Panon Kan Mangiiter na Simbawa?

Kasin wala lay kinmerew ed sikay simbawa? Singa bilang, wala la kasi angibagad sikan: ‘Anto kasi gawaen ko? Mila ak kasi? Aya kasin kursoy alaen ko? Kasin mi-date ak ed sikato?’

Ompan wala ray patulongan ed sikan manggaway desisyon​—nayarin nipaakar ed relasyon dad kakaaro, pamilya, odino ed si Jehova. Iner so pangibasiyan moy simbawam? Antoy gagawaen mo no mangiiter kay simbawa? Mainomay man o mairap so dedesisyonan, oniay ibabaga na Uliran 15:28: “Say puso na maptek aralen to so onebat.” Nengnengen tayo no panon a makatulong iray onggendan a limaran prinsipyod Biblia sano mangiiter tayoy simbawa.

1 Amtaen no Anton Talagay Situasyon.

“Samay oneebat a tampol antis to nin narengel so sakey a bengatla et onkikiwas a makulangkulang tan makapabaing.”​—PRO. 18:13, NW.

Pian maabig so simbawan niiter tayo, kaukolan ya amtaen tayoy situasyon tan panmoria na samay patutulongan. Alimbawa: No walay mantepet ed sika no iner so sankaabigan a dalan paonlad abung yo, antoy kaukolan mon amtaen? Kasin natulongan mo no agmo amtay kawalaan to? Siempre andi! Ontan met, pian dugay giyan niiter tayo, kaukolan ya amtaen tayo no iner so “kawalaan”​—say situasyon tan panmoria​—na samay patutulongan. Kasin wala ray makatunongan a rason ya nepeg tayon ikonsidera? No agtayo amta no anton talagay situasyon, ompan say niiter tayon simbawa et mamaloor ni laingen ed kipapasen.​—Luc. 6:39.

Amtaen no Kaunongan Lay A-research To. Maabig met no itepet ed samay patutulongan: “Parad sika, anto ran prinsipyod Biblia so makatulong?” “Anto ray posiblin kaabigan tan kakapuyan na desisyon a pilien mo?” “Kaunongan lay a-research mo?” “Anto la ray insimbawad sika na saray elder, atateng mo, odino na mangiyaaral ed sika na Biblia?”

Makatulong iray ebat to pian naamtaan no kaunongan lay impan-research to pian nasolusyonan so problema. Ontan met, ikonsidera tayo no anto lay insimbawa ed sikato na arum. Naimano tayo met no say aanapen labat na onkekerew na simbawa et samay mangibagad ‘sikato na labalabay ton narengel.’​—2 Tim. 4:3.

  2 Agbastabasta Manisimbawa.

“Balang too et nepeg ya aliston ondengel, agbengatbengat a mansalita.”​—SANT. 1:19.

Lapud labalabay tayoy makatulong, ompan bengatbengat ti’ lan manimbawa. Balet talaga kasin makatulong itan, lalo la no agtayo ni akapan-research ya maong? Oniay ibabaga na Proverbio 29:20 (NW): “Wala ta’y nanenengneng mon too a bengatbengat a mansalita? Mas walay ilalo na makulangkulang nen say sikato.”

Agtamtampol a manisimbawa pian naseguron say nibaga et mitunosan ed Salita na Dios. Tepetan moy sarilim, ‘Kasin say simbawak et naimpluensyaan lay panmoria tan “espiritu na mundo”?’ (1 Cor. 2:12, 13) Tandaan, agmagenap so basta pakawalaan na maong a motibo. Oniay imbaga nen apostol Pedro sanen naamtaan toy mairap ya asainmin nen Jesus: “Kasian moy inkasika, Katawan. Ag-iyan balot nagawa ed sika.” Antoy naaralan tayod reaksion nen Pedro? No agtayo manalwar, anggan maabig so intension tayo, ompan say ipapaseseg tayo et “kanonotan na totoo, aliwan kanonotan na Dios.” (Mat. 16:21-23) Kanian nepeg a mannonot tayo ni antis a mansalita! Lalo la ta amta tayon say kakabatan na Dios et mas atagtagey nen say sikatayo.​—Job 38:1-4; Uli. 11:2.

3 Mapaabeban Iyaplikay Salita na Dios.

“Anggapoy antokaman a gagawaen ko a manlalapud siak a dili, noagta sasalitaen ko no anto iray imbangat ed siak na Ama.”​—JUAN 8:28.

No manisimbawa ka kasin ibagam ya, “No siak ed sika, say gawaen ko et . . .”? Anggano amta tayo lan tampol so ebat, maabig no aligen tayoy inkamapaabeba nen Jesus, tan say impamidbir tod limitasyon to. Mas dakel tan malaknab so kakabatan to nen say anggan siopaman a too; ingen ta imbaga ton: “Agak nansalita manlapud inkasiak a dili, noagta say Ama . . . [so] angiter na ganggan no anto so ibagak tan no anto so ibangat ko.” (Juan 12:49, 50) Lanang ya ibabase nen Jesus ed linawa na Ama to iray bangat tan simbawa to.

Alimbawa, diad Lucas 22:49 et nabasa tayon nantepet iray babangatan nen Jesus no kasin milaban ira sano sikatoy arestoen la. Inusar ni ingen na sakey ed saray babangatan so espada to! Imanoen so miparan salaysay a walad Mateo 26:52-54 ya anggano delikado lay situasyon et impamoria nin siansia nen Jesus ed babangatan to so linawa nen Jehova. Lapud kabisado toy prinsipyon walad Genesis 9:6 tan saray propesiya ed Salmo 22 tan Isaias 53, akapangiter si Jesus na makabat a simbawa ya seguradon angiliktar na bilay tan amaliket ed si Jehova.

  4 Usaren so Theocratic Library.

“Siopa so peteg a matoor tan makabat ya aripen a tinuro na katawan to a mangasikaso ed saray lingkor na sankaabungan to, pian mangiter ed sikara na naakan da diad dugan panaon?”​—MAT. 24:45.

Anuro si Jesus na napanmatalkan ya aripen a klase pian mangiter na makanan espiritual a naakan. Sano mangiter ka na simbawa tan panangigiya nipaakar ed importante iran bengatla, kasin manre-research kan maong ed saray base ed Biblian publikasyon?

Say Watch Tower Publications Index tan Watchtower Library * et mangiiter na dakel tan malinew ya impormasyon a main-inomay ya naala. Agta sayang labat no ibaliwala tayo irayan makanan impormasyon? Dakel iray tema ya wadtan, ontan met ed saray artikulon makatulong ed amin a mankaukolay panangigiya. Kaunongan ka kaepektibon ontulong ed arum a manusisad saray prinsipyo na Biblia, tan mankatunongan base ed Salita na Dios? Say GPS (Global Positioning System) et kagawaan ya uusaren pian naamtaan na sakey so kawalaan to tan nigiya ed laen to. Singa ed GPS, makatulong met iray research tool pian naamtaan na sakey so dalan a kawalaan to, tan ipamoria met na saraya no panon so pansiansiad dalan a mamaarap ed bilay.

Dakel iray elder ya angipasal ed saray manangipalapag a man-research panamegley na Index odino Watchtower Library. Tinmulong iyad saray agagin mankatunongan base ed Kasulatan. Aglabat iya angibangat ed saray agagin naromog so ebat ed saray tepet da, noagta tinmulong met iya pian niyugali day pan-research tan naynay a manmatalek ed espiritual a tulong nen Jehova. “Lapud saya et nipasal [so pakayari ran mantalos] a mangibiig ed duga tan aliwa.”​—Heb. 5:14.

5 Ag-idedesisyonay Arum.

“Sakbaten na kada sakey so awit ton dili.”​—GAL. 6:5.

Diad kaunoran, balang sakey ed sikatayo et mandesisyon no anton simbaway tumboken to. Aabuloyan itayo nen Jehova a mandesisyon no kasin paigiya tayod saray prinsipyo to odino andi. (Deu. 30:19, 20) Wala ray situasyon a pigaran prinsipyo ed Biblia so nalalanor, tan samay mismon onkekerew na tulong so manggaway desisyon. Depende ed isyu tan edad na onkekerew ed sikatayoy simbawa, nayarin itepet tayod inkasikatayo, ‘Wala kasi kanepegan kon mangiter na simbawa? Wala ray probleman mas maabig no iyasingger ed saray elder ed kongregasyon odino no tobonbalo so patutulongan, diad saray atateng to.

[Paimano ed leksab]

[Kahon/Litrato ed pahina 8]

Proyekto Parad Panagdayew na Pamilya

Bilang asainmin, akin ta no salien yon i-research so ebat ed saray nitepet ed sikayo diad apalabas? Antoran artikulo ed publikasyon tayo tan Makasulatan a prinsipyo so makatulong ed saray mantetepet ed sikayo? Singa bilang, no walay sakey ya agin kinmerew na tulong ed sikatayo nipaakar pidi-date tan panangasawa. No uusaren tayoy Index odino say Watchtower Library, anapen tayon tampol so subject a labay tayon i-research. Alimbawa, diad Index anapey salitan “Dating” odino “Marriage.” Insan tayo nengnengen iray subtitulon mikonektaan ed satan. Sano nenengnengen tayoy tema, imanoen met no walay balikas a “See also” a makatulong pian naanap tayoy artikulon direktan mitukoyan ed ire-research tayo.

[Kahon ed pahina 9]

Salamat ed saray probisyon nen Jehova panamegley na organisasyon to ta makapangiter tan makapangawat itayo na sankaabigan iran simbawa. Inkuan na Eclesiastes 12:11 (NW): “Saray salita na marunong et singa saray turok, tan saramay okupado ed pankokolekta na makabat iran salita et singa ra impanek a pasak; saratan a salita et nanlapud sakey a pastol.” No panon a say “turok,” odino nan-utok a baston et uusaren pian igiya iray ayayep, say maaro tan makabat a simbawa so mangigiya met ed saray onkekerew na tulong diad dugan direksion. Say “impanek a pasak” et manresultad malet ya paalagey. Mipadpara, say makabat a simbawa et mangiter na napanmatalkan tan manbayag iran resulta. Saray marunong et “okupado” odino manliket ed “pankokolekta na makabat iran salita” ya mangipapatnag ed karunongan na “pastol” da, si Jehova.

Sano mangiiter tayoy simbawa, aligen tayoy “pastol” tayon si Jehova. Talagan pribilehyo so idengel tan pangiter na simbawa! No satan et base ed saray prinsipyo na Biblia, manresulta itan ed agmanganggan pankaabigan na samay onkekerew na simbawa.