“Agamoran Kon Siansiay Kerew Ko”

Si Emilia et datin regular payunir, balet 15 taon lan tinmunda. Balet diad linmabas iran taon, lanang ton nanonotan so liket to sanen sikatoy manpapayunir, tan labay toy makapawil lamet.

Nauupot so panaon nen Emilia ed trabaho to, tan lapud satan et agla maliket. Aminsan, imbaga tod saray katrabaho ton: “Komon ta daiset labat ya oras so pantrabahok!” Arengel iya na boss to tan tinepetan toy Emilia no talagan satan so labay to. Imbaga nen Emilia a satan a talagay labay to. Balet kakaukolanen na kompanya so full-time a pantrabaho na saray empleyado to. Kanian kaukolan a katongtongen nen Emilia so direktor pian onkerew na permison nabawasay oras na trabaho to. Sikatoy namparaan a maong pian mitongtong ed direktor tan nampikasi pian magmaliw a kalmado tan nawalaay pakpel a mansalita.

Legan na miting, makpel balet ta magalang a kinerew nen Emilia a nabawasay oras na trabaho to. Impaliwawa tod direktor ya no anggapoy trabaho to, uusaren toy panaon ton ontulong ed arum: “Sakey ak ed Saray Tasi nen Jehova, tan tutulongan ko ray totoon onapit ed Dios. Natan et duma lay ugali na dakel a totoo. Kaukolan day nawalaan na dugan prinsipyo, tan say kakabatan a manlalapud Biblia ya ibabangat kod sikara et baleg so naitulong to. Agkayo mapaga ta agnaapektoan na sayan kimey so trabahok, balet labay kon nawalaay mas dakel a panaon pian tulongan iray totoo. Kanian komon ta bawasan yoy oras na trabahok.”

Dinmengel a maong imay direktor tan imbaga to a nensaman et ninonot to met so mibiang ed charity work. Insan to inkuan: “Lapud saratan ya imbagam, abuloyan ta ka. Balet naisip mo ta lan nabawasay sueldom?” Imbaga nen Emilia ya iilaloan to la itan, tan no kaukolan, pasimplien toy bilay to. Inkuan to nin: “Say sankaimportantian ya kalat ko et say panggawa na maabig a bengatla parad totoo.” Imbaga na direktor ed sikato: “Bilib ak ed saray totoon isasakripisyo ray panaon da parad arum.”

Anggapo ni empleyado ed satan ya kompanya a naabuloyan ya mantrabaho na mas daiset ya oras. Si Emilia et naabuloyan ya mantrabaho labat na apatiran agew ed sakey simba. Sikato ni ingey asurprisa ta intagey day sueldo to, tan natan et mipara lay sueldo to ed samay dati! Imbaga ton: “Agamoran kon siansiay kerew ko, tan makapanpayunir ak la lamet!”

Kasin sinalim lan i-adjust so kipapasen mo pian makapanpayunir ka odino pian makapawil ka lamet bilang payunir?

[Blurb ed pahina 32]

Imbaga na direktor ed sikato: “Bilib ak ed saray totoon isasakripisyo ray panaon da parad arum”