‘Inggiya Ira na Masanton Espiritu’

“Say propesiya et agbalot niwala unong ed panlabayan na too, noagta sinalita na totoo so nanlapud Dios legan ya igigiya ira na masanton espiritu.”​—2 PED. 1:21.

SARAY PUNTON PANISIPAN

Panon ya inusar na Dios so masanton espiritu to pian ipasabi so mensahe tod saray nansulat ed Biblia?

Anto ray paneknek a say Biblia et impuyan na Dios?

Antoy gawaen mon inagew-agew pian mansiansiay apresasyon mod Salita na Dios?

1. Akin a kaukolan tayo so impuyan a Salita na Dios?

ONIAY maslak ya itetepet na totoo: Iner so nanlapuan tayo? Akin et wadia tayo? Anto kasi nagawad arapen? Akin et oniay kipapasen na mundo? Antoy nagawa sano ompatey tayo? No anggapo so impuyan a Salita na Dios, say Biblia, panon tayon naamtaay ebat ed sarayan importantin tepet? Nayarin say pandependian tayo et say personal ya eksperiensya tayo. Balet no ontan so gawaen tayo, kasin nalikna tayo met imay imbaga nen David nipaakar ed “katunongan nen Jehova”?​—Basaen so Salmo 19:7.

2. Panon ya onaralem so apresasyon tayod Biblia, say importantin regalo na Dios ed sikatayo?

² Balet makapaermen ta pinaulyan na arum a naandi so panangaro rad katuaan. (Ikompara so Apocalipsis 2:4.) Intunda da lay manbilay ed paraan a makapaliket ed si Jehova. (Isa. 30:21) Balet, ag-itan kaukolan a nagawad sikatayo. Sarag tayo, tan nepeg tayon gawaey anggaay nayarian tayon pansiansiaey apresasyon tayod Biblia tan ed saray bangat to. Importante iyan regalo ed sikatayo na maaron Amalsa. (Sant. 1:17) Panon ya onaralem so apresasyon tayod “salita na Dios”? Makatulong so pandalepdep ed no panon a nigiya iray lalakin nansulat na Biblia. Kabiangan ed satan so pangusisad dakel iran paneknek a saya et impuyan na Dios. No gawaen tayo iraya, napakiwas tayon basaen ya inagew-agew so Salita na Dios tan iyaplikay simbawa to.​—Heb. 4:12.

‘INGGIYA IRA NA MASANTON ESPIRITU’​—PANON?

3. Panon ya ‘inggiya na masanton espiritu’ iray propeta tan arum nin nansulat na Biblia?

³ Diad loob na 1,610 ya taon​—manlapud 1513 B.C.E. anggad 98 C.E.—​manga 40 a lalaki so nausar pian isulat so Biblia. Say arum et propeta ya ‘inggiya na masanton  espiritu.’ (Basaen so 2 Pedro 1:20, 21.) Inusar ed sayan bersikulo so Griegon salitan ‘inggiya’ a mankabaliksay iyalis, awiten, odino iyakar ed arum a lugar. * Diad Gawa 27:15, nausar so miparan salita pian deskribien so sakey a barkon niyalis-alis odino niyanor-anor ed nanduruman direksion. Kanian no nabasa tayon saray propeta tan arum nin nansulat na Biblia et ‘inggiya na masanton espiritu,’ mankabaliksan iyan akitongtong so Dios ed sikara, inimpluensyaan to ra, tan inggiya to ra panamegley na aktibon puersa to odino masanton espiritu to. Kanian say insulat da et kanonotan na Dios, aliwan say dili ran kanonotan. No maminsan et agni ingen amta na sarayan managsulat so kabaliksan na propesiyan insulat da. (Dan. 12:8, 9) Kanian, tua sirin a “say interon Kasulatan et impuyan na Dios.” Anggapoy nilaok ya opinyon na totoo ed Biblia.​—2 Tim. 3:16.

4-6. Panon ya impasabi nen Jehova so mensahe tod saray nansulat na Biblia? Iyilustra.

⁴ Ingen, panon ya inusar na Dios so masanton espiritu to pian ipasabi so mensahe tod saray nansulat ed Biblia? Kasin naawat da itan a salita por salita odino ideya labat tan naabuloyan iran mangisulat na satan ed dili ran salita? Imanoen tayo pa no panon a manggaway sulat so sakey a businessman. No salita por salita so kaukolan ed sulat, sikatoy manggagawa ed satan odino ididikta tod sekretarya to. I-type na sekretarya itan insan pirmaan na samay businessman. Balet wala ray pankanawnawan say ibabaga to labat et saray manunan ideya, insan la itan isulat na sekretarya ed dilin salita to. Insan itan basaen na businessman, tan no wala ni ray kaukolan ya umanen, gawaen itan na sekretarya. Insan no asumpal lay sulat, pirmaan itan na businessman tan nibaga ya sikaton mismo so akansulat ed satan.

⁵ Ontan met, wala ray kabiangan na Biblia ya insulat na mismon “tamuro na Dios.” (Exo. 31:18) Wala ray pankanawnawan indikta na Dios iray eksakton salita lapud kakkaukolan itan. Singa bilang, oniay nabasa tayod Exodo 34:27: “Inkuan nen Jehova ed Moises, Isulat mo so sarayan salita: ta dia ed balikas na sarayan salita akigawaan ak na sakey a sipanan ed sika tan dia ed Israel.” Tan inkuan met nen Jehova ed si propeta Jeremias: “Isulat mo so saray amin a salita ya insalitak ed sika dia ed sakey a libro.”​—Jer. 30:2.

⁶ Balet mabetbet ya ideya labat tan aliwan salita por salita so mamilagron iiyan na Dios ed puso tan isip na saray nansulat na Biblia, tan aabuloyan to ran mangusar na dili ran salita. Oniay ibabaga na Eclesiastes 12:10: “Say Managpulong inusisa to ya inanap so saray makapaliket a salsalita, tan say nisulat nensaman a maptek, salanti salsalita a matua.” Imbaga na managsulat na Ebanghelyo a si Lucas, “maalwar kon inusisa iratan ya amin manlapud gapo.” (Luc. 1:3) Sinegurado  na espiritu na Dios ya agnalaokay ideya na too so mensahe to.

7. Panon a napatnagan so karunongan na Dios diad impangusar tod saray totoon mangisulat ed Biblia?

⁷ Napatnagan so agnaparaan a karunongan na Dios diad impangusar tod saray totoon mangisulat ed Biblia. Tutulongan itayo na saray salita a natalosan iray impormasyon, tan nalikna iray emosyon. Balet, panon to no say inusar nen Jehova a mansulat et saray anghel? Nayarian da kasin deskribien so liknaay totoo a singa say takot, ermen, tan impakadismaya? Lapud inusar nen Jehova iray agperpekton totoo a mangisulat ed kanonotan to, asabi na satan so kapusoan na totoo!

SARAY PANEKNEK A SAY BIBLIA ET NANLAPUD DIOS

8. Akin a nibagan duma so Biblia ed saray arum a libro na relihyon?

⁸ Dakel so paneknek a say Biblia et impuyan a Salita na Dios. Diad amin a libro na relihyon, say Biblia labat so alenleneg a makatulong ed sikatayon nakabat so Dios. Singa bilang, kaibad saray sulsulat na Hinduismo iray libron himno na Veda, koleksion na saray komentaryo nipaakar ed saratan a himno, saray sulsulat a tatawagey Upanishads, tan saray alamat a singa say Ramayana tan Mahabharata. Kabiangan na Mahabharata so libron Bhagavad Gita, a mankarga na saray moral a totontonen. Wala met iray libro na Buddhista a singa say Tipitaka (Taloran Koleksion). Say unonan volume na satan et mangipapaliwawad saray ganggan a kaukolan a tumboken na saray monghe tan madre. Say komadua et nipaakar ed saray doktrina ra. Tan say komatlo et rekord na saray bangat nen Buddha. Ag-ibabaga nen Buddha a sikatoy dios tan dagdaiset labat so imbaga to nipaakar ed Dios. Karga na saray libro na Confucianismo iray pinanlalaok a rekord na saray agawad apalabas, moral iran totontonen, saray pormula ed magic, tan saray kansion. Wala met so sagradon libro na Islam a mangibabangat a walay saksakey a Dios, ya amta to tan sarag ton kontrolen so arapen. Balet ag-ibabangat na satan so ngaran na Dios a Jehova, a nilibon beses a nisulat ed Biblia.

9, 10. Antoy ibabangat na Biblia ed sikatayo nipaakar ed Dios?

⁹ Maslak ed saray libro na relihyon et dagdaiset so ibabangat da nipaakar ed Dios. Balet, tutulongan itayo na Biblia a nakabat si Jehova a Dios, naamtaan iray ginawa to, ontan met ed personalidad to. Ibabangat na Biblia a say Dios et Makapanyarin-amin, marunong, maar-aro, tan mangipapatnag na inkahustisya. (Basaen so Juan 3:16; 1 Juan 4:19.) Kaaruman ni, ibabaga na Biblia: “Say Dios et agmanangidumaduma, noagta diad balang nasyon et makapaliket ed sikato so toon ontatakot ed sikato tan manggagawa na inkatunong.” (Gawa 10:34, 35) Napaneknekan iya diad pangipapatalos ed Biblia diad dakerakel a lenguahe. Unong ed saray eksperto ed lenguahe, manga 6,700 a lenguahe so uusaren ed kaplesan. Manga 100 ed saratan so uusaren na 90 porsiento na populasyon ed mundo. Ingen, siansian nipatalos so Biblia—​intero odino kabiangan labat  na satan​—diad masulok a 2,400 a lenguahe. Kanian, amin lawari et makapanbasa na intero odino kabiangan na Biblia diad dilin lenguahe ra.

¹⁰ Inkuan nen Jesus: “Say Amak et mankikimey ni anggad natan, tan ontan ak met.” (Juan 5:17) ‘Manlapud andi-anggaan ya angga ed andi-anggaan, si Jehova so Dios.’ Kanian, isip yo pa labat iray ginawa to! (Sal. 90:2) Say Biblia labat so makapangipaamtad sikatayo na saray ginawa na Dios manlapu lad gapo ya anggad natan, tan no anto ni ray nagawad arapen. Ibabangat met ed sikatayo na Kasulatan no antoy labay tan aglabay na Dios, tan no panon tayon onapit ed sikato. (Sant. 4:8) Agtayo komon aabuloyan iray personal a panlabayan odino kapagaan a mangiyarawid sikatayo ed Dios.

11. Anto ran napanmatalkan a kakabatan so walad Biblia?

¹¹ Say dakel tan napanmatalkan iran kakabatan a walad Biblia et paneknek a say Lapuan na sayan libro et mas makabat nen saray totoo. Oniay insulat nen apostol Pablo: “Siopa so akaamta la ed kanonotan nen Jehova, ta pian sikatoy ibangat to?” (1 Cor. 2:16) Sayan bersikulo et base ed inkuan nen propeta Isaias ya: “Siopay akapansukat la ed espiritu nen Jehova, tan siopan too so makapangiter ed sikato na simbawa tan makapangibangat ed sikato na anggan anton bengatla?” (Isa. 40:13, NW) Siempre, anggapo. Kanian agtayo la pankelawan a say pangiyaplikad saray simbawa na Kasulatan nipaakar ed panangasawa, ananak, panagligliwaan, kalimog, inkakuli, inkamatua, tan moralidad et talagan parad pankaabigan tayo! Anggapoy makapuy a simbawan iiter na Biblia. Balet saray totoo et kulang na kakabatan pian makapangiter na epektibo iran simbawa. (Jer. 10:23) Mabetbet dan uumanen tan sasalatan iray simbawa ra sano namoria dan ag-iratan epektibo. Dugaruga so inkuan na Biblia: ‘Say kanonotan na totoo et andi-kakanaan.’​—Sal. 94:11, NW.

12. Anto ray ginawa na saray totoo pian deralen so Biblia?

¹² Papaneknekan na saray agawa nensaman a say tuan Dios so Autor na Biblia. Diad apalabas, sinali na dakel a totoo a deralen so mensahe na Dios. Singa bilang, nen 168 B.C.E., ingganggan nen Arin Antiochus IV na Sirya iray totoo ya anapen so amin a kopya na Ganggan tan poolan iratan. Nen 303 C.E., ingganggan met nen Romanon Emperador a si Diocletian a deralen iray lugar a pantitiponan na saray Kristiano, tan poolan so amin a Kasulatan. Nantultuloy itan ed loob na sakey a dekada. Diad loob na nilasus iran taon, ginawa na saray papa so anggaay nayarian da pian patundaen so panangipatalos na Biblia ed nanduruman lenguahe lapud agda labay a nabasa itan na saray totoo. Balet anggaman ontan lay pansasagpot nen Satanas tan saray totoon onsusuportad sikato, say Biblia et nansiansia anggad panaon tayo. Ag-inabuloyan nen Jehova so siopaman a maneral ed sayan regalo tod katooan.

SARAY PANEKNEK YA AKAKOMBINSIAN NA DAKEL

13. Anto ni ray arum a paneknek a say Biblia et impuyan na Dios?

¹³ Wala ni ray arum a paneknek a say Biblia et impuyan na Dios. Saraya et: say pantutunosan, inkasusto no nipaakar ed science tan history, asumpal iran propesiya, inkaprangka, pakayarin manguman ed bilay, tan makapnek iran ebat ed saray tepet ya abasad parapo 1. Nengnengen tayo no panon ya akombinse so arum a say Biblia et nanlapud Dios.

14-16. (a) Antoy akakombinse ed sakey a Muslim, Hindu, tan agnostiko a say Biblia et nanlapud Dios? (b) Anton makakombinsin paneknek a say Biblia et nanlapud Dios so labay mon usaren ed ministeryo?

¹⁴ Si Anwar, * sakey a Muslim et binmaleg ed sakey a bansa diad Middle East. Legan  a manaayam ed North America, sikatoy binisita na Saray Tasi nen Jehova. Inkuan to: “Diad saman et agko labay iray Kristianon relihyon lapud saray mauges a ginawa ra a singa say Crusade tan Inquisition. Balet sipor lan labalabay koy manaral, kanian nampaiyaral ak na Biblia.” Ag-abayag, sinmempet si Anwar tan nitunday piaaral tod saray Tasi. Kayari pigay taon, sikatoy nanayam ed Europa, tan intuloy toy nanaral na Biblia. Onia so inkuan to: ‘Akombinse ak a say Biblia et nanlapud Dios lapud saray propesiya na satan et tinmua, saksakey labat so tema to manlapud gapo anggad sampot, mantutunosan so karga to, tan saray lingkor nen Jehova et walaan na aro ed sakey tan sakey.’ Abautismoan si Anwar nen 1998.

¹⁵ Si Asha et 16 años, tan Hindu so pamilya to. “Manpipikasi ak labat kada onla ak ed templo odino no walay problemak, balet no anggapoy problemak agkon balot nanonotay Dios. Sakey ya agew, pinulongan ak na Saray Tasi nen Jehova ed abung mi, manlapud saman anguma-uman so bilay ko.” Nanaral na Biblia si Asha, akabat toy Jehova tan nagmaliw a maapit ed sikato. Antoy akakombinse ed sikato a say Biblia et impuyan na Dios? Oniay imbaga to: ‘Inebatan na Biblia so amin a tepet ko. Tan tinmulong iyad siak a manisiad Dios anggan agak la onlad templo tan mandayew ed saray imahen.’

¹⁶ Si Paula et binmaleg ed pamilyan Katoliko, balet sanen sikato lay kalangweran, nagmaliw ya agnostiko. Insan walay biglan agawa. Inkuan to: ‘Anengneng ko lamet imay kaarok ya pigay bulan ko lan ag-anengneng. Panaon iman ya usoy andukey so buek tan dakel so manguusar na druga. Balet anguma-uman ’may kaarok. Malinis lay itsura to tan malikeliket. Tinepetan ko no antoy agawad sikato tan nanlapuan to. Inkuan ton sikatoy iyaaralan na Saray Tasi nen Jehova, insan to ak pinulongan.’ Lapud anengneng nen Paula no panon ya inuman na Biblia so panagbilay na kaaro to, sikatoy nagmaliw ya interesado ed mensahe na Biblia tan akombinsin nanlapu itan ed Dios.

‘SAY SALITAM SO SILEWAN ED SARAY SALIK’

17. Antoy nitulong ed sika na inagew-agew a panagbasa tan pandalepdep ed Biblia?

¹⁷ Say Biblia et sakey ya makapadinayew a regalo ya inter nen Jehova ed sikatayo panamegley na masanton espiritu to. No basaen mo itan ya inagew-agew, mas lalom itan a naapresya tan onaralem so panangarom ed say Autor na satan. (Sal. 1:1, 2) Antis mon basaen so Biblia, kerew moy masanton espiritu na Dios diad pikakasi pian natalosan itan. (Luc. 11:13) Karga na Biblia so kanonotan na Dios, kanian legan mon dadalepdepen so ibabaga na satan, naalig mo so kanonotan na Dios.

18. Akin a labay mon itultuloy ya aralen so Biblia?

¹⁸ Legan ya ondarakel so kakabatan mod Biblia, iyaplikam so naaaralan mo. (Basaen so Salmo 119:105.) Say panagbasay Biblia et singa inenengneng ed espiho. Kanian no walay nanengneng mon kaukolan ya umanen, maabig no onkiwas kan tampol. (Sant. 1:23-25) Ontan met, say Salita na Dios et singa espada. Usar mo itan pian idepensay pananisiam tan ekalen iray palson bangat ed puso na saray mauyamon totoo. (Efe. 6:17) Sano gagawaen mo iratan, naapresyam a saray propeta tan lalakin nansulat ed Biblia et talagan ‘inggiya na masanton espiritu.’

[Saray paimano ed leksab]

[Tepetepet Parad Panagaral]

[Blurb ed pahina 29]

No basaen moy Biblia ya inagew-agew, onaralem so panangarom ed say Autor na satan

[Litrato ed pahina 26]

Say nampirmad sulat so nanlapuan na satan