Kasin Nanonotan Yo?

Binasam ta la iray agano nin isyu na Say Panag-bantayan tan The Watchtower Salim pa sirin ya ebatan irayan tepet:

Kasin say buek nen Samson so lapuay biskeg to?

Aliwan say buek nen Samson so lapuay biskeg to. Irerepresenta labat na satan so espisyal a relasyon tod Dios bilang sakey a Nazareo. Naapektoan iyan relasyon sanen kinatli nen Delila so buek to.​—4/15, pahina 9.

Singa ed literal a puso tayo, anto ran taloran bengatla so mangapektad piguratibon puso tayo?

(1) Taganoen. No panon a kaukolan na literal a puso tayo so masustansia iran tagano, kaukolan tayo met so magenap ya espiritual a tagano. (2) Ehersisyo. Say maseseg a pibibiang tayod ministeryo so ontulong pian napansiansian maabig so kondisyon na piguratibon puso tayo. (3) Kaliberliber. Nabawasay stress tayo no miulop tayod saray agagin talagan mangiyaansakit ed sikatayo.​—4/15, pahina 16.

Kayari na ag-impanmatoor na asawa, panon a nipawil lamet so panagmatalek?

Kaukolan day (1) magmaliw a matua ed sakey tan sakey; (2) mantulongan; (3) manguman; tan (4) alagaren so dugan panaon pian naperdonay agawan lingo.​—5/1-E, pahina 12-15.

Akin ya agnepeg ya usaren na espiker ed funeral discourse na sakey a Kristiano so Salmo 116:15?

Oniay nabasad satan a teksto unong ed New World Translation: “Mabmabli ed pakanengneng nen Jehova so ipatey na saray matoor ed sikato.” Kabaliksan na satan ya ag-iyabuloy na Dios ya ompatey so amin ya matoor ya lingkor to lapud mabmabli rad pakanengneng to. Ag-iyabuloy nen Jehova ya bilang grupo et naupot iray matoor ya lingkor to diad dalin.​—5/15, pahina 22.

Siopa ray colporteur?

Antis na 1931, say salitan “colporteur” et manutukoy ed saramay tatawagen la natan a payunir.​—5/15, pahina 31.

Anto ray mamapaneknek a say Biblia et aliwa labat a libron insulat na saray totoo?

Naromog ed Biblia iray dakel a propesiyan agawa la. Susto so karga na satan nipaakar ed history, aliwan is-istorya labat. Susto met itan ed science tan mantutunosan iray karga to. Praktikal itan ed panaon tayo.​—6/1-E, pahina 4-8.

Siopa ray tutukoyen na “saraya ya amin a panarian” diad Daniel 2:44?

Say tutukoyen labat na saya et saray panarian odino gobierno ya irerepresenta na nanduruman parte na imahen ya impaliwawa nen Daniel.​—6/15, pahina 17.

Kapigan a say Anglo-Amerikano et nagmaliw a komapiton Makapanyari ed Mundo unong a nipropesiya ed Biblia?

Sayan saniban makapanyari ed mundo et ginmapo sanen say Britanya tan Estados Unidos et nanulop legay Sankamundoan a Guerra I.​—6/15, pahina 19.

Panon a peperdonaen tan lilingwanan na Dios so kasalanan na saray nagbabawi?

Oniay imbaga nen Jehova ed saramay aaroen to: “Agko la naani nonoten so kasalanan da.” (Jer. 31:34) Sarag ton perdonaen iray kasalanan panamegley na dondon. No mamerdona so Dios, lingwanan to la iratan a kasalanan tan agto lan balot pawilen pian dusaen lamet iramay nankasalanan.​—7/1, pahina 18.

Akin a manisia tayod saray milagron walad Biblia?

Anengneng na totoo so inkagawa na saraya, aliwan maamot. Simpli labat iraya, anggapoy props. Ginawa iraya pian igloria so Dios, aliwan say too. Dakel ed saray milagro et talagan agawa, tan ag-itan kinuestion na anggan saray onsusumpa. Pabiskegen na saraya so talek tayod saray rekord na Biblia nipaakar ed saray milagro.​—8/1-E, pahina 7-8.