Manalwar ed Saray Patit na Diablo!

“Makablos ira ed patit na Diablo.”​—2 TIM. 2:26.

PANON MON EBATAN?

Antoy nepeg mon gawaen no lanang mo lan krikritikoey arum?

Antoy naaralan tayod alimbawa di Pilato tan Pedro nipaakar ed panaeg ed takot tan desdes?

Panon tayon napaliisan so alablabas a pakakakonsiensia?

1, 2. Anto ran patit na Diablo so pantongtongan tayod sayan artikulo?

SASALIEN na Diablo ya erelen iray lingkor nen Jehova. Balet sikatoy aliwan singa sakey ya hunter a mamapatey lawari ed amin ya naeerel to. Imbes, say manunan gagala na Diablo et erelen a mabilay so biktima to tan usaren itan a manggaway panlabayan to.​—Basaen so 2 Timoteo 2:24-26.

² Manguusar na nanduruman patit so sakey ya hunter pian naerel a mabilay so biktima to. Nayarin dagdagen toy ayep ya ompaway pian naerel panamegley na lubir. Odino mangusar na akaamot ya patit pian biglan naerel so biktima to. Uusaren met na Diablo so ontan iran patit pian erelen a mabilay iray lingkor na Dios. Pian agtayo naerel, kaukolan a manalerto tan ondengel tayod saray pasakbay ya ontulong ed sikatayon naamtaan no iner so kawalaan na saray patit nen Satanas. Pantongtongan tayod sayan artikulo no panon tayon napaliisan so taloran patit ya inusar na Diablo pian erelen so arum ed saray lingkor na Dios. Saratan et (1) anggapoy kontrol a panagsalita, (2) takot tan desdes, tan (3) alablabas a pakakakonsiensia. Pantongtongan tayod ontumbok ya artikulo so duara nin patit ya uusaren nen Satanas.

EREPEN SO APOY NA ANGGAPOY KONTROL A PANAGSALITA

3, 4. No agtayo kontroley dila tayo, antoy magmaliw a resulta? Mangiter na alimbawa.

³ Pian napapaway iray akaamot ya ayayep, manggawa na pool so hunter ed kakiewan a panaayaman na saratan. Insan to ra biglan erelen legan iran ontatakas. Diad piguratibon panangibaga, labay na Diablo so manggawa na pool ed loob na kongregasyon pian ompaway iray agagi ed satan. Panon tayon agnaam-amtaan a tutulongan tayo lay Diablo?

 ⁴ Inkompara nen babangatan a Santiago so dila ed apoy. (Basaen so Santiago 3:6-8.) No agtayo kontroley dila odino panagsalita tayo, makapangigapo tayoy piguratibon pool ed kongregasyon. Panon? Nia so sakey a situasyon: Diad sakey a miting na kongregasyon, inyanunsio so impaka-aproba na sakey a sister bilang regular payunir. Kayari na miting, pinantongtongan na duaran sister so impaka-aproba to. Imbaga na sakey a sikatoy naliliketan ed impanpayunir na sister tan inyarum to nin komon ta magmaliw a maaligwas. Balet inkuan na samay sakey a nampayunir labat imay agi ta labay toy manpaimportante ed kongregasyon. Siopa ed sarayan dua so labay mon nakaaro? Mainomay tayo lan nibiig no siopay mangigagapo na apoy ed kongregasyon panamegley na panagsalita to.

5. Pian naerep so apoy na anggapoy kontrol a panagsalita, antoy nepeg tayon gawaen?

⁵ Panon tayon erepen so apoy na anggapoy kontrol a panagsalita? Oniay imbaga nen Jesus: “No anto so daakan a walad puso, satan so ibabalikas na sangi.” (Mat. 12:34) Kanian usisaen tayo nin unona no antoy walad puso tayo. Kasin papaliisan tayo ray liknaan ya mangimpluensyad sikatayon mansalitay ansakit ed arum? Singa bilang, no naamtaan tayon mansasagpot so sakey a brother pian naabot so sakey a pribilehyo, kasin manisia itayon malinis so motibo to, odino mansuspetsa tayon gagawaen to labat itan lapud makasarilin pilalek? No naynay tayon iisipen a manlilingkor labat so sakey ya agi lapud makasarilin interes, nepeg tayon tandaan ya ontan met so inisip na Diablo nipaakar ed matoor a lingkor na Dios a si Job. (Job 1:9-11) Imbes ya kritikoen so agi tayo, kaukolan tayon usisaen no akin ya ontan so iisipen tayod sikato. Wala kasi makatunongan a rason? Odino naimpluensiaan tayo la na agmaaron ugali na sayan mundo legan na sarayan kaunoran ya agew?​—2 Tim. 3:1-4.

6, 7. (a) Anto ray nayarin rason no akin ya makritiko tayod arum? (b) Antoy ikiwas tayo sano asakitan itayo na arum?

⁶ Pantongtongan tayo so arum nin rason no akin ya makritiko tayod arum. Nayarin say sakey et lapud mas labay tayon saray nagagawaan tayo so naimano pian ompaway a mas maabilidad tayo. Odino walay agtayo agawaan, kanian manggagawa tayoy paraan pian agnaimano itan a kakulangan. No abuloyan tayoy pride, ibeg, odino kakulangay kompiyansa a mangimpluensya ed sikatayo, mamawala itan na makaderal a resulta.

⁷ Ompan nalilikna tayon duga labat so pankritiko ed arum. Nayarin asakitan tayo lapud aliwan maalwar a panagsalita na sakey ya agi. No ontan so ginawa tod sikatayo, aliwan maabig no ombawi tayo. Palooren labat na satan so situasyon, a labalabay  na Diablo a gawaen tayo. (2 Tim. 2:26) Maabig no aligen tayoy ehemplo nen Jesus nipaakar ed saya. Sanen sikatoy minudmora, “agto ra minudmora.” Imbes, “inmatalek toy inkasikato ed samay matunong ya ukom.” (1 Ped. 2:21-23) Matalek si Jesus ya asikasoen nen Jehova iray situasyon unong ed paraan tan panaon To. Nepeg ya ontan met so panagmatalek tayod Dios. No usaren tayoy dila tayo pian mamabiskeg, ontutulong itayon napansiansiay “bedber na kareenan” ed kongregasyon.​—Basaen so Efeso 4:1-3.

ARAWIAN SO PATIT NA TAKOT TAN DESDES

8, 9. Akin ya senentensiaan nen Pilato na patey si Jesus?

⁸ Say sakey ya ayep ya apatitan et aliwa lan bulos. Ontan met, no say sakey a too et nampadaeg ed takot tan desdes, singa to inabuloyan so arum a mangontrol ed bilay to. (Basaen so Uliran 29:25.) Pantongtongan tayo so alimbawa na duaran lalaki a nampadaeg ed desdes tan takot, tan nengnengen tayo no antoy naaralan tayod eksperiensya ra.

⁹ Amta na Romanon Gobernador ya si Poncio Pilato ya anggapoy kasalanan nen Jesus, kanian agto labay a dusaen. Diad tua, imbaga nen Pilato ya ‘anggapon balot so aromog to ed si Jesus a makanepegan na patey.’ Balet, siansia to nin senentensiaan na patey si Jesus. Akin? Lapud nampadaeg si Pilato ed desdes na saray totoo. (Luc. 23:15, 21-25) Pinilit day Pilato a gawaen toy labay da diad impangiyeyag na: “No ibulos mo iyan too, aliwa kan kaaro nen Cesar.” (Juan 19:12) Tinmakot si Pilato ompan naekal ed posisyon to tan ompan pateyen da ni ingen no ibulos toy Kristo. Kanian inabuloyan toy inkasikaton gawaey linawa na Diablo.

10. Akin ya imburi nen Pedro so Kristo?

¹⁰ Si apostol Pedro so sakey ed saray sankaapitan ya kaaro nen Jesus. Anggapoy takot ton inyabawag a si Jesus so Mesias. (Mat. 16:16) Anggan sanen agnatatalosan na arum a papatumbok so kabaliksan na imbaga nen Jesus tan imbatikan da, nansiansian matoor si Pedro. (Juan 6:66-69) Tan sanen arestoen la na saray kakabusol si Jesus, inuyos nen Pedro so espada to pian iyagel so Katawan to. (Juan 18:10, 11) Balet ag-abayag, sikatoy nampadaeg ed takot tan imburi toy Jesu-Kristo. Diad aganon panaon et apatitan si Pedro. Abalang toy determinasyon ton gawaey duga tan manmatoor ed si Jesus.​—Mat. 26:74, 75.

11. Anto ran desdes so kaukolan tayon labanan?

¹¹ Bilang Kristiano, kaukolan tayon labanan so desdes a manggaway mamaermen ed Dios. Nayarin desdesen itayo na saray amo odino katrabaho tayon mantila odino manggaway imoral. Tatalonaan met na saray estudyante so desdes ed sikaran mankopya no exam, manbantay na pornograpiya, mansigarilyo, mandrugs, manbuanges, odino mibiang ed marutak iran kagagawad sekso. Anto sirin so makatulong ed sikatayon naarawian so patit na takot tan desdes a manggaway mamaermen ed si Jehova?

12. Anto ran leksion so naaralan tayod di Pilato tan Pedro?

¹² Antoy naaralan tayod alimbawa di Pilato tan Pedro? Daiset so amta nen Pilato nipaakar ed Kristo. Balet, amta ton anggapoy kasalanan tan aliwan ordinaryon too si Jesus. Ingen, aliwan mapaabebay Pilato tan agto inaroy tuan Dios. Kanian, sikatoy narel a mabilay na Diablo. Si Pedro et walaan na suston pikakabat tan panangaro ed Dios. Balet wala ray panaon ya agto binidbir so limitasyon to, nagmaliw a matakot, tan nampadaeg ed desdes. Antis ya naarestoy Jesus, oniay imbaga to: “Anggano taynan da kan amin, agta ka taynan.” (Mar. 14:29) No nanmatalek komoy Pedro ed Dios a singa ed impanmatalek na salmista, mas akaparaan  komon a mangarap ed subok na pananisia to. Oniay inkanta na satan a salmista: “Si Jehova wala ed abay ko; agak la natatakot. Anto ni nayarian na too a gawaen ed siak?” (Sal. 118:6) Diad unor lan labi na bilay nen Jesus ed dalin, impila toy Pedro tan duara nin apostol diad hardin na Getsemani. Imbes ya mansiansian aliing, akaugip si Pedro tan saray kakaiba to. Sikaray binangon nen Jesus tan inkuan ton: “Mantultuloy kayon manbantay tan manpikasi, ta pian agkayo napelag ed tukso.” (Mar. 14:38) Balet akaugip lamet si Pedro, tan ag-abayag et tinmakot tan nampadaeg ed desdes.

13. Panon tayon nalabanay desdes a manggaway mauges?

¹³ Wala ni importantin leksion a naaralan tayod di Pilato tan Pedro: Pian nalabanan tayoy desdes tan takot ed totoo, kaukolan tayoy suston pikakabat, kapaabebaan, pamidbir ed limitasyon, panangaro tan takot ed si Jehova, aliwan diad saray totoo. No say pananisia tayo et base ed suston pikakabat, makpel tayon ipulong iray papanisiaan tayo. Ontulong iyad sikatayon labanay desdes tan daegen so takot ed too. Agtayo alablabas a manmatalek ed sarilin biskeg tayo. Imbes, mapaabeba tayon bidbiren a kaukolan tayoy pakayari na Dios pian nalabanay desdes. Kaukolan tayon kerewen so tulong na masanton espiritu nen Jehova tan abuloyan tayon say aro tayod sikato so mamakiwas ed sikatayon idayew so ngaran to tan mangunor ed saray estandarte to. Ontan met, kaukolan tayoy manparaan antis ya onsabi iray subok. Singa bilang, kaukolan tayoy manpikasin kaiba iray ananak tayo tan iparaan ira pian amta ray gawaen da sano piliten ira na kaedaran dan manggaway mauges.​—2 Cor. 13:7. *

PALIISAN SO PATIT A MAKAPABELAT​—ALABLABAS A PAKAKAKONSIENSIA

14. Nipaakar ed saray agawaan tayon lingo, antoy labay na Diablo ya isipen tayo?

¹⁴ No maminsan wala ray patit a gawad baleg a kiew odino bato ya akasabit ed petek na dalan a mabetbet a nadadalanan na ayep. Sano nagatinan na sakey ya ayep imay lubir, napaktak so ambelbelat a kiew o bato ya mamildak ed sikato. Say alablabas a pakakakonsiensia so nikomparad ambelat a bato ya mamildak. Sano lanang tayon nononoten iray agawaan tayon kasalanan, nayarin sikatayoy ‘nadanel a maong.’ (Basaen so Salmo 38:3-5, 8.) Labay nen Satanas ya isipen tayon agtayo la naperdona nen Jehova tan agtayo sarag ya unoren iray ganggan to.

15, 16. Panon mon napaliisan so patit na alablabas a pakakakonsiensia?

¹⁵ Panon mon napaliisan iyan patit a makapabelat? No akagawa kay seryoson kasalanan, gawam iray nakaukolan pian nipawil so relasyon mod si Jehova. Mitongtong kad saray elder tan onkerew kay tulong ed sikara. (Sant. 5:14-16) Gawam so anggaay nayarian mon ipetek so lingom. (2 Cor. 7:11) No nadisiplina ka, agka nadidismaya. Tanda itan na panangaro nen Jehova ed sika. (Heb. 12:6) Pansagpotan mon agla uliten so kasalanan. No nagbabawi tan anguman ka la, manmatalek kan sarag ya sakbongan na dondon bagat nen Jesu-Kristo so kasalanan mo.​—1 Juan 4:9, 14.

¹⁶ Wala ray agagin nagogonigon nin siansia ed agawaan dan lingo anggano aperdona la ra. No ontan so naliliknam, tandaan mon pinerdona nen Jehova si Pedro tan arum ni ran apostol diad impanaynan dad inad-aro ton Anak sanen kakkaukolan to ra. Pinerdona met nen Jehova imay adispelosip ed kongregasyon na Corinto lapud alablabas ya imoralidad, a diad saginonor et nagbabawi. (1 Cor. 5:1-5; 2 Cor. 2:6-8) Nabasa tayod  Biblia iray totoon akagaway graben kasalanan a sanen nagbabawi ira et pinerdona ra na Dios.​—2 Awa. 33:2, 10-13; 1 Cor. 6:9-11.

17. Antoy nagawaan na dondon parad sika?

¹⁷ No talagan nagbabawi ka tan inawat mo lay panangasi nen Jehova, perdonaen tan lingwanan to la ray agawaan mon lingo. Agmon balot iisipen ya agnaperdona na dondon bagat nen Jesus iray kasalanan mo. No isipen mon agka naperdona, napelag kad sakey ed saray patit nen Satanas. Labay ton panisiaan mo ya agnasakbongan na dondon so amin a kasalanan na saray magbabawi. (Uli. 24:16) Say panisia ed dondon bagat so ontulong ed sikan agnabelatan na alablabas a pakakakonsiensia tan mangiter ed sika na biskeg a manlingkor ed Dios diad interon puso, nonot, tan kamarerwa.​—Mat. 22:37.

ALIWA ITAYON ANDIAN NA PIKAKABAT ED SARAY PATIT NEN SATANAS

18. Panon tayon napaliisan iray patit na Diablo?

¹⁸ Ag-importantid si Satanas no panon to tayon napatitan. Basta say labay to et naerel to itayo, odino gawaen tayoy panlabayan to. Lapud amta tayo la ray patit ya uusaren to, napaliisan tayo iratan. (2 Cor. 2:10, 11) Agtayo napatitan no onkerew tayoy kakabatan ed si Jehova diad pikakasi pian natalonaan tayo ray subok. Oniay inkuan nen Santiago: “No walad sikayo so kulang na karunongan, mantultuloy komon ya onkerew ed Dios, ta sikatoy mabunlok a mangiiter ed amin tan agmamabalaw; tan iter to itan ed sikato.” (Sant. 1:5) Kaukolan tayoy onkiwas unong ed pikakasi tayo panamegley na regular a personal a panagaral tan pangiyaplika ed Salita na Dios. Ipapaamtad sikatayo na saray publikasyon a nanlapud matoor tan makabat ya aripen iray patit na Diablo tan ontutulong iratan ed sikatayon napaliisay patit to.

19, 20. Akin a nepeg tayon busolen so mauges?

¹⁹ Ontulong ed sikatayo so pikakasi tan panagaral ed Biblia pian aroen no antoy maong. Balet, importante met ya busolen tayoy mauges. (Sal. 97:10) Makatulong ed sikatayo so pandalepdep ed saray mauges a resulta na makasarilin pilalek pian napaliisan tayo iratan. (Sant. 1:14, 15) No aralen tayon busolen so mauges tan aroen so maong, ag-onipektod sikatayo iray patit nen Satanas, agtayo nasagyat ed saratan.

²⁰ Talagan misalsalamat tayo ta tutulongan itayo na Dios pian napaliisan iray patit nen Satanas! Panamegley na espiritu, Salita, tan na organisasyon To, tutulongan itayo nen Jehova ya makaliktar ed “samay sakey a mauges.” (Mat. 6:13) Diad ontumbok ya artikulo, aralen tayo ni duaran patit na Diablo ya uusaren to pian naerel a mabilay iray lingkor na Dios.

[Paimano ed leksab]

[Tepetepet Parad Panagaral]

[Litrato ed pahina 21]

Say anggapoy kontrol a panagsalita et manggaway pool ed loob na kongregasyon

[Litrato ed pahina 24]

Natalonaan moy patit na alablabas a pakakakonsiensia