Mabulbulos Dan Inyapay so Inkasikara​—Diad Ecuador

NAPRE-PRESSURE so sakey a kalangweran a brother a taga Italy. Kakka-graduate to ni labat ed haiskul tan sikatoy sankaatageyan na grade ed klase ra. Sikatoy pipiliten na saray kanayon tan maestra ton mangala ni na atagtagey ya edukasyon. Balet pigay taon antis na saya, indedika nen Bruno so bilay tod si Jehova, tan insipan ton iyuna ton gawaen so linaway Dios diad bilay to. Antoy pinili to ey? Imbaga to: “Impikasik ed si Jehova a labay kon sumpaley sipan ko tan iyunak so panlingkor ed sikato. Balet impikasik met ya agko labay so boring a bilay, noagta labay koy nawalaay nanduruman kimey diad panlingkor ed sikato.”

 Kayari pigaran taon, si Bruno et linmad Ecuador, South America. Inkuan to: “Say ebat nen Jehova ed pikakasik et mas ni nen say iilaloan ko.” Kasabi tod Ecuador, agto ilaloan a dakel so nakabat ton kalangweran ya linma met diman pian mas palaknabey panaglingkor dad si Jehova.

SARAY KALANGWERAN YA ‘ANALID SI JEHOVA’

Sakey labat si Bruno ed saray nilibon kalangweran ed interon mundo ya angawat ed imbitasyon nen Jehova ya: “Salien yo ak natan ed saya, . . . no siak agko naani lukasan ed sikayo so saray pinto na tawen, et ikalbok naani ed sikayo so sakey a bendisyon.” (Mal. 3:10) Lapud panangaro dad Dios, sikaray apakiwas a ‘salien si Jehova’ diad mabulos ya impangusar day panaon, biskeg, tan kaykayarian da pian suportaay kimey diad bansan mas baleg so pankaukolan parad manangipulong na Panarian.

Kasabi na sarayan boluntaryo ed balon asainmin da, anengneng dan mismo ya “dakel so aanien, balet daiset so mankikimey.” (Mat. 9:37) Singa bilang, oniay insulat nen Jaqueline a taga Germany diad branch na Ecuador: “Masulok a duay taon ko ni labat a manlilingkor ed Ecuador, balet ta 13 lay iyaaralan ko, tan 4 ed sikara et regular lan miaaral. Agta agaylay abig?” Onia met so imbaga nen Chantal a taga Canada: “Nen 2008, linma ak ed sakey a lugar diad coast na Ecuador a ditan et saksakey labat so kongregasyon. Balet natan et talora lay kongregasyon ditan tan masulok a 30 lay payunir. Makapalikliket so pakanengneng ed saray balo ni ya onaaligwas ed katuaan!” Inyarum  to ni: “Kakkaalis ko ed sakey a syudad diad Kapalandeyan na Andes, a say kaatagey to 2,743 metro. Say populasyon ditan et masulok a 75,000 balet ta saksakey so kongregasyon. Talagan mabunga itan a teritorya! Nai-enjoy kon maong so ministeryok.”

SARAY SUBOK

Siempre, talagan wala ray subok ed panlingkor diad arum a bansa. Diad tua, wala ray kalangweran a nasusubok anggan sakbay ni na iyalis da. Oniay imbaga nen Kayla a taga United States: “Makapadismaya iray negatibon reaksion na saray kakongregasyon ko, anggaman say motibo ra et maabig. Agda natatalosan no akin a labay koy manpayunir ed sananey a bansa. No maminsan, iisipen kon, ‘Duga kasi desisyon ko?’” Anggaman ontan, linma nin siansiay Kayla. Inkuan to: “Tinmulong ed siak so dakel a pikakasid si Jehova tan impitongtong ed saray agagin matatken ed espiritual pian namorian bebendisyonan nen Jehova iray walaan na mabulos ya espiritu.”

Parad dakel, mairap so panaral na sananey a lenguahe. Oniay nanonotan nen Siobhan a taga Ireland: “Mairap parad siak no agko naibagay labay kon ibaga. Kaukolan koy mananos, aralen a maong so lenguahe, tan elekan labat iray lingok.” Onia met so imbaga nen Anna a taga Estonia: “Mas mairap so panaral na Spanish nen say panayam ed lugar ya ampetang, marabok, tan anggapoy hot shower. No maminsan et singa labay ko lay ontunda. Balet inaral koy manpokus ed iyaaligwas ko, aliwan diad saray lingok.”

Sakey nin subok et say pakailiw ed saray kapamilya tan kakaaro. Oniay inamin nen Jonathan a taga United States: “Nen kakkasabik, nadidismaya ak ta makakailiw ak ed saray kakaarok tan kapamilyak. Balet, alabanan ko met lanlamang itan a liknaan panamegley na impangusar koy dakel a panaon ed personal a panagaral na Biblia tan ed ministeryo. Ag-abayag, dakel so makapaliket ya eksperiensyak ed panagpulong tan amayamay so balon kakaarok ya akatulong ed siak pian nipawil lamet so liket ko.”

Say sananey nin subok et say kipapasey panagbilay, ompan duma itan ed apasalan da. Oniay inkuan nen Beau a taga Canada: “Diad nanlapuan mon bansa, nayarin ibabaliwalam labat lay serbisyoy kuryente tan danum. Balet dia, no maminsan wala, no maminsan anggapo.” Diad mairap iran bansa, kaslakan so  kairapay bilay, aliwan komportable so transportasyon, tan dakel so ag-akaaral. Say akatulong ed si Ines a taga Austria pian natalonaan itan et say impanpokus tod balibalin ugali na saray taga diman. Imbaga ton sikaray “maparawes, mauyamo, akaparaan ya ontulong, tan mapaabeba. Nagkalalo lad amin, labalabay day manaral nipaakar ed Dios.”

“DAKERAKEL A BENDISYON YA ANGGAD ANGGAPO LAY NAPANGINAN”

Anggaman mansasakripisyo irayan kalangweran a walad Ecuador, apaneknekan dan si Jehova et mangitatarya na “mas nagkalalo ni nen say nayarian tayon kerewen odino isipen.” (Efe. 3:20) Talagan alikna ran akaawat iray “dakerakel a bendisyon ya anggad anggapo lay napanginan.” (Mal. 3:10) Oniay imbaga ra nipaakar ed ministeryo ra:

Bruno: “Say unonan nanlingkoran kod Ecuador et diad balibalin rehyon na Amazon. Ag-abayag, tinmulong ak diad impamaawang ed branch office na Ecuador. Natan et manlilingkor ak lad Bethel. Nen wala ak nid Italy, pinilik ya iyunay panlingkor ed si Jehova, tan talagan inebatan toy pikakasik a magmaliw ya eksayting so bilay ko tan nawalaay nanduruman kimey diad panlingkor ed sikato.”

Beau: “Talagan mas inmap-apit ak ed si Jehova ta diad Ecuador et nauusar koy amin a panaon ko parad espiritual iran kimey. Ontan met, akapasyar ak ed mararakep iran lugar, a panlikliketan kon gawaen.”

Anna: “Bilang sakey ya andiay asawa, singa imposible parad siak so manbilay a singa missionary. Balet apaneknekan kon posible manaya. Misalsalamat ak ed bendisyon nen Jehova lapud malikeliket ak ya ontutulong ed arum a manaral na Biblia, manpaalagey na saray Kingdom Hall, tan nawalaay balon kakaaro.”

Elke: “Sanen wala ak nid Austria, lanang kon ipipikasid si Jehova a nawalaan ak komon na anggan sakey labat ya iyaaralay Biblia. Dia balet et 15 so iyaaralan koy Biblia! Malikeliket ak no nanenengneng koy gayaga ed lupa na saray onaaligwas lan iyaaralan ko.”

Joel: “Nikadkaduman eksperiensya so pakakar ed arum a lugar pian manlingkor ed si Jehova. Naaralan moy mas manmatalek ed sikato tan eksayting so pamendisyon to ed saray sagpot mo! Sanen sakey taon ko ni labat a nanlapud United States, say grupo a panlilingkoran ko et inmaligwas manlapud 6 ya anggad 21 a manangipalapag. Tan say inmatendid Memoryal et 110.”

SIKA EY?

Agagin kalangweran, kasin iyabuloy na kipapasen yoy manlingkor ed lugar a mas baleg so pankaukolan parad manangipulong na Panarian? Siempre, satan ya importantin desisyon et mankaukolan na makabat a panagplano. Balet manuna ed amin, kaukolan so malet a panangaro ed si Jehova tan ed totoo pian nagawaan itan ya desisyon. No walay ontan a panangaro yo, tan kualipikado kayo, masimoon yon ipikasi ed si Jehova so panlingkor ed sananey a bansa. Ontan met, itongtong yo iyan pilalek yod saray Kristianon atateng yo tan ed saray elder ed kongregasyon yo. Nayarin mandesisyon kayo met a sarag yoy manlingkor ed si Jehova diad sayan eksayting tan makapnek a klase na panaglingkor.

[Blurb ed pahina 3]

“Tinmulong ed siak so dakel a pikakasid si Jehova tan impitongtong ed saray agagin matatken ed espiritual pian namorian bebendisyonan nen Jehova iray walaan na mabulos ya espiritu.”​—Kayla a taga United States

[Kahon/Litrato ed pahina 6]

No panoy pamparaan a manlingkor ed sananey a bansa

• Mangiyeskedyul na regular a personal a panagaral

• Repasoen so Agosto 2011 a Ministeryo Tayod Panarian, pahina 4-6

• Mitongtong ed arum a nanlingkor lad sananey a bansa

• I-research so kultura tan history na bansan planom a laen

• Mangalay basic language course

[Kahon/Litrato ed pahina 6]

Susuportaan na arum ya manlilingkor ed sananey a bansa so sarili da panamegley na . . .

• pantrabahoy pigay bulan ed bansa ra

• pangipaabang day abung, apartment, odino negosyo ra

• pantrabaho diad Internet

[Saray litrato ed pahina 4, 5]

1 Jaqueline a taga Germany

2 Bruno a taga Italy

3 Beau a taga Canada

4 Siobhan a taga Ireland

5 Joel a taga United States

6 Jonathan a taga United States

7 Anna a taga Estonia

8 Elke a taga Austria

9 Chantal a taga Canada

10 Ines a taga Austria