Kasin Aapresyaen Moy Regalo na Dios a Panangasawa?

“Si Jehova iyabobon to a makaromog kayo komon na painawa, balang sakey ed sikayo dia ed abung na asawa to.”​—RUT 1:9.

ANAPEN IRAY EBAT:

Panon tayon nibaga ya inapresya na saray lingkor na Dios nensaman so regalo ton panangasawa?

Panon mon naseguro ya importantid si Jehova no siopay pilien mon kapareha?

Anton simbawa na Biblia nipaakar ed panangasawa so labay mon iyaplika?

1. Deskribien so reaksion nen Adan sanen sikatoy inikdan na asawa.

“SAYA so pukel na saray pukepukel ko, tan laman na laman ko: Saya ingaran ya Bii, ta sikato et inala ed Laki.” (Gen. 2:23) Inikdan na Dios si Adan na asawa, tan diad liket to et nibalikas to iratan ya salita. Kayari maitlep ya impamaugip na Dios ed si Adan, Sikatoy anguyos na sakey a taglang na laki tan ginawa ton magangganan bii. Tinawag nen Adan so bii ya Eva. Impankasakey ira na Dios panamegley na panangasawa. Lapud inusar nen Jehova so mismon taglang nen Adan pian niwalay Eva, mas maapit so relasyon da nen say siopaman a sanasawa.

2. Akin ya onaapit so liknaan na bii tan laki ed sakey tan sakey?

² Pinalsa nen Jehova iray totoo a walaan na kapasidad a makaliknay romantikon aro. Saya so mamaapit ed liknaan na sanasawa ed sakey tan sakey. Oniay nabasad The World Book Encyclopedia: “Ilaloan na laki tan biin nankasal a nawalaan iray seksual a relasyon tan permanentin romantikon aroan.” Dakel ed saray lingkor nen Jehova so makakaeksperiensya ed saya.

INAPRESYA RAY REGALON PANANGASAWA

3. Panon ya awalaan na asaway Isaac?

³ Inapresya na matoor a toon si Abraham so panangasawa. Kanian imbaki tod Mesopotamia so sankatatkenan ya aripen to pian iyanapan na asaway Isaac. Lapud nampikasi iyan aripen ed si Jehova, niwalay maabig a resulta. Si Rebeca, sakey a matakot ed Dios a bii so nagmaliw ya asawa nen Isaac, tan sikatoy awalaan na importantin betang pian nasumpal so sipan nen Jehova a mansiansiay poli nen Abraham. (Gen. 22:18; 24:12-14, 67) Diad panaon tayo, say pampili na piasawaan odino asawaen et personal a  desisyon. Ingen, wala ray totoon labay dan iyanapan so arum na kapareha. Balet, agda nepeg a gawaen itan no agmet kekerewen ed sikara. Ontan met, aliwan say Dios so manpipili no siopay magmaliw a kapareha na sakey. Balet, no labay na sakey a Kristianon nawalaay kapareha, nagamoran toy tulong nen Jehova ed sayan bengatla tan ed arum nin aspekto na bilay no onkerew na tulong ed Dios tan paigiya ed espiritu To.​—Gal. 5:18, 25.

4, 5. Antoy paneknek ya inaro na Sulamita tan pastol so sakey tan sakey?

⁴ Aglabay na magangganan Sulamita a sikatoy desdesen na arum a magmaliw a sakey ed amayamay ya asawa nen Arin Solomon. Oniay imbaga to: “Pansambaen ta kayo, O anak a bibii na Jerusalem, pian agyo tenyegen, no liingen so arok, angga ed kaliktan to.” (Kanta nen Sol. 8:4) Say inaro na Sulamita et sakey ya pastol. Oniay inkuan to: “Siak sakey ak a bulaklak na Saron, sakey a lirio ed saray lawak.” Oniay ebat na pastol: “Singa sakey a lirio ed leet na saray sabit, ontan so inarok ed leet na saray anak a bibii.” (Kanta nen Sol. 2:1, 2) Talagan inad-aro day sakey tan sakey!

⁵ Lapud inyuna na Sulamita tan pastol ya aroen so Dios, nailaloan ya magmaliw a maliket so panamaley da. Diad tua, oniay imbaga na Sulamita ed inad-aro ton pastol: “Ipasen moak a singa tatak ed tapew na pusom, singa tatak ed tapew na taklay mo: ta say aro sikato so mabiskeg a singa patey; say imon sikato so masulit a singa Sheol; saray ngalab to sikara so ngalangalab na apuy, sakey a matua a dalang nen Jehova. Saray dakel a danum agda naerep so aro, anggan saray delap sikato so agda nasebseban: no sakey a too iter to komon so amin a kayarian na abung to nipaakar ed aro, sikato so sigpot a namudmora.” (Kanta nen Sol. 8:6, 7) Agta onia met a panangaro tan talek so ilaloan na saray lingkor nen Jehova ed saray magmaliw a kapareha ra?

DESISYON YA IMPORTANTE ED DIOS

6, 7. Panon mon naseguro ya importantid Dios no siopay pilien mon kapareha?

⁶ Importantid si Jehova no siopay pilien mon kapareha. Alimbawa, oniay impasakbay tod saray Israelita nipaakar ed saray taga Canaan: “Agka miaasawa ed sikara naani; agmo iiter naani bii ya anak mo ed laki ya anak to, odino agka naani mangaala na bii ya anak to ya iyasawa ed laki ya anak mo. Ta paarapen to ed sananey so anak mo a laki pian ag-ontumbok ed siak, pian manlingkor ira ed sananey a dirios: dia ed satan ondalang naani sanok nen Jehova ed sikayo, et tampol to kayo naani a deralen.” (Deu. 7:3, 4) Kayari pigaran siglo, oniay imbaga na saserdoten si Esdras: “Linmukso kayo [agkayo nanmatoor, NW], tan akiasawa kayo ed saray sangkaili a bibii, pian ondakel so kasalanan na Israel.” (Esd. 10:10) Inkuan met nen apostol Pablo ed saray Kristiano: “Say asawan bii so asinger ed amin a panaon legan a mabilay so asawa to. Balet no inatey so asawa to, sikatoy bulos a miasawa ed samay labay to, dia labat ed Katawan.”​—1 Cor. 7:39.

⁷ No say dedikadon lingkor nen Jehova et akiasawad agmananisia, saya et isusumlang ed Dios. Agnanmatoor ed Dios iray Israelita diad panaon nen Esdras lapud ‘impangasawa ray sangkailin bibii.’ Malinew ya ibabaga na Kasulatan no siopay nepeg ya piasawaan na saray Kristiano. Kanian, agtayo leglemewen itan ya ganggan. (Esd. 10:10; 2 Cor. 6:14, 15) Say sakey a Kristianon akiasawad agmananisia et agmaabig ya ehemplo, tan agton talaga aapresyaen so regalo na Dios a panangasawa. Manresulta iyad pakabalang tod saray pribilehyo tod kongregasyon. Tan agmakatunongan so panilalo tod bendisyon legan ton ipipikasi  ya: ‘Aman Jehova, amtak ya ginagalak a sumlangey ganggan mo, balet bendisyonan mo ak pa.’

AMTA NEN JEHOVA SO SANKAABIGAN

8. Ipaliwawa no akin a kaukolan tayon tumboken so instruksion na Dios nipaakar ed panangasawa.

⁸ Amta na sakey a managgaway makina no panon itan ya usaren. Sarag to met so mangiter na impormasyon ed arum no panon itan ya i-assemble. Balet, no ibaliwalay instruksion ya inter to, antoy resulta? Ag-itan onandar! Mipadpara, no labay tayon magmaliw a maliket so panamaley tayo, nepeg tayon tumboken so instruksion ya nanlapud si Jehova, say Nanggaway uksoyan parad panangasawa.

9. Panon tayon nibagan natatalosan nen Jehova so ermen ed pambukbukor, ontan met ed liket a posiblin niwalad sanasawa?

⁹ Amta nen Jehova so amin a bengatla nipaakar ed totoo tan panangasawa. Insipor toy seksual a pankaukolan pian nayarian day ‘manbunga tan manparakel.’ (Gen. 1:28) Natatalosan na Dios so ermen ed pambukbukor, ta antis ton pinalsay Eva, oniay inkuan to: “Aliwan maong a manbukbukor so too; igawaan ko na sakey a manepeg a katulongan to.” (Gen. 2:18) Talagan labay nen Jehova a manliket so sanasawa.​—Basaen so Uliran 5:15-18.

10. Panon a napaliket na sanasaway Jehova anggan diad personal iran pankaukolan da?

¹⁰ Lapud kasalanan tan ag-inkaperpekto ya impatawir nen Adan, anggapoy perpekton panangasawa. Balet parad saray lingkor nen Jehova, nagamoray tuan liket ed panamaley no iyaplikay Salita na Dios. Singa bilang, ikonsidera tayoy simbawa nen Pablo nipaakar ed seksual a relasyon na sanasawa. (Basaen so 1 Corinto 7:1-5.) Ag-ibabaga na Biblia a say rason labat na seksual a relasyon et pian nawalaay ananak. Importante met itan ed pisikal tan emosyonal a pankaukolan na sanasawa. Balet, seguradon aglabay na Dios iray marutak a kagagawad sekso. Say seksual a relasyon et importantin kabiangan ed bilay na Kristianon sanasawa, kanian kaukolan dan ipatnag ed balang sakey so inkatamoy tan tuan panangaro.

11. Panon ya abendisyonan si Rut lapud katooran tod si Jehova?

¹¹ Nepeg a say panangasawa et napno na liket. Ontan met, nepeg a walay deen ed ayaman na saray Kristianon pamilya. Imanoen pay agawa manga 3,000 taon lay apalabas. Manaakar a nanlapud Moab paarap ed Juda so maedad lan balon bii a si Noemi, kaibay balo met lan manugang ton si Orpa tan Rut. Papapawilen la nen Noemi iray manugang tod pamilya ra. Balet  agtinaynan na Moabitan si Rut so katulangan to, tan nanmatoor ed tuan Dios. Sikatoy akaawat na “nasnaspot a gunggona” lapud sigpot ya impanmatalek tod si Jehova. (Rut 1:9; 2:12) Lapud inapresya nen Rut so regalo na Dios a panangasawa, sikatoy nagmaliw ya asawa na sakey a managdayew nen Jehova, si Boaz. Sano napaoli si Rut diad balon mundo, seguradon agaylay liket ton naamtaan ya sikatoy kaibad poli ya nanlapuan nen Jesu-Kristo. (Mat. 1:1, 5, 6; Luc. 3:23, 32) Talagan baleg a pribilehyo so niwalad sikato lapud katooran tod si Jehova!

MAKABAT A SIMBAWA PARAD MALIKET A PANANGASAWA

12. Iner so pakalaan na makabat iran simbawa nipaakar ed panangasawa?

¹² Imbaga na Nanggaway uksoyan na panangasawa no anto ray kaukolan pian magmaliw a maliket so panamaley. Anggapoy toon mas makabat nen say Sikato. Lawas a duga so ibabaga na Biblia, tan say pangiyaplika na sanasawa ed saray makabat a simbawa na satan so alenleneg a paraan pian nagunggonaan ira. Singa bilang, oniay insulat nen apostol Pablo: “Komon ta aroen a maong na kada sakey ed sikayo so asawa to a singa ed pangaaro to ed laman ton dili; balet, say asawan bii et nepeg a walaan na aralem a respeto ed asawa to.” (Efe. 5:33) Mainomay iyan natalosan na saray maespiritual a Kristiano. Balet say tepet, Kasin iyaplika da iyan simbawa nen Jehova? Gawaen da iya no talagan aapresyaen day regalo na Dios a panangasawa. *

13. Antoy resulta na agpangiyaplikad simbawa na 1 Pedro 3:7?

¹³ Kaukolan a maaron tratoen na Kristianon asawan laki so asawa to. Insulat nen apostol Pedro: “Sikayoran asawan lalaki, mantultuloy kayon miamong ed kaasawaan yo unong ed pikakabat, tan pagalangan yo ra a singa panaalwar yo ed mipipisit a pananginan, lapud kaiba yo met iran manawir na agnaparaan a regalon bilay, ta pian agnaamper iray pikakasi yo.” (1 Ped. 3:7) No ag-iyaplika na asawan laki iyan simbawa, agdengelen nen Jehova so pikakasi to. Naapektoan so espiritualidad na sanasawa, tan nayarin manresulta itan ed stress, kolkolan, tan sakitan.

14. Antoy nagawaan na maaron asawan bii pian magmaliw a maliket so pamilya to?

¹⁴ No say asawan bii et paigigiyad Salita nen Jehova tan ed masanton espiritu, baleg so nagawaan to pian niwalay deen tan liket ed pamilya to. Natural labat ya aroen na Kristianon asawan laki so asawa to tan protektaan tod pisikal tan espiritual. Iilaloan na asawan bii ya sikatoy aroen na asawa to, kanian ipapanengneng to ray maabig a kualidad pian sikatoy mas aroen na asawa to. Oniay ibabaga na Uliran 14:1: “Balang bii a makabat ipaalagey to so abung to, balet say maatiw sikato so igeba to ed saray dili a lima to.” Baleg so nagawaan na makabat tan maaron asawan bii pian magmaliw a matalona tan maliket so pamilya to. Ipapanengneng to met a talagan aapresyaen toy regalo na Dios a panangasawa.

15. Panon mon ipaliwaway simbawan nabasad Efeso 5:22-25?

 ¹⁵ Saray sanasawan mangaalig ed impantrato nen Jesus ed kongregasyon et mangipapanengneng a talagan aapresyaen day regalo na Dios a panangasawa. (Basaen so Efeso 5:22-25.) Talagan bebendisyonan nen Jehova iray sanasawan inaro ray balang sakey, mapaabeba, walaan na maabig a komunikasyon, tan agda aabuloyan iray makapuy ya ugalin maneral ed panamaley da.

AG-IRA NEPEG A PANSIANEN

16. Akin a wala ray Kristianon mansiasiansian andiay asawa?

¹⁶ Labay na dakel so nawalaay kapareha. Balet arum ed saray lingkor nen Jehova et mansiasiansian andiay asawa lapud anggapoy naalmo ran kapareha ya labay da tan aabobonan nen Jehova. Wala met iray maliket ed kipapasen dan andiay asawa, ta mas dakel a panaon so nausar dad panlingkor ed si Jehova. Balet pian magmaliw a maliket iray andiay asawa, kaukolan dan tumboken iray limitasyon ya inter nen Jehova.​—Mat. 19:10-12; 1 Cor. 7:1, 6, 7, 17.

17. (a) Anton simbawa nen Jesus nipaakar ed panangasawa so kaukolan tayon tandaan? (b) No nalikas na sakey a Kristiano ya pipilaleken to lay asawa na arum, antoy tampol a kaukolan ton gawaen?

¹⁷ Walaan tayo man na asawa odino anggapo, kaukolan tayon tandaan so imbaga nen Jesus: “Agyo ta abasa a samay amalsa ed sikara diad gapo et ginawa to ran laki tan bii tan inkuan to, ‘Nisengeg ed saya et taynan na laki so ama tan ina to tan iyamong toy asawa to, tan sikaran dua et magmaliw a sakey a laman’? Kanian aliwa la ran duara, noagta sakey a laman. Sirin, say impankasakey na Dios, agnepeg a pansianen na too.” (Mat. 19:4-6) Kasalanan so pampilalek ed asawa na arum. (Deu. 5:21) No nalikas na sakey a Kristianon onggagapo la itan a mauges a pilalek, kaukolan a tampol ton ekalen itan. Tan no bilang ta inabuloyan ton mantultuloy itan a pilalek, mas lalon kaukolan to itan ya ekalen anggano panon kasakit. (Mat. 5:27-30) Importantin ipetek itan a mauges a kanonotan tan ekaley antokaman a makasalanan a pilalek na manamalikdon puso.​—Jer. 17:9.

18. Antoy nepeg a nalikna tayo ed regalo na Dios a panangasawa?

¹⁸ Anggan saray totoon daiset odino anggapo ni ingey amta rad si Jehova tan say marakep a regalo ton panangasawa et mamapabli ed saya. Sikatayo ey? Bilang dedikadon lingkor na “maliket a Dios” ya Jehova, maliket tayon ipanengneng ed kabibilay tayo ya aapresyaen tan papablien tayo iyan regalo na Dios a panangasawa!​—1 Tim. 1:11.

[Paimano ed leksab]

[Tepetepet Parad Panagaral]

[Blurb ed pahina 6]

Say matalonan panangasawa et mamagalang ed si Jehova tan mamaliket ed pamilya

[Litrato ed pahina 5]

Inapresya nen Rut so regalo na Dios a panangasawa

[Litrato ed pahina 7]

Kasin ipapanengneng mon talagan aapresyaen moy regalo na Dios a panangasawa?