UNONG ED SALAYSAY NEN ELVA GJERDE

Manga 70 taon lay apalabas, walay binmisitad abung mi tan walay imbaga tod si tatay ko ya akapanguman ed bilay ko. Manlapud saman ya agnalingwanan ya agew, dakel so walaan na maabig ya impluensyad siak. Tan lapud satan et akabat koy sankaabigan ya kaaro a papablien ko nen say siopaman. Nia ay so istorya to ’tan.

NIANAK ak ed Sydney, Australia nen 1932. Manisiad Dios iray ateng ko balet ag-ira mimimisa. Mamatbantay kunoy Dios so kuan nen nanay ko, tan dusaen to ak no anawet so ulok. Antakotakot ko laingey Dios. Balet ta nainteresan ak ed Biblia. Sano ombibisitay panginaen ko no Sabado-Simba, amayamay so balibalin istorya ton nanlapud Biblia. Tatalaranan kon naynay so iyakar tod abung mi.

Nen tin-edyer ak la, walay akulaw ya Tasi nen Jehova ya angiter na pigaran libro ed si nanay ko. Binasa iratan nen tatay ko tan pandinayewan toy abasa to kanian nampaiyaral na Biblia ed saray Tasi. Aminsan, sanen iyaaralan day tatay ko, narel to ak ya midedengel. Labalabay to ak lan paalisen pian onugip ak la, balet ta inkuan na mangiyaaral, “Labay mon ipilay Elva ed panaaral tayo?” Satan ya imbaga to so gapoan na balon bilay ko tan pikakaarok ed tuan Dios​—si Jehova.

Ag-abayag kayari na satan, ginapoan mi nen tatay ko so miaral. Sikatoy apakiwas ya manguman lapud saray nanaaralan to. Nakokontrol to lay pasnok to, kanian apakiwas met si nanay ko tan si kuyak Frank ya miaral. * Inmaligwas kamin apat ed espiritual tan abautismoan kami bilang Tasi nen Jehova. Manlapud saman, dakel ya maedad lan agagi so walaan na maabig ya impluensyad siak anggad natan.

SANEN MANPIPILI AK NA KURSO

Nen tin-edyer ak, maap-apit ak ed saray maedad diad kongregasyon mi. Sakey ed sikara si Alice Place, samay akulaw ya inmunan nampulong ed sikami. Inturing to ak ya singa apo to. Impasal to ak ed panagpulong tan pinaseseg to ak ya gawaen kon kalat so pampabautismo. Adampot ko ’tan a kalat nen 15 años ko.

Akaarok met so maedad lan sanasawa ya si Percy tan Madge [Margaret] Dunham. Baleg so epekto na impikaarok ed sikara. Paboritok so math, kanian labalabay koy magmaliw ya math teacher. Nanmisionero ira di Percy tan Madge ed Latvia nen 1930’s. Sanen ginmapoy World War II ed Europa, niyasain irad Australia Bethel ya walad  baryo na Sydney. Talagan nanggunaetan di Percy tan Madge ya tulongan ak. Inistorya day dakdakel ya eksperiensyan agda nalinglingwanan ed impanmisionero da. Diman ko amoria ya mas maliket so pambangat na Biblia nen say pambangat na math. Kanian mas labay ko lay magmaliw ya misionero.

Pinaseseg ak na sayan sanasawa ya manpayunir pian nipasal ak ed panagmisionero. Kanian nen 1948, sanen 16 años ko, sakey ak lad saray samploran kalangweran ya payunir diad kongregasyon mi ed Hurstville, Sydney.

Diad sinmublay ya apat taon, nampayunir ak ed apatiran baley na New South Wales tan Queensland. Sakey ed saray inmunan inyaralan ko et si Betty Law (Remnant lay apelyido to natan). Maar-aroy Betty, tan panguloan na duay taon ed siak. Sikatoy nagmaliw ya partner kod panagpayunir diad Cowra, manga 230 kilometro ed sagur na Sydney. Anggano aganggano kamin akapaniba nen Betty, anggad natan et sankaaro kami ni.

Niyasain ak ya special pioneer diad baley na Narrandera a 220 kilometro so kaarawi tod Cowra. Si Joy Lennox (Hunter lay apelyido to natan) so balon partner ko. Si Joy et maseseg a payunir ya panguloan met na duay taon ed siak. Sikami labat so Tasi ed satan a baley. Nanrenta kami nen Joy ed abung na maomaong a sanasawan Ray tan Esther Irons. Sikaray interesadod katuaan pati say apatiran anak da (sakey ya laki tan taloran bibii). Mantratrabahoy Ray tan say balolaki to diad maawang ya tanemay trigo tan panagkomponiay karnero ed sananey a baley. Si Esther balet tan saramay mamarikit so mangaasikasod boarding house da. Kada Simba, manluluto kami nen Joy na pandeman na sayan pamilya tan na manga labinduan manrerenta ed boarding house da​—lalaki iran amin ya trabahador ed riles na tren. Kaiba iyad bayar mid abung. Sano asumpal kami lan nansinop, parungoan mi so pamilyay Irons na mananam ya espiritual a naakan​—say panaral mi na Panag-bantayan. Amin da et nagmaliw a Tasi, tan kaiba irad saray inmuunan agagi ed Narrandera Congregation.

Nen 1951, inmatendi ak ed kombension na Saray Tasi nen Jehova diad Sydney. Ditan et inmatendi ak ed special meeting parad saray payunir a malabay a manmisionero. Masulok ya 300 so inmatendid satan a miting ya ginawad maawang a pasen ya inatepay tolda. Si Nathan Knorr a nanlapud Brooklyn Bethel so nampaliwawa tan indanet toy inkaganatan na pangipulong ed maong a balita diad amin a sukong na dalin. Matattalineng kamid amin ya imbaga to. Dakel ed saray payunir ya inmatendid satan a miting so angigapo ed panagpulong a kimey diad South Pacific tan arum ni ran bansa. Malikeliket ak ta sakey ak ed saray 17 ya Australian a naimbitaan ed koma 19 a klase na Gilead School nen 1952. Duamploy años ko ni labat et kalkalnak lan nadadampot imay kalat kon manmisionero!

SANEN KAUKOLAN KOY NIPETEK

Saray naaralan tan apiulopan ko legay impanaral kod Gilead et aglabat angarum na kakabatan kod Biblia tan amabiskeg na pananisiak, noagta baleg met so epekto tod personalidad ko. Lapud ugaw ak nid saman tan labay kon duga so amin a gagawaen ko, perpeksionista ak ed sarilik tan ed arum. No maminsan et alablabas so inka-istriktok. Singa bilang, abigbigla ak nen anengneng koy Brother Knorr ya migagalaw ed saray kalangweran a Bethelite.

Nayarin naimano na saray makatebek tan eksperiensyadon instructor mid Gilead a lalabanan ko iyan ugalik. Nanggunaetan da ak ya tulongan pian nipetek koy kanonotan ko. Lapud satan et kalkalnan amoriak ya si Jehova et maaro tan maapresyan  Dios, aliwan is-istrikto tan agto oobligaen iray lingkor to. Tinulongan ak met na saray kaklasek. Nanonotan koy imbaga na sakey ed sikara: “Elva, antoy antam ed si Aman Jehova a, walay awit ton lewet? Agka masyadon is-istriktod sarilim!” Sinmabid pusok iyan prangkan imbaga to.

Kayari Gilead, limara kamin sankaklase ya niyasain ed Namibia, Africa. Ag-abayag et wala lay 80 ya iyaaralan mi na Biblia. Agusgustoan koy Namibia tan na-enjoy koy panmimisionerok ditan balet ta na-inlove ak ed kaklasek ed Gilead ya niyasain ed Switzerland. Kayari sakey taon, linma ak ed Switzerland pian nakaibak. Kayari min nankasal, inibaan koy asawak ed impanlingkor to bilang ombiabiahen manangasikaso.

SANEN NIPAARAP AK ED PROBLEMA

Kayari limaran taon na malikeliket ya impanlingkor mid sirkito, naimbitaan kamin manlingkor ed Switzerland Bethel. Diman et akaiba mi so dakel ya maespiritual tan maedad la ran agagin lalaki tan bibii.

Ag-abayag, walay makapabiglan naamtaan ko. Adiskobrek ya si asawak et agnanmatoor ed siak tan ed si Jehova. Insan to ak tinaynan. Adepress ak ya maong! Agko ’man asarag no aliwan lapud panangaro tan suporta na saray pinabpablin maedad lan kakaarok ed Bethel. Akaparaan iran ondengel no kaukolan koy katongtong tan paulyan da ak ya makapanbukbukor no kaukolan ko itan. Baleg so agawaan na saray makaligliwan balikas tan kamaongan da pian nasungdoan koy ansakisakit ya agawad bilay ko tan lalo ak ya inmapit ed si Jehova.

Nanonotan ko met iray imbabagad siak nensaman na saray maedad ya agagin dakel lay dinadalan dan subok. Sakey ed saratan imay imbagad siak nen Madge Dunham ya: “Elva, diad panlingkor mod si Jehova, dakel so dalanen mon subok, balet say sankairapan et sano manlapu itan ed saramay inad-arom. No bilang ta nagawa itan ed sika, singger kad si Jehova. Tandaan mon sikato so panlilingkoran mo, aliwan too!” Tinmulong itan ya simbawa nen Madge pian nasarag ko ’yan maer-ermen ya parte bilay ko. Desidido ak ya agkon balot abuloyan so lingo nen asawak ya mangiyarawid siak ed si Jehova.

Asabi panaon ya nandesisyon ak ya manpayunir lad Australia pian mas asingger ak ed pamilyak. Legay biahek diad barko, walay grupo na pasahero ya aminpigak ya akatongtong nipaakar ed Biblia. Sakey ed sikara si Arne Gjerde, marendeen ya lakin Norwegian. Agustoan toy nadngel to. Insan nen kien et pinasyar ak nen Arne tan say pamilyak diad Sydney. Maples so inyaligwas tod espiritual tan nampabautismo. Nen 1963, nankasal kami nen Arne, tan kayari duay taon et inyanak koy saksakey ya anak mi, si Gary.

SANEN NAANDIAN AK LAMET NA INAD-ARO

Kontento tan malikeliket so pamilya mi. Nen kien, pinabaleg nen Arne so abung mi pian nakaamong mi maedad lan atateng ko. Balet kayari anem taon, wala lamet so dinalan min subok. A-diagnose ya walay brain cancer nen Arne. Inagew-agew kon bibisitaen ed ospital legan na abayag ya impanpa-radiation therapy to. Diad agano et walay inabigan na situasyon to; balet ta linmoor lanlamang tan na-stroke ni ingen. Pigay simba labat la kunoy pambilay to. Nilabas balet nen Arne itan. Insempet mid abung tan siak so angasikasod  sikato. Asabi panaon, makaakar lamet tan nituloy to ray kimey to bilang elder ed kongregasyon. Maliket tan mapalek ya too si Arne kanian akatulong itan ed inyabig to tan agak tanto nairapan ya angasikasod sikato.

Nen 1986, linmoor lamet so sakit nen Arne. Diad saman et naandi lad bilay iray atateng ko, tan inmalis kamid marakdakep ya lugar diad Blue Mountains, diad paway na Sydney. Ditan et mas asingger kamid saray kakaaro mi. Ag-abayag et angasawa si Gary na maomaong tan maespiritual ya agi, si Karin, tan imbaga ran mas maabig no saksakey lay panayaman mi. Kanian kayari labat na pigaran bulan, inmalis kamin amin ed abung ya asingger ed samay datin abung mi nen Arne.

Diad unor ya 18 bulan ya impanbilay nen Arne, agmakabangon tan kaukolan ya walan naynay so mangasikasod sikato. Lapud lanang ak ya walad abung, kada agew et duay oras ak ya makakapanaral na Biblia tan saray publikasyon ya base ed Biblia. Diad saratan et amayamay so abasak ya simbawa no panon kon naarap so situasyon ko. Bibisitaen ak met na saray maedad lan agagid kongregasyon mi​—tan say arum ed sikara et kaparehok na dinalan ya subok ed bilay. Talagan aligliwa ak ed imbibisita ra! Naandid bilay si Arne nen 2003 tekep na ilalon kioli.

SAY MANUNAN TINMULONG ED SIAK

Nen ugaw ak ni, labay kon perpekto so amin a bengatla. Balet ta apaneknekan kon no maminsan et agnagawa so amin ya iilaloan mo. Dakerakel so bendisyon ya naawat ko tan walay duaran makapasinagem ya dinalan ko​—tinaynan ak na inmunan asawak tan nansakit anggad inatey so komadua. Diad sayan amin, nanduruma so lapuan na panangiwanwan tan ligliwa. Balet say manunan tinmulong ed siak et say “masiken na saray ag-agew”​—si Jehova a Dios. (Dan. 7:9) Saray simbawa to so akapanguman ed personalidad ko tan angiter ed siak na makapaliket iran eksperiensya diad impanmisionerok. Sanen wala ray problemak, ‘say panangasi nen Jehova so angegna ed siak tan saray ligliwa to so amaliket ed kamarerwak.’ (Sal. 94:18, 19) Misalsalamat ak met ta wadtay suporta na pamilyak tan saray ‘tuan kakaaro ya nailaloan sano walay gonigon.’ (Uli. 17:17, NW) Dakel ed sikara so maedad tan maespiritual ya agagi.

“[Diad] saray mamasiken wala so kakabatan, tan dia ed kinarukey na saray agew say pakatalos” so inkuan nen patriarkan Job. (Job 12:12) No pawilen ko ray agawad bilay ko, nibagak ya duga itan ya inkuan to. Say simbawa na saray maedad tan maespiritual ya agagi so tinmulong ed siak, say impanligliwa ra so amabiskeg ed siak, tan say pikakaaro ra so amaliket ed bilay ko. Misalsalamat ak ta inmapit ak ed sikara.

Natan et akulaw ak met la ta 80 años ko la. Lapud saray naeksperiensyak, mas natatalosan koy liknaan tan pankaukolan na saray kaparak ya maedad la. Labalabay ko ran pasyaren tan tulongan. Balet ta labalabay ko met ya nakaiba iray kalangweran. Makapaligsay miulop ed sikara, tan makaalis so seseg da. No inasinggeran ak na sakey a kalangweran tan nalikas kon labay toy onkerew na simbawa odino suporta, malikeliket kon ipapalikna ya wadtan ak ya lanang parad sikara.

[Paimano ed leksab]

[Litrato ed pahina 14]

Kaibak ya payunir si Joy Lennox diad Narrandera

[Litrato ed pahina 15]

Kaibak so pigaran Bethelite ed Switzerland nen 1960

[Litrato ed pahina 16]

Sanen aasikasoen koy Arne