Panlingkoran so Dios na Kawayangan

“Saya so kabaliksan na panangaro ed Dios, ya unoren tayo iray ganggan to; tan aliwan makapabelat iray ganggan to.”​—1 JUAN 5:3.

KASIN NAEBATAN MO?

Panon ya ipapalikna nen Satanas a saray ganggan na Dios et makapabelat?

Akin a kaukolan tayon pilien a maong iray kaulop tayo?

Antoy ontulong ed sikatayon mansiansian matoor ed Dios na kawayangan?

1. Panon ya uusaren nen Jehova so kawayangan to, tan anton kawayangan so inter tod si Adan tan Eva?

SI Jehova labat so walaan na sigpot a kawayangan. Balet lanang ton uusaren itan ed dugan paraan tan agto kokontrolen so amin a gagawaen na saray lingkor to. Aabuloyan to ran manggawa na sarili dan desisyon pian napenek so amin a dugan pilalek da. Singa bilang, inikdan na Dios si Adan tan Eva na saksakey labat a ganggan​—say agpangan ed bunga na ‘kiew a pakaamtaan na maong tan mauges.’ (Gen. 2:17) Talagan makapadinayew a klase na kawayangan so panggawad linaway Amalsa ed sikara!

2. Akin ya abalang na inmunan atateng tayo so inter na Dios a kawayangan da?

² Akin et inikdan na Dios so inmunan atateng tayo na ontan a kawayangan? Lapud pinalsa to ra unong ed indengan to tan inikdan to ray konsiensia, iilaloan ton gawaen da so duga lapud panangaro rad sikato bilang Amalsa ra. (Gen. 1:27; Roma 2:15) Balet, makapaermen ta ag-inapresya di Adan tan Eva so kawayangan ya inter na Amalsa ed sikara. Imbes, nilabay dan sikaray mandesisyon no antoy duga tan aliwa. Inisip dan say panggawad satan et mangiter ed sikara na nagkalalon kawayangan, balet diad tua, satan a ginawa ra et nanresultad kairapan tan ipapatey da, tan na saray magmaliw ya ilalak da.​—Roma 5:12.

3, 4. Antoy labay ya ipaliknad sikatayo nen Satanas nipaakar ed saray ganggan nen Jehova?

³ No apalikdo nen Satanas so duaran perpekton too, ontan met na dakel ya anghel ya ipulisay so inkasoberano na Dios, sarag to met itan a gawaen ed sikatayo. Ontan nin siansiay taktika to. Ipapalikna tod sikatayon makapabelat iray ganggan na Dios, tan agmakapaliket so pangunor ed saratan. (1 Juan 5:3) No say lanang ya kaulop tayo et ontan so panagnonot da, naimpluensyaan  itayo. Oniay imbaga na 24 años a sister ya akapanggaway imoral: “Baleg so impluensyad siak na saray mauges a kaulop, lalo la ta antakot koy magmaliw a dumad sikara.” Nayarin ontan met so desdes a naeksperiensyam ed saray kaulop mo.

⁴ Makapaermen ta no maminsan say panlalapuan na saray mauges ya impluensya et diad saray agagid kongregasyon. Oniay inkuan na sakey ya agin kalangweran: “Wala ray kakaarok ed kongregasyon ya midi-date ed saray aliwan Tasi. Kada miulop ak ed sikara, mas naaalig koy ugali ra. Naapektoan anggan say espiritualidad ko. Agko la nai-enjoy iray aral tan mataltalag ak met lan manpulong. Diad saman ko amoria ya kaukolan ko lan tundaay miulop ed sikara!” Kasin namomoriam no panon kabiskeg so impluensyad sika na saray kaulop mo? Pantongtongan tayoy sakey ya alimbawa ed Biblia.​—Roma 15:4.

PINALIKDO TOY KAPUSOAN DA

5, 6. Panon ya apalikdo nen Absalom so arum, tan kasin agawa so plano to?

⁵ Nabasa tayod Biblia iray alimbawa na totoon walaan na mauges ya impluensyad arum. Sakey ed saraya et si Absalom ya anak nen Arin David. Sikatoy guakguapo. Balet singa si Satanas, binayuboan toy mauges ya pilalek ed puso to. Labay ton samsamen so inkaari nen ama to, anta anggapoy kanepegan to. * Kanian sikatoy kunkunwarin angipanengneng na panangiyansakit ed saray Israelita, legan ton papapawayen ya anggapoy pibabali na ari ed sikara. Singa ed ginawa na Diablo diad hardin na Eden, pinapaway nen Absalom ya iyaansakit to ray totoo, ingen ta papaugesen toy ama to.​—2 Sam. 15:1-5.

⁶ Kasin agawa so mapalikdon plano nen Absalom? Anggan panon et agawa itan ta oniay ibabaga na Biblia: “Tinakew [nen Absalom] so kapusoan na saray lalaki na Israel.” (2 Sam. 15:6) Dakel so apalikdo to balet ta nansumpal itan ed inkatalo to. Say inkamapaatagey nen Absalom et nanresultad impatey to tan na nilibon totoo ya sinmuportad sikato.​—2 Sam. 18:7, 14-17.

7. Anto ray naaralan tayo ed salaysay nipaakar ed si Absalom? (Nengnengen so litrato ed pahina 14.)

⁷ Akin a main-inomay ya apalikdo iray Israelita? Nayarin lapud labalabay da ray insipan nen Absalom, odino nayarin apalikdo irad itsura to. Antokamay rason, segurado tayon: Ag-ira nanmatoor ed si Jehova tan ed tinuro ton ari. Siansia nin uusaren nen Satanas so singa “Absalom” ya taktika pian palikdoey puso na saray lingkor nen Jehova. Nayarin ibaga na arum: ‘Is-istriktoy Jehova. Nengneng yo ray totoon agmanlilingkor ed sikato, malikeliket ira!’ Kasin ipasen mo irayan andi-kakanaan a tila tan mansiansia kan matoor ed Dios? Kasin manisia kan say “ayadyarin ganggan” nen Jehova​—say ganggan na Kristo—​et mangitonton ed sika ed tuan kawayangan? (Sant. 1:25) Pablim sirin itan ya ganggan, tan usaren moy kawayangan mo ed paraan ya makapaliket ed si Jehova.​—Basaen so 1 Pedro 2:16.

8. Anto ran alimbawa so mangipapanengneng ya agmaliket iramay mangibabaliwalad saray ganggan nen Jehova?

⁸ Saray kalangweran so manunan puntirya nen Satanas. Oniay imbaga na sakey a 30 años ya brother nipaakar ed inkatobonbalo to: “Inisip kon saray estandarte nen Jehova ed moral et panameget, aliwan proteksion.” Kanian, sikatoy akapanggawa na imoral ya angekal ed liket to. Inkuan to: “Talagan akonsiensia ak tan nagbabawian ko itan diad loob na dakel a taon.” Oniay insulat na sakey a sister: “Kayarim a makagaway imoral, talagan graben ermen so naliknam tan singa anggapo lay kanam. Anggan 19 taon lay apalabas, sankanonot ko ni mauges a ginawak.” Oniay imbaga na sakey a  sister: “Lapud amtak a say ginawak et amasakit na linawa na saray inad-arok, walaan itan na mauges ya epektod mental, espiritual, tan emosyonal a kipapasen ko. Talagan anggapoy kakanaan na bilay mo no nabalang moy panangabobon nen Jehova.” Aglabay nen Satanas a nonoten moy epekto na kasalanan.

9. (a) Anto ran tepet so nepeg tayon nonoten nipaakar ed si Jehova tan ed saray ganggan tan prinsipyo to? (b) Akin et kaukolan tayon kabaten a maong so Dios?

⁹ Anengneng tayod saratan ya alimbawa ya aliwan maabig so resulta na ag-itulok ed Dios. Makapaermen ta dakel ya agagin kalangweran, tan anggan saray wala lad edad so kaukolan nin manirap pian namoria itan! (Gal. 6:7, 8) Kanian tepetan moy sarilim: ‘Kasin amtak iray taktika ya uusaren nen Satanas pian palikdoen ak? Kasin ipapasen koy Jehova bilang sankaapitan a Kaarok, say sakey a lawas matua tan sankanonot toy pankaabigan ko? Talaga kasin kombinsido ak ya agton balot isiblet so sankaabigan tan mamaliket ed siak?’ (Basaen so Isaias 48:17, 18.) Pian positiboy ebat mod saratan, kaukolan mon kabaten a maong si Jehova. Nepeg mon panisiaan a saray ganggan tan prinsipyon walad Biblia et pakapatnagan ya inaro ka nen Jehova, tan aliwan pian ekalen so kawayangan mo.​—Sal. 25:14.

IPIKASIN NAWALAAN TAYOY MAKABAT TAN MAKATALOS A PUSO

10. Akin a kaukolan tayon aligen so kalangweran nin si Arin Solomon?

¹⁰ Sanen wala nid kalangweran si Solomon, oniay impikasi to: “Siak lambengat ni  melag ya ugaw; agko amta so ompaway odino onloob.” Insan to kinerew a nawalaay makabat tan makatalos a puso. (1 Ara. 3:7-9, 12) Inebatan nen Jehova itan a masimoon a pikakasi to. No ontan met so kerewen mod si Jehova, ebatan to met so pikakasim, antokaman so edad mo. Siempre, ag-automatikon iter nen Jehova ed sika so pakatalos tan karunongan. Balet magmaliw kan makabat no aralen mon maong so Salita to, onkerew na masanton espiritu to, tan unoren iray panangigiya tan instruksion to a naawat mod Kristianon kongregasyon. (Sant. 1:5) Diad tua et gagawaen nen Jehova a mas makabat iray kalangweran a lingkor to nen saramay agmanguunor ed ganggan to, tan anggan ed “saray marunong tan mautek” diad sayan mundo.​—Luc. 10:21; basaen so Salmo 119:98-100.

11-13. (a) Anto ray naaralan tayod Salmo 26:4, Uliran 13:20, tan 1 Corinto 15:33? (b) Panon mon niyaplika irayan prinsipyo ed Biblia?

¹¹ Pian naamtaan so kaimportantian na panaral tan pandalepdep ed Biblia a manresultad iyapit ed si Jehova, pantongtongan tayo so pigaran teksto. Balang sakey ed saraya et walaan na importantin prinsipyo nipaakar ed pampili na saray kaulop: “Agak akiyurong ed saray matitila a totoo, nisay akiyurong ak ed saray mansimpisimpitan.” (Sal. 26:4) “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.” (Uli. 13:20) “Say piulop ed mauges et maneral ed maong iran ugali.”​—1 Cor. 15:33.

¹² Anto ran importantin leksion so naaralan tayod sarayan teksto? (1) Labay nen Jehova a pilien tayon maong iray kaulop tayo. Labay to tayon protektaan ed moral tan espiritual. (2) Maong odino mauges so impluensyad sikatayo na saray kaulop tayo. Satan so katuaan. Say paraan na inkisulat na saray tekston abasa tayo et mangipapatnag a labay nen Jehova a sabiey kapusoan tayo. Panon? Imanoen a say inkisulat na saratan et aliwan ganggan, a singa “agmo nepeg so . . . ” Imbes, insulat iratan bilang katuaan. Singa ibabaga nen Jehova ed sikatayon: ‘Nirayay katuaan. Antoy gawaen mo? Antoy walad pusom?’

¹³ Lapud sarayan teksto et katuaan, nausar iraya anggad panaon tayo tan praktikal ed amin a situasyon. Tepetan mo pay sarilim: Panon kon napaliisay piulop ed “saray mansimpisimpitan”? Anto ray situasyon a nayarin makapiulop ak ed sikara? (Uli. 3:32; 6:12) Siopa ray “makabat a totoo” a labay nen Jehova ya piulopan ko? Siopa ray “maatiw” a labay ton paliisan ko? (Sal. 111:10; 112:1; Uli. 1:7) Anto ran ‘maong ya ugalik’ so nibaliwalak no mauges iray kaulop ko? Kasin saray totoo ed mundo labat so nayarin magmaliw a mauges a kaulop ko? (2 Ped. 2:1-3) Antoy ebat mod sarayan tepet?

14. Panon yon napaaligwas so Panagdayew na Pamilya yo?

¹⁴ No panon so impangusisam ed sarayan teksto ed Biblia, ontan met so gawaen mod arum nin teksto pian natulongan kan naamtaay panmoria na Dios ed saray bengatlan mangaapektad sika tan ed pamilyam. * Atateng, pantongtongan yo irayan topic diad Panagdayew na Pamilya yo. No gawaen yo iya, nonot yon say gagala yo et pian natulongay kada membro na pamilya yon natalosan a saray ganggan tan prinsipyo na Dios et mangipapatnag no panon kaaralem so panangaro tod sikatayo. (Sal. 119:72) Say ontan ya panagaral et mamaapit na relasyon yod si Jehova tan ed pamilya yo.

15. Panon mon naamtaan ya walaan ka lay makabat tan makatalos a puso?

 ¹⁵ Panon mon naamtaan ya walaan ka lay makabat tan makatalos a puso? Say sakey a paraan et say pangikomparad panagnonot mo ed panagnonot na saray matoor a lingkor na Dios nensaman, a singa si Arin David. Oniay insulat to: “Makaliket ak a mangunor na linawam, O Dios ko; on, say ganggan mo wala ed dalem na pusok.” (Sal. 40:8) Ontan met so imbaga na managsulat na Salmo 119: “O agayla so panangarok ed ganggan mo! Sikato so dalepdep ko ed amin ya agew.” (Sal. 119:97) Ag-automatikon niwalad sikatayo so ontan a panangaro. Imbes, resulta itan na maseet a panagaral, panagpikasi, tan panagdalepdep. Onaralem met itan ya aro sano naeksperiensya tayo iray dakel a bendisyon lapud panguunor tayod saray ganggan na Dios.​—Sal. 34:8.

MILABAN PARAD KRISTIANON KAWAYANGAN MO!

16. Antoy kaukolan tayon tandaan pian nagamoran tayoy sigpot a kawayangan?

¹⁶ Diad interon awaran na too, akaparaan iray bansa a milaban pian nawalaan na kawayangan. Agta mas lalon mabulos kan milaban parad espiritual a kawayangan mo? Nonot mon aliwa labat a si Satanas, say mundo, tan say makasamal ya impluensya na satan so kalaban mo. Kaukolan mo met ya labanan iray kakapuyan mo, kaiba lay manamalingon pusom. (Jer. 17:9; Efe. 2:3) Balet diad tulong nen Jehova, manalo ka. Ontan met, kada pilien moy manggawa na duga, walay duaran maabig a resulta. Unona, napaliket moy puso nen Jehova. (Uli. 27:11) Komadua, legan mon naeeksperiensya so pakayari na “ayadyarin ganggan a mangitonton ed kawayangan,” mas determinado kan mansiansia ed ‘makisir a dalan’ a mangitonton ed andi-anggaan a bilay. Asingger mo lan nagamoran so sigpot a kawayangan ya iter nen Jehova ed saramay matoor ed sikato.​—Sant. 1:25; Mat. 7:13, 14.

17. Akin et agtayo nepeg a nadismaya ed saray kakapuyan tayo, tan anton tulong so iiter nen Jehova ed sikatayo?

¹⁷ Siempre, amin tayo et mankakasalanan. (Ecl. 7:20) Balet no makagawa kay lingo, agka nadidismaya odino isipen ya anggapoy kanam. No atumba ka, a singa panangibaga, alagey kan tampol anggan mankabaliksan itan na ikerew moy tulong ed saray elder. Say “pikakasi [ra] ya atekepan na pananisia,” unong ed si Santiago et “mamaabig ed samay mansasakit, tan sikatoy ibangon nen Jehova. Ontan met, no sikatoy akagawa na saray kasalanan, sikatoy naperdona.” (Sant. 5:15) Agmon balot lilingwanan a si Jehova et talagan mapangasi, tan inyasingger to ka ed kongregasyon lapud walay anengneng ton maabig ed sika. (Basaen so Salmo 103:8, 9.) Kanian no pansiansiaen mon ayadyari so pusom ed sikato, agto kan balot paulyan.​—1 Awa. 28:9.

18. Antoy gawaen tayo pian protektaan itayo nen Jehova?

¹⁸ Legan a manpipikasi Jesus diad samay sampot lan labi tod dalin a kaiba iray 11 ya apostol to, oniay agnalinglingwanan a kerew to parad sikara: “Bantayan mo ra lapud samay sakey a mauges.” (Juan 17:15) Aliwa labat lan saray apostol so ipapagaan nen Jesus, noagta amin a papatumbok to. Kanian makaseguro tayon ebatan nen Jehova so kerew nen Jesus diad pamprotekta tod sikatayo diad sarayan mairap a panaon. “[Si Jehova] so sakey a kinlong ed saray manakar ed kaptekan. Pian bantayan to so saray basbas na inkatunong, tan pansiansiaen to so dalan na saray santo to.” (Uli. 2:7, 8) Siempre, say pansiansia ed dalan na kaptekan et aliwan mainomay, balet satan labat so dalan parad andi-anggaan a bilay tan tuan kawayangan. (Roma 8:21) Nayarin dumay panmoria na arum, balet agka patitilaan!

[Saray paimano ed leksab]

[Tepetepet Parad Panagaral]

[Saray litrato ed pahina 14]

Panon tayon nibiig iray singa Absalom a taktika tan protektaay sarili tayo manlapud saratan?