Pansiansiaen so Nalilikna Yon Inkaganatan

“Ipulong mo so salita, maganat mon gawaen itan.”​—2 TIM. 4:2.

KASIN NIPALIWAWAM?

Akin ya nampulong tekep na inkaganatan iray Kristiano nen inmunan siglo?

Panon tayon napansiansiay nalilikna tayon inkaganatan?

Akin ya mas apuraan natan so panagpulong nen say kapiganman?

1, 2. Anto ray nitepet tayo nipaakar ed ganggan ya ‘manpulong a maganat’?

ANGGAPOY dadaraken a panaon na saramay say trabaho da et mangisalbay bilay. Singa bilang, maples ya onrerespondi iray bombero no walay pool lapud amta ran bilay so nalalanor.

² Bilang Tasi nen Jehova, labay tayon nisalba iray totoo. Kanian ipapapuso tayoy kimey a pangipulong ed maong a balita na Panarian. Siempre, agto labay ya ibagan manapurasta tayon lanang. Anto siri’ labay ya ibaga nen apostol Pablo sanen impaseseg ton, “Ipulong mo so salita, maganat mon gawaen itan”? (2 Tim. 4:2) Antoy kabaliksan na pampulong a maganat? Tan akin ya apuraan so kimey tayo?

AKIN YA MAGANAT SO PANAGPULONG TAYO?

3. Antoy resulta na pangawat odino agpangawat na totoo ed mensahe na Panarian?

³ No sankanonot mon akadepende so bilay na saray totoo ed panagpulong tayo, ditan mo nalikna ya kaukolan mon ipasabin tampol ed sikara so maong a balita. (Roma 10:13, 14) Ibabaga na Salita na Dios: “No kuan ko ed marelmeng, Ompatey ka naani ya andi saew; no magbabawi [balet] ed kasalanan to, tan gawaen to so nikatunongan tan maptek, . . . sikato manbilay naani a petepeteg, agnaani ompatey. Anggapo naani ed saray kasalanan to a ginawa to so nanonotan a sumpa ed sikato.” (Eze. 33:14-16) Kanian oniay ibabaga na Biblia ed saramay mangipupulong ed mensahe na Panarian: “Nilaban mo so inkasika tan saramay ondengel ed sika.”​—1 Tim. 4:16; Eze. 3:17-21.

4. Lapud apostasya, akin et kaukolan ya pansiansiaen nen Timoteo so nalilikna ton inkaganatan?

⁴ Pian mas natalosan tayo no akin ya pinaseseg nen Pablo si Timoteo ya pansiansiaen so nalilikna ton  inkaganatan, nengnengen tayoy konteksto na pinagkateman teksto na sayan artikulo. Oniay nabasa: “Ipulong mo so salita, maganat mon gawaen itan diad maabig a panaon tan diad makapagonigon a panaon, mamaat ka, manimbawa ka, mamaseseg ka, tekep na andukey a panag-anos tan dunong ed panagbangat. Ta onsabi so panaon ya agda nayarian ya awaten so suston bangat, balet, unong ed saray pilalek dan dili et pilien da iramay mangibangat ed sikara na labalabay dan narengel; tan agda labay a dengelen so katuaan.” (2 Tim. 4:2-4) Impasakbay nen Jesus ya wala ray man-apostata. (Mat. 13:24, 25, 38) Lapud manasingger lay pakagawa na satan, kaukolan nen Timoteo ya ‘ipulong so salita’ anggan diad loob kongregasyon pian saray Kristiano et agnibalang na makapalikdo iran palson bangat. Bilay so nalalanor. Diad panaon tayo ey?

5, 6. Anto ran popular a bangat so papanisiaan na totoon nakakatongtong tayod ministeryo?

⁵ Diad panaon tayo et malaklaknab so apostasya. (2 Tes. 2:3, 8) Anto ran bangat so labalabay a narengel na saray totoo? Diad dakel a lugar, masetseseg dan ikakalar so bangat ya ebolusyon. Anggaman ibabangat da itan panamegley na saray sientipikon termino, nagmaliw la itan a singa relihyon, ta apektado lay panmoria na totoo ed Dios tan ed arum nin bengatla. Say sakey nin popular a bangat et anggapo kunoy pibabali na Dios ed sikatayo kanian ayos labat no anggapoy pibabali tayod sikato. Akin et agustoan na totoo irayan bangat ya anggad akaugip la rad espiritual? Lapud susuportaan na sarayan bangat so katunongan ya, ‘Gawam labat so labay mo ta agka met naukom.’ On, ’atan so labalabay a narengel na dakel a totoo.​—Basaen so Salmo 10:4.

⁶ Balet, wala ni arum ya ideya a labalabay ya narengel na totoo. Wala ray mimimisa ya say pitalaran dan narengel et, ‘Anggan antoy gawaen mo, inaro ka na Dios.’ Ibabangat na saray papari tan pastor ya saray seremonya, misa, piesta, tan imahen et makapaliket ed Dios. Agbalet nalilikas na saray membro da ya mapeligroy kipapasen da. (Sal. 115:4-8) Balet, no liingen tayo ra ed espiritual pian natalosan day peteg ya ibabangat na Biblia, nagamoran day bendisyon na Panarian na Dios.

ANTOY KABALIKSAN NA PAMPULONG A MAGANAT NATAN?

7. Panon tayon nipanengneng so inkaganatan?

⁷ No say sakey a doktor et walay ooperaan to, nepeg ya akapokus ed gagawaen to lapud bilay so nalalanor. Ontan met ed ministeryo tayo, nipanengneng tayoy inkaganatan no akapokus itayod sayan kimey. Nagawaan tayo iya no nonoten tayo ray isyu, tepet, odino impormasyon ya makasagyat ed interes na saray totoo. Nayarin kaukolan tayo met ya i-adjust so eskedyul tayo pian nasabi tayo ray totoo ed kombenientin panaon a mas posiblin ondengel ira.​—Roma 1:15, 16; 1 Tim. 4:16.

8. Anto ni sakey a paraan ya nipanengneng tayoy inkaganatan?

⁸ Ipapanengneng tayo met so inkaganatan no duga iray prayuridad tayo. (Basaen so Genesis 19:15.) Alimbawa, isipen ya kakkapangalam na resultay check-up mo, insan ka impatawag na doktor ed opisina to, tan masimpatya ton imbagan, “Grabe la ’yay sakit mo. Kaukolan ya tambalen a tampol. Agmo la pababayagen.” Seguradon agka manapurastan ompaway ed opisina to, ya singa bomberon onrespondid pool. Balet, alaen moy rekomendasyon to, tan kasempet mo et nonoten mo no anto ray kaukolan mon gawaen a tampol.

9. Akin et nibaga tayon nampulong si Pablo tekep na inkaganatan diad Efeso?

⁹ Natebek tayoy aliknan inkaganatan nen Pablo no imanoen tayo ’may imbaga tod saray mamatatken ed Efeso diad impangipulong tod maong a balita ed distrito na Asia. (Basaen so Gawa 20:18-21.) Maseguron kasabi  to ni labat et impulong to lan tampol so maong a balita diad kabkaabungan. Niarum ni, diad loob na duay taon et “inagew-agew a nampaliwawa diad auditoryum na eskuelaan nen Tirano.” (Gawa 19:1, 8-10) On, sankanengneng ed inagew-agew ya aktibidad nen Pablo so alikna ton inkaganatan. Say panamaseseg ya ‘mangganat ed ministeryo’ et aliwan pian taktakoten tan pasooten itayon manpulong. Anggaman ontan, nepeg tayon iprayuridad a siansia ed bilay tayo so panagpulong a kimey.

10. Akin et misalsalamat itayod inkiwas na saray Kristiano tekep na inkaganatan ngalngali 100 taon lay apalabas?

¹⁰ Nanengneng tayoy kabaliksan na inkaganatan diad alimbawa na melag a grupo na saray Estudyante na Biblia ya angigapo ed panagpulong antis na 1914. Anggano pigan libo labat ira, alikna day inkaganatan na panaon tan maseseg dan inggapoy panagpulong a kimey. Angipalapag iray paliwawa diad masulok a 2,000 ya dyaryo tan impabantay day de-kolor iran litrato tan pelikulan “Photo-Drama of Creation.” Lapud satan, minilyon so apasabian na maong a balita. No ag-ira nampulong tekep na inkaganatan, nadngel tayo kasi so mensahe na Panarian?​—Basaen so Salmo 119:60.

MANALWAR PIAN AGYO NIBALANG SO INKAGANATAN YO

11. Akin et abalang na arum so inkaganatan da?

¹¹ Lapud saray pakaabalaan, nayarin nalingwanan tayo so kaimportantian na panagpulong. Say gagala na sistema nen Satanas et pian lagyaten itayon upoten so panaon tayo ed saray pilpilalek na laman tan arum nin ag-importantin bengatla. (1 Ped. 5:8; 1 Juan 2:15-17) Wala ray datin maseseg ed panaglingkor ed si Jehova ya abalang day inkaganatan da. Alimbawa, say Kristiano nen inmunan siglo ya si Demas et “kakimeyan” nen Pablo, balet ta nisuawi imano to ta mas inaro toy sistema na mundo. Imbes ya itultuloy nen Demas ya tulongay Pablo diad panaon a kakkaukolan toy panamabiskeg, tinaynan to laingen.​—Filem. 23, 24; 2 Tim. 4:10.

12. Antoy pankanawnawa tayon gawaen natan, tan anto ray pankanawnawa tayod arapen?

¹² No labay tayon pansiansiaen so nalilikna tayon inkaganatan, kaukolan tayon labanan so pilalek ya manpayaman ed sayan mundo. Say panggunaetan tayo et say ‘ibemben a malet ed peteg a bilay.’ (1 Tim. 6:18, 19) Amta tayo a sano uleyan la na Panarian na Dios so dalin, pankanawnawa tayon panggayagaay dakerakel ya makapainteres a kimey diad andi-anggaan. Anggad agni balet itan sinmabi, pankanawnawa tayoy mibiang ed kimey ya aglan balot naulit, say panulong ed arum ya nilaban ed Armagedon.

13. Bilang Kristiano, panon tayon napansiansiay nalilikna tayon inkaganatan?

¹³ Anggano nanaugip ed espiritual so karaklan ya totoo natan, antoy makatulong ed sikatayo pian ag-itayo met makateglep? Tandaan tayo ya aliling to et naugi-ugip ti’ met nensaman ed kabilungetan. Balet ta unong ed si Pablo, linmiing itayo la tan sinminag so liwawa nen Kristo ed sikatayo. Kanian, awalaan itayo na pribilehyo pian isindag itan a liwawa. (Basaen so Efeso 5:14.) Kayari ya imbaga nen Pablo itan, insulat to: “Manalwar kayon maong pian say panagkurang yo et aliwan bilang agmarunong a totoo noagta marunong a totoo, ya anamot yo so kada pankanawnawa [odino, “saliwen so panaon”], lapud mauges so panaon.” (Efe. 5:15, 16, ftn.) Anggaman mauge-uges so mundo, kaukolan tayon “saliwen so panaon” pian gawaen iray kimey a makatulong ed pansiansia tayon aliing.

MANBIBILAY ITAYOD MAKATANTANDAN PANAON

14-16. Akin ya mas apuraan natan so panagpulong nen say kapiganman?

¹⁴ Nensaman ni et apuraan lay kimey a  panagpulong, balet ta mas apuraan itan natan. Nanlapu la nen 1914, nanenengneng lay pakakagawa na samay tanda ya adeskribid Biblia. (Mat. 24:3-51) Mas napepeligro natan so bilay na katooan nen say kapiganman. Anggano wala la ray paknaan, wala nin siansiay manga 2,000 a nuklear iran armas na saray makapanyarin bansa. Unong ed report, pigan lasus ya nuklear ya armas so “nababalang.” Kasin walad saray terorista? Wala ray mangibabagan magmainomay ya napalanit so bilay na amin a totoo no igapo na saray terorista so sakey a guerra. Balet, aliwa labat a guerra so mamepeligro ed bilay na too.

¹⁵ “Say climate change so manunan sengegay sakit na saray totoo ed interon mundo diad sayan koma 21 a siglo,” so inkuan na The Lancet tan University College London ed report da nen 2009. Oniay inkuan na satan: “Lapud epektoy climate change, naapektoay bunigas na ngalngali amin a totoo diad ontumbok iran dekada tan mas napeligro so bilay na binilyon a totoo.” Nayarin dakel so ompatey lapud itagey na danum ed dayat, kelang, delap, epidemya, bagyo, tan panlalaban lapud nanaupot lan pangalaay pambilay. On, napepeligroy bilay na too lapud saray guerra tan kalamidad.

¹⁶ Parad arum, say takot ya walay nagawan nuklear a guerra so gapoan na pakagaway “tanda.” Balet, agnatatalosan na karaklan so tuan kabaliksan na sayan tanda. Pigay dekada lan nagagawa iyan tanda a pakapatnagan ya talagan manaari lay Kristo tan asingsingger lay anggaan na sayan sistemay mundo. (Mat. 24:3) Nanenengneng tayo natan so mas malaknab a pakagagawa na saray kabiangan na tanda. Talagan kakkaukolan tayo lan liingen iray totoon naugip ed espiritual. Natulongan tayo ran onliing panamegley na kimey tayon panagpulong.

17, 18. (a) Antoy epekto ed sikatayo na “panaon”? (b) Anto ray situasyon a posiblin makapanguman ed panmoria na totoo ed mensahe na Panarian?

¹⁷ Dagdaiset lay nakekeran panaon pian paneknekay panangaro tayod si Jehova tan sumpaley panagpulong a kimey ed sayan kaunoran iran agew. Kanian mas makabkabaliksan natan imay imbaga nen Pablo ed saray Kristiano ed Roma nen inmunan siglo: “Amta yo so panaon, a saya la so oras pian onliing kayo, ta natan et mas asingger lay kilalaban tayo nen say sanen nagmaliw itayon mananisia.”​—Roma 13:11.

¹⁸ Lapud saray nagagawa ed kaunoran iran agew, nayarin namoria na saray totoo ya kaukolan dan ikdan na imano so relasyon dad Dios. Namomoria na arum a kakkaukolan na too so tulong sano naiimatonan day agpakasarag na gobierno a resolbiey ibabagsak na ekonomya, posiblin nuklear a guerra, graben krimen, odino say pakadederal na planeta. Wala ray namomoria day espiritual a pankaukolan da sano walay agawad pamilya ra, singa sano walay mansakit, ompatey, odino mansian so sanasawa. Diad pibiang tayod ministeryo, walay pankanawnawa tayon ontulong ed saratan a totoo.

APAKIWAS LAPUD ALIKNAN INKAGANATAN

19, 20. Anto ran pananguman so ginawa na dakel a Kristiano lapud alikna ran inkaganatan?

¹⁹ Dakel a Kristiano so amadaak ed ministeryo ra lapud alikna dan inkaganatan. Alimbawa, nandesisyon so ugaw nin sanasawa ed Ecuador ya pasimpliey bilay da lapud samay nadngel dad espisyal ya asemblea nen 2006 ya “Pansiansiaen a Simpli so Mata Yo.” Inlista da ray bengatlan agda nakaukolan, tan diad loob labat na taloy bulan et tinaynan day apartment da ya taloray kuarto tan inmalis irad apartment ya saksakey so kuarto to, inlako da ray pigaran kagawaan da, tan binayaran day amin ya utang da. Insan ira nan-auxiliary pioneer tan inunor  da imay suhestion na manangasikaso na sirkito ya ontulong irad kongregasyon a mas baleg so pankaukolan.

²⁰ Oniay insulat na sakey ya brother a taga North America: “Sanen aki-assembly kami nen akulaw ko nen 2006, 30 taon kami lan Tasi. Nen pasempet kami kayari na asemblea, nantongtongan mi no panon min niyaplika imay simbawa nipaakar ed pamasimpli bilay. (Mat. 6:19-22) Taloray abung mi, walay dalin mi, ankablin kotse, motorboat, tan mobile home. Amoria min singa kami kuankuanan a Kristiano, kanian ginawa min kalat so pampayunir. Nen 2008, nan-regular pioneer kami la kanian akaiba mi lay anak min bii ed panagpayunir. Makapalikliket so mas maapit ya pikimey ed saray agagi! Akapanlingkor kamid lugar ya mas baleg so pankaukolan. Tan lapud mas dakel so gagawaen mi parad si Jehova, lalo kamin inmapit ed sikato. Say sakey nin talagan panliliketan mi et say pakanengneng mid liket ed lupa na saray totoo sano narerengel tan natatalosan day katuaan a walad Salita na Dios.”

21. Antoy mamapakiwas ed sikatayon manpulong tekep na inkaganatan?

²¹ Amta tayo no antoy asingger lan nagawa ed sayan mauges a mundo​—say “agew na panangukom tan kaderal na totoon agmaridios.” (2 Ped. 3:7) Saray nanaaralan tayo ed Salita na Dios so mamapakiwas ed sikatayon maseseg ya ipulong so onsasabin baleg ya irap tan kayari to et say balon mundo. Nepeg ya lawas tayon sankalikna so inkaganatan pian nitultuloy tayon ninabang ed saray totoo so peteg ya ilalo. No gagawaen tayoy anggaay nayarian tayo ed sayan apuraan ya kimey, ipapanengneng tayoy tuan panangaro ed Dios tan ed kapara tayon totoo.

[Tepetepet Parad Panagaral]