Pansiansiaey Sigpot-puson Panaglingkor ed si Jehova
Pansiansiaey Sigpot-puson Panaglingkor ed si Jehova
“Ana’ko, kabaten moy Dios nen amam tan manlingkor kad sikato a maliket tan sigpot-puso.”—1 AWA. 28:9, NW.
ANAPEN SO EBAT ED SARAYAN TEPET:
Anto so piguratibon puso?
Anton paraan so usaren tayo pian nausisay puso tayo?
Panon tayon napansiansiay sigpot-puson panaglingkor ed si Jehova?
1, 2. (a) Anton parte na laman so mas mabetbet ya sasalambiten na Biblia ed piguratibon paraan? (b) Akin et importantin natalosan tayoy kabaliksan na piguratibon puso?
MABETBET ya tutukoyen na Biblia iray parte na laman diad piguratibon paraan. Alimbawa, oniay imbaga nen patriarkan Job: “Anggapo so pamasoot ed saray limak.” Inkuan nen Arin Solomon: “Saray maong a balita patabaen da so saray pukel.” Impaseguro nen Jehova ed si Ezequiel: “Singa diamante ya anawet nen bato so ginawak ed moling mo.” Tan walay angibagad si Pablo ya, “awiten mo ed saray kalayagan mi so saray balo a bengatla.”—Job 16:17; Uli. 15:30; Eze. 3:9; Gawa 17:20.
2 Balet, walay parte na laman ya mas mabetbet ya nasasalambit ed Biblia diad piguratibon paraan. Saya imay binitla nen matoor ya Hana diad pikakasi to: “Say pusok manggayaga ed Jehova.” (1 Sam. 2:1) Diad tua et masulok a sanlibon danay a binitla na saray managsulat na Biblia so puso, a maslak et diad piguratibon paraan. Kanian importantin natalosan tayo no antoy irerepresenta na piguratibon puso, ta ibabaga na Biblia a kaukolan tayon salimbengan itan.—Basaen so Uliran 4:23.
ANTO SO PIGURATIBON PUSO?
3. Panon tayon natalosan so kabaliksan na salitan “puso” ed Biblia? Iyilustra.
3 Anggaman ag-iikdan na eksakton kabaliksan na Biblia so salitan “puso,” tutulongan to itayon natalosan itan. Panon? Pian iyilustra, imadyin yo pay sakey a jigsaw puzzle ya tugyopen na dakel a piraso na cardboard. Pian nanengneng tayo no antoy litrato na jigsaw puzzle, kaukolan tayon tuopen itan. Mipadpara, nepeg tayo met a tugyopen so inkausar na salitan “puso” ed Biblia pian natalosan tayo so kabaliksan na satan. Kanian, anto sirin so piguratibon puso?
4. (a) Antoy kabaliksan na salitan “puso”? (b) Antoy labay ya ibaga na inkuan nen Jesus ed Mateo 22:37?
4 Uusaren na saray managsulat na Biblia so salitan “puso” pian tukoyen so inkatoo na sakey. Lalaktipen na satan iray pilalek, kanonotan, personalidad, ugali, abilidad, motibo, tan kalat tayo. (Basaen so Deuteronomio 15:7; Uliran 16:9; Gawa 2:26.) Unong ed sakey a reperensya, satan et say “peteg ya inkatoo” na sakey. No maminsan, walay espisipikon kabaliksan na “puso.” Alimbawa, inkuan nen Jesus: “Arom si Jehova a Dios mo ed interon pusom tan ed interon kamarerwam tan ed interon nonot mo.” (Mat. 22:37) Say tutukoyen na “puso” dia et say mismon emosyon, pilalek, tan liknaan na sakey a too. Diad espisipikon impanalambit nen Jesus ed puso, kamarerwa, tan nonot, labay ton idanet ya kaukolan tayon aroen so Dios, tan ipatnag itan a panangaro ed kabibilay tan panagnonot tayo. (Juan 17:3; Efe. 6:6) Balet no “puso” labat so nasasaglawi, say kabaliksan na satan et say interon inkatoo na sakey.
AKIN A KAUKOLAN TAYON SALIMBENGAY PUSO TAYO
5. Akin et kaukolan tayon gawaey anggaay nayarian tayon sigpot-puso a panlingkoray Jehova?
5 Oniay impanonot nen Arin David ed si Solomon: “Ana’ko, kabaten moy Dios nen amam tan manlingkor kad sikato a maliket tan sigpot-puso, ta uusisaen nen Jehova so amin a kapusoan, tan natetebek toy amin a kanonotan tan motibo na sakey.” (1 Awa. 28:9, NW) On, si Jehova so Manangusisa na amin a puso, kaibay puso tayo. (Uli. 17:3; 21:2) Tan say nausisa tod puso tayo et walaan na baleg ya epektod relasyon tayod sikato tan ed arapen tayo. Kanian maabig sirin no tumboken tayoy simbawa nen David ya gawaey anggaay nayarian tayon sigpot-puso a panlingkoray Jehova.
6. Antoy nepeg tayon nodnonoten legan a sigpot-puso tayon panlilingkoray Jehova?
6 Ipapanengneng na seseg tayod ministeryo a talagan sigpot-puso tayon panlilingkoray Jehova. Balet, amta tayon say impluensya na mauges a mundo nen Satanas tan say makasalanan a tendensia tayo et nayarin mamakapuy ed satan a determinasyon tayo. (Jer. 17:9; Efe. 2:2) Sirin, pian naamtaan tayon ag-onkakapuy so determinasyon tayon panlingkoray Dios, kaukolan tayon usisaen a regular so puso tayo. Panon tayon gawaen itan?
7. Panon a napatnagan so kondisyon na puso tayo?
7 Anggapoy makanengneng ed peteg ya inkatoo na sakey, no panon ya agmet nanengneng so walad dalem na kiew. Anggaman ontan, imbaga nen Jesus ed Sermon tod Palandey ya no panon a napatnagan ed bunga so kondisyon na kiew, napatnagan met ed saray gagawaen tayo so kondisyon na puso tayo. (Mat. 7:17-20) Pantongtongan tayoy sakey ed saraya.
SAKEY A PARAAN PIAN NAUSISA SO PUSO TAYO
8. Unong ed salita nen Jesus ed Mateo 6:33, panon tayon nipatnag no antoy walad puso tayo?
8 Diad saman lanlamang a sermon nen Jesus, imbaga tod saray dumerengel to no antoy espisipikon gawaen da pian nipanengneng so pilalek dan manlingkor a sigpot-puso ed si Jehova. Inkuan to: “Itultuloy yo sirin ya anapen nin unona so panarian tan say inkatunong to, tan sarayan amin a bengatla so niarum ed sikayo.” (Mat. 6:33) Kanian napatnagan ed saray pilalek, nononoten, tan plano tayo no antoy iyuuna tayod bilay tayo. Say pangusisad saray prayuridad tayo so sakey a paraan pian naamtaan no kasin sigpot-puso tayon manlilingkor ed Dios.
9. Antoy inyimbita nen Jesus ed pigaran lalaki, tan antoy ipapatnag na reaksion da?
9 Pantongtongan tayoy sakey a situasyon ya agawa kayarin imbaga nen Jesus ed saray papatumbok ton ‘itultuloy dan anapen ya unona so panarian.’ Impanengneng na sayan situasyon ya napatnagan so kipapasen na puso na sakey ed no antoy iyuuna tod bilay to. Inggapo nen Lucas itan a situasyon diad impangibagan “desidido lan onla ed Jerusalem” si Jesus, anggaman amta toy nagawad sikato diman. Legan ton ‘walad dalan’ kaiba ray apostol to, wala ray nabet dan lalaki ya inimbitaan ton ‘magmaliw a papatumbok to.’ Inawat da itan, balet ta walay kondisyon. Oniay kuan na sakey ed sikara: “Abuloyan mo ak nin ontaynan tan iponpon koy amak.” Inkuan met na sananey: “Ontumbok ak ed sika, Katawan, balet abuloyan mo ak nin manpatanir ed sankaabungan ko.” (Luc. 9:51, 57-61) Talagan baleg so pidumaan na mapekder a desisyon nen Jesus a gawaey linawa na Dios komparad reaksion na saraman a lalaki. Impatnag dan agda labay so manlingkor ed Dios a sigpot-puso lapud inyuna day panlabayan da imbes a say interes na Panarian.
10. (a) Antoy inkiwas na saray Kristiano ed imbitasyon nen Jesus? (b) Anton ilustrasyon so inusar nen Jesus?
10 Makabat itayo ta inawat tayo so imbitasyon nen Jesus a magmaliw a patumbok to, tan natan et manlilingkor tayod si Jehova, aliwan singa saraman a lalaki. Lapud satan et nipapatnag tayoy liknaan tayo nipaakar ed panaglingkor ed si Jehova. Balet, anggaman aktibo tayon manlilingkor ed Dios, kaukolan tayon tandaan a posible nin siansia ya nipeligroy puso tayo. Akin? Imbaga nen Jesus so rason ed saramay magmaliw komon a babangatan to: “Say toon ombemben ed lukoy tan onlingaw ed saray walad benegan et agmakanepegan ed panarian na Dios.” (Luc. 9:62) Antoy naaralan tayod sayan ilustrasyon?
KASIN ‘OMPEPEKET TAYO ED MAONG’?
11. Antoy agawad kimey na dumaralos ed ilustrasyon nen Jesus, tan akin?
11 Pian natalosan tayon maong so leksion ed ilustrasyon nen Jesus, nengnengen tayoy arum a detalye. Okupadon manbabaka so sakey ya uupaan a dumaralos. Balet legan ton mankikimey, sankanonot toy pamilya tan kakaaro to, panangan, musika, liket, tan panrelaks. Pilpilaleken to iratan. Maawang lay abaka to, balet say pampilalek tod saramay mararakep a bengatla et mas lalon binmiskeg kanian sikatoy asagyat ya onlingaw ed “saray walad benegan.” Anggaman dakel ni gawaen to antis ton natanemay uma, inabuloyan ton sikatoy naabala kanian naapektoay kimey to. Siempre, adismayay amo to ta agnan-anos iyan aripen.
12. Antoy piparaan na samay dumaralos ed ilustrasyon nen Jesus ed arum a Kristiano natan?
12 Imanoen tayo natan so piparaan na satan ya ilustrasyon ed panaon tayo. Say irerepresenta na dumaralos et siopaman a Kristianon singa aktibo, anta manaya et napepeligro lay espiritualidad to. Pian natalosan tayo iya, isipen tayo pay sakey a brother a maseseg ed ministeryo. Ingen, say sankanonot ton lanang et saray bengatlan iyoopresi na sayan mundo tan diad puso to et pilalek to iratan a maong. Kayari pigaran taon na impanlingkor tod Dios, say pampilalek tod saray bengatlan iyoopresi na mundo et mas lalon binmiskeg, kanian sikatoy asagyat ya onlingaw ed “saray walad benegan.” Anggaman dakel ni kimey ed ministeryo, agto ‘binembenan a malet so salita na bilay,’ tan kinmapuy lay seseg tod panaglingkor ed Dios. (Fil. 2:16) Si Jehova, say “Katawan na panag-ani,” et nadismaya sano agman-anos iray lingkor to.—Luc. 10:2.
13. Antoy kabaliksan na sigpot-puso a panaglingkor ed si Jehova?
13 Malinlinew so leksion. Say sigpot-puso a panaglingkor ed si Jehova et aglabat mankabaliksan na regular ya iyatendid saray miting tan pibiang ed ministeryo. (2 Awa. 25:1, 2, 27) No itultuloy ya aroen na sakey a Kristiano iray “walad benegan”—say klase na panagbilay ed sayan mundo—ipepeligro toy maabig a relasyon tod Dios. (Luc. 17:32) Kanian no talagan ‘bubusolen tayo so mauges, tan ompepeket tayo ed maong,’ magmaliw itayon ‘makanepegan ed panarian na Dios.’ (Roma 12:9; Luc. 9:62) Anggaman wala ray mausar odino marakdakep a bengatlan iyoopresi na sayan mundo nen Satanas, kaukolan tayon seguroen ya anggapoy mamatunda ed sikatayon sigpot-puso a manlingkor ed Dios.—2 Cor. 11:14; basaen so Filipos 3:13, 14.
MANSIANSIAN ALERTO!
14, 15. (a) Panon a sasalien nen Satanas ya impluensyaan so kondisyon na puso tayo? (b) Iyilustra no akin ya epektiboy taktika nen Satanas?
14 Say panangaro tayod si Jehova so amakiwas ed sikatayon magmaliw a dedikadon lingkor to. Manlapud impangidedika tayoy bilay tayo, apaneknekan ti lan determinado tayon manlingkor ed si Jehova a sigpot-puso. Balet, agni tinmunday Satanas ed panutukso to. Say puntirya to nin siansia et say puso tayo. (Efe. 6:12) Siempre, amta ton agtayo basta-bastan itunday panaglingkor ed si Jehova. Kanian, masilib ton uusaren so sistema na bengabengatla pian kalkalnan pakapuyey seseg tayod panaglingkor ed Dios. (Basaen so Marcos 4:18, 19.) Akin ya epektibo itan a taktika nen Satanas?
15 Pian naebatan tayo itan a tepet, imadyin yo pan legan kayon manbabasay libro et biglan apundyi so 100-watt ya bombilyan uusaren yo. Lapud ambilunget, sinalatan yon tampol itan kanian linmiwawa lamet so interon kuarto. Diad sinmublay a labi, ditan lamet a lugar so nambasaan yo. Balet, agyo amtan samay balon 100-watt ya bombilya et sinalatan na 95-watt. Kasin naimano yoy pandumaan to? Ompan andi. Panon to no diad ontumbok a labi et sinalatan lamet itan na 90-watt? Ompan agyo nin siansia itan naimano. Akin ey? Lapud kalkalnay impansalat ed bombilya, agtayo naimanoy inkuyep na silew. Ontan met, nayarin say impluensya nen Satanas et kalkalnan mamakapuy na seseg tayo. No nagawa itan, aliling to et analoy Satanas ed kalkalnan impamakuyep na 100-watt a seseg tayod panaglingkor ed si Jehova. No say sakey a Kristiano et agmansiansian alerto, agto naimano itan a kalkalnan pananguman.—Mat. 24:42; 1 Ped. 5:8.
KAUKOLAN TAYOY MANPIKASI
16. Panon tayon naprotektaay sarili tayo manlapud saray taktika nen Satanas?
16 Panon tayon naprotektaay sarili tayo manlapud saray taktika nen Satanas tan napansiansiay sigpot-puso a panaglingkor ed si Jehova? (2 Cor. 2:11) Kaukolan tayoy manpikasi. Pinaseseg nen Pablo iray Kristiano ya ‘ontalindeg sumpad saray masilib a paraan na Diablo.’ Tan imbaga ton, “diad amin a paraan na panagpikasi tan masimoon a pikekerew et mantultuloy kayon manpikasi ed amin a pankanawnawa.”—Efe. 6:11, 18; 1 Ped. 4:7.
17. Antoy naaralan tayod paraan na impanpikasi nen Jesus?
17 Pian makatalindeg tayo sumpad si Satanas, maabig no aligen tayoy Jesus, tan say pilalek ton manlingkor ed si Jehova a sigpot-puso. Oniay insulat nen Lucas nipaakar ed paraan na impanpikasi nen Jesus diad samay labi antis ton ompatey: “Lapud nagogonigon a maong, sikatoy nantultuloy a nampikasin masimsimoon.” (Luc. 22:44) Amta tayon masimoon so panagpikasi nen Jesus, balet diad saman a pankanawnawa a kaukolan ton sungdoan so sankairapan a subok ed bilay to diad dalin, sikatoy nampikasi a mas “masimsimoon,” tan naebatan so pikakasi to. Impanengneng na alimbawa nen Jesus ya wala ray nanduruman kalidad na pikakasi. Kanian no kapigan mas mairap iray subok tan mas masilib iray taktika nen Satanas, kaukolan a mas “masimsimoon” so pampikasi tayod Jehova parad proteksion to.
18. (a) Antoy kaukolan tayon itepet ed inkasikatayo nipaakar ed pikakasi, tan akin? (b) Anto ray bengatlan mangapektod puso tayo, tan diad anto ran paraan? (Nengnengen so kahon ed pahina 16.)
18 Antoy resulta na ontan iran masimoon a pikakasi? Oniay imbaga nen Pablo: “Diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say deen na Dios a palumbasan toy amin a kanonotan so manbantay ed saray puso.” (Fil. 4:6, 7) No talagan labay tayoy manlingkor a sigpot-puso ed si Jehova, kaukolan a regular tan masimoon so panagpikasi tayod sikato. (Luc. 6:12) Kanian tepetan tayoy sarili tayo, ‘Panon kabetbet tan kasimoon so pikakasik?’ (Mat. 7:7; Rom. 12:12) Napatnagan ed ebat yo no panon kabiskeg so pilalek yon manlingkor ed Dios.
19. Antoy nepeg tayon gawaen pian napansiansiay sigpot-puson panaglingkor ed si Jehova?
19 Unong ed naaralan tayo la, napatnagan ed saray prayuridad tayod bilay so kondisyon na puso tayo. Labay tayon seguroen ya agnapakapuy na saray bengatlan imbeneg tayo odino na saray masilib a taktika nen Satanas so determinasyon tayon sigpot-puso a panlingkoray Jehova. (Basaen so Lucas 21:19, 34-36.) Kanian, singa si David, itultuloy tayon ipikasid si Jehova ya ‘iyapasakey to so puso tayo.’—Sal. 86:11.
[Tepetepet Parad Panagaral]
[Kahon ed pahina 16]
TALORAN BENGATLAN MANGAPEKTAD PUSO TAYO
No panon a manpapacheck-up tayo pian naamtaay kondisyon na literal a puso tayo, wala met so nagawaan tayo pian nacheck-up so piguratibon puso tayo. Konsideraen tayoy taloran importantin bengatla:
1 Taganoen: Kaukolan na literal a puso tayo so masustansia iran tagano. Ontan met, nepeg tayon seguroen ya makakaawat tayo na magenap ya espiritual a naakan panamegley na regular a personal a panagaral, panagdalepdep, tan iyaatendid saray miting.—Sal. 1:1, 2; Uli. 15:28; Heb. 10:24, 25.
2 Ehersisyo: Pian magmaliw a mabunigas so literal a puso tayo, no maminsan, kaukolan ya omparok itan a maples. Ontan met, say maseseg a pibibiang tayod ministeryo—kaibay panggunaet ya paaligwasen so kimey tayo—so ontulong pian napansiansian maabig so kondisyon na piguratibon puso tayo.—Luc. 13:24; Fil. 3:12.
3 Kaliberliber: Say mauges a kaliberliber a pambibilayan tan pantratrabahoan tayo so mangi-stress ed literal tan piguratibon puso tayo. Anggaman ontan, nabawasan itan ya stress no gawaen tayoy anggaay nayarian tayon miulop a naynay ed saray agagin talagan mangiyaansakit ed sikatayo tan determinadon manlingkor ed Dios a sigpot-puso.—Sal. 119:63; Uli. 13:20.
