Akin ya Iyunay Panaglingkor ed si Jehova?

‘Say sangik ibaga to so inkatunong mo, tan say panangilaban mo ed amin ya agew.’​—SAL. 71:15.

PANON MON EBATAN?

Akin ya inyuna di Noe, Moises, Jeremias, tan Pablo si Jehova ed bilay da?

Antoy ontulong ed sikan makapandesisyon no antoy gawaen mod bilay mo?

Akin et determinado kan iyunay panlingkor ed si Jehova?

1, 2. (a) Antoy ipapatnag na sakey ya angidedikay bilay tod si Jehova? (b) Panon itayon natulongan na ehemplo di Noe, Moises, Jeremias, tan apostol Pablo?

SANEN indedikam so bilay mo tan nagmaliw kan bautismadon patumbok nen Jesus, ginawam lay sankaimportantian a desisyon ed bilay mo. Satan so sankaseryosoan a desisyon a nagawaan na sakey ya indibidual. Singam ibabagan: ‘Aman Jehova, labay kon usarey interon bilay ko a manlingkor ed sikayo. Labay kon sikayoy mangibaga no panon kon usarey bilay ko, no anto ray magmaliw a prayuridad ko, tan no panon kon usarey kaykayarian tan abilidad ko.’

² No sakey kan dedikadon Kristiano, onia so nepeg a sipan mod si Jehova. Nakomendaan kad satan a duga tan makabat a desisyon mo. Balet natan ta pinilim lan panlingkoray Jehova, panon mon uusarey panaon mo? Say ehemplo di Noe, Moises, Jeremias, tan apostol Pablo so ontulong ed sikatayon mangebat ed satan a tepet. Amin da et sigpot-puson nanlingkor ed si Jehova. Say kipapasen tayo natan et miparad sikara. Ipapanengneng na saray desisyon da no antoy prayuridad da tan ontulong iyad sikatayon usisaen no panon tayon uusaren so panaon tayo.​—Mat. 28:19, 20; 2 Tim. 3:1.

SAKBAY NA DELAP

3. Antoy piparaan na panaon tayo ed panaon nen Noe?

³ Inkompara nen Jesus so panaon tayo ed panaon nen Noe. “Singa ed saray agew nen Noe, ontan met naani ed kiwawala na Anak na too.” Intuloy to: “Saray totoo et nan-aakan tan naniinum, angasawa ra tan akiasawa ra, anggad sanen linmoob ed biong si Noe, tan ag-ira nanimano ya anggad sinmabi so delap tan niyanor iran amin.” (Mat. 24:37-39) Maslak a totoo natan et ag-ondedengel ed saray pasakbay na saray lingkor na  Dios. Ibabaliwala ray inkaganatan na panaon a pambibilayan tayo. Singa ed panaon nen Noe, dakel natan so agmanisian deralen na Dios iray mauges a totoo. Balbalawen da ni ingen itan! (2 Ped. 3:3-7) Balet anggaman ed ontan a kipapasen, panon ya inusar nen Noe so panaon to?

4. Antoy angusaran nen Noe na panaon to kayari ton naawat so ganggan nen Jehova, tan akin?

⁴ Kayarin imbaga na Dios ed si Noe so gagala ton paneral ed amin a mauges a totoo, inikdan toy Noe na espisyal a kimey. Ingganggan toy Noe a manggaway biong pian niliktar iray totoo tan ayayep. (Gen. 6:13, 14, 22) Impulong met nen Noe so magano lan panangukom nen Jehova. Sikatoy tinawag nen apostol Pedro a “managpulong na inkatunong,” a mangipapatnag a nanseetan nen Noe a pasakbayan iray totoo ed mapeligron situasyon da. (Basaen so 2 Pedro 2:5.) Parad sika, mas maabig kasi no inusar di Noe tan say pamilya to so biskeg da ed negosyo pian magmaliw iran mas mayaman nen saray kapanaonan da, odino pian nawalaay komportablen bilay? Siempre andi! Pinaliisan da iratan a pakaabalaan lapud amta ray nagawad arapen.

SAY DESISYON NA PRINSIPE NA EHIPTO

5, 6. (a) Akin ya imbangat si Moises ed “amin a karunongan na saray Ehipsio”? (b) Akin ya agpinili nen Moises so magmaliw a prinsipe ed Ehipto?

⁵ Natan et pantongtongan tayoy alimbawa nen Moises. Sikatoy binmaleg ed palasyo diad Ehipto bilang tagibi na anak a bii nen Faraon. Bilang ugaw nin prinsipe, sikatoy nibangat ed “amin a karunongan na saray Ehipsio.” (Gawa 7:22; Exo. 2:9, 10) Say gagala na satan et pian sikatoy niparaan a manlingkor ed palasyo nen Faraon. Nagmaliw komon a prominentin too si Moises ed sankamakapanyarian a gobierno ed panaon to. Lapud posisyon to, dakel komoy maabig a bengatlan niwalad sikato tan nawalaan met na nikadkaduman kagalangan. Balet kasin importante iratan ed si Moises?

⁶ Sanen ugaw ni Moises, sikatoy imbangat na saray peteg ya atateng to nipaakar ed si Jehova. Kanian nayarin amta to ray sipan nen Jehova ed laki ton di Abraham, Isaac, tan Jacob. Tan nanmatalek si Moises ed saratan a sipan. Inisip ton maong so arapen to tan say katooran tod si Jehova. Kanian sanen sinmabi panaon a manpili no kasin magmaliw a prinsipe ed Ehipto odino magmaliw ya aripen, antoy pinili to? Mas pinili nen Moises so “napairap a kaiba na totoo na Dios nen say temporaryon panliket ed kasalanan.” (Basaen so Hebreos 11:24-26.) Kayari na satan, inunor toy panangigiya nen Jehova no panon ton usarey bilay to. (Exo. 3:2, 6-10) Akin et ontay ginawa nen Moises? Lapud sikatoy nanmatalek ed saray sipan na Dios. Amta ton anggapoy maabig a pansumpalan tod Ehipto. Tua met ta diad saginonor et dinusa na Dios itan a nasyon panamegley na samploran salot. Antoy naaralan na amin a dedikadon lingkor na Dios manlapud alimbawa nen Moises?  Say prayuridad tayo et say panlingkor ed si Jehova tan say panggawa na linawa to, aliwan say pakawalaan na trabaho odino mainawan bilay.

AMTA NEN JEREMIAS NO ANTOY NAGAWA

7. Panon a miparad sikatayo so kipapasen nen Jeremias?

⁷ Inyuna met nen propeta Jeremias so panaglingkor ed si Jehova diad bilay to. Sikatoy ingganggan nen Jehova ya ipulong so mensahe na panangukom ed apostatan Jerusalem tan Juda. Kanian nibagan si Jeremias et nambilay diad ‘kaunoran iran agew.’ (Jer. 23:19, 20) Amta ton say sisteman pambibilayan to et mangangga.

8, 9. (a) Akin a kaukolan ya ipetek so panmoria nen Baruc? (b) Antoy nepeg tayon nonoten sano manplaplano itayo?

⁸ Antoy agnanmatalekan nen Jeremias lapud pananisia to? Agto inmatalek so arapen tod satan a sistema ya asingger lan naderal ta amta ton aliwa itan a makabat a desisyon. Balet, say sekretaryo nen Jeremias a si Baruc et awalaan na duman panmoria. Kanian pinakiwas na Dios si Jeremias a mangibagad sikato: “Nia, saman so impaalagey ko, igebak ta naani, tan say intanem ko bagoten ko ta naani; et saya so gawaen ko naani ed amin a dalin. Et anapen mo so saray baleg a bengatla a nipaakar ed sika lanlamang? Agmo ra anapen; ta ni, yakar ko naani mauges ed amin a laman, . . . balet say bilay mo iter ko naani ed sika a [samsam] ed saray amin a pasen a laen mo.”​—Jer. 45:4, 5.

⁹ Agtayo segurado no anto ran “baleg a bengatla” so pinirawat nen Baruc. * Balet amta tayon anggapoy kakanaan na saratan ta nen 607 B.C.E. sanen inmataki so Babilonia ed Jerusalem et aderal iratan. Antoy naaralan tayod saya? Kaukolan tayoy manplano pian naseguron walaan itayo na saray nakaukolan pian manbilay. (Uli. 6:6-11) Balet, makabat kasin usarey amin a panaon tan biskeg tayo pian nawalaan na saray bengatlan agmet manbayag? Tua, tuloytuloy a manplaplano so organisasyon nen Jehova a mangipaalagey na saray Kingdom Hall, pasilidad na saray branch office, tan arum nin teokratikon proyekto. Balet sarayan plano et duma lapud susuportaan day interes na Panarian. Kanian sano manplaplano iray lingkor nen Jehova, ipraprayuridad dad bilay da so Panarian na Dios. Kasin kombinsido kan ‘aanapen mo nin unona so Panarian [nen Jehova] tan say inkatunong to’?​—Mat. 6:33.

“IMPASEN KO IRATAN BILANG DAKERAKEL A DUTAK”

10, 11. (a) Antoy prayuridad nen Pablo sakbay a nagmaliw a Kristiano? (b) Akin a sigpot ya angumay prayuridad nen Pablo?

¹⁰ Say unor ya alimbawan pantongtongan tayo et si Pablo. Sakbay a nagmaliw a Kristiano, inisip na amin a sikatoy nawalaan na marakep ya arapen. Inaral toy Judion ganggan diad panamegley na sakey ed saray sankabantogan a managbangat ed panaon to. Sikatoy panmamatalkan na Judion atagey a saserdote tan inikdan toy importantin kimey. Tan sikatoy nagmaliw ya eksperto ed Judaismo nen saray kapanaonan to. (Gawa 9:1, 2; 22:3; 26:10; Gal. 1:13, 14) Balet anguman iratan ya amin sanen amoria nen Pablo ya impulisay la nen Jehova iray Judio bilang say pinili ton nasyon.

¹¹ Amoria nen Pablo a say pakawalaan na karera ed Judion sistema et andiay kana ed imaton nen Jehova, andian itan na arapen. (Mat. 24:2) Atalosan nen Pablo iray gagala na Dios, tan amta ton baleg a pribilehyo so pibiang ed panagpulong a kimey. Inkuan to ni ingen a saray prayuridad  to nensaman et “dakerakel a dutak,” odino basura. Intunda nen Pablo so pibiang ed Judaismo tan inusar toy bilay to pian ipulong so maong a balita.​—Basaen so Filipos 3:4-8, 15; Gawa 9:15.

USISAEN IRAY PRAYURIDAD YO

12. Antoy nagmaliw a prayuridad nen Jesus kayari na bautismo to?

¹² Inusar di Noe, Moises, Jeremias, Pablo tan dakel nin kapara ra so dakel a panaon tan biskeg da pian panlingkoray Jehova. Maabig iran alimbawa parad sikatayo. Siempre, say sankaabigan ya ehemplo parad amin a dedikadon lingkor nen Jehova et si Jesus. (1 Ped. 2:21) Kayari bautismo to, inusar toy interon bilay tod dalin pian igalang si Jehova tan ipulong so maong a balita. Kanian say panlingkor ed si Jehova so prayuridad na amin a Kristianon manutumbok ed ehemplo nen Jesus tan mangaawat ed si Jehova bilang Katawan da. Kasin ontan so prayuridad mo? Panon tayon napaaligwas so panaglingkor tayod si Jehova legan tayon aasikasoen iray responsabilidad tayo?​—Basaen so Salmo 71:15; 145:2.

13, 14. (a) Antoy ipapaseseg a gawaen na amin a dedikadon Kristiano? (b) Antoy mamaliket ed saray totoo na Dios?

¹³ Diad apalabas iran taon, mabetbet ya ipapaseseg na organisasyon nen Jehova a sipipikasi tayon ikonsidera no kasin makapanpayunir tayo. Lapud nanduruman rason, wala ray matoor ya agagin agmakapampulong na 70 oras kada bulan. Agkayo komon nadidismaya. (1 Tim. 5:8) Sika balet ey, talaga kasin agka makapanpayunir?

¹⁴ Nonot yo pa lamet imay liket ya agamoran na dakel ed totoo na Dios legan na Memoryal ed sayan taon. Legay bulan na Marso, walay espisyal a probisyon parad saray auxiliary payunir a manpili no kasin say aboten dan oras et 30 odino 50. (Sal. 110:3) Minilyon so nan-auxiliary payunir, tan alikna na saray kongregasyon so nikadkaduman gayaga tan liket. Kasin ni-adjust yoy eskedyul yo pian mas mabetbet kayon makapan-auxiliary payunir? No makapanpayunir kayo, kada agew et nibaga yon: “Aman Jehova, ginawak so anggaay nayarian kon manlingkor ed sika.”

15. Anto so nepeg a gagala na saray kalangweran a Kristiano nipaakar ed sekular ya edukasyon?

¹⁵ No sakey kan kalangweran a Kristiano ya asingger lan man-graduate, nayarin maabig so bunigas mo tan daiset ni responsabilidad mo. Kasin ninonot mo lan maong no makapan-regular payunir ka? Nayarin isipen na mamaestram a say pangala na atagtagey ya edukasyon et sankaabigan a paraan pian niplanom so arapen mo. Manmamatalek irad gobierno na too tan ed kuarta ya agla manbayag et mangangga. Balet no say pilien mon karera et say panlingkor ed si Jehova, maabig so pakausaran moy panaon mo tan gagawaen moy sakey a bengatlan mangiter ed sika na agmanganggan arapen. Tan aaligen moy perpekton alimbawa nen Jesus. Satan a makabat a desisyon mo et mamaliket tan manprotekta ed sika. Ipatnag met na satan so determinasyon mon manbilay unong ed dedikasyon mod si Jehova.​—Mat. 6:19-21; 1 Tim. 6:9-12.

16, 17. Anto ran tepet so nepeg ya ikonsidera na saray Kristiano nipaakar ed panaglingkor dad si Jehova?

¹⁶ Dakel ed saray lingkor na Dios natan et mantratrabaho na andukey iran oras pian nitaryay manunan pankaukolan na pamilya ra. Balet, wala met iray mantratrabaho na mas dakel ya oras anta agda met itan kaukolan. (1 Tim. 6:8) Gagawaen na sayan mundo so anggaay nayarian ton kombinsien itayo ya agtayo manbilay no anggapod sikatayo iray dakel tan balon  bengatla ya iyoopresi to. Balet aglabay na saray tuan Kristiano a say mundo nen Satanas so mangidiktay prayuridad da. (1 Juan 2:15-17) Komusta balet iramay nanretiro la? Say sankaabigan a pangusaran day panaon da et say pampayunir tan panlingkor ed si Jehova.

¹⁷ Nirayay nayarin itepet na amin a dedikadon lingkor nen Jehova: Anto so prayuridad kod bilay? Kasin iyuunak so Panarian? Kasin aaligen koy panagsakripisyo nen Jesus? Kasin uunoren koy simbawa nen Jesus a mantultuloy ya ontumbok ed sikato? Kasin ni-adjust koy eskedyul ko pian nawalaay mas dakel a panaon a makapibiang ed panangipulong na Panarian odino manggawa na arum nin teokratikon kimey? Anggaman diad kaplesan et ag-iyabuloy na kipapasen kon napalaknab so panaglingkor ko, kasin itutultuloy kon bayuboan so masakripisyon espiritu?

‘PAMPILALEK TAN PANGGAWA’

18, 19. Antoy kaukolan tayon ipikasi, tan akin a mamaliket iyad si Jehova?

¹⁸ Makapalikliket a nanengneng iray maseseg a totoo na Dios. Balet wala ray agagin nayarian da komoy manpayunir ingen ta singa agda naliknay pampilalek ed satan odino iisipen dan ag-ira kualipikado. (Exo. 4:10; Jer. 1:6) No bilang ta ontan so naliliknam, ipikasim ed si Jehova ya tulongan to ka. Imbaga nen Pablo ed saray kapara ton Kristiano a si Jehova et ‘mangiiter na pampilalek tan pakayarin manggaway panlabayan to.’ (Fil. 2:13) Kanian no singa naliliknam ya agka napapakiwas a palaknabey ministeryom, kerew mod si Jehova ya nawalaan kay pilalek tan abilidad a manggawad satan.​—2 Ped. 3:9, 11.

¹⁹ Sikara di Noe, Moises, Jeremias, Pablo, tan Jesus et matoor a lalaki. Inusar day panaon tan biskeg dan ipulong so manamasakbay a mensahe nen Jehova. Agda inabuloyan so anggan anto a mangabala ed sikara. Magano lan mangangga iyan sistema na mundo. Kanian kaukolan a seguroen na amin a dedikadon lingkor na Dios a nitultuloy dan gawaey anggaay nayarian dan aligen irayan Makasulatan ya ehemplo. (Mat. 24:42; 2 Tim. 2:15) No gawaen tayo iya, napaliket tayoy Jehova tan nagamoran tayoy dakel a bendisyon manlapud sikato.​—Basaen so Malaquias 3:10.

[Paimano ed leksab]

[Tepetepet Parad Panagaral]

[Litrato ed pahina 21]

Agdinengel na totoo so pasakbay nen Noe

[Litrato ed pahina 24]

Kasin ninonot mo lan maong no makapan-regular payunir ka?