Tulongan Iray Totoo Ya “Onliing”

“Amta yo so panaon, a saya la so oras pian onliing kayo.”​—ROMA 13:11.

KASIN NIPALIWAWAM?

Akin et kaukolan ya panggunaetan na saray Kristiano so pansiansian aliing ed espiritual?

Akin et kaukolan a maong ya ondengel tan manobserba so sakey ya aliing a managpulong?

Akin et kaukolan tayon ipanengneng so kaabigan tan inkauyamo sano manpupulong itayo?

1, 2. Akin et kaukolan ya liingen iray totoo?

KADA taon, nilibo so ompapatey ta akatemeg odino akateglep ni ra ingen legan dan mandra-drayb. Wala ray nakal ed trabaho ta atrasado ran ombabangon kanian atrasado met iran onloloob, odino nanaugip ira legan na trabaho. Balet mas grabe so epekto na pakatemeg ed espiritual. Satan so tutukoyen na Biblia sanen inkuan ton, “Maliket imay mansiasiansian aliing.”​—Apo. 16:14-16.

² Legan ya manasingger so baleg ya agew nen Jehova, nanaugip ed espiritual so dakel a totoo. Imbaga ni ingen na pigaran lider na Kakristianoan a saray membro da et aliling day mansangguok ta masamsamit so ugip da. Antoy labay ya ibaga na pakaugip ed espiritual? Akin et kaukolan ya mansiansian aliing iray tuan Kristiano? Panon tayon natulongan iray totoo ya onliing?

ANTOY KABALIKSAN NA PAKAUGIP ED ESPIRITUAL?

3. Antoy kipapasen na toon nanaugip ed espiritual?

³ No naugip so sakey a too, anggapoy gagawaen to. Diad pidumaan, saramay naugip ed espiritual et nayarin dakel so gagawaen da​—balet aliwan diad espiritual iran bengatla. Nayarin okupado iran maong lapud inagew-agew ya problemad bilay odino impasyay pankikimey da parad likeliket, inkabantog, odino kayamanan. Lapud satan, dagdaiset lay panaon da parad espiritualidad da. Amta balet na saray totoon aliing ed espiritual ya manbibilay tayo lad “kaunoran iran agew” kanian aktibo irad panggagaway linawa na Dios.​—2 Ped. 3:3, 4; Luc. 21:34-36.

4. Akin ya importante so simbawan “ag-itayo la komon nanaugip a singa gagawaen na arum”?

⁴ Basaen so 1 Tesalonica 5:4-8. Diad saya et pinaseseg nen apostol Pablo iray kapananisiaan to ya ag-ira komon “nanaugip a singa gagawaen na arum.” Antoy labay ton  ibaga? Say sakey et nibagan “nanaugip” no ibabaliwala to ray moral ya estandarte nen Jehova, tan no isipen ton mabayag ni paneral To ed saray mauges. Kanian, nepeg tayon seguroen ya ag-itayo naimpluensyaan na saray ontan ya agmaridios a totoo pian agtayo naalig so kagagawa tan ugali ra.

5. Anto ray pakapatnagan ya naugip ed espiritual iray totoo?

⁵ Iisipen na arum ya anggapoy Dios a mangukom ed sikara. (Sal. 53:1) Ibabaga na arum ya anggapoy pibabali na Dios ed totoo, kanian anggapo met lanlamang so kana na panaral tayo nipaakar ed sikato. Balet, wala met ni ran siansiay manisia ya magmaliw iran kaaroy Dios no mimembro irad sakey ya relihyon. Amin na sarayan totoo et nanaugip ed espiritual kanian kaukolan day onliing. Panon tayo ran natulongan?

NEPEG YA SIKATAYON MISMO ET ALIING

6. Akin et kaukolan tayon panggunaetay mansiansian aliing ed espiritual?

⁶ Pian sarag tayon liingen so arum, kaukolan ya aliing itayon mismo. Antoy kabaliksan na satan? Inkonekta na Salita na Dios so espiritual ya ugip ed saray “gawa a nipaakar ed kabilungetan”​—maingal a panliliket, panagbuanges, sebel a piaakdol, anggapoy-baing a kagagawa, pankokolkol, tan imon. (Basaen so Roma 13:11-14.) Aliwan mainomay a paliisan iray ontan ya kagagawa. Importante sirin so pansiansian alerto. No isipen na sakey a drayber ya ayos labat so makatemeg legan na biahe, ipepeligro toy bilay to. Kanian bilang Kristiano, tandaan tayon makapatey so itemeg ed espiritual!

7. Antoy epektod sikatayo no negatiboy panmoria tayod saray totoo?

⁷ Alimbawa, nayarin isipen na sakey a Kristiano ya anggapo lan balot ed teritorya to so malabay ya ondengel ed maong a balita. (Uli. 6:10, 11) Nayarin ikatunongan ton, ‘No anggapo lanlamang so ondengel, akin et pankesawan mo ni ran pulongan?’ Tua, nayarin dakel natan so naugip ed espiritual, balet posiblin manguman so sirkumstansya tan panmoria rad bilay. Seguradon wala ni ray ondengel tan onkiwas. Tan sarag tayo ran tulongan no sikatayon mismo et aliing. Singa bilang, salien tayo ray balon paraan na pangipresenta ed mensahe na Panarian a managyat ed interes da. Makapansiansia tayo met ya aliing no naynay tayon nononoten so kaimportantian na ministeryo tayo.

AKIN YA IMPORTANTE SO MINISTERYO TAYO?

8. Akin ya importantin maong so ministeryo tayo?

⁸ Tandaan ya ondengel man odino andi iray totoo, say kimey tayon panagpulong et mamapagalang ed si Jehova tan uusaren to itan pian sumpaley gagala to. Agla manbayag, nasentensiaan iramay agmanguunor ed maong a balita. Say reaksion na saray totoo ed panagpulong tayo so sakey a basiyan na pangukom ed sikara. (2 Tes. 1:8, 9) Ontan met, aliwan duga no ikatunongan na sakey a Kristiano ya agla kaukolan so impasyan panagpulong ta wala met lanlamang so “kioli na saray matunong tan saray agmatunong.” (Gawa 24:15) Naaralan tayod Biblia ya saramay nibiig bilang “kanding” et “managmak na andi-anggaan a kadederal.” Say panagpulong a kimey et pakapatnagay panangasi na Dios ta satan so mangiiter ed totoo na pankanawnawan manguman tan makaawat na “bilay ya andi-anggaan.” (Mat. 25:32, 41, 46; Roma 10:13-15) No agtayo manpulong, panon dan narengelan so mensahe ya makapangiter ed sikara na bilay?

9. Panon kan nagugunggonaan tan say arum diad pangipupulong mod maong a balita?

⁹ Nagunggonaan itayo met no ipulong tayoy maong a balita. (Basaen so 1 Timoteo 4:16.) Agta ombibiskeg so pananisiam tan onaaralem so panangarom ed Dios sano ibabagam ed arum so nipaakar ed si Jehova tan say Panarian? Agta atulongan ka na satan ya nabayuboan iray Makristianon kualidad?  Agta lalo kan naliliketan no ipapanengneng moy debosyon mod Dios diad pibibiang mod ministeryo? Aliketan so dakel ed saray apribilehyoan a mangibangat na katuaan sanen anengneng dan mismoy intulong na espiritu na Dios ed saray interesado ya manggaway pananguman ed bilay.

MAGMALIW YA MAOBSERBA

10, 11. (a) Akin ya nibagan alerto tan maobserba si Jesus tan si Pablo? (b) Ipaliwawa no panon a makatulong ed ministeryo so pagmaliw ya alerto tan maobserba.

¹⁰ Nayarin naliing so interes na saray totoo ed maong a balita diad nanduruman paraan. Kanian saray Kristiano et kaukolan ya alerton manobserba. Say alimbawa tayod saya et si Jesus. Lapud sikatoy perpekto, alikas toy pansyodot na sakey a Fariseo, atebek toy impapuson pagbabawi na makasalanan ya bii, tan alikna toy inkamasakripisyo na sakey ya balo. (Luc. 7:37-50; 21:1-4) Kanian niiter nen Jesus so espisipikon espiritual a pankaukolan na balang sakey. Balet, anggano aliwa itayon perpekto ya singa si Jesus, sarag tayoy magmaliw ya maobserba. Ontan so ginawa nen apostol Pablo. Imbagay toy paraan na panagbangat to pian naala toy interes na saray nanduruman grupo tan klase na totoo.​—Gawa 17:22, 23, 34; 1 Cor. 9:19-23.

¹¹ No lawas itayon alerto tan maobserba ya singa si Jesus tan si Pablo, natebek tayo so sankaabigan a paraan pian liingen so interes na saray nakatongtong tayo. Alimbawa, antis kan onasingger, obserbaan mo nin unona no antoy kultura, hilig, odino kipapasen na pamilya na sakey ya indibidual. Nayarin naimanom no antoy gagawaen to tan sarag mon igapoy tongtongan panamegley na satan.

12. Legan itayon manpupulong, akin et nepeg tayon paliisan iray posiblin makaabala?

¹² Say sakey ya alerton manobserba et paliisan to ray makaabala. Sano walad pulongan, maabig so pitongtong ed partner pian makapanpasesegan. Balet, tandaan tayo a say gagala na pibiang ed ministeryo et pian manpulong. (Ecl. 3:1, 7) Kanian agtayo abuloyan ya makaabalad pampupulong tayo so piistoryaan ed partner tayo. Pian nipokus tayoy imano tayod panagpulong, maabig no say pantongtongan tayo et saray tema ya labay tayon inabang ed saray interesado. Ontan met, anggaman makatulong no maminsan ed ministeryo so cell phone, nepeg tayon seguroen ya no walay ontawag et agnaabalay pitotongtong tayod unabung.

IPANENGNENG SO PERSONAL YA INTERES

13, 14. (a) Panon tayon natebek no antoy makasagyat ed interes na sakey a too? (b) Anto ray nayarin mamaliing ed interes na totoo diad espiritual iran bengatla?

¹³ Say sakey ya aliing tan alerton managpulong et dedengelen ton maong so ibabagay katongtong to. Anto ray nayarin itepet mo pian nasagyat mo ran ibesngaw so nalilikna ra? Kasin iisipen day idarakel na relihyon, say gulo ed lugar da, o say limitadon nagagawaan na gobierno? Sarag mo kasin ipaimanoy makapakelaw ya desinyo na saray palsa odino say inkapraktikal na prinsipyoy Biblia pian liingey interes dad espiritual iran bengatla? Amin lawarin totoo et interesadon pantongtongan so nipaakar ed pikakasi, anggan saray agmanisiad Dios. Pankelawan da no wala kasin talagay ondedengel ed saray pikakasi. Iisipen met na arum so tepet ya: Dedengelen kasi na Dios so amin ya pikakasi? No andi, antoy nepeg tayon gawaen pian dengelen itayo na Dios?

¹⁴ Dakel so naaralan tayon teknik na pangigapoy tongtongan no obserbaan tayo iramay epektibon manangipalapag. Obserbaan mo no panon dan papaliisay impresyon ya singa ra maniimbestiga odino mibabalid bilay na arum. Panon dan ipapanengneng ed tonaday boses tan ekspresyoy lupa ra ya interesado ra ed opinyon na unabung?​—Uli. 15:13.

 KAABIGAN TAN DUNONG

15. Akin et kaukolan tayon ipanengneng so kaabigan sano manpupulong itayo?

¹⁵ Labay mo kasin bangonen da ka anta masamsamit so ugip mo? Wala ray onsyodot no bigbiglay pamangon ed sikara. Mas labay da no inap-apiger iran bangonen. Singa ontan met no nipaakar ed pansasagpot tayon liingen iray totoo ed espiritual ya ugip. Alimbawa, no mansyodot so sakey ya pupulongan mo, antoy sankaabigan ya gawaen mo? Ibagam ya natatalosan moy situasyon to, tan kalmadon onalis. (Uli. 15:1; 17:14; 2 Tim. 2:24) No ipanengneng moy kaabigan, nayarin ondengel la iyan unabung sano napulongan lamet na saray agagi.

16, 17. Panon tayon nausar so pakatebek diad ministeryo?

¹⁶ Wala ray pankanawnawa balet ya sarag mo nin ituloy so pitongtong anggano negatiboy reaksion na unabung. Lapud agda labay so mitongtong, nayarin ibaga ran, “Agmo ak la pupulongan ta wala lay relihyon ko” odino, “Agak interesado.” Balet, no maanos ka tan usaren moy dunong mo, ompan makapangitepet kay mamaliing ed interes na unabung ed espiritual iran bengatla.​—Basaen so Colosas 4:6.

¹⁷ No maminsan, sano walay mangibagan anggapoy panaon ton mitongtong, maabig no ibaga tayon natatalosan tayoy situasyon to, insan tayo la onalis. Balet, wala ray pankanawnawan sarag mo ni mangibagay antikey tan makabaliksan a mensahe. Wala ray agagin nagagawaan da ni mangibasay makapainteres a tekstod Biblia tan mamalesa na tepet diad loob labat na kulang a sakey minuto. Lapud satan et aliing so interes na unabung kanian amoria ton wala met manayay panaon ton mitongtong a magano. Maabig sirin no ontan so gawaen tayo no iyabuloy na sirkumstansya.

18. Antoy sarag tayon gawaen pian mas epektibo tayod pan-informal witnessing?

¹⁸ Sano wala ray nanaabet tayon totoo diad inagew-agew iran aktibidad tayo, posiblin naliing tayoy interes da ed maong a balita no akaparaan tayon man-informal witnessing. Dakel ya agagi so mangaawit na pigaran literatura diad bulsa odino bag da. Wala met lay sankanonot dan espisipikon tekstod Biblia ya inabang da no walay pankanawnawa. Sarag mon asinggeran so service overseer odino saray payunir ed kongregasyon yo pian natulongan da kan manparaan parad satan.

MATAKTIKAN LIINGEN IRAY KAKANAYON TAYO

19. Akin et agtayo onsasawan ontulong ed saray kakanayon tayo?

¹⁹ Natural labat ya labay tayon tulongan iray kakanayon tayo pian awaten day maong a balita. (Jos. 2:13; Gawa 10:24, 48; 16:31, 32) No diad gapo et ag-ira ondengel, nayarin natabangan tayo la. Ompan isipen tayon anggapo lay nagawaan tayo ya makapanguman ed isip da. Balet, nayarin wala ray nagawa ya makapanguman ed bilay odino panmoria da. Odino ompan inmaligwas ka lad abilidad mon mangipaliwawa ed katuaan kanian nayarin duma lay reaksion da.

20. Akin ya importante so pagmaliw a mataktika sano mitotongtong ed saray kakanayon mo?

 ²⁰ Nepeg tayon ikonsideray liknaan na saray kakanayon tayo. (Roma 2:4) Agta manepeg labat ya magalang so pitongtong tayod sikara a singa sano mitotongtong tayod saray totoo ed teritorya tayo? Nepeg ya mauyamo tan marespetoy pitongtong tayo. Paliisay impresyon ya singa ka naynay a mamupulong. Imbes, ipanengneng mod gawa so maabig ya epekto na katuaan ed sika. (Efe. 4:23, 24) Ipatnag mo no panon kan agunggonaan ed ‘impangibangat nen Jehova ed sika’ kanian awalaan na kabaliksan so bilay mo. (Isa. 48:17) Nepeg ya nanengneng na saray kakanayon mo ya talagan Makristiano so kabibilay mo.

21, 22. Mangisalaysay na eksperiensyan mangipapanengneng ya importante so pananos tan pansagpot pian natulongan ed espiritual iray kakanayon.

²¹ Oniay insulat na sakey a sister: “Panamegley na salita tan gawa et lanang ak ya mangipapanengneng na maabig a pantasi ed 13 agagik. Ag-onlabas so sakey taon ya agak onsulat ed balang sakey ed sikara. Balet, diad loob na 30 taon, siak labat so Tasi ed pamilya mi.”

²² Intuloy to: “Aminsan, tinawagan koy sakey ya atsik ya pigan lasus a kilometroy kaarawi na panaayaman to. Inistorya tod siak ya imbaga tod samay pastor da ya labay toy manpabangat na Biblia, balet ta agton balot kuno imbangat. Nen imbagak ed sikato ya siak lay mangibangat ed sikato, inkuan to: ‘Sige, balet natan ni labat et ibagak lad sika ya agak balot man-Tasi anggan kapigan.’ Sanen nipawitan ko lay libron Anto so Peteg ya Ibabangat na Biblia?, aminpigak ya tinawagan diad loob na sakey simba pian komustaen no abasa to la. Balet ta agto nin siansia abukay imay libro. Kanian aminsan, impaalak lad sikato, tan diad manga 15 minuto et binasa tan nantongtongan mi so pigaran tekstod satan a libro. Kayari pigara nin intawag ko, labay ton say panaral mi et aliwa labat lan 15 minuto. Insan nen kien et sikato lay ontatawag ed siak parad panaral mi. No maminsan ni ingen, agak ni abangon et ontatawag la, tan wala ray pankanawnawan mamiduan ontawag ed sanagew. Diad tinmumbok ya taon, abautismoan si atsik, tan kalabas na sakey taon et nampayunir.”

23. Akin et agtayo nepeg ya onkesaw ed pansasagpot tayon liingen iray totoo diad espiritual ya ugip?

²³ Pian natulongan tayo ray totoo ya onliing ed espiritual ya ugip, kaukolan so dunong, anos, tan sagpot. On, dakel nin mauyamon totoo so onkikiwas lapud pansasagpot tayon liingen ira. Diad average, masulok ya 20,000 kada bulan so manpapabautismo bilang Tasi nen Jehova. Kanian ipapuso tayo iyan simbawa nen Pablo ed si Arquipo nen inmunan siglo: “Itultuloy mon imanoen so ministeryo ya inawat mo ed Katawan, tan sumpal mo itan.” (Col. 4:17) Diad onsublay ya artikulo, naaralan tayo no antoy kabaliksan na pampulong tekep na inkaganatan.

[Tepetepet Parad Panagaral]

[Kahon ed pahina 13]

NO PANON KAN MAKAPANSIANSIAN ALIING

▪ Mansiansian okupado ed panggaway linaway Dios

▪ Paliisan iray kimey na kabilungetan

▪ Tandaan ya mapeligro so itemeg ed espiritual

▪ Pansiansiaen so positibon panmoria ed saray totood teritorya

▪ Salien so nanduruman paraan na panagpulong

▪ Lawas nonoten so kaimportantian na ministeryom