Sanen si Charlotte White, sakey a sigpot-panaon a managpulong et linmad Louisville, Kentucky, U.S.A., sikatoy pantotongtongan na saray totoo lapud awit ton nandalig a maleta.

Say taon ed saman et 1908, tan si Sister White et sankaimano na saray totoo lapud awit ton balon imbension​—say Dawn-Mobile. Inkuan ton, “pantotongtongan itan na saray totoo tan lapud satan et sankaimano da ak la laingen.”

Amoria na saray Estudyante na Biblia, datin tawag ed saray Tasi nen Jehova, a kaukolan dan inabang so katuaan a maseet dan inaral ed Kasulatan. Dakel so awalaan na kakabatan ed Biblia diad impanaral dad saray serye na libron Millennial Dawn (a diad saginonor et tinawag a Studies in the Scriptures). Saramay Kristianon malabay tan makayarin onlad saray ararawin pasen​—diad saray baley tan baryo—​et angiyopresi na “Helping Hands for Bible Students” (kabkabat a tawag ed saray serye na libron Millennial Dawn) ed saray interesadon manbasa.

Nen 1908, iyoopresi di Sister White tan arum nin makukulin managpulong na Panarian iyan libro a walaan na anemiran volume a say apis to et abel, tan say bili to et $1.65 (U.S.). Imbes ya iter dan tampol so libron Dawns, alaen da nin unona iray order insan ira ompawil​—a kaslakan et diad agew na sueldo—​pian i-deliver iray libro tan singilen so bayar. Balbalawen na sakey ya sumusumpa so libro lapud mamurmura itan!

Nanonotan ni nen Malinda Keefer a say naaala ton order ed kada simba et duanlasus anggad talonlasus a libro. Balet lapud dakel so interesadod libron Dawns, walay linmesan problema. Say komanem a volume labat na satan et walaan la na 740 a pahina! Oniay  imbaga na The Watch Tower, “say limamplon libro et 18 kilo lay kabelat to,” kanian no i-deliver iratan et “talagan ambelat” lalo la parad agagin bibii.

Pian naresolbe so problema, nanggaway Brother James Cole na napangiluganay maleta. Say frame na saya walaan na duaran dalig a nayarin ipeket ed maleta panamegley na saray screw, tan nikupit. Natan ta agto la kaukolan ya sakbaten iray karton a napnoy libro, oniay inkuan nen Brother Cole: “Agla onsakit iray takeb ko.” Impanengneng to iyan balon kagawaan nen 1908 ed kombension na saray Estudyante na Biblia diad Cincinnati, Ohio. Diad kada sampot na crossbar et aka-ukit so salitan Dawn-Mobile, lapud say manunan karga na satan et saray volume na Millennial Dawn. No eksperto ka lan mangusar ed satan, mainomay lay pangibiahe ed saray maletan napnoy libro anggan sakey a lima labat so usaren. Nayarin i-adjust so Dawn-Mobile dependid katagey na mangusar, tan nayari itan ya usaren anggan diad agsementadon dalan. Kayari sanagew ya impanpulong, nayarin ikupit iray dalig pian mainomay a bitbiten odino ilugan ed saray streetcar.

Say presyo na Dawn-Mobile et $2.50 (U.S.). Balet libre itan ed saray agagin bibii a walad sigpot-panaon a serbisyo. A singa nanengneng ed litrato, sarasarag ya itulak nen Sister Keefer so Dawn-Mobile a napnapnoy libro anggan sakey a lima labat so usaren to, legan a bitbit na sakey a lima to so bag a mankargay libro. Lapud dakel so nalmo ton interesado ed sakey a baley a walaay panagminaan diman ed Pennsylvania, U.S.A., diad loob na sanagew et sikatoy mamitlo odino mamipat ya ondadalan ed sakey a taytay pian i-deliver iray libro.

Nen dekada ’80, naimbento na sakey a piloto so maletan walaan na dalig a mabetbet la natan a nanengneng diad saray airport tan syudad. Balet manga sanlasus taon lay apalabas, inusar na saray makukulin Estudyante na Biblia so Dawn-Mobile. Nayarin naliliketan ira legan iran sankanengneng na totoon mangitutulak ed Dawn-Mobile pian inabang iray katuaan a walad Biblia.

[Blurb ed pahina 32]

Si Sister Keefer et mamitlo odino mamipat ya ondadalan ed sakey a taytay pian i-deliver iray libro diad loob na sanagew

[Blurb ed pahina 32]

Asolusyonan na satan so problemad pangideliver na Dawn