Paitonton Kad si Jehova ed Tuan Kawayangan

“[Usisaen so] ayadyarin ganggan a mangitonton ed kawayangan.”​—SANT. 1:25.

KASIN NIPALIWAWAM?

Anton ganggan so mangitonton ed tuan kawayangan tan siopa ray minabang ed satan?

Anto so sekreto pian nawalaay tuan kawayangan?

Anton kawayangan so aalagaren na amin a mansiasiansia ed dalan na bilay?

1, 2. (a) Anto lay nagagawad kawayangan na totoo natan, tan akin? (b) Anton kawayangan so iilaloan na saray lingkor nen Jehova?

MANBIBILAY tayo la natan ed panaon ya onloloor so inkaagum, kaugsan, tan karawalan. (2 Tim. 3:1-5) Lapud satan, saray gobierno et manggagawa na dakel a ley, papabiskegen day puersa na pulisya, tan manguusar na saray surveillance camera. Diad arum a bansa, mangikakarga iray totoo na saray security alarm, electric fence, tan kaaruman a kandado ed saray ayaman da. Ontan met, agla labay na dakel so ompaway ed labi tan agda met la aabuloyan iray ananak dan manggalaw a bukor. Talagan singa anggapo lay kawayangan tan onloloor ni itan.

² Diad hardin na Eden et imbaga nen Satanas a magmaliw labat lan tuan bulos so totoo no ag-ira manpasakop ed si Jehova. Ipapatnag na saray agawa manlapu lad saman a si Satanas et matila! Diad tua, no kapigan ibabaliwala na totoo iray moral tan espiritual ya estandartin inletneg na Dios, mas lalo iran naiirapan. Sayan mauges a kipapasen et mangaapekta met ed sikatayo ran lingkor nen Jehova. Anggaman ontan, nailaloan tayon nibulos so katooan manlapud kasalanan tan kabubulok, tan panggayagaan na ‘ananak na Dios so maglorian kawayangan.’ (Roma 8:21) Diad tua, ipaparaan la nen Jehova iray lingkor to parad satan. Panon?

3. Anton ganggan so inter nen Jehova ed saray lingkor to, tan anto ran tepet so pantongtongan tayo?

³ Walay inter ed sikatayo nen Jehova a tinawag nen Santiago ya “ayadyarin ganggan a mangitonton ed kawayangan.” (Basaen so Santiago 1:25.) Onia so impangipatalos na arum a bersion na Biblia ed satan: “Say ganggan a mangibulos ed sikatayo,” (The New English Bible) tan “say ayadyarin ganggan na kawayangan” (The New American Bible). Balet no ganggan so pantotongtongan,  kaslakan ya ikokonekta itan na totoo ed panameget, aliwan diad kawayangan. Kanian, anto iyan “ayadyarin ganggan a mangitonton ed kawayangan”? Tan panon itayon nibulos na satan a ganggan?

SAY GANGGAN A MANGIBULOS ED SIKATAYO

4. Anto so “ayadyarin ganggan a mangitonton ed kawayangan,” tan siopa ray minabang ed satan?

⁴ Say “ayadyarin ganggan a mangitonton ed kawayangan” et aliwan say Mosaikon Ganggan, lapud impaimano na satan iray kasalanan na saray Israelita, tan asumpal la itan sanen sinmabi Kristo. (Mat. 5:17; Gal. 3:19) Anto sirin a ganggan so tutukoyen nen Santiago? Satan et say “ganggan na Kristo,” ya tatawagen met a “ganggan na pananisia” tan “ganggan na bulos a totoo.” (Gal. 6:2; Roma 3:27; Sant. 2:12) Kalaktip sirin ed ayadyarin ganggan so amin ya kakaukolanen nen Jehova ed sikatayo. Minabang iray alanaan a Kristiano tan “arum a karnero” ed satan a ganggan.​—Juan 10:16.

5. Akin et agmakapabelat so ayadyarin ganggan?

⁵ Aliwan singa say ley na dakel a bansa, say “ayadyarin ganggan” et aliwan komplikado tan makapabelat ta lalaktipen na satan iray simplin ganggan, tan saray prinsipyon mainomay a talosan. (1 Juan 5:3) Inkuan nen Jesus: “Mainomay a sakbaten so pakok tan anlemew so awit ko.” (Mat. 11:29, 30) Ontan met, agkaukolan na “ayadyarin ganggan” so andukey a listaan na saray dusa. Nibase itan ed aro tan say akasulatan na satan et diad nonot tan puso na totoo, aliwan diad saray tapyas na bato.​—Basaen so Hebreos 8:6, 10.

NO PANON ITAYON NIBULOS NA “AYADYARIN GANGGAN”

6, 7. Antoy nitulong ed sikatayo na saray estandarte nen Jehova, tan akin ya nibulos itayo na ayadyarin ganggan?

⁶ Saray limitasyon ya inter nen Jehova ed totoo to et parad pankaabigan tan proteksion da. Singa bilang, nonot yo pa labat so ley ed palsa ya mangokontrol ed enerhiya tan matter, a singa say gravity. Agtayo ibabagan nabebelatan itayo lapud saratan a ganggan. Imbes, aapresyaen tan bibidbiren tayon parad pankaabigan tayo iratan. Ontan met, saray moral tan espiritual ya estandarte nen Jehova a naromog tayod “ayadyarin ganggan” et parad pankaabigan tayo.

⁷ Likud ed proteksion, say ayadyarin ganggan so mamenek ed amin a dugan pilalek tayo tan agtayo nasakitan ed satan, ni say pibabalian na satan so kanepegan tan kawayangan na arum. Kanian, say sekreto na tuan kawayangan​—panggawa na pilalek tayo—​et say pakawalaan na dugan pilalek a mitunosan ed personalidad tan saray estandarte nen Jehova. Sirin, nepeg tayon aroen iray aaroen nen Jehova tan busolen iray bubusolen to. Tulongan itayo na ayadyarin ganggan pian nagawaan itan.​—Amos 5:15.

8, 9. Anto ran bendisyon so nagamoran na saramay manguunor ed ayadyarin ganggan? Mangiter na alimbawa.

⁸ Lapud agtayo perpekto, nairapan tayon daegen iray makapuy a pilalek tayo. Anggaman ontan, niwalad sikatayoy kawayangan legan tayon uunoren so ayadyarin ganggan. Pian niyilustra: Nengnengen tayoy alimbawa nen Jay, sakey a balon iyaaralan na Biblia ya adik ed sigarilyo. Sanen naamtaan ton say bisyo to et agmamaliket ed Dios, kaukolan toy mandesisyon. Kasin itultuloy ton unoren so pilalek to odino unoren toy Jehova? Anggaman nairapan ya mangitunda ed panagsigarilyo, pinili ton unoren so Dios. Antoy alikna to sanen intunda to lay bisyo to? Imbaga ton, “malikeliket ak la natan ta nagmaliw ak lan bulos!”

⁹ Amoria nen Jay a say kawayangan a walad mundo et mangiyaabuloy ed totoon ‘nonoten so nipaakar ed laman,’ a manresultad panangaripen. Balet say kawayangan ya iiter  nen Jehova, say “pannonot nipaakar ed espiritu,” et mangibulos tan mangitonton ed “bilay tan kareenan.” (Roma 8:5, 6) Iner so angalaan nen Jay na biskeg pian nalabanan itan ya manangaripen a bisyo? Aliwan diad dilin biskeg to, noagta diad tulong na Dios. Oniay inyarum to: “Regular ak ya manaaral na Biblia, manpipikasi parad masanton espiritu, tan inawat koy tulong na saray agagi ed kongregasyon mi.” Makatulong met irayad sikatayon nawalaay tuan kawayangan. Nengnengen tayo no panon.

USISAEN A MAONG SO SALITA NA DIOS

10. Antoy kabaliksan na ‘pangusisad’ ganggan na Dios?

¹⁰ Oniay nabasa tayod Santiago 1:25: “Samay manuusisan maong ed ayadyarin ganggan a mangitonton ed kawayangan tan pampepelengan ton gawaen itan . . . et magmaliw a maliket ed panggagawa to ed satan.” Say orihinal a Griegon salitan impatalos a ‘manuusisa’ et mankabaliksay “iyuko pian nengnengen a maong so sakey a bengatla,” a mangipapatnag na impasyan sagpot. Kanian, no labay tayon say nonot tan puso tayo et pakiwasen na ayadyarin ganggan, kaukolan a maseet tayon aralen so Biblia tan dalepdepen a maong iray nababasa tayo.​—1 Tim. 4:15.

11, 12. (a) Panon ya indanet nen Jesus a nepeg tayon gawaen a paraan na panagbilay tayo so katuaan? (b) Anton peligro so kaukolan ya panalwaran na saray kalangweran?

¹¹ Ontan met, kaukolan tayon ‘pampelengan,’ odino pansagpotan ya iyaplikay Salita na Dios, a gawaen itan a paraan na panagbilay tayo. Onia so imbaga nen Jesus ed saramay anisia ed sikato: “No mansiansia kayo ed salitak, peteg a sikayo iray  disipulok, tan naamtaan yo so katuaan, tan say katuaan so mangibulos ed sikayo.” (Juan 8:31, 32) Unong ed sakey a reperensya, say salitan ‘pangamta’ et mankabaliksan met na panangapresya ed “‘naamtaan’ lapud mabli odino importante itan ed samay akaamta.” Kanian, nibagan sigpot ya ‘amta’ tayo so katuaan no gawaen tayo itan a paraan na panagbilay tayo. Insan lad satan onkiwas so “salita na Dios” ed sikatayo. Ontulong iyad sikatayon manggawa na tuloytuloy a pananguman pian mas naalig tayoy Ama tayon walad tawen.​—1 Tes. 2:13.

¹² Tepetan mo pay inkasika, ‘Talaga kasin amtak so katuaan? Kasin iyaaplikak so katuaan ed bilay ko? Odino pipilaleken ko ni ray “kawayangan” a walad mundo?’ Oniay insulat na sakey ya sister a pinabaleg na saray atateng ton Tasi, legan ton sankanonot so inkatobonbalo to: “No binmaleg kad katuaan, nibagan sipor mo lan kabat si Jehova. Balet, sikatoy agkon talaga akabat. Agko naaralan ya busolen iray kabusol to. Agak manisia ya importantid sikato iray gagawaen ko. Tan agak balot kinmerew na tulong ed sikato. Nanmatalek ak ed dilin pakatalos ko, a natan et amoriak ya kakulangkulangan lapud andi kakanaan so kakabatan ko.” Maong labat ta amoria na sayan sister a mauges manayay gagawaen to. Sikatoy nanggawa na baleg a pananguman, tan nanregular payunir ni ingen.

TULONGAN KA NA MASANTON ESPIRITU A NAWALAAY KAWAYANGAN

13. Panon itayon tutulongan na masanton espiritu a nawalaay kawayangan?

¹³ Oniay nabasa tayod 2 Corinto 3:17: “No iner so kawalaan na masanton espiritu nen Jehova et walay kawayangan.” Panon ya ontutulong ed sikatayo so masanton espiritu a nawalaay kawayangan? Manunad amin, papawalaen na satan ed sikatayo iray kualidad ya kakkaukolan parad kawayangan a singa say “aro, gayaga, deen, andukey a panag-anos, kaabigan, kamaongan, pananisia, inkaulimek, [tan] panangontrol ed dili.” (Gal. 5:22, 23) No anggapo irayan kualidad, lalo lad aro, agsigpot a nibulos iray totoo​—ya mapatpatnag ed mundo natan. Kayarin insulat nen apostol Pablo iray aspekto na masanton espiritu, oniay intuloy to: “Anggapoy ganggan a sumpad sarayan bengatla.” Antoy labay ton ibaga? Agnalimitaan na anggan anton ley na too so espiritu na Dios tan anggapon balot so makaamper ed pamaaligwas tayod sarayan kualidad. (Gal. 5:18) Labay nen Jehova a nipanengneng tayo irayan kualidad anggad angga.

14. Panon ya aaripenen na espiritu na mundo iray totoo?

¹⁴ Saramay kokontroley espiritu na mundo tan saramay mamepenek ed pilalek da et maniisip a bulos ira. (Basaen so 2 Pedro 2:18, 19.) Balet agda amtan sikaray aripen na satan. Kaukolan a manggawa na dakel a ley iray gobierno pian nakontrol irayan pilalek tan ugali na totoo. Inkuan nen Pablo, “say ganggan et inter, aliwan parad matunong a too, noagta parad totoon mauges tan agnapatulok.” (1 Tim. 1:9, 10) Sikara met so aripen na kasalanan a sengegay pakakagawa ray “bengatlan labalabay na laman,” tan sakey iyan maruksan katawan. (Efe. 2:1-3) Saratan a totoo et singa insekto ya kinmurong ed sanyaong a dilo. Lapud labay dan penekey pilalek da, agla ra akaalis ditan.​—Sant. 1:14, 15.

KAWAYANGAN DIAD LOOB NA KRISTIANON KONGREGASYON

15, 16. Anto ran gunggona so agamoran tayo sanen nagmaliw tayon kabiangan na kongregasyon, tan anton kawayangan so panliliketan tayo?

¹⁵ Say gagala na pilimog ed Kristianon kongregasyon et aliwan singa pibiang ed sakey a grupo. Imbes, nagmaliw kan kabiangan na satan lapud inyasingger ka nen Jehova. (Juan 6:44) Akin et pinili to ka? Kasin  lapud matunong tan matakot kad Dios? Nayarin ikuan mon, “Andin balot!” Anto sirin so anengneng na Dios ed sika? Naimano ton labay mon unoren so ganggan to tan mabulos kan paigigiyad sikato. Manlapu nen nagmaliw kan kabiangan na kongregasyon, aasikasoen ka nen Jehova panamegley na pambabangat tod sika na Salita to. Imbulos to ka manlapud saray palson bangat na relihyon, panag-anito, tan imbangat to kan aligen so personalidad na Kristo. (Basaen so Efeso 4:22-24.) Bilang resulta, awalaan ka na pribilehyon magmaliw a kabiangan na saray totoon peteg a bulos.​—Sant. 2:12.

¹⁶ Nonot yo pa iya: Kasin natatakot ka no kaibam iramay mangaarod si Jehova? Legan kan mitotongtong ed saray agagi, kasin sankaegnaan mo ray kagawaan mo ta ompan walay manakew ed saratan? Siempre andi! Komportable tan maligen ka. Ontan met kasi naliknam no say kaibam et arum a totoo? Andin balot! Say kawayangan a nalilikna tayo natan diad loob na kongregasyon et pataway labat na kawayangan a nagamoran tayod arapen.

“ANANAK NA DIOS A WALAAN NA MAGLORIAN KAWAYANGAN”

17. Panon a say “kiparungtal na ananak na Dios” et ontulong pian nawalaay kawayangan iray totoo?

¹⁷ Oniay insulat nen Pablo nipaakar ed kawayangan ya iter nen Jehova ed saray totoo to: “Saray pinalsa a manaalagar ed kiparungtal na ananak na Dios et maniilalon maong.” Insan to intuloy: “Nibulos met iray pinalsa ed impakaaripen ed kabubulok pian magmaliw iran ananak na Dios a walaan na maglorian kawayangan.” (Roma 8:19-21) Say tutukoyen ya “saray pinalsa” et saray totoon walaan na ilalon manbilay ed dalin, a minabang ed “kiparungtal” na saray alanaan ya ananak na Dios. Satan a panangiparungtal et onggapo sano sarayan alanaan a walad tawen et ontulong ed si Kristo a maneral ed amin a mauges a totoo tan mangiliktar ed “baleg ya ulop” parad sakey a balon mundo.​—Apo. 7:9, 14.

18. Panon ya nagamoran na saray matulok a totoo so tuloytuloy a kawayangan, tan anton kawayangan so niwalad sikara diad arapen?

¹⁸ Saray makaliktar et nawalaan na balon klase na kawayangan​—kawayangan manlapud impluensya nen Satanas tan saray demonyo to. (Apo. 20:1-3) Talagan baleg itan ya inawa! Manlapu lad satan et ibulos na 144,000 a kaiba nen Kristo a manuley bilang ari tan saserdote iray totoo panamegley na pantultuloy a pangiyaplikad dondon anggad sigpot lan naandi kasalanan tan ag-inkaperpekto. (Apo. 5:9, 10) Diad pansiansian matoor na saray totoo, nagamoran day perpekton kawayangan ya gagala nen Jehova parad sikara​—‘say maglorian kawayangan na ananak na Dios.’ Isip yo pa labat, agtayo la nairapan a gawaen so ibabaga na Dios a duga, lapud say laman, puso, tan nonot tayo et magmaliw lan perpekto, tan sigpot tayo lan naalig iray kualidad na Dios.

19. Antoy nepeg tayon gawaen no labay tayoy nawalaan na tuan kawayangan?

¹⁹ Pirpirawat tayo la kasin nagamoray ‘maglorian kawayangan na ananak na Dios’? Abuloyan tayo sirin a say nonot tan puso tayo et mantultuloy a pakiwasen na “ayadyarin ganggan a mangitonton ed kawayangan.” Pampelengan ya usisaen so Kasulatan tan ipatnag so katuaan ed bilay tayo. Manpikasi parad tulong na masanton espiritu. Sigpot a minabang ed Kristianon kongregasyon tan ed saray espiritual a naakan ya itatarya nen Jehova. Tan agtayo aabuloyan a palikdoen itayo nen Satanas ya isipen a say Dios et is-istrikto, a singa ginawa tod si Eva. Anggaman antoy inkasilib na Diablo, agto tayo napalikdo no “aliwa itayon andian na pikakabat ed saray paraan to.” Satan so pantongtongan tayod ontumbok ya artikulo.​—2 Cor. 2:11.

[Tepetepet Parad Panagaral]

[Saray litrato ed pahina 9]

Kasin pipilaleken ko ni ray “kawayangan” a walad mundo?

[Saray litrato ed pahina 9]

Kasin ipapatnag kod bilay ko so katuaan?