“Siopa ni Antakot Ko Naani?”
“Siopa ni Antakot Ko Naani?”
“Anggan bakal so ontalindeg ya onsumpa ed siak, matalek ak naani a siansia.”—SAL. 27:3.
BASE ED SARAYAN TEKSTO, ANTOY ONTULONG ED SIKAN MAKAPANPAKPEL?
1. Anto ran tepet so naebatan na Salmo 27?
AKIN a mantutultuloy ya onaaligwas so panagpulong a kimey tayo anggaman onggragrabe so kipapasen na mundo? Akin et mabulos tayon uusaren so panaon tan biskeg tayo anggaman dakel so maniirap? Akin a mansiasiansia itayon makpel anggaman tatakotan na arum so arapen? Nabasa tayoy ebat ed sarayan tepet diad Salmo 27 ya insulat nen Arin David.
2. Antoy epekto na alablabas a takot ed sakey a too, balet diad anto itayo segurado?
2 Inggapo nen David iyan Salmo diad impangibagan: “Si Jehova sikato so [liwawak, NW] tan kilabanan ko; Siopa so takotan ko naani? Si Jehova sikato so biskeg na bilay ko; Siopa ni antakot ko naani?” (Sal. 27:1) Say alablabas a takot et mamakapuy ed sakey, anggad singa anggapo lay nagawaan to. Ingen, say sakey a walaan na takot ed si Jehova et agnagonigon na alablabas a takot. (1 Ped. 3:14) No gawaen tayoy Jehova a salimbeng, ‘manayam tayod katalkan, tan sikatayo naani mareen ya andi takot ed mauges.’ (Uli. 1:33; 3:25) Akin?
‘SI JEHOVA SO LIWAWAK TAN KILALABAN KO’
3. Antoy kabaliksan na pagmaliw nen Jehova a liwawa tayo, tan antoy nepeg tayon gawaen?
3 Sano ibabagad sikatayo na Biblia ya ‘si Jehova so liwawak,’ kabaliksan na satan ya ibabangat nen Jehova ed sikatayo so katuaan. (Sal. 27:1) Nayarin ipanengneng na literal a liwawa so peligro odino babeng ed dalan tayo, balet agto iratan ekalen. Kaukolan tayon paliisan iratan. Ontan met, ipapaamta nen Jehova ed sikatayo so kabaliksan na saray nagagawad mundo. Papasakbayan to tayod saray peligro ed sayan sistema na mundo. Ipapaamta tod sikatayo iray makabat a prinsipyo ed Biblia ya kaukolan tayon iyaplika. No unoren tayo iratan, magmaliw itayon mas makabat nen saray kakabusol tan mamaestra tayo.—Sal. 119:98, 99, 130.
4. (a) Akin a matalek ya nibaga nen David ya ‘si Jehova so kilalaban ko’? (b) Kapigan iliktar nen Jehova iray lingkor to?
4 Ipapanengneng na saray salita nen David diad Salmo 27:1 ya agto nilingwanan so impangilaban nen Jehova ed sikato diad dakel iran pankanawnawa. Singa bilang, sikatoy prinotektaan nen Jehova ed “sali na leon tan ed sali na oso.” Sikato met so inlaban nen Jehova ed si Goliat. Ontan met, sanen sikatoy sasalien a pateyen nen Saul, sikatoy aminpigan sinalimbengan nen Jehova. (1 Sam. 17:37, 49, 50; 18:11, 12; 19:10) Kanian oniay matalek ya imbaga nen David: ‘Si Jehova so kilalaban ko!’ Iliktar met nen Jehova iray lingkor to, a singa impangiliktar tod si David. Panon? Diad panalimbeng tod sikara diad onsasabin “baleg ya irap.”—Apo. 7:14; 2 Ped. 2:9.
AGMO LILINGWANAN IRAY PANAON A TINULONGAN KA NEN JEHOVA
5, 6. (a) Antoy ontulong ed sikatayon mas makapanpakpel? (b) Panon a saray ginawa nen Jehova parad saray lingkor to nensaman et makatulong ed sikatayon lalon manpakpel?
5 Say sakey a makatulong ed sikatayo pian lalo itayon manpakpel et nabasad Salmo 27:2, 3. (Basaen.) Agnilingwanan nen David iray panaon a sikatoy inliktar nen Jehova. (1 Sam. 17:34-37) Saratan so angiter ed sikato na talek pian naarap ni ray mas graben situasyon. Kasin nanonotan mo ni no panon kan tinulongan nen Jehova? Kasin atulongan ka na saratan a makapanpakpel? Singa bilang, kasin masimoon mo lan impikasi so sakey a seryoson problema? Aliknam kasi ya inikdan ka nen Jehova na kakabatan tan biskeg pian sungdoan itan a problema? Kasin nanonotan mo no panon kan tinulongan nen Jehova a naresolbe iray probleman mangaamper ed sikan magmaliw a maliket diad panlilingkor ed sikato? Kasin nanonotan mo ni no panon to kan inikdan na pankanawnawan napalaknab so kimey mo? (1 Cor. 16:9) Antoy epektod sika na saratan ya eksperiensyam? Agta saratan et mangombinsid sika ya tulongan ka nen Jehova a nasungdoan iray problema odino mairap iran situasyon?—Roma 5:3-5.
6 Panon to no walay mabiskeg a gobierno ya manplanon maneral ed organisasyon na Saray Tasi nen Jehova? Dakel lay anali ed satan, balet ag-ira tinmalona. No aralen tayo no panon a tinulongan nen Jehova iray totoo to nensaman, ontulong itan ed sikatayon manpakpel antokaman so nagawa.—Dan. 3:28.
PABLIEN SO DUGAN PANAGDAYEW
7, 8. (a) Unong ed Salmo 27:4, antoy kinerew nen David ed si Jehova? (b) Anto so baleg ya espiritual a templo nen Jehova, tan panon itayon makapandayew ditan?
7 Say sakey nin makatulong ed sikatayon mas makapanpakpel et say apresasyon tayod dugan panagdayew. (Basaen so Salmo 27:4.) Diad panaon nen David, say tabernakulo so “abung nen Jehova.” Si David so nanggaway detalyadon plano na templo ya ipaalagey na anak ton si Solomon. Kalabas na dakel a taon, impaliwawa nen Jesus ya onsabi panaon et agla onlad templo iray totoo a mandayew ed si Jehova. (Juan 4:21-23) Diad Hebreos kapitulo 8 anggad 10, indanet nen apostol Pablo a niwalay sakey a baleg ya espiritual a templo nen 29 C.E. sanen abautismoan si Jesus, tan inyapay toy sarili to pian gawaey linawa nen Jehova. (Heb. 10:10) Intarya nen Jehova so baleg ya espiritual a templo pian diad panamegley na pananisiad dondon bagat nen Jesus et makaasingger tayod sikato. Panon itayon makapandayew ditan? Diad pampikasi “tekep na masimoon a kapusoan a napno na kompiyansa lapud pananisia”; diad tuloytuloy a pangiyabawag na ilalo tayo ed amin a totoo; diad pannonot, pansasagyatan, tan pampapasesegan tayod sakey tan sakey sano mantitipon tayo, tan legan na panagdayew na pamilya tayo. (Heb. 10:22-25) Say pangapresya tayod dugan panagdayew so mamabiskeg ed sikatayo ed sarayan kaunoran ya agew.
8 Dakel ed saray matoor a lingkor nen Jehova ed interon mundo so mamapalaknab ed ministeryo ra, manaaral na balo iran lenguahe, tan oonlad saray lugar a mas baleg so pankaukolan parad manangipulong na Panarian. Ipapatnag day awawey a singa ed salmista. Labay dan nanengneng so kamaongan nen Jehova.—Basaen so Salmo 27:6.
MANMATALEK ED TULONG NA DIOS
9, 10. Antoy ipapaseguro ed sikatayo na Salmo 27:10?
9 Imbalikas nen David so panagmatalek tod si Jehova sanen imbaga ton: “Bangno paulyan ak na amak tan inak, si Jehova ed satan ampopoen to ak.” (Sal. 27:10) Diad saray agawgawa ya abitlad 1 Samuel kapitulo 22, nibaga tayon si David et agpinaulyan na saray atateng to. Balet, dakel natan so kaukolan a mananos ed graben isusumpa na pamilya ra. Ingen, sikaray tinulongan tan prinotektaan na saray maaron agagi ed kongregasyon.
10 Si Jehova et akaparaan ya ontulong ed saray lingkor to, anggan ibabaliwala ira na arum. Kanian makaseguro irad tulong to sano nipapaarap irad kairapan. Singa bilang, no pampapagaan tayoy pangitarya na materyal a pankaukolan na pamilya tayo, agta nailaloan tayon tulongan itayo nen Jehova? (Heb. 13:5, 6) Natatalosan toy situasyon tayo tan amta to no antoy kaukolan tayo.
11. Anto so epektod arum na panagmatalek tayod si Jehova? Iyilustra.
11 Pantongtongan tayoy situasyon nen Victoria, sakey ya iyaaralan na Biblia a taga Liberia. Sanen sikatoy asingger lan manpabautismo, sikato tan say taloran ananak to et tinaynan na kaamong ton laki. Anggaman pinaalis da rad ayaman da tan anggapoy trabaho to, sikatoy nantultuloy ya inmaligwas ed espiritual. Kayari na bautismo to, say anak ton bii ya 13 años et akalmoy pitakan napnoy kuarta. Pian ag-ira natukson mangala ed karga to, agda itan anggan binilang. Imbes, inanap dan tampol imay sundalo a makanggaway pitaka. Inkuan ton no amin a too et matua a singa Saray Tasi nen Jehova, mas mareen tan marakep so mundo. Inusar nen Victoria so Biblia pian ipaliwawa so insipan nen Jehova a balon mundo. Lapud nandinayewan toy pananisia nen Victoria, inikdan toy baleg a kantidad. Kabkabat ya matua iray Tasi nen Jehova ed interon mundo. Matua ira lapud matalek iran sigpot ya itarya nen Jehova so pankaukolan da.
12. Akin et mantutultuloy tayon manlilingkor ed si Jehova anggano naekal tayod trabaho? Mangiter na alimbawa.
12 Nonot yo pa labat so alikna na sakey ya agbautismadon manangipalapag a si Thomas a taga Sierra Leone. Sikatoy manbabangat ed haiskul, balet agto naawat so sueldo to diad loob na ngalngali sakey taon. Kaukolan ton interbyuen so school administrator pian naala toy sueldo to. Sayan administrator et sakey a pari tan imbaga tod Thomas ya ag-aawaten na eskuelaan so pananisia na Saray Tasi nen Jehova. Imbaga na pari ya kaukolan toy onekal bilang Tasi nen Jehova no labay toy mansiansiad trabaho to. Si Thomas et nan-resign, anggan agto la naala ’may sueldo to. Agnambayag, sikatoy nagmaliw a manag-apiger na radyo tan cellphone. Dakel iray paneknek a no manmatalek tayod si Jehova, agtayo nepeg a pampagaan iray nakaukolan tayo. Lapud pinalsa nen Jehova so amin a bengatla tan lawas ton sasalimbengan iray totoo to, seguradon asikasoen to itayo.
13. Akin a maaligwas so panagpulong a kimey ed mairap iran bansa?
13 Diad dakel a bansan mairap so panagbilay, aktibon manpupulong iray agagi. Akin? Oniay inkuan na sakey a branch office: “Dakel ed saray unabung a mangaawat na panangiyaral na Biblia et anggapoy trabaho ra, kanian mas dakel so panaon dan manaral. Dakel met so panaon na saray agagi a manpulong. Saray totoo ed saratan a lugar et agla kaukolan a kombinsien a manbibilay itayo lad kaunoran iran agew ta naiimatonan da la itan.” Oniay insulat na sakey a misionero a masulok lan 12 taon a manlilingkor ed sakey a lugar ya kada manangipalapag et walaan na masulok ya taloran iyaaralan: “Lapud dakel iray manangipalapag a simpli panagbilay da, mas dakel so panaon dan manpulong tan mangiyaral na Biblia.”
14. Diad anto ran paraan a sasalimbengan nen Jehova so baleg ya ulop?
14 Insipan nen Jehova ya tulongan, protektaan, tan salimbengan to iray lingkor to bilang grupo diad pisikal tan espiritual a paraan. Seguradon panmamatalekan tayo itan a sipan to. (Sal. 37:28; 91:1-3) Walay baleg ya ulop a makaliktar ed “baleg ya irap.” (Apo. 7:9, 14) Salimbengan na Dios iyan baleg ya ulop diad agto pangiyabuloy a naderal iran amin legan na sayan kaunoran iran agew. Itatarya toy amin a pankaukolan da pian nasungdoan iray subok tan naprotektaay relasyon dad sikato. Tan diad unor a kabiangan na baleg ya irap, salimbengan nen Jehova iray lingkor to.
‘IBANGAT MOD SIAK JEHOVA SO DALAN MO’
15, 16. Panon itayon nagunggonaan no paigiya tayod Dios? Iyilustra.
15 Pian mansiansia itayon makpel, kaukolan a mantultuloy tayon paibangat ed si Jehova. Oniay inkuan nen David: “Ibangat mo ed siak so dalan mo, O Jehova; tan itabin mo ak ed mapatar a basbas, nisengeg ed saray kakabusol ko.” (Sal. 27:11) No labay tayoy paibangat ed si Jehova, kaukolan tayon dengelen a maong so ibabaga na Biblia tan awaten so panangigiya na organisasyon to. Nepeg met ya iyaplika tayon tampol so naaralan tayo. Singa bilang, dakel so angiyaplika ed simbawan pasimpliey bilay da. Binayaran da ray utang da tan inlako da ray kagawaan ya agda kaukolan. Kanian no walay problemad ekonomya, daiset labat so pampagaan da. Agda la kaukolay nawalaan na dakel a trabaho pian nabayaran iray bengatlan agda kaukolan, tan mas dakel ni ingey panaon da ed ministeryo. Kanian tepetan tayoy sarili tayo: ‘Iyaaplikak kasin tampol iray nababasak ed Biblia tan ed saray publikasyon a nanlapud matoor tan makabat ya aripen, anggaman aliwan mainomay irayan gawaen?’—Mat. 24:45.
16 No paibangat tan paigiya tayo ed si Jehova diad dalan na inkatunong, anggapoy rason ya ontakot tayo. Sakey a regular payunir ed United States so nan-apply ed sakey a trabaho ya ontulong ed sikato tan ed interon pamilya to ya makapansiansian payunir. Balet inkuan na supervisor ya agbalot naawat ed satan a trabaho ta ag-akapankolehyo. No agawad sika itan, kasin pagbabawian moy impanpayunir mo tan agmo impangalay atagey a kurso? Kayari duay simba, nakal imay supervisor. Tinepetan na sananey a supervisor imay agi no akin et labay toy man-apply. Impaliwawa ton sikato tan say asawa to et full-time a ministro na Saray Tasi nen Jehova tan labay da so makapantultuloy ed satan. Balet antis to nin nibagay arum a rason, oniay imbaga na supervisor: “Naimanok a walay duma ed relihyon yo. Nen makapuy lay tatay ko, walay duaran karelihyon yo ya ombibisita tan manbabasay Biblia ed sikato ya inagew-agew. Imbagak ed sarilik a no walay nagawaan ko pian tulongan so sakey a Tasi nen Jehova, talagan tulongan ko.” Kaimbuasan to, naawat imay agi ed samay trabahon aglabay ya iter ed sikato na datin supervisor. Mapatpatnag ya no iyuna tayod bilay tayo so Panarian, tooren nen Jehova so sipan ton iter tod sikatayo so amin a kaukolan tayo.—Mat. 6:33.
KAUKOLAN TAYOY PANANISIA TAN ILALO
17. Anto so ontulong ed sikatayon agtakotan so arapen?
17 Tutulongan itayo nen David a natalosan no panon kaimportante so pakawalaay pananisia tan ilalo diad impangibagan: “No agko anisiaan a nanengneng koy kamaongan nen Jehova legan a mabilay ak, panon ko la kasi?” (Sal. 27:13, NW) Anto la kasi kipapasen na bilay tayo no ag-itayo inikdan na Dios na ilalo, tan no agtayo amtay ibabaga na Salmo 27? Kanian diad sarayan kaunoran ya agew, mantultuloy tayon ipikasi ed si Jehova ya ikdan to tayo na biskeg tan iliktar to tayod Armagedon.—Basaen so Salmo 27:14.
[Tepetepet Parad Panagaral]
[Litrato ed pahina 23]
Apabiskeg si David diad impannonot tod saray impangiliktar nen Jehova ed sikato
[Litrato ed pahina 25]
Kasin aanamoten moy kairapan ed ekonomya pian palaknabey ministeryom?
