imbagak, balet akapangipalima ak ed sikato na publikasyon. Kaalis ko, nagmaliw ak lan makpel tan aliknak so bendisyon nen Jehova. Diad saman ya agew et dakel so nipalimak ya bokleta ed saman a lugar na panagnegosyoan.”

“Nen manga 1933, uusaren na dakel ya agagi so de-trumpan luluganan pian nikayat so mensahe na Panarian,” so kuan na sakey a sister. Aminsan, kaiba toy sanasawan manpupulong ed kapalandeyan na California, U.S.A. Inkuan to: “Inyakar na brother so de-trumpan luluganan ed medyo atagey a kapalandeyan, pero tinmilak kami ed baley. Sanen in-play to so rekording, singa itan manlalapud tawen. Inanap na saray tagad’man imay brother balet agda naanap. Sanen asumpal lay rekording, nila mi ray totoo tan pinulongan mi ra. Asalik ni amiduan akilad onian kimey tan talagan apaneknekan kon aglabalabay na totoo a dengelen so mensahe tayo. Balet, anggapoy nagawaan da ta sankarengel iray paliwawa diad kaabungan da. Lanang min naiimatonan ya itatarya nen Jehova so dugan metodo  ed dugan panaon. Say pangusar ed de-trumpan luluganan et talagan mankaukolan na pakpel, balet lawas asumpal na satan so gagalan nidayew so ngaran nen Jehova.”

Nen dekada na 1930 tan 1940, inusar ed ministeryo iray phonograph tan inrekord iran paliwawa manlapud Biblia. Onia ni nanonotan na sananey ya agin bii: “Walay sakey a kalangweran a sister ya angusar na phonograph legan a mankakabkaabungan. Sanen in-play to so rekording ed arap na sakey ya abung, sinmyodot imay lakin akan-abung tan indepak to so phonograph. Balet anggapoy anggan sakey a rekord ya aderal. Dugarugan walay taloran lalaki a manguugto ed akaparadan luluganan ya akaimaton ed agawa, kinerew dad samay sister ya iparengel tod sikara so rekording, tan angawat ira na literatura. Lapud satan et singa baliwala la imay aliwliwan agawa.” Talagan kaukolay pakpel pian nasungdoan iray onman a subok.

Inyarum ni na sister: “Nanonotan ko ni imay inggapo na panangipalimay magasin ed karsada nen 1940. Antis na satan a taon, say gagawaen mi et mantataluntonan kamin manmartsa ed sidewalk tan awi-awit mi ray plakard ya akasulat so ‘Sakey a Patit tan Negosyo so Relihyon’ tan ‘Panlingkoray Dios tan si Kristo ya Ari.’ Ontan met, mangiiter kami na libren tracts ed saray totoo. Kaukolay pakpel pian makapibiang ed sayan kimey, balet agawaan na saya so gagalan iyabawag ed publiko so ngaran nen Jehova tan na totoo to.”

“Talagan mairap ya iyopresi iray magasin ed dalan,” so inkuan na sakey nin sister. “Agawa iya sanen grabe so isusumpa ed saray Tasi. . . . Kakkaukolay pakpel pian onalagey ed gilig a sankaegna iray magasin tan ibando iray slogan ya insuherin usaren. Balet matalag so agmi pakapankimey ed Sabado. No maminsan maomaong iray totoo. Balet no arum, mungkogen kami na mansyodot a totoo tan wala ray panaon a kaukolan mi ran paliisan pian agda kami sakitan.”

Anggaman pinasegsegang iray Tasi nen Jehova nen komaduan sankamundoan a guerra, siansia nin makmakpel irad ministeryo. Diad samay 43 ya agew a kampanya manlapud Disyembre 1, 1940 anggad Enero 12, 1941, manga 50,000 a manangipalapag ed United States so angibunog ed ngalngali waloran milyon a bokleta.

Sankanonot ni na saray abayag lad organisasyon na Dios iray apalabas ya subsubok a mankaukolay pakpel. Natandaan ni na arum a diad loob na pigaran taon et paulit-ulit dan ibabagay, Itultuloy tayoy manpulong anggad anggaan! Tan pakapatnagan iya na pakpel da. Agtayo amta no anto nin metodo so usaren pian ipasabi so mensahe na Dios antis a manampot so kaplesan a mauges ya sistema. Balet diad tulong nen Jehova, itultuloy tayon iyabawag so salita to tekep na pananisia tan pakpel.

[Blurb ed pahina 9]

Lawas kaukolan so pakpel pian makapibiang ed kimey a panangipulong ed Panarian