Amta nen Jehova no Panon Ton Iliktar Iray Totoo To

“Amta nen Jehova no panon ton iliktar ed subok iray maridios a totoo.”​—2 PED. 2:9.

AKIN YA MATALEK ITAYON:

Amta nen Jehova so dugan timing na saray ebento diad panumpal tod gagala to?

Usaren nen Jehova so pakapanyari to pian milaban parad totoo to?

Amta nen Jehova no panoy eksakton kagawa na saray ebento ed arapen?

1. Antoy situasyon legay “baleg a kairapan”?

SAY isabi na panangukom na Dios ed sistema nen Satanas et biglaan tan agnatalaranan. (1 Tes. 5:2, 3) Naguloy interon mundo diad satan ya “baleg ya agew nen Jehova.” (Sof. 1:14-17) Anggapoy nipuera ed irap tan subsubok. Panaon itan na gonigon ya “agni agawa manlapud inggapo na mundo anggad natan.”​—Basaen so Mateo 24:21, 22.

2, 3. (a) Antoy nasagmak na totoo na Dios legay “baleg a kairapan”? (b) Antoy makatulong pian makpel tayon nasungdoan so antokaman ya nagawad arapen?

² Antis ya manampot so “baleg a kairapan,” puntiryaen nen “Gog ed dalin na Magog” iray totoo na Dios. Atakien ira na “mabiskeg” ya armadan singa “lurem a manakbong na dalin.” (Eze. 38:2, 14-16) Anggapoy organisasyon na too ya mangiyagel ed totoo nen Jehova. Say Dios labat so mangiliktar ed sikara. Anto kasi reaksion da sano arap-arapan da lan nanenengneng so iyaataki nen Gog?

³ No sakey kan lingkor nen Jehova, kasin panisiaan mo ya sarag tan talagan salimbengan nen Jehova iray totoo to legay baleg a kairapan? Oniay insulat nen apostol Pedro: “Amta nen Jehova no panon ton iliktar ed subok iray maridios a totoo, balet iyalagar to ed agew na panangukom so paneral to ed agmatunong a totoo.” (2 Ped. 2:9) No dalepdepen tayoy impangiliktar nen Jehova ed saray lingkor to nensaman, makpel tayon nasungdoan so antokaman ya nagawad arapen. Aralen tayoy taloran alimbawa a mamabiskeg na panagmatalek tayod pakayari nen Jehova a mangiliktar ed totoo to.

NILIKTAR ED SANKAMUNDOAN A DELAP

4. Akin ya importante so timing no nipaakar ed isabi na Delap?

⁴ Unona, ikonsidera tayo pa imay salaysay nipaakar  ed Delap nen panaon nen Noe. Pian nagawa so linawa nen Jehova, importante so dugan timing. Kaukolan ya nasumpal so baleg a trabahon pangipaalagey ed biong tan niloob ditan iray ayayep antis ya onuran. Base ed salaysay na Genesis, ag-inalagar nen Jehova so kipaalagey na biong insan nandesisyon no kapigan so isabi Delap, ya no bilang ta naatrasadoy pakasumpal na biong et nai-adjust toy eskedyul to. Imbes, antis ya impaamta na Dios ed si Noe iray detalye ed pangipaalagey na biong, abayag To lan inggeter no kapigan so isabi na Delap. Akin ya nibaga tayo itan?

5. Antoy indeklara nen Jehova unong ed Genesis 6:3, tan kapigan to itan indeklara?

⁵ Unong ed Genesis 6:3, oniay indeklara nen Jehova manlapud tawen: “Say espirituk aglawas misumpaan ed too, ta sikato so laman met. Ingen ta saray agew to naani sanlasus tan duamplo a taon ira.” Dia et ag-ibabaga nen Jehova a say average ya dukey na bilay na too et 120 taon. Imbes, legal ya deklarasyon iya no kapigan so pangekal tod kaugsan diad dalin. * Lapud agawa so Delap nen 2370 B.C.E, nibaga tayo sirin ya imbalikas na Dios iyan deklarasyon nen 2490 B.C.E. Diad satan a panaon et 480 años lay Noe. (Gen. 7:6) Kalabas na manga 20 taon, nen 2470 B.C.E., ginmapon nanilalak si Noe. (Gen. 5:32) Manga 100 taon labat lay nakekeraan antis ya onsabi Delap, balet ta agni impaamta nen Jehova ed si Noe no antoy espisyal ya papel to pian niliktar so bilay na totoo. Pigara ni kasin taon so pinalabas na Dios antis ton imbaga itan ed si Noe?

6. Kapigan ingganggan nen Jehova si Noe ya mangipaalagey na biong?

⁶ Posiblin amalabas ni Jehova na pigaran dekada antis ton imbaga ed si Noe no antoy gawaen To. Akin et nibaga tayo itan? Ipapanengneng na pinuyanan a rekord ya angkabaleg la ray ilalak nen Noe tan wala lay kaasawaan da sanen sikatoy ingganggan na Dios ya mangipaalagey na biong. Inkuan nen Jehova ed sikato: “Dia ed sika so pangipaletnegan ko na sipan ko; et sika onloob ka naani ed biong, sika, tan saray lalaki ya anak [mo], tan si asawam, tan saray kaasawaan na saray anak mo.” (Gen. 6:9-18) Posible sirin ya sanen ingganggan na Dios si Noe ya mamaalagey na biong et manga 40 odino 50 taon labat lay nakekeraan antis na Delap.

7. (a) Panon ya impanengneng nen Noe tan na pamilya to so pananisia? (b) Kapigan imbaga na Dios ed si Noe so eksakton isabi Delap?

⁷ Legan ya ipapaalagey nen Noe tan na pamilya to so biong, nayarin naisip da no panon ya sumpalen na Dios so gagala to tan no kapigan so isabi Delap. Balet, anggano agda amta iratan ya detalye, ag-ira tinmunda ed pangipapaalagey day biong. Oniay inkuan na Kasulatan: “Unong na amin ya ingganggan na Dios ed [si Noe] ontan so ginawa to.” (Gen. 6:22) Imbaga nen Jehova ed si Noe no kapigan so isabi Delap sanen pitoy agew labat la antis ya ompelag so uran, dugaruga pian niloob nen Noe tan na pamilya to iray ayayep diad biong. Kanian nen alukasan iray dorongawen na tawen diad koma “anem a lasus taon a pambibilay nen Noe, nen komadua a bulan, sanen koma labinpito ya agew na bulan,” akaparaan lan amin.​—Gen. 7:1-5, 11.

8. Panon ya pinabiskeg na salaysay nipaakar ed Delap so talek tayo ya amta nen Jehova no kapigay pangiliktar tod totoo to?

⁸ Papaneknekan na salaysay nipaakar ed Delap ya si Jehova so sankarunongan a Manangigeter na Panaon tan Manangiliktar. Legan ton bibilangen so nakekeran panaon na sayan sistema na bengabengatla, makaseguro itayo ya nagawa so amin ya  gagala to diad mismon “agew tan oras” ya inggeter to.​—Mat. 24:36; basaen so Habacuc 2:3.

NILIKTAR DIAD AMBALANGAN DAYAT

9, 10. Panon ya inusar nen Jehova iray totoo to pian patitan so armada na Ehipto?

⁹ On, anengneng tayon si Jehova so alenleneg a manangigeter no kapigay kagawa na saray ebento pian nasumpal so gagala to. Diad komaduan alimbawa ya ikonsidera tayo, naaralan tayo so sakey nin rason no akin ya makapanmatalek itayon sarag nen Jehova ya iliktar iray totoo to: Uusaren to so ag-alimitaan ya pakapanyari to pian seguroen ya nagawa so linawa to. Segsegurado si Jehova ya nailiktar to ray lingkor to, kanian no maminsan et uusaren to ni ra ingen ya tapang pian patitan iray kalaban. Ontan so agawa sanen imbulos to ray Israelita manlapud impakaaripen dad Ehipto.

¹⁰ Manga taloran milyon ya Israelita so tinmaynan ed Ehipto. Ingganggan nen Jehova si Moises ya ipaarap to rad rotan isipen nen Faraon ya nababalang ira tan agda la amtay arapen da. (Basaen so Exodo 14:1-4.) Parad si Faraon et pankanawnawa to la itan, kanian indaulo toy armada to pian usilan iray datin ariripen da. Say walad arapan na saray Israelita et say Ambalangan Dayat, tan walad benegan iray unuusil ya Ehipsio. Singa anggapo lay nagawaan da. (Exo. 14:5-10) Balet diad tua, ag-ira napepeligro. Akin ey? Lapud si Jehova so milaban parad sikara.

11, 12. (a) Panon ya akilaban si Jehova parad totoo to? (b) Antoy resulta, tan antoy naaralan tayo nipaakar ed si Jehova diad sayan salaysay?

¹¹ Samay “singa lusek a lurem” ya mangigigiyad saray Israelita et inmalis ed benegan da, kanian agmakaasingger so armada nen Faraon tan binmilunget ed kawalaan na saray Ehipsio. Diad saray Israelita balet, sayan lurem so liwawa da no labi. (Basaen so Exodo 14:19, 20.) Insan binelsay nen Jehova so dayat panamegley na maksil a dagem ya nanlapud bukig, kanian ‘say dayat et nagmaliw ya amagan dalin.’ Maseguron medyo abayag met iya, ta unong ed Biblia  et agawa iyad sanlabi, insan la dinmalan iray Israelita ed amagan dalin diad pegley na dayat. No ikomparad saray akakarwahen armada nen Faraon, matantantan iray Israelita. Balet ta imposiblin makausil iray Ehipsio lapud si Jehova so milalaban parad Israel. “Binuyak to so ehersito na saray Ehipsios. Tan inekal to so dalidalig na saray luganan da, kanian ambelabelat ira ya impagayugoy da.”​—Exo. 14:21-25.

¹² Sanen akabeltang la so amin ya Israelita, ingganggan nen Jehova si Moises: “Iyayag mo so limam ed dayat pian saray danum manolian [odino, ontabon] ira ed saray Ehipsios, dia ed saray luganan da, tan saray kabayoan da.” Sinali na saray Ehipsion sundalo so ontakas, balet ta ‘impasag ira nen Jehova diman ed pegley na dayat.’ Ag-ira akatakas. “Anggapo so nakdaan ed sikara ya anggan sakey.” (Exo. 14:26-28) Impanengneng nen Jehova ya walay pakayari ton mangiliktar ed totoo to diad antokaman a situasyon.

NILIKTAR ED IMPAKADERAL NA JERUSALEM

13. Anto ran instruksion so inter nen Jesus, tan antoy nayarin inisip na saray papatumbok to?

¹³ Diad panusumpal nen Jehova ed gagala to, amta to no panoy eksakton kagawa na saray ebento. Napaneknekan tayo iya diad komatlon alimbawa ya ikonsidera tayo: say impanakop ed Jerusalem nen inmunan siglo. Panamegley nen Jesus et angiter si Jehova na instruksion no panon ya makaliktar iray Kristiano ya manaayam ed Jerusalem tan Judea antis ya aderal so syudad nen 70 C.E. Inkuan nen Jesus: “Sano nanengneng yo a manalalagey la ed masanton pasen so makapadimlan bengatla a pansengegan na kaderal, a singa samay sinalita ed panamegley nen propetan Daniel, . . . saramay walad Judea et ombatik la ed kapalandeyan.” (Mat. 24:15, 16) Balet, panon ya naamtaan na saray papatumbok nen Jesus ya nagagawa la iyan propesiya?

14. Panon ya alinewan so kabaliksan na saray instruksion nen Jesus ed nantutumbokan ya agawad Jerusalem?

¹⁴ Linminew so kabaliksan na sarayan salita nen Jesus sanen naimatonan na saray papatumbok to iray nantutumbokan ya agawad Jerusalem. Nen 66 C.E., sinmabid Jerusalem so armada na Roma ya indaulo nen Cestius Gallus pian patundaen so panrerebelde na saray Judio. Sanen inmamot iray rebelden Judio ya tatawagen a Zealot diad pinagka-salimbengan na templo, dineral na saray Romanon sundalo so padir na templo. Atalosan na saray aliing a Kristiano no antoy kabaliksan na sarayan nagagawa: Akaasingger lad padir na templo (“masanton pasen”) iray paganon sundalo (“makapadimlan bengatla”). On, panaon la itan pian “ombatik la ed kapalandeyan” iray papatumbok nen Jesus. Balet panon iran makatakas anta apaliberan so syudad? Agda inilaloan iray tinmumbok ya agawa.

15, 16. (a) Anton espisipikon instruksion so inter nen Jesus tan akin ya nepeg itan a tuloken na saray papatumbok to? (b) Anto so akadependian na kiliktar tayo?

 ¹⁵ Diad ag-amtan rason, inmatras si Cestius Gallus tan say armada to. Inmusil iray Zealot. Natan ta akaarawid Jerusalem irayan manlalaban ya grupo, pankanawnawa la na saray papatumbok nen Jesus so ontakas. Espisipikon imbaga nen Jesus ya kaukolan dan taynan iray materyal ya kaykayarian da tan ombatik la ran tampol. (Basaen so Mateo 24:17, 18.) Talaga kasin kaukolan ya ombatik iran tampol? On, tan say rason et alinewan diad tinmumbok iran agew. Amawil ed Jerusalem iray Zealot tan pinasoot da iray totoo diman a mila ed panrerebelde ra. Mapmaples ya linmoor so situasyon ed syudad ta nanlalaban a mismo iray grupo na saray Judio. Labay na balang sakey ya naalay pakauley ed syudad. Kanian mas mairap lay ontakas. Sanen amawil iray Romano nen 70 C.E., talagan imposible lay ontakas. (Luc. 19:43) Aramay nanpappaleen, agla ran balot akatakas! Saramay Kristiano balet ya batik ed kapalandeyan et nisalbay bilay da lapud tinulok day instruksion nen Jesus. Apaneknekan dan mismo ya amta nen Jehova no panon ton iliktar iray totoo to. Antoy naaralan tayod sayan inkagawa?

¹⁶ Legan ya nagagawa iray ebento ed baleg a kairapan, kaukolan ya tuloken na saray Kristiano iray instruksion manlapud Salita na Dios tan organisasyon to. Alimbawa, say ganggan nen Jesus ya “ombatik la ed kapalandeyan” et onaplika met ed panaon tayo. Agtayo ni amta no anton ibatik so kaukolan tayon gawaen. * Balet, makaseguro itayo ya ipalinew nen Jehova so kabaliksan na saratan ya instruksion sano nasabi lay panaon a kaukolan tayo lan gawaen itan. Say kililiktar tayo et akadepende ed itulok tayo, kanian maabig no itepet tayo: ‘Antoy reaksion ko ed saray instruksion ya iiter nen Jehova natan? Kasin ontutulok ak ya tampol odino mapaleen ak?’​—Sant. 3:17.

MAKPEL TAYON ALAGAREN SO NAGAWAD ARAPEN

17. Antoy ipapanengneng na propesiya nen Habacuc nipaakar ed asingger lan iyataki nen Gog ed totoo na Dios?

¹⁷ Pawilen tayo imay iyataki nen Gog ya apantongtongan tayo niman. Diad sakey a miparan propesiya et inkuan nen Habacuc: “Nadngel ko, tan ginmiwgiw so eges ko; manggiwgiw iray bibil ko lapud mensahe; say kabubulok so linmoob ed saray pukel ko; tan ginmiwgiw ak lapud kipapasen ko, balet mareen kon alagaren so agew na gonigon, say isabi to [Dios] ed saray totoo [say onaatakin armada], ta pian lusoben to ra.” (Hab. 3:16, NW) Anggan say impakadngel labat na propeta ed balitan pangataki ed totoo na Dios et sengegan lay inyagasang na eges to, inggiwgiw na bibil to, tan inkapuy na pukel to. Ipapanengneng na reaksion nen Habacuc ya talagan grabe so irap ya sagmaken tayo sano atakien itayo la nen Gog tan na armada to. Balet ta siansian al-alagaren na propeta so baleg ya agew nen Jehova, matalek ya iliktar nen Jehova iray totoo to. Ontan met komon so panagmatalek tayo.​—Hab. 3:18, 19.

18. (a) Akin et agtayo nepeg ya takotan so asingger lan iyataki nen Gog? (b) Antoy aralen tayod onsublay ya artikulo?

¹⁸ Ipapanengneng na sayan taloran alimbawa ya inaral tayo a seguradon amta nen Jehova no panoy pangiliktar tod totoo to. Imposiblin agnatuloy so gagala to; seguradoy panalo to. Balet, pian kaiba tayod satan ya maglorian pananalo, nepeg ya mansiansia itayon matoor anggad anggaan. Panon itayon tutulongan nen Jehova natan a napansiansiay katooran tayo? Aralen tayo itan diad onsublay ya artikulo.

[Saray paimano ed leksab]

[Tepetepet Parad Panagaral]

[Litrato ed pahina 24]

Talaga kasin nipeligro so bilay na saray Israelita sanen inusilan ira na armada nen Faraon?