Naandi Sanok Lapud Kaabigan

WALAY sakey ya akulaw ya supsuplada nen pupulongan da di George tan Manon, duaran Tasi ed Netherlands, nipaakar ed maong a balita na Panarian. Naamtaan dan amidua lan abalo tan inateyan na sakey ya anak a laki, tan wala ni graben arthritis to. Anggaman medyo nankalmado legay pantotongtong da, siansia nin aliwan makaaro ed sikara.

Anggaman ontan, imbaga nen George ed si Manon ya ikdan day rosas so akulaw no ompawil ira ta singa maer-ermen tan walay pansasakitan toy linawa. Ginawa da itan, tan asurprisa imay akulaw, a manngaran na Rie. Balet ta aliwan kombeniente iman ya oras parad sikato kanian inyeskedyul da so ipawil ed arum ya agew. Nen pinmawil si George tan Manon ed samay nantongtongan dan agew, anggapoy onebat. Aminpigapiga ’ran pinmawil diad nanduruman agew balet ta agda nasasabian. Inisip da ni ingen ya ompan iyaamotan to ra.

Sakey ya agew, asabian ya siansia nen George ed abung to. Kinmerew na dispensa si Rie ta agto atoor so tongtongan da tan impaliwawa ton sikatoy naospital. “Balet amta yo no antoy ginawak nen kaalis yon dua?” so kuan to. “Inggapok lay manbasa na Biblia!” Balibali impantongtong da tan nigapo so panangiyaral na Biblia.

Diad panaaral nen Rie na Biblia, baleg so angumanan to. Dati maer-ermen tan mapaspasnok, balet ta nagmaliw ya maliket tan maomaong ya too. Anggano agla makaalis ed abung, inanabang to lan tampol so balon pananisia to ed siopaman ya ombisitad sikato. Lapud sakit to, mataltalag ya makaatendid aral, balet ta malikeliket no sikatoy bibisitaen na saray agagi. Diad mismon agew na impan-82 to, inmatendid sirkiton asemblea tan nampabautismo bilang simbolo na dedikasyon to ed Dios.

Pigaran bulan labat kayari impatey to, walay nalmon poem ya insulat to. Diad satan et deneskribe to so ermen na pambukbukor no matatken la, tan indanet toy kaimportantian na kaabigan. “Talagan atenyeg so liknaan ko nen abasak itan,” so inkuan nen Manon, “tan malikeliket ak ta tinulongan kami nen Jehova ya ipanengneng so kaabigan ed sikato.”

On, say mismon ehemplo nen Jehova so mamapakiwas ed sikatayon ipanengneng met so aro tan kaabigan. (Efe. 5:1, 2) Magmaliw ya mabunga so ministeryo tayo legan tayon ‘irerekomenda so inkasikatayo bilang ministros na Dios . . . diad kaabigan.’​—2 Cor. 6:4, 6.