Titiponen nen Jehova so Pamilya To

‘Mikasi ak ed sikayo ya gawa yoy anggaay nayarian yon pansiansiaey pankakasakey ed espiritu.’​—EFE. 4:1, 3.

KASIN NIPALIWAWAM?

Antoy gagala na administrasyon na Dios?

Panon tayon ‘pansiansiaey pankakasakey ed espiritu’?

Antoy ontulong ed sikatayon ‘ipanengneng so kaabigan ed balang sakey’?

1, 2. Antoy gagala nen Jehova ed dalin tan ed saray totoo?

PAMILYA. Antoy nanonotan mo no narengel mo itan a salita? Aro? Liket? Pantutulongan pian gawaey sakey a bengatla? Maligen a pasen a balegan, panaralan, tan pangibagaay nalilikna? Nayarin ontan so liknaan mo no walay aroan ed pamilya yo. Si Jehova so Manangigapoy pamilya. (Efe. 3:14, 15) Say gagala to et panliketan na amin a pinalsa tod tawen tan dalin so kaligenan, talek, tan peteg a pankakasakey.

² Kayari na impankasalanan na inmunan totoo, agla ra kabiangan na sankatalbaan ya pamilya na Dios. Balet ag-anguman so gagala nen Jehova. Seguroen ton say dalin et sigpot a panayaman na saray perpekton ilalak nen Adan tan Eva. (Gen. 1:28; Isa. 45:18) Imparaan to lay amin a nakaukolan pian nasumpal so gagala to. Nabasa tayo so pigarad saraya diad libro na Biblia ya Efeso, a say tema to et nipaakar ed pankakasakey. Pantongtongan tayo so pigaran bersikulo na Efeso tan amtaen tayo no panon tayon makapitulongan ed si Jehova diad gagala ton pankakasakeyen iray pinalsa to.

SAY ADMINISTRASYON TAN SAY KIMEY TO

3. Anto so administrasyon na Dios ya tutukoyen na Efeso 1:10, tan kapigan ginmapo so unonan kabiangan na satan?

³ Oniay imbaga nen Moises ed saray Israelita: “Si Jehova a Dios tayo sikato so sakey a Jehova.” (Deu. 6:4) Mantunosan so kiwas tan gagala nen Jehova. Kanian pian “nasumpal iray aturon panaon,” angiletneg so Dios na “sakey ya administrasyon,”​—sakey ya uksoyan pian pankakasakeyen so amin ya intelihentin pinalsa. (Basaen so Efeso 1:8-10.) Walay duaran kabiangan na sayan administrasyon. Say unonan kabiangan et say pangiparaan na Dios ed saray alanaan a mantultuloy a mankimey ed tawen diad panangidaulo nen Jesu-Kristo ya Ulo  ra. Ginmapo itan nen Pentecostes 33 C.E. sanen ginapoan nen Jehova a tiponen iramay kaiba nen Kristo a manuley ed tawen. (Gawa 2:1-4) Lapud saray alanaan et niyabawag lan matunong panamegley na dondon a binayaran na Kristo, bibidbiren dan sikaray tinagibi bilang “ananak na Dios.”​—Roma 3:23, 24; 5:1; 8:15-17.

4, 5. Anto lay gagawaen na komaduan kabiangan na administrasyon?

⁴ Say komaduan kabiangan na satan ya administrasyon et say pangiparaan na Dios ed saray manayam ed Paraison dalin panamegley na Mesianikon Panarian ya uleyan na Kristo. Say “baleg ya ulop” a makaliktar ed Armagedon so unonan manayam ed Paraiso. (Apo. 7:9, 13-17; 21:1-5) Legan na Sanlibon Taon ya Uley na Kristo, nakaiba da ray binilyon a napaoli. (Apo. 20:12, 13) Talagan ipatnag na kioli so pankakasakey tayo! Diad pansampot na sanlibon taon, saray ‘bengatlan walad dalin’ et onarap ed unor a subok. Saramay manmatoor et natagibi bilang “ananak na Dios” diad dalin.​—Roma 8:21; Apo. 20:7, 8.

⁵ Ipaparaan la nen Jehova iray alanaan a manayam ed tawen tan say arum a karnero a manayam diad Paraison dalin. Balet bilang indibidual, panon tayon mitutulongan ed administrasyon na Dios?

‘PANSIANSIAEY PANKAKASAKEY ED ESPIRITU’

6. Anto ran teksto so mangidadanet ya kaukolan a mantitipon iray Kristiano?

⁶ Idadanet na Kasulatan a saray Kristiano et kaukolan ya mantitipon. (1 Cor. 14:23; Heb. 10:24, 25) Mas ni so tutukoyen na satan nen say basta panlilimog ed sakey a lugar, a singa gagawaen na saray totoon oonlad tindaan odino diad istadyum. Niwalay pankakasakey no iyaplika tayoy instruksion nen Jehova tan paigiyad masanton espiritu to.

7. Anto so kabaliksan na ‘pansiansiaey pankakasakey ed espiritu’?

⁷ Anggaman inyabawag nen Jehova a matunong iray alanaan bilang ananak to, tan say arum a karnero a matunong bilang kakaaro to base ed dondon bagat na Kristo, wala nin siansiay onlesan agpantatalosan legan a manbibilay tayo ni ed sayan sistema na mundo. (Roma 5:9; Sant. 2:23) Ta no andi, agla komon kaukolay simbawa na Biblia ya ‘itepel tayoy balang sakey.’ Panon tayon nagamoran itan a pankakasakey? Kaukolan a nawalaan tayo na “kapaabebaan na nonot tan inkaulimek.” Ontan met, impaseseg nen Pablo a gawaen tayoy anggaay nayarian tayon ‘pansiansiaey pankakasakey ed espiritu diad bedber na kareenan.’ (Basaen so Efeso 4:1-3.) Kalaktip na pangiyaplikad sayan simbawa so pangiyabuloy ed espiritu na Dios a mangimpluensyad sikatayo tan mamawala ed saray aspekto na bunga na satan. Ontulong iraya ed sikatayon resolbien iray agpantatalosan pian niwalay pankakasakey, aliwan singa saray gawa na laman a sengegay inkaapag-apag.

8. Panon a saray gawa na laman et pansengegay inkaapag-apag?

⁸ Panon a saray “gawa na laman” et pansengegay inkaapag-apag? (Basaen so Galacia 5:19-21.) Say pilalawanan so mangiyarawid sakey a too manlapud si Jehova tan ed kongregasyon, tan say pikakalugoran et mangiyarawid saray ananak manlapud saray atateng tan saray inosentin kapareha manlapud kaasawaan da. Say karutakan so mangapektad relasyon na sakey a too ed Dios tan ed saray mangaarod sikato. No labay tayon panlaktipen so duaran bengatla, amta tayon kaukolan ya pareho itan ya malinis pian manpeketan. Say anggapoy-baing a kagagawa et mangipapatnag na sigpot ya pangibaliwalad matunong iran ganggan na  Dios. Wala ni ray arum a gawa na laman ya mangiyarawid totoo ed sakey tan sakey tan ed Dios. Sarayan kagagawa et kabusol nen Jehova.

9. Anto ray itepet tayod sarili tayo pian naamtaan no kasin mansasagpot itayon pansiansiaey kareenan tan pankakasakey?

⁹ Kaukolan sirin a tepetan tayoy sarili tayo: ‘Kasin mansasagpot ak ya ‘pansiansiaey pankakasakey ed espiritu diad bedber na kareenan’? Antoy gawaen ko no walay agin agko akapitalosan? Kasin ibagak iya ed dakel a kakaarok pian naalay simpatya ra? Kasin iilaloan kon saray elder so manresolbid problemak pian aliwa lan siak so mikareenan ed sikato? Tan no amtak a walay sakit na linawa na sakey ya agi ed siak, kasin papaliisan ko pian agmi itan pantongtongan?’ No ontan so gawaen tayo, kasin ipapanengneng tayon mitutulongan tayod gagala nen Jehova a pankasakeyen so amin bilang sakey a pamilya ya uleyan na Kristo?

10, 11. (a) Panon kaimportante so pikareenan ed saray agagi tayo? (b) Antoy gawaen tayo pian napansiansiay deen tan nagamoray panamendisyon nen Jehova?

¹⁰ Inkuan nen Jesus: “No mangiyaapay ka ed altar tan anonotan mon say agim et walay babarongan to ed sika, itilak mo so apay mo ed arap na altar tan anap mo so agim; mikareenan ka ni ed sikato, insan kapawil mo, iter mo so apay mo. Miaregloan kan tampol.” (Mat. 5:23-25) Insulat nen Santiago a say “bukel na bungay inkatunong et intanem diad mareen iran kipapasen parad saramay mikakareenan.” (Sant. 3:17, 18) Kanian, agtayo makapantultuloy a makapanggaway duga no agtayo mikareenan ed arum.

¹¹ Pian niyilustra, diad saray bansan walay guerra, 35 porsiento ni komon ed bansa ra so napantaneman na saray dumaralos no anggapo ray akakotkot a bomba. No walay onsabog ed saratan, taynan itan na saray dumaralos, naandian la ray trabaho, tan nairapan la ran mananap na naakan. Mipadpara, nairapan tayon onaligwas ed espiritual no wala ray ugali tayon mangamper ed pikareenan tayod arum. Balet no mainomay tayoy mamerdona tan manggaway maong ed arum, nagamoran tayoy kareenan tan panamendisyon nen Jehova.

12. Panon itayon tutulongan na saray elder a mankakasakey?

¹² Makatulong met iray elder pian niwalay pankakasakey. Niiter irad sikatayo pian “nadampot tayon amin so pankakasakey ed pananisia.” (Efe. 4:13) Sano mankikimey itayon kaiba ra tan sano mangiiter iray simbawa base ed Salita na Dios, tutulongan da itayon mangisulong na balon personalidad. (Efe. 4:22-24) No sisimbawaen da ka, nonot mon uusaren ira nen Jehova  pian iparaan kan manayam ed balon mundo. Tan seseguroen na saray elder ya ipetek so arum diad maaron paraan.​—Gal. 6:1.

“IPANENGNENG YOY KAABIGAN ED BALANG SAKEY”

13. Antoy resulta no agtayo unoren so simbawan walad Efeso 4:25-32?

¹³ Nabasad Efeso 4:25-29 iray konduktan kaukolan tayon paliisan. Kaibad saratan so panagtila, misasanok odino mangiras, tan pangibaga na abulok iran salita, imbes ya saray maabig tan makapabiskeg a salita. No ag-iraya paliisan na sakey, napaermen toy masanton espiritu na Dios, a lapuan na pankakasakey. (Efe. 4:30) Pian niwalay kareenan tan pankakasakey, makatulong met so pangiyaplikad sinmublay ya imbaga nen Pablo: “Naekal komon ed sikayo so amin a paneem-em na sakit na linawa tan pasnok tan sanok tan paneeyagan tan makapasakit a salita pati say amin a kaugsan. Balet ipanengneng yoy kaabigan ed balang sakey, magmaliw kayon maabagey, a mabulos kayon manpeperdonaan no panon a sikayoy mabulos met a pinerdona na Dios diad panamegley nen Kristo.”​—Efe. 4:31, 32.

14. (a) Antoy idadanet na salitan “ipanengneng yoy kaabigan”? (b) Antoy ontulong ed sikatayon ipatnag so kaabigan?

¹⁴ Idadanet na salitan “ipanengneng yoy kaabigan” ya agtayo mabetbet a nipapatnag itan, tan kaukolan tayon paaligwasen so pangipatnag ed satan. Kanian importante sirin ya ipasal tayoy sarili tayon nonoten nin unona so pankaabigan na arum nen say sikatayo. (Fil. 2:4) No maminsan, nayarin walay labay tayon ibaga a makapalek odino lapud satan et isipen na arum ya nayadyari tayo, balet kasin maabig itan? Say pannonot ed ibaga tayo antis a mansalita et ontulong pian ‘nipanengneng so kaabigan’ ed arum.

ARALEN YA IPANENGNENG SO ARO TAN RESPETO ED PAMILYA

15. Panon a makatulong so Efeso 5:28 ed saray asawan laki a namoria no panon dan aligen so Kristo?

¹⁵ Inkompara na Biblia so relasyon na Kristo ed kongregasyon diad relasyon na asawan laki ed asawa to. Say ehemplo na Kristo so ontulong ed asawan laki a namorian kaukolan ton igiya, aroen, tan asikasoey asawa to. Ontulong met ed asawan bii so ehemplo na Kristo a namorian kaukolan toy manpasakop ed asawa to. (Efe. 5:22-33) Sanen imbaga nen Pablo ya: “Ontan met, nepeg ya aroen na asawan lalaki so kaasawaan da a singa laman dan dili,” antoy tutukoyen to? (Efe. 5:28) Saray salitan imbaga to nen inmuna et ontutukoy ed “no panon a say Kristo et inaro to met so kongregasyon tan inter toy inkasikato parad satan, . . . a lilinisan tan uurasan toy danum na salita na Dios.” Kanian responsabilidad na asawan laki a tulongan so balang membro na pamilya to a nawalaay maabig a relasyon ed si Jehova. No gawaen to iya, sikatoy mitutulongan ed gagala nen Jehova a pankasakeyen so amin bilang sakey a pamilyan uleyan na Kristo.

16. Anto ray maabig a resulta no gawaen na saray atateng so Makasulatan iran responsabilidad da?

¹⁶ Kaukolan ya nonoten na saray atateng a si Jehova so angiter ed sikara na responsabilidad a mangasikaso ed saray ananak da. Balet makapaermen ta natan et dakel so “anggapoy panangaro ra ed kapamilyaan da.” (2 Tim. 3:1, 3) Ibabaliwala na dakel a kaamaan so responsabilidad da a sengegay pakadismaya tan ermen ed saray ananak. Balet oniay insimbawa nen Pablo ed saray Kristianon kaamaan: “Agyo papasyodoten iray anak yo, noagta itultuloy yo ran pabalegen diad panagdisiplina tan panamilin nen Jehova.” (Efe. 6:4) Unonan naaaralan na saray ananak ya ipatnag so aro tan respeto diad loob na pamilya. Saray atateng ya mangibabangat  ed saray ananak da na sarayan bengatla et mitutulongan ed administrasyon nen Jehova. Kaukolan ya ipalikna na saray atateng ya inaro da ray ananak da. Kanian nepeg dan kontrolen so sanok da, agda ira eeyagan tan agmangibabagay makapasakit ed sikara. Diad ontan et nibabangat da ray anak dan mangipatnag na aro tan respeto ed autoridad. Iparaan na saya iray ananak dan manbilay ed balon mundo na Dios.

17. Antoy kaukolan tayon gawaen pian nalabanay Diablo?

¹⁷ Kaukolan tayon tandaan a say Diablo ya inmunan aneral ed kareenan et sigpot a mangontra ed sagpot tayon manggaway linawa na Dios. Dakel a totoo so manggagaway panlabayan na Diablo diad pidiborsyo, panlive-in, tan pangiyabuloy ed pankasal na saray homosexual. Ingen, say aaligen tayo et say Kristo, aliwan saray konduktan aabobonan na sayan mundo. (Efe. 4:17-21) Kanian napapaseseg itayon ‘isulong so kompleton armas ya inter na Dios’ pian matalona tayon nalabanay Diablo tan saray demonyo to.​—Basaen so Efeso 6:10-13.

“MANTULTULOY KAYON MANKURANG ED ARO”

18. Antoy sekreto na Kristianon pankakasakey?

¹⁸ Say sekreto na Kristianon pankakasakey et aro. Lapud say puso tayo et napnoy panangaro ed “sakey a Katawan” tan ed “sakey a Dios,” tan ed balang sakey, determinado tayon ‘pansiansiaey pankakasakey ed espiritu diad bedber na kareenan.’ (Efe. 4:3-6) Oniay impikasi nen Jesus nipaakar ed satan ya aro: “Onkerew ak, aliwa labat a parad sikara, noagta parad saramay manisia met ed siak diad panamegley na salita ra; ta pian amin da et magmaliw a saksakey, a singa sika, Ama, ya akikasakey ed siak tan akikasakey ak ed sika, ta pian mikasakey met ira ed sikata . . . Tan impakabat ko ed sikara so ngaran mo tan ipakabat ko itan, ta pian nipatnag da met so aro ya impatnag mo ed siak tan mikasakey ak ed sikara.”​—Juan 17:20, 21, 26.

19. Antoy determinadom a gawaen?

¹⁹ No maminsan et wala ray ugali tayon mairap tayon umanen, balet kaukolan a pakiwasen itayo na aro ya aligey pikakasi na salmista: “Iyapasakey mo pay pusok ya ontakot ed ngaran mo.” (Sal. 86:11, NW) Komon ta determinado tayon labanay Diablo sano salien to itayon iyarawi manlapud maaron Ama tayo tan ed saray agagi tayo. Gawaen tayoy anggaay nayarian tayon ‘aligen so Dios, bilang inad-aro ton ananak, tan mantultuloy tayon mankurang ed aro’​—diad pamilya, ministeryo, tan kongregasyon.​—Efe. 5:1, 2.

[Tepetepet Parad Panagaral]

[Litrato ed pahina 29]

Itilak to so bagat tod altar pian mikareenan ni ed agi to

[Litrato ed pahina 31]

Atateng, ibangat yo ray ananak yon ipatnag so respeto