Agmo Lilingawen Iray “Walad Benegan”

“Say toon ombemben ed lukoy tan onlingaw ed saray walad benegan et agmakanepegan ed panarian na Dios.”​—LUC. 9:62.

ANTOY EBAT MO?

Akin et nepeg tayon ‘nodnonoten so asawa nen Lot’?

Anto ran taloran bengatla so agtayo nepeg a lingawen?

Panon tayon makapibansag ed iyaaligwas na organisasyon nen Jehova?

1. Antoy impasakbay nen Jesus, tan anto so nitepet tayo?

“NODNONOT yo so asawa nen Lot.” (Luc. 17:32) Satan ya pasakbay nen Jesu-Kristo, ngalngali 2,000 taon lay apalabas et nagkalalo lan importante natan. Balet, antoy labay ya ibaga nen Jesus ed satan a seryoson pasakbay to? Agto la kaukolan ya ipaliwawa ni itan ed saray Judion katongtong to. Amta ray agawad asawa nen Lot. Legan ya ontatakas ed Sodoma so pamilya nen Lot, ag-inunor na asawa to so ganggan ya ag-onlilingaw, kanian nagmaliw a pungol na asin.​—Basaen so Genesis 19:17, 26.

2. Akin et linmingaw so asawa nen Lot, tan antoy resulta na agto intulok?

² Balet, akin et linmingaw so asawa nen Lot? Kasin labay ton nanengneng no antoy nagagawa? Kasin agmanisia odino maletey so pananisia to? Odino pansinayangan to iray bengatlan atilak tod Sodoma? (Luc. 17:31) Antokaman so rason, abalang toy bilay to lapud agto intulok. Nonot mo pa itan. Sikatoy inatey diad samay agew ya dineral iray mauges a totoo ed Sodoma tan Gomorra. Agpankelawan ya imbaga nen Jesus: “Nodnonot yo so asawa nen Lot”!

3. Panon ya indanet nen Jesus so agtayo ilingaw?

³ Diad panaon tayo, importante met so agtayo ilingaw, a singa panangibaga. Indanet iya nen Jesus sanen katongtong To imay lakin angibagan manpatanir ni ed pamilya to antis a magmaliw ya disipulo. Inkuan nen Jesus: “Say toon ombemben ed lukoy tan onlingaw ed saray walad benegan et agmakanepegan ed panarian na Dios.” (Luc. 9:62) Kasin is-istrikto odino agmakatunongan ed saya si Jesus? Andi, ta amta to ya manbabaraan labat imay laki pian nalikiray responsabilidad. Tan tinukoy itan nen Jesus bilang ilingaw ed  saray “walad benegan.” Anto kasi nagawa no say toon manbabaka et onlingaw a magano odino ikbanan toy lukoy to tan ombeneg? Lapud ag-akasentroy imano tod gagawaen to, nayarin aliwan maptek so panagbaka to.

4. Iner tayo nepeg ya isentro so mata tayo?

⁴ Imbes ya imanoen tayo so apalabas, nepeg tayon isentroy mata tayo ed arapen. Malinlinew ya imbaga na Uliran 4:25: “Saray matam et nepeg ya onnengneng a diretso, on, nepeg mon iteen iray matam ed arapan mo.”

5. Akin et nepeg ya agtayo imanoen so apalabas?

⁵ Akin et nepeg ya agtayo imanoen so apalabas? Lapud manbibilay tayo la ed “kaunoran iran agew.” (2 Tim. 3:1) Tan aliwa labat lan duaran mauges a syudad so asingger lan deralen na Dios noagta interon sistema na mundo. Antoy gawaen tayo pian agtayo naalig imay agawad asawa nen Lot? Kaukolan tayon amtaen no anto ray nayarin pakatuksoan tayon lingawen. (2 Cor. 2:11) Pantongtongan tayo sirin no anto iratan tan no antoy gawaen tayo pian agnisentroy isip ed saratan.

MALIKET YA APALABAS

6. Akin a no maminsan et agnapanmatalkan so memorya tayo?

⁶ Say sakey a peligro et say aliwan panmoria ed apalabas. No maminsan, agnapanmatalkan so memorya tayo. Ompan agtayo naam-amtaan ya palelemewen ti’ la manaya iray problemad apalabas tan papapawayen ya mas maliket ni bilay nensaman. Sayan lingon panagnonot et nayarin pansengegan na pampirawat ed ipapasen tayon maliket ya apalabas. Balet oniay impasakbay na Biblia: “Agmon balot itetepet, ‘Akin et maong ni kipapasen na bilay nensaman nen say natan?’ Aliwa yan tepet na makabat a too.” (Ecl. 7:10, Maung a Balita) Akin et mapeligro so ontan a panagnonot?

7-9. (a) Antoy agawa ed saray Israelita diad Ehipto? (b) Anto ray sengegan na panliket na saray Israelita? (c) Akin et nannguro-nguro ra?

⁷ Imanoen no antoy agawad saray Israelita ed panaon nen Moises. Diad gapo et maong so impantrato na saray taga-Ehipto ed sikara, balet sanen inatey lay Jose, “angipasen iray Ehipsio na saray opisyal a mamairap ed saray Israelita. Impankimey da ra na ambelat.” (Exo. 1:11, MB) Ag-abayag, ingganggan nen Faraon ya ipapatey iray anak na saray Israelita pian ag-ira ondakel. (Exo. 1:15, 16, 22) Kanian agla pankelawan ya imbaga nen Jehova ed si Moises: “Peteg ya anengneng ko so ermen na totook a wadman ed Ehipto, et dinengel ko so tagleey da lapu ed saray kapatas da, ta amtak so kaermenan da.”​—Exo. 3:7.

⁸ Kasin naiimadyin moy liket na saray Israelita sanen papaway la rad dalin ya angaripen ed sikara? Anengneng day makapadinayew a pakapanyari nen Jehova sanen indapo to so Samploran Salot ed mapaatagey a Faraon tan ed totoo to. (Basaen so Exodo 6:1, 6, 7.) Diad tua, aglabat ira inabuloyan na saray Ehipsio ya onalis, noagta dinagdag da ra. Inikdan da ni ra ingen na dakerakel a balitok tan pilak a singa da ‘nilakseban iray Ehipsio.’ (Exo.  12:33-36) Lalon aliketan iray totoo na Dios sanen anengneng dan inatey si Faraon tan saray militar to ed Ambalangan Dayat. (Exo. 14:30, 31) Seguradon makapabiskeg na pananisia so pakanengneng ed ontan iran makapadinayew ya inkagawa!

⁹ Balet, ag-abayag kayari na samay mamilagron impakaliktar da, nannguro-nguro ra. Akin ey? Lapud naakan! Ag-ira nankontento ed intarya nen Jehova tan nanreklamo ra: “Nanonotan mi so sirasira a sinira mi ed Ehipto ya andi bayar, saray pipino, tan saray [pakwan], tan saray kutsay, tan saray lasona, tan bawang. Balet nalelenes so kamarerwa mi natan; anggapo so antokaman a nanengneng noag saya labat so mana.” (Num. 11:5, 6) On, apikewet so panmoria da, ya anggad punton labay da lay ompawil ed dalin ya angaripen ed sikara! (Num. 14:2-4) Nilingaw na saray Israelita so apalabas tan abalang day panangabobon nen Jehova.​—Num. 11:10.

10. Antoy naaralan tayod saray Israelita?

¹⁰ Antoy naaralan tayod saya? Sano naiirapan tan naproproblema, agtayo isesentroy imano tayod saray ipapasen tayon marakep ya apalabas​—anganko et anggan sanen antis ti’ nin naamtaan so katuaan. Tua, aliwan makapuy so pandalepdep ed saray naaralan tayod apalabas iran eksperiensya odino tariwaen ed nonot iray mararakep ya agawad bilay. Balet, kaukolan a balanse odino realistiko so panmoria tayo ed apalabas. Ta no andi, mas onloor labat so pakakadismaya tayod kaplesan a sirkumstansya tayo tan natukson pawiley datin kabibilay.​—Basaen so 2 Pedro 2:20-22.

SARAY INSAKRIPISYOM NENSAMAN

11. Panoy pangipapasen na arum ed saray insakripisyo da nensaman?

¹¹ Makapaermen, nilingaw na arum iramay apalabas ya insakripisyo ra tan impasen da iratan ya asayang a pankanawnawa. Ompan nensaman et walay pankanawnawam a mangalay atagey ya edukasyon, magmaliw a prominente, odino onyaman, balet nandesisyon kan ibeneg iratan. Inikbanan na dakel ya agagi tayo iray atagey a posisyon ed trabaho, pagmaliw a sikat ed industriya na pelikula tan musika, edukasyon, odino isports. Ingen ta linmabas so panaon tan agni sinmabi so anggaan. Sika ey, kasin pansisinayangan mo ray nayarin agawa komon no agmo iraman insakripisyo?

12. Antoy impangipasen nen Pablo ed saray inikbanan to?

¹² Baleg so insakripisyo nen apostol Pablo pian magmaliw a patumbok nen Kristo. (Fil. 3:4-6) Antoy impangipasen to ed saray inikbanan to? Oniay inkuan to: “Ipapasen ko met so amin a bengatla bilang anggapoy kakanaan nisengeg ed mabmablin pikakabat ed si Kristo Jesus a Katawan ko. Nisengeg ed sikato et agko kawkawanan a naandi so amin a bengatla tan impasen ko iratan bilang dakerakel a dutak, ta pian nagamoran koy Kristo.” *  (Fil. 3:7, 8) No panon a say toon angibantak na basura et agto kawkawanan itan, agmet panermenan nen Pablo iray insakripisyo to. Agto la iraman impasen a makanakana.

13, 14. Panon tayon naalig si Pablo?

¹³ Antoy makatulong no nalilikas tayon pansinayangan tayo ray ipapasen tin apalampas iran oportunidad? Aligen tayoy Pablo. Panon? Pablien no antoy walad sika natan. Niwala lad sika so maapit a relasyon ed si Jehova tan manmamatoor kad sikato. (Heb. 6:10) Wala tay materyal a bengatlan niyopresi na mundo a makapipara ed saray espiritual a bendisyon ya nagagamoran tayo natan tan diad arapen?​—Basaen so Marcos 10:28-30.

¹⁴ Wala ni sinalambit nen Pablo a makatulong ed sikatayo pian makapanmatoor. Imbaga ton ‘nilingwanan to ray bengatlan binenegan to la tan dinampot to ray bengatlan walad arapen to.’ (Fil. 3:13) Imanoen ya impabitar nen Pablo so duaran importante a gawaen. Unona, kaukolan tayon lingwanan iray bengatlan binenegan tayo la, ya agtayo sasayangen so sagpot tan panaon diad masyadon pampaga ed saratan. Komadua, singa say bumabatik ya akasabid finish line, kaukolan a dampoten tayo ray bengatlan walad arapen, tan isentroy nonot ed satan.

15. Antoy nagunggona tayo no dalepdepen tayo ray alimbawa na saray matoor a lingkor na Dios?

¹⁵ Sano dalepdepen tayo ray alimbawa na saray matoor a lingkor na Dios nensaman tan natan, mas napaseseg tayon mantultuloy ya onnengneng ed arapen imbes a diad apalabas. Singa bilang, no ninodnonot di Abraham tan Sara so Ur, “wala komon so pankanawnawa ran ompawil.” (Heb. 11:13-15) Balet ag-ira pinmawil. Ontan met, mas baleg ni tinaynanan nen Moises ed Ehipto nen say siopaman ya Israelita. Balet, anggapoy pakabasaan a pansinayangan to iraman. Imbes, ibabagad sikatayo na Biblia ya say “napabanday bilang Sakey a Nilanaan et impasen ton kaykayamanan a babaleg ni nen say kaykayamanan na Ehipto; ta akateen so ilalo to ed pakaawat ed tumang.”​—Heb. 11:26.

ALIWLIWAN APALABAS

16. Panon tayon naapektoan na apalabas iran eksperiensya?

¹⁶ Aliwan amin ya apalabas et marakep. Ompan nagogonigon tayo ed saray apalabas a kasalanan odino kalilingoan tayo. (Sal. 51:3) Nayarin liliknaen tayo ni imay ambelat a simbawa ed sikatayo. (Heb. 12:11) Ompan sankanonot tayo ni ray asagmak tayon ag-inkahustisya, balang lan tudtua odino abaloan labat. (Sal. 55:2) Antoy gawaen tayo pian agnisentroy imano tayod saratan ya apalabas? Pantongtongan tayoy taloran alimbawa.

17. (a) Akin et deneskribe nen Pablo so inkasikato bilang “toon sankaabebaan ed amin a masanto”? (b) Antoy akatulong ed si Pablo pian agmanisip na negatibo?

¹⁷ Apalabas iran lingo. Deneskribe nen apostol Pablo so inkasikato bilang “toon sankaabebaan ed amin a masanto.” (Efe. 3:8) Akin et ontan so inisip to? “Lapud pinasegsegang koy kongregasyon na Dios,”  so inkuan to. (1 Cor. 15:9) Kasin naiimadyin moy alikna nen Pablo sanen akalimog to so arum ed saray pinasegsegang to? Imbes ya mannonot na negatibo a sengegay iletey to, insentro toy imano to ed agnaparaan a kaabigan ed sikato. (1 Tim. 1:12-16) Lapud apresasyon nen Pablo, sikatoy apaseseg ya itultuloy so ministeryo to. Saray apalabas a kasalanan to et kaibad saray bengatlan nanggunaetan ton lingwanan. No iyapasakey tayo met so nonot tayod panangasi nen Jehova, agnaupot so biskeg tayod alablabas a panaburido ed saray bengatlan agti’ la nauman. Imbes, maabig no say pangusaran ti’ lad biskeg tayo et diad kaplesan a kimey tayo.

18. (a) Antoy nayarin nagawa no siansia nin sankanonot tan pansyodotan tayoy apalabas ya simbawa? (b) Panon tayon natumbok so bilin nen Solomon nipaakar ed pangawat na simbawa?

¹⁸ Ambelat a simbawa. Panon to no siansia nin sankanonot tan pansyodotan tayoy apalabas ya simbawa? Agti’ labat nasakitan noagta ‘onkapuy met so linawa tayo.’ (Heb. 12:5) Balanglan “melmelagen” tayo itan lapud agtayo agustoan, odino ‘kinmapuy’ tayo ta inawat tayod gapo balet ta impulisay ed saginonor, pareho lanlamang so resulta​—agtayon talaga labay so nagunggonaan tan nipetek na simbawa. Agaylan abig no dengelen tayoy bilin nen Solomon: “Bembenan mo a malet so panangibangat [odino disiplina]; sikato so agmo yabuloy ya onla; sikato so unoren mo; ta sikato so bilay mo.” (Uli. 4:13) Singa say sakey a drayber ya uunoren to ray pasakbay ed dalan, komon ta awaten tayoy simbawa, iyaplika itan, tan ag-onsusuko.​—Uli. 4:26, 27; basaen so Hebreos 12:12, 13.

19. Panon tayon naalig so pananisia di Habacuc tan Jeremias?

¹⁹ Ag-inkahustisya​—balang lan tudtua odino abaloan labat. Ompan no maminsan et nalikna tayo so alikna nen propetan Habacuc a manugaog ya kinmerew na hustisya ed si Jehova lapud agto natatalosan no akin ya inabuloyan nen Jehova a nagawa iray panagsaol tan panaglabi. (Hab. 1:2, 3) Agaylan importante ya aligen tayo so pananisia na satan a propeta ya angikuan na: “Anggan ontan manliket ak naani ed Jehova, manliket ak naani dia ed Dios na kilalaban ko.” (Hab. 3:18) Ontan met, singa si Jeremias, no “manilalo” tan sigpot tayon manmatalek ed si Jehova a Dios na hustisya, matalek tayo ya amin a bengatla et nipetek ed dugan panaon.​—Tag. 3:19-24.

20. Panon tayon napaneknekan ya ‘sankanonot tayo so asawa nen Lot’?

²⁰ Dakerakel iray agnalinglingwanan a nagagawa natan tan ed asingger ya arapen. Komon ta balang sakey ed sikatayo et makapibansag ed iyaaligwas na organisasyon nen Jehova. Nepeg tayon dengelen so simbawa na Biblia ya onnengneng ed arapen aliwan diad apalabas. Diad ontan et papaneknekan tayo ya ‘sankanonot tayo so asawa nen Lot’!

[Paimano ed leksab]

[Tepetepet Parad Panagaral]