Pansiansiaen so Positibon Espiritu na Kongregasyon

“Niwala komon ed espiritu yo so agnaparaan a kaabigan na Katawan a Jesu-Kristo.”​—FIL. 4:23.

PANON TAYON NIPASESEG SO POSITIBON ESPIRITU ED KONGREGASYON . . .

sano mililimog ed saray agagi?

panamegley na inkakuli tayod ministeryo?

diad pangipaamtad seryoson kasalanan?

1. Akin ya akomendaan so kongregasyon ed Filipos tan Tiatira?

MAIRAP so bilay na saray agagid Filipos nen inmunan siglo. Balet sikaray maiter tan inar-aro da iray kaagian da. (Fil. 1:3-5, 9; 4:15, 16) Kanian oniay imbaga nen apostol Pablo ed konklusyon na sulat tod sikara: “Niwala komon ed espiritu yo so agnaparaan a kaabigan na Katawan a Jesu-Kristo.” (Fil. 4:23) Lapud ontan met so espiritu ya impanengneng na saray agagid Tiatira, oniay imbaga nen Jesu-Kristo ed sikara: “Amtak iray gagawaen mo, tan say panangarom tan pananisiam tan panlilingkor mo tan pansusungdom, tan saray gagawaen mo natan et magmaong ni nen saramay gagawaen mo nensaman.”​—Apo. 2:19.

2. Anto so epekto na awawey tayo ed espiritu na interon kongregasyon?

² Diad panaon tayo, wala met so espiritu odino sankaimanon kualidad na kada kongregasyon. Wala ray kongregasyon ya kabkabat ed makaaro tan maaron espiritu da. Say arum et makapadinayew so inkakuli dad panagpulong tan panamabli rad panagpayunir. No pampelengan na balang sakey ed sikatayo a bayuboay positibon espiritu, baleg so nitulong tayod pankakasakey tan iyaligwas ed espiritual na interon kongregasyon. (1 Cor. 1:10) Balet no negatibo so espiritu tayo, nayarin naimpluensyaan so arum ya makateglep ed espiritual, magmaliw ya malainem-em, tan ompan konsintien da ni ingen so seryoson kasalanan. (1 Cor. 5:1; Apo. 3:15, 16) Anto so sankaimanon espiritu na kongregasyon yo? Antoy nagawaan mo pian napansiansiay positibon espiritu na kongregasyon yo?

IPASESEG SO POSITIBON ESPIRITU

3, 4. Panon tayon nidayew si Jehova diad kongregasyon?

³ Oniay inkanta na salmista: “Ikdan ta ka [Jehova]  na pisasalamat ed loob na baleg a muyongan; idayew ta ka ed utel na saray dakel a totoo.” (Sal. 35:18) Indayew na salmista si Jehova sanen kaiba to ray arum a lingkor na Dios. Saray sinimban aral singa say Panagaral na Panag-bantayan et maabig ya pankanawnawa a nipanengneng tayoy ligsa tan pananisia tayo diad saray komento tayo. Maabig no itepet tayo: ‘Kasin gagawaen koy anggaay nayarian kon mankomento kada aral? Kasin manpaparaan ak a maong pian makapaseseg iray komentok? Bilang ulo na pamilya, kasin tutulongan ko ray ana’ko ya manparaan na komento tan babangatan ko ran onebat ed dili ran salita?’

⁴ Nipanengneng tayon matoor so puso tayo diad maligsan panangansion ed saray aral. Oniay imbaga nen David: “Matoor so pusok, O Dios, matoor so pusok. Mangansion ak, mankanta ak na panangidayew.” (Sal. 57:7, NW) Saray aral et maabig a pankanawnawa pian kantaan tayoy Jehova tekep na matoor a puso. No agtayo ni kabisado so arum ya Kingdom song, maabig no ipraktis tayo iratan no Panagdayew na Pamilya tayo. Labay tayon aligen imay imbaga na salmista ya: “Mankanta ak ed Jehova ed kaleganan na bilay ko; mankanta ak na pandayew ed Dios ko a legan a wala ak ni.”​—Sal. 104:33.

5, 6. Panon tayon nipanengneng so inkamaparawes tan inkamabunlok, tan antoy epekto na satan ed kongregasyon?

⁵ Nipaseseg met so panaaroan ed kongregasyon diad pamarawes tayod saray agagi. Diad sampot a kapitulo na sulat nen Pablo ed saray Hebreo, oniay impaseseg to: “Mantultuloy kayon manaaroan bilang sanaagi. Agyo lilingwanan so panagparawes.” (Heb. 13:1, 2) Say sakey a paraan ya nipanengneng tayoy panagparawes et diad panangkailid saray ombiabiahen manangasikaso tan asawa ra odino saray walad full-time ed kongregasyon. Imbitaan tayo met iray abalo, pamilyan saksakey lay ateng da, odino arum nin agagi diad panagdayew na pamilya tayo, odino mangan ed abung tayo pian napaseseg tayo ra.

⁶ Ingganggan nen Pablo si Timoteo ya pasesegen to ray agagi “a manggawa ra na maong, magmaliw iran mayaman ed saray maabig a gawa, mabunlok, akaparaan a manginabang, a maalwar iran mantipon  parad inkasikara na sakey a maabig a pundasyon parad arapen, ta pian makabemben iran malet ed peteg a bilay.” (1 Tim. 6:17-19) Pinaseseg nen Pablo iray kaagian to ya aralen day inkamabunlok. Sarag tayon gawaen iya anggano gawat. Singa bilang, no walay luluganan yo, sarag yon paluganen iray agagi paonlad teritorya tan Kingdom Hall. Diad saramay milulugan balet ey? Nipaseseg day positibon espiritu ed kongregasyon no ipanengneng day pisasalamat da, nayarin diad pitulongan dad ombibilin gastos ed gasolina. Ontan met, nipalikna tayon papablien tan inad-aro tayo ray agagi no mangigana tayoy panaon parad sikara. No manggagawa tayoy maabig ed saray “kapananisiaan tayo” tan mabulos tayon usarey panaon tan kaykayarian tayo parad sikara, aglabat onelet so panangaro tayod saray agagi noagta makatulong tayo met ed pamasiansiay maaro tan positibon espiritu na kongregasyon.​—Gal. 6:10.

7. Panon a makatulong ed positibon espiritu na kongregasyon so pagmaliw a tuan kaaro ya napansekretoan?

⁷ Onelet met so bedber na panangaro tayod agagi no panggunaetan tayoy magmaliw a tuan kaaro tan agtayo mangikayat na sekreto. (Basaen so Uliran 18:24.) Say tuan kaaro et napansekretoan. No mabulos ya naibesngaw ed sikatayo na sakey ya agi so walad kanonotan to ta matalek ya agtayo itan ibagad arum, lalon onelet so bedber na aroan. No panggunaetan tayoy magmaliw a tuan kaaro ya napansekretoan, makatulong tayo pian say kongregasyon et magmaliw a singa maaron pamilya.​—Uli. 20:19.

MAGMALIW A MASESEG ED MINISTERYO

8. Antoy insimbawa nen Jesus ed saray taga Laodicea, tan akin?

⁸ Oniay imbaga nen Jesus ed kongregasyon diad Laodicea: “Amtak iray gagawaen mo, ya aliwa kan ambetel tan aliwa ka met ya ampetang. Komon ta ambetel ka odino no andi et ampetang ka. Kanian, lapud malainem-em ka tan agka ampetang tan agka met ambetel, iyula ta ka.” (Apo. 3:15, 16) Kulang so seseg na saray Kristianod Laodicea diad ministeryo. Satan ya awawey da et nayarin akaapektod mismon ulopan da. Kanian oniay maaron insimbawa nen Jesus ed sikara: “Amin iramay aaroen ko et babaaten tan didisiplinaen ko. Kanian magmaliw kan maseseg tan magbabawi ka.”​—Apo. 3:19.

9. Panon ya naapektoan na seseg tayod ministeryo so espiritu na kongregasyon?

⁹ Pian mansiansian positibo so espiritu na kongregasyon, kaukolan tayon imanoen so seseg tayod panagpulong. Inorganisa so kongregasyon pian anapen iray kinmarneron totoo ed teritorya tan tulongan iran onaligwas ed espiritual. Kaukolan sirin  ya no mibibiang tayod panaggaway babangatan et maligsa itayo a singa si Jesus. (Mat. 28:19, 20; Luc. 4:43) No aruman tayoy seseg tayod ministeryo, mas onelet so pankakasakey tayo bilang ‘kakimeyan na Dios.’ (1 Cor. 3:9) Diad lawak na kimeyan, naimatonan tayoy pangidepensa na saray agagi ed pananisia ra tan say panamabli rad espiritual iran bengatla, kanian lalon onaralem so panangaro tan respeto tayod sikara. Ontan met, say panlingkor ed ministeryo ya “benebenek” et makatulong ed pankakasakey na kongregasyon.​—Basaen so Sofonias 3:9.

10. Antoy epekto na pamaaligwas tayod kualidad na ministeryo tayo ed espiritu na agagi ed kongregasyon?

¹⁰ Saray sagpot tayon paaligwasey kualidad na ministeryo tayo et walaan na maabig ya epektod arum. Lalo itayon onligsa ed ministeryo no ipanengneng tayoy personal ya interes ed saray pupulongan tayo tan panggunaetan tayon sabiey puso ra. (Mat. 9:36, 37) No maligsa itayod panagpulong, magmaliw met a maligsa iray kaiba tayo. Imbaki nen Jesus iray disipulo to ya asanderwa, aliwan asansakey. (Luc. 10:1) Lapud satan, aglabat ira akapanpapabiskegan tan akaaral ed sakey tan sakey, noagta lalon sinmeseg irad ministeryo. Agta naliliketan itayo met ya miulop ed saray maseseg a manpulong? Naalisan itayo na seseg da tan napabiskeg itayon mantultuloy a manpulong.​—Roma 1:12.

PALIISAY PANAGREKLAMO TAN PANGIYAMOT ED KASALANAN

11. Anton espiritu so impanengneng na saray Israelita diad panaon nen Moises, tan antoy resulta na satan?

¹¹ Pigay simba ni labat so apalabas kayarin nagmaliw a nasyon iray Israelita, ginapoan da lay nanmeremere, odino nanreklamo. Lapud satan et nanrebelde irad si Jehova tan ed saray representanti to. (Exo. 16:1, 2) Dagdaiset ed saramay Israelitan tinmaynan ed Ehipto so akasabid Insipan a Dalin. Anggan si Moises et agnaabuloyan ya onloob lapud negatibon reaksion tod mauges ya awawey na saray Israelita! (Deu. 32:48-52) Antoy nepeg tayon gawaen pian agtayo nabiktima na negatibon espiritu?

12. Panon tayon napaliisay magmaliw a mareklamo?

¹² Kaukolan tayoy manalwar pian ag-ontubod puso tayoy mareklamon ugali. Napaliisan tayo itan no bayuboan tayoy inkamapaabeba tan respetoen tayo ray mangidadaulo. Balet, makatulong met no pilien tayon maong iray piulopan tayo. Seguradon mauges so epekto na saray makapuy a panagligliwaan tan ag-alimitaan a pipiulop ed saray katrabaho o kaeskuela ya agmandadayew ed si Jehova. Maabig sirin no limitaan tayoy piulop ed saray totoon negatibo tan rebelyoso.​—Uli. 13:20.

13. Anto so arum nin makaderal ya epekto na inkamareklamo ed espiritualidad na kongregasyon?

¹³ Say inkamareklamo et nayarin deralen to met so espiritualidad na kongregasyon. Singa bilang, nayarin apektaen na satan so deen tan pankakasakey na agagi. Niarum ni, aglabat nasakitan so liknaan na agagi no manmeremere tayo sumpad sikara noagta ompan mansumpal ni ingen itan ed kasalanan ya panagpauges tan sobran pambusol. (Lev. 19:16; 1 Cor. 5:11) Wala ray managmeremere diad inmunan siglon kongregasyon ya “agda bibidbiren so pananguley tan mansasalita ra na mauges ed saray pinagalangan na Dios.” (Jud. 8, 16) Seguradon aglabay na Dios so panmeremere sumpad saray walaan na responsabilidad ed kongregasyon.

14, 15. (a) Antoy epektod kongregasyon no paulyan ya mantultuloy so sakey a seryoson kasalanan? (b) Antoy nepeg tayon gawaen no naamtaan tayon walay iyaamot na agi ya seryoson kasalanan?

 ¹⁴ Panon to no naamtaan mon walay seryoson kasalanan ya iyaamot na sakey ya agi, singa say alabas a kakainum na alak, panagbantay na pornograpiya, odino manggagaway imoral? (Efe. 5:11, 12) No pappaulyan tayo itan, naamper so mabulos ya iyagus na masanton espiritu nen Jehova tan naderal so deen na kongregasyon. (Gal. 5:19-23) Imbaga nen Pablo ed saray agagid Corinto ya kaukolan dan ‘ekalen so daan a lebadura.’ Ontan met natan, nepeg ya ekalen ed kongregasyon so antokaman ya mauges ya impluensya pian napansiansiay positibon espiritu. Antoy nagawaan mo pian napansiansiay deen na kongregasyon?

¹⁵ Singa nibaga la, nepeg ya napansekretoan itayon kaaro, lalo la no imbaga na kaaro tayo so walad kanonotan tan liknaan to. Makasakit na liknaan tan talagan makapuy so resulta no ikayat tayoy sekreto na arum! Anggaman ontan, no walay akagaway kasalanan, kaukolan ya nipaamta itan ed saray elder ta unong ed Kasulatan et responsabilidad day pangasikasod satan. (Basaen so Levitico 5:1.) Kanian no naamtaan tayon akagaway seryoson kasalanan so sakey ya agi, pasesegen tayon ipatua tod saray elder tan patulongan. (Sant. 5:13-15) Balet no agto itan ginawa diad rasonablin karukey na panaon, kaukolan a sikatayo lay mangireport ed satan.

16. Panon a naprotektaan so kongregasyon no ireport tayoy seryoson kasalanan?

¹⁶ Say Kristianon kongregasyon et pasen na tuan espiritual a kaligenan, kanian kaukolan tayoy mitulongan pian protektaan itan diad pangireport ed seryoson kasalanan. No natulongan na saray elder imay nankasalanan ya namoriay inkaseryosoy ginawa to, magbabawi, tan awaten toy panangipetek, agla napeligro so espiritu na kongregasyon. Panon to balet no agmagbabawi so managkasalanan tan agto awatey maaron simbawa na saray elder? Sikatoy nadispelo, diad ontan et naekal so makaderal ya impluensya to tan napansiansiay positibon espiritu na kongregasyon. (Basaen so 1 Corinto 5:5.) Responsabilidad sirin na balang sakey ed sikatayo so onkiwas pian nipaamtad saray elder so seryoson kasalanan, mitulongan ed sikara, tan protektaay pankaabigan na saray agagi tayo.

IPASESEG SO “PANKAKASAKEY ED ESPIRITU”

17, 18. Antoy ontulong ed sikatayo pian ‘napansiansiay pankakasakey ed espiritu’?

¹⁷ Lapud inaral na saray inmuunan papatumbok nen Jesus iray ‘bangat na saray apostol,’ akatulong irad pankakasakey na kongregasyon. (Gawa 2:42) Inapresya day Makasulatan iran simbawa tan instruksion na saray mamatatken. Ontan met natan, mikokoopera iray elder ed matoor tan makabat ya aripen a klase, kanian amin tayo ed kongregasyon et napapaseseg tan natutulongan ya mansiansian nankakasakey. (1 Cor. 1:10) No manpapasakop itayod saray base ed Biblian instruksion na organisasyon nen Jehova tan tutumboken tayoy panangiwanwan na saray elder, papaneknekan tayon ‘gagawaen tayoy anggaay nayarian tayon napansiansiay pankakasakey ed espiritu diad bedber na kareenan.’​—Efe. 4:3.

¹⁸ Mitulongan tayo sirin pian napansiansiay maligsa tan positibon espiritu na kongregasyon. No ontan so gawaen tayo, makaseguro itayon ‘niwala so agnaparaan a kaabigan na Katawan a Jesu-Kristo ed espiritu’ ya ipapanengneng tayo.​—Fil. 4:23.

[Tepetepet Parad Panagaral]

[Litrato ed pahina 19]

Kasin mangipaparaan kay makapaseseg iran komento pian napansiansiay positibon espiritu na kongregasyon?

[Litrato ed pahina 20]

No ipraktis tayo ray Kingdom song, makatulong tayod positibon espiritu na kongregasyon