Unong ed salaysay nen Max Lloyd

Sakey ya labi nen 1955, wala ak ed Paraguay, South America a kaibay kaparak a misionero. Say abung a kawalaan mi et pinaliberan na saray manggugulon totoo, tan iyeeyag dan: “Labalabay na dios mi so dala tan labay toy dala na saray dayo.” Antoy gagawaen mid sayan lugar?

GINMAPO itan ya amin ed binalegan kon lugar diad Australia. Ditan ak met imbangat nen Jehova a gawaey linawa to. Akaawat si Tatay ko na libron Enemies ed sakey a Tasi nen 1938. Adismaya lay Nanay tan Tatay ed saray relihyoson lider diad lugar mi ta ibabaga ran saray arum a parte na Biblia et is-istorya labat. Kayari sakey taon, nampabautismo iray atateng ko bilang simbolo na dedikasyon dad si Jehova. Manlapu lad saman, say panggawa na linawa nen Jehova so sankaimportantian a kabiangay bilay na pamilya mi. Say sinmublay ya nampabautismo et si atsik Lesley, a mas matatken ed siak na limay taon. Abautismoan ak nen 1940 sanen siameray taon ko.

Ag-abayag kayari inggapo na World War II, nagmaliw a sebel so panag-imprinta tan panangibunog ed saray literatura na Saray Tasi nen Jehova diad Australia. Kanian anggano ugaw ak ni, naaralan ko ya ipaliwaway basiyan na pananisiak, a say uusaren labat et say Biblia. Aawiten kon lanang so Bibliak diad eskuelaan pian ipanengneng no akin ya agak mansasaludo ed bandira tan ag-onsusuportad saray guerra.​—Exo. 20:4, 5; Mat. 4:10; Juan 17:16; 1 Juan 5:21.

Dakel ed saray kaeskuelak so agmalabay a miulop ed siak tan pinangaranan da ak ya “German spy.” Diad saman et wala ray pelikulan ipapabantay na eskuelaan mi. Antis ya onggapoy pelikula, amin et kaukolan ya onalagey tan mangansion na national anthem. Lapud agak onalagey, walay duara odino taloran lalaki a mangigunot ed siak a paalagey. Ag-abayag pinaekal da ak ed eskuelaan lapud pananisiak. Balet, akapanaral ak nin siansia panamegley na correspondence courses diad abung mi.

ADAMPOT KON SIANSIAY KALAT KO

Ginawak a kalat so pagmaliw a payunir sanen 14 años ko. Kanian adisdismaya ak nen imbaga na atateng kon kaukolan ko ni mananap na trabaho. Imbaga ran kaukolan kon rentaan so kuartok, balet insipan dan no 18 años ko la et sarag ko lay manpayunir. Nanresulta iyad mabetbet a diskusyon nipaakar ed sueldok. Imbagak ed sikaran labay kon tiponen so kuartak parad pampayunir ko, balet ta aalaen da.

Sanen onggapo ak lan manpayunir, kinatongtong ak na saray atateng ko pian ipaliwawa ya amin  a kuartan imbayar kod sikara et indeposito rad banko. Insan da impawil itan ya amin ed siak pian walay isaliw koy kawes ko tan arum nin kaukolan kod pampayunir. Ibabangat da ak labat manayan asikasoey sarilik pian agak magmaliw a pabelat ed arum. Talagan agunggonaan ak ed satan ya impangipasal da.

Legan kamin ombabaleg nen atsik, diad abung mi so mabetbet ya tutuloyan na saray payunir, tan malikeliket kamin manpupulong a kaiba ra. Inyeskedyul mi lay weekend mi parad panagkabkaabungan, street witnessing, tan panangiyaral na Biblia. Say aaboten ya oras na saray manangipalapag ed saraman a taon et 60 kada bulan. Ngalngali naaabot a lanang nen Nanay itan ya kakaukolanen ya oras tan maabig ya alimbawa itan ed sikami nen atsik.

IMPAMPAYUNIR DIAD TASMANIA

Say inmunan nampayuniran ko et diad Tasmania, sakey ya isla ed Australia. Ditan et akaibak si atsik tan say asawa to. Balet, agnambayag et inmalis ira pian manaral ed koma 15 klase na Gilead School. Mabapbaing ak tan agko nin balot asali inmarawid pamilyak. Inisip na arum ya ombayag ak labat na taloy bulan. Balet, diad loob na sakey taon, nen 1950, nagmaliw ak ya company servant, a natan et tatawagen ya coordinator na ulop na mamatatken. Ag-abayag, niasain ak bilang espisyal payunir, tan sakey ya kalangweran so partner ko.

Say asainmin mi et diad nisulinek a baley a panagminaay copper, tan anggapo ni Tasi diman. Mansirunget la sanen sinmabi kami. Diad saman a labi, naugip kamid sakey a daan ya hotel. Kaimbuasan to, legan min manpupulong nantepet kamid saray totoo no walay amta ran narentaan ya kuarto. Sanen mansirunget la, walay angibagad sikami ya bakante so abung na diakono a walad abay na Presbyterian church tan inkuan ton kaukolan mi mitongtong ed diakono. Sikatoy makaaro tan inmabuloy a manayam kamid abung to. Singa makapalek ya isipen ya inagew-agew kamin onsisipot ed abung na diakono pian manpulong.

Mabunga so teritorya mi, dakel so interesado tan akapangigapo kami dakel a panangiyaral ed Biblia. Balet sanen naamtaan na saray lider na simbaan iyan nagagawa tan nadngelan dan say panaayaman mi et diad abung na diakono, ingganggan da imay diakono a paalisen to kami. Kanian anggapo lamet so napanayaman mi.

Kayari min nampulong anggad manga alas-tres na ngarem ed ontumbok ya agew, nananap kami pasen ya ugipan mi. Diad grandstand na sports istadyum so sankaabigan lan nalmo mi. Diman mi inyatol iray maleta mi, insan mi intuloy so nampulong. Mansirunget lad saman, balet nandesisyon kamin pulongan ni so pigaran kaabungan pian nasumpal so teritorya mi. Walay lakin akatongtong mi ya angiyopresi na napanayaman mi. Melag itan ya abung a walaay duaran kuarto diad beneg na abung to.

 IMPANLINGKOR ED SIRKITO TAN IMPANARAL ED GILEAD

Kayari na manga waloran bulan ed asainmin ko, akaawat ak na imbitasyon manlapud branch office na Australia a magmaliw ak ya circuit overseer. Agak makapanisia ta 20 años ko ni labat! Kayari impangipasal dad siak na pigaran simba, ginmapo ak lan ombisitad saray kongregasyon pian mamaseseg ed sikara. Anggaman ugaw ak ni tan daiset ni eksperiensyak, agak nileglemew na saray mas matatatken nen say siak, noagta nirespeto day kimey a gagawaen ko.

Nandurumay naeeksperiensyak kada ombibisita ak ed saray kongregasyon! Diad loob na sakey simba say luluganan ko et bus, diad ontumbok a simba et tren, insan diad kotse odino diad beneg na motor, a sankaegnaan koy maleta tan panagpulong a bag ko. Say panpundo ed abung na saray agagi et talagan makapaliket. Aminsan et labalabay na sakey a company servant a manayam ak ed abung to anggano agni itan asumpal. Diad loob na sakey simba say naugipan ko et diad bathtub, balet makapaliket tan makapabiskeg iman ya impanulop mi!

Nen 1953 wala lamet so makapasurprisan agawa, akaawat ak na application parad koma 22 a klase na Gilead. Balet say liket ko et alaokan na paga. Lapud kayari na impangraduate di atsik tan asawa to diad Gilead nen Hulyo 30, 1950, niasain ira ed Pakistan. Balet, ngalngali sakey taon da ni labat diman, nansakit si Lesley tan inatey. Lapud satan ya agawa, iisipen ko no antoy nalikna na saray atateng ko no onalis ak met. Balet, oniay imbaga ra: “Manlingkor kad si Jehova, inerman so pangibakian tod sika.” Agko lan balot anengneng si Tatay ta sikatoy inatey nen 1957.

Ag-abayag, nambiahe ak ed loob na anemiran simba kaibay limaran Australian paonlad New York City. Legan na satan a biahe, binasa mi so Biblia, nanaral kami, tan pinulongan mi ray kapara min pasahero. Antis kamin onlad eskuelaan diad South Lansing, New York, inmatendi kamid international convention ya agawad Yankee Stadium nen Hulyo 1953. Walay 165,829 ya inmatendi!

Nanlapud nanduruman pasen ed mundo so 120 ya estudyante na Gilead. Diad agew na graduation mi labat naamtaan no iner so asainmin mi. Nen naamtaan mi, batik kamin tampol ed library na Gilead pian mangalay impormasyon nipaakar ed bansan laen mi. Naamtaan kon say asainmin ko et diad Paraguay, sakey a bansan kabkabat lapud problemad politika. Sanen aganggano ak ni labat diman, tinepetan ko ray arum ya misionero no antoy “selebrasyon” ta diad labi et maingal. Inmimis labat irad siak tan imbaga ran: “Natan asalim lay rebolusyon. Nengneng kad paway.” Dakdakel iray sundalo!

AGNALINGLINGWANAN YA EKSPERIENSYA

Aminsan, inibaan kon ombisitad arawin kongregasyon so circuit overseer pian ipabantay so pelikulan The New World Society in Action. Nambiahe kami na manga walora odino siameran oras, unona panamegley na tren, insan karumata, tan kariton  ya guguyorey baka. Awiawit mi generator tan projector. Akasabi kamin siansia ed laen mi. Kaimbuasan to, linma kamid kaumaan tan inimbitaan mi iray totoo a manbantay na pelikula diad labi. Walay 15 totoo a linman nambantay.

Kayari na manga 20 minuto a pambabantay da, imbaga dad sikami ya onloob kamin tampol ed abung. Inala min tampol imay projector insan kami linmoob. Diad saman, sinmabi iray lalakin maneeyag-eyag tan ipappaltog day paltog da, tan ibabaga ran: “Labalabay na dios mi so dala tan labay toy dala na saray dayo.” Duatduara labat so dayon wadman, tan sakey ak ed saraman! Naamper na saramay nambantay na pelikula so panasali dan iloob ed abung. Balet pinmawil ira nen manga alas-tres na palbangon, ipappaltog da lamet iray paltog da tan imbabaga ran naerel da kamin siansia sano ompawil kami lad baley diad bandad ngarem.

Tinawagan na saray agagi so sheriff, ya anumbok ed sikami ed ngarem tan walay awit ton duaran kabayo a luganan mi pasempet ed baley. Nen pasempet kami la, kada no walay nadalanan min masamek odino kakiewan, ipaway toy paltog to tan onlad unaan mi pian inspeksioney dalanan mi. Amoriak ya mausar ed transportasyon so kabayo, kanian angaliw ak na sakey.

SINMABI IRAY KAARUMAN A MISIONERO

Anggaman mabetbet so isusumpa na saray klero ed panagpulong, nantultuloy itan ya inmaligwas. Nen 1955, walay sinmabin limaran misionero. Si Elsie Swanson so sakey ed sikara, sikatoy taga Canada tan nangraduate ed koma 25 a klase na Gilead. Akapan-ulop kamin agano ed branch office sakbay a sikatoy naikdan na sananey ya asainmin. Diad daiset a tulong na saray atateng to ya agbalot nagmaliw a mananisia, inusar toy bilay to a manlingkor ed si Jehova. Nen Disyembre 31, 1957, nankasal kami nen Elsie, tan nanayam kami ed missionary home diad abalaten a parte na Paraguay.

Diad panaayaman mi et kaukolan mi ni onasol na danum ed bobon a walad beneg na abung mi. Kanian anggapoy amesan tan banyo, washing machine, ni anggan refrigerator. Say sasaliwen mi labat et say naakan mi ed sanagew. Balet say simplin panagbilay tan maaron relasyon mid saray agagi ed kongregasyon so rason no akin a nagmaliw itan a sankaliketan a parte na bilay min sanasawa.

Ag-abayag sanen sinmabi kamid Australia nen 1963 pian bisitaey nanay ko, sikatoy naataki. Nayarin  say makasengeg et sikatoy eksayted a maong ta nanengneng to ak lamet kayari na samploy taon. Legan a manasingger so ipawil mid Paraguay, walay mairap a desisyon a kaukolan min gawaen. Kasin taynan mi nanay kod ospital tan ilaloan a walay mangasikasod sikato, insan kami ompawil ed inad-aro min asainmin ed Paraguay? Kayari na masimoon ya impanpikasi, nandesisyon kamin sanasawa ya mansiansia pian asikasoen si Nanay ko. Asarag mi itan, tan akapansiansia kamid sigpot-panaon a serbisyo anggad impatey to nen 1966.

Talagan baleg a pribilehyo so impagmaliw kon circuit tan district overseer ed Australia diad loob na pigaran taon tan impambangat ed Kingdom Ministry School parad saray elder. Insan wala lamet so sananey a pananguman ed bilay mi. Niasain ak a magmaliw a membro na sankaunaan a Branch Committee diad Australia. Insan nen kaukolan mi mangipaalagey na balon branch office, niasain ak a magmaliw a tsirman na building committee. Nipaalagey so balibalin branch office diad tulong na saray agagin eksperiensyado tan walay pankakasakey.

Say sinmublay ya asainmin ko et diad Service Department a mangaasikaso ed panagpulong a kimey diad sakey a bansa. Pribilehyok met so ombisitad arum a branch ed interon mundo bilang zone overseer pian ontulong tan mamaseseg ed saray agagi. Talagan makapabiskeg na pananisia parad siak so ibisitad saray agagi ed arum a bansa ya pigaran taon odino dekada ni ingen a nipriso tan walad saray concentration camp lapud katooran dad si Jehova.

SAY ASAINMIN MI NATAN

Kapawil mi manlapud sakey a zone visit nen 2001, akaawat kami na sulat a mangiimbita ya onla kamid Brooklyn, New York, pian magmaliw ak a membro na balon Branch Committee diad United States. Impikasi mi itan nen Elsie, tan mabulos min inawat so balon asainmin mi. Natan et masulok mi lan 11 a taon ed Brooklyn.

Malikeliket ak ta walay asawak ya mabulos a manggawad linawa nen Jehova. Masulok ya 80 años mi la nen Elsie, balet ta maksil ni laman mi. Iilaloan min ibangat tan bendisyonan to kami nen Jehova ed andi-anggaan, pati saramay mantutultuloy a manggagaway linawa to.

[Blurb ed pahina 19]

Diad loob na sakey simba say luluganan ko et bus, diad ontumbok a simba et tren, insan diad kotse odino diad beneg na motor, a sankaegnaan koy maleta tan panagpulong a bag ko

[Blurb ed ed pahina 21]

Iilaloan min ibangat to kami nen Jehova ed andi-anggaan

[Saray litrato ed pahina 18]

Kawigi: Sanen wala ak ed sirkiton kimey diad Australia

Kawanan: Kaibak iray atateng ko

[Litrato ed pahina 20]

Nen kasal mi, Disyembre 31, 1957