“Sarag Toy Manpalitrato?”

Kayari na komaduan agew na distriton kombension, si Josué, sakey a Bethelite diad Mexico et ompapasyar ed syudad na Querétaro. Nabet toy sanasawan turistan di Javier tan Maru a taga Colombia. Tinepet dad si Josué no sarag to ran litratoen. Lapud desente kawes tan walay badge card di Josué tan saray kaaro ton Tasi, tinepetan da ra no inmatendi rad graduation odino diad espisyal ya okasyon. Imbaga nen Josué ya onaatendi rad kombension na saray Tasi nen Jehova, insan to ra inimbitaan ya onatendid Simba.

Nababaingan iran onatendi ta anggapoy matukoy ya nisulong da. Anggaman ontan, inter nen Josué so ngaran to tan numeroy telepono na branch office ya kawalaan to.

Asurprisay Josué ta agto iilaloan ya kayari apat bulan et nakatongtong toy Javier. Inmatendi ra manayad samay kombension tan natan et labay da lay pabisitad saray Tasi nen Jehova ed lugar a panaayaman da diad Mexico City. Ag-abayag et nigapo so panagaral na Biblia ed si Javier tan Maru, tan tampol iran inmatendi ed saray pantitipon. Kayari samploran bulan, nagmaliw iran agbautismadon manangipalapag. Anggaman kaukolan day onlad Toronto, Canada, nantultuloy so inyaligwas da tan abautismoan ira.

Ag-abayag, akaawat si Josué na sulat manlapud si Javier a mangipapaliwawa no antoy amakiwas ed sikaton awaten so katuaan. “Antis kamin inmatendid kombension, apantongtongan min sanasawa ya kaukolan mi panangigiya na Dios. Nen anengneng mi desentin panangawes yo, inisip min nanlapu kayod espisyal ya okasyon. Tan diad kombension et nandinayewan mi so maaron impanulong ed sikami ya mananap na nayurongan, manbukay na tekstod Biblia, tan say maabig a kondukta na saray inmatendi. Anggaman agmatukoy so kawes mi, agda la itan inimano.”

Apaneknekan nen Josué ya tua imay salita na makabat ya Arin Solomon: “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas, no saya kasi odino saman, no sikara kasi nampadpara naani a maong.” (Ecl. 11:6) Sika ey, sarag mo met kasi mantanem na bini na katuaan diad pananap na pankanawnawan iyimbita ed arum so kombension odino miting ed kongregasyon? Nayarin usaren ka nen Jehova pian natulongan iray narasan tan napgaan ed espiritual, a singa di Javier tan Maru.​—Isa. 55:1.

[Litrato ed pahina 32]

Manlapud kawigi pakawanan: Alejandro Voeguelin, Maru Pineda, Alejandro Pineda, Javier Pineda, tan Josué Ramírez diad Mexico branch