1. Antoy imbaga nen Jesus nipaakar ed panggaway sipan, tan akin?

DIAD panaon tayo, agla kaukolan a mansamba iray tuan Kristiano. Uunoren day imbaga nen Jesus ya: “Komon ta say imbaga yon On et On.” Kabaliksan na saya a kaukolan ya tooren na sakey iray imbaga to. Oniay akadkaunan imbaga nen Jesus: “Agkan balot mangisisipan.” Imbaga to iya lapud kagagawa la na dakel a totoo nensaman so mangisipan balet ta agda lanlamang totooren. Panon to no angisipan so sakey balet ta agto tinoor? Paneknek labat itan ya sikatoy agnapanmatalkan tan naiimpluensyaan la na “sakey a mauges.”​—Basaen so Mateo 5:33-37.

2. Ipaliwawa no akin a no maminsan et kaukolan so manggaway sipan.

² Kasin labay ya ibaga nen Jesus ya amin a panggaway sipan et mauges? Akin ya ontan? Unong ed naaralan tayod inmunan artikulo, nanggaway sinambaan a sipan si Jehova tan say matunong a lingkor ton si Abraham diad saray importantin bengatla. Ontan met, unong ed Ganggan na Dios, kaukolan so panggaway sipan pian naresolbe iray agpantatalosan. (Exo. 22:10, 11; Num. 5:21, 22) Kanian, nayarin mansamba so sakey a Kristiano no kaukolan toy man-witness ed korte. Odino, diad arum a situasyon, kaukolan na sakey a Kristiano so mangisipan pian paneknekay intension to odino pian ontulong a resolbien so problema. Diad tua, sanen si Jesus et pinansamba na atagey a saserdote, sikatoy matuan inmebat ed Judion Sanhedrin. (Mat. 26:63, 64) Ingen, agkaukolan nen Jesus so mansamba ed siopaman. Balet pian paneknekan ya napanmatalkan so ibabaga to, mabetbet ton igagapoy salita to panamegley na saray balikas ya: “Tua kuan ko ed sikayo.” (Juan 1:51; 13:16, 20, 21, 38) Pantongtongan tayo no anto ni  naaralan tayod ehemplo nen Jesus, Pablo, tan ed arum nin anoor ed sipan da.

3. Antoy insipan nen Jesus ed Dios diad pikakasi, tan antoy ebat nen Ama to?

³ “Nia! Onsabi ak . . . pian gawaen koy linawam, O Dios.” (Heb. 10:7) Panamegley na sarayan salita, imbalikas nen Jesus so pilalek ton gawaey amin a nipropesiya nipaakar ed insipan a Bini, kaiba lay ‘panugat nen Satanas ed mukor to.’ (Gen. 3:15) Anggapoy toon malabay a manggawa ed satan a responsabilidad. Manlapud tawen, imbalikas nen Jehova so panagmatalek tod Anak to, tan agto la kinerew ed si Jesus a sambaan to iray salita to.​—Luc. 3:21, 22.

4. Antoy mabulos a gawaen nen Jesus pian say On to et On?

⁴ Lanang a gagawaen nen Jesus so ipupulong to diad panotoor tod sipan to ya On et On. Agto inabuloyan so antokaman a mangabalad kimey ya inter na Ama to a mangipulong ed maong balita na Panarian na Dios tan manggawa na babangatan ed saray inyasingger na Dios ed sikato. (Juan 6:44) Papaneknekan na Biblia so inkamatua nen Jesus diad saray balikas ya: “Anggan panon karakel iray sipan na Dios, nagmaliw iratan ya On diad panamegley to.” (2 Cor. 1:20) Kanian, si Jesus so sankaabigan ya ehemplo na anumpal ed sipan tod Ama. Natan et pantongtongan tayoy sakey a toon nanggawa na anggaay nayarian ton aligen si Jesus.

5. Akin a maabig ya ehemplo si Pablo ed sikatayo?

⁵ “Antoy gawaen ko, Katawan?” (Gawa 22:10) Onia so inyebat nen Pablo, a tinawag met a Saulo, sanen nampanengneng so niglorian Jesus ed sikato diad sakey a pasingawey pian patundaen ed pamapairap tod saray papatumbok nen Kristo. Bilang resulta na sayan inkagawa, nagbabawi si Saulo, nampabautismo, tan inawat toy espisyal ya asainmin ton ipulong so maong a balita nipaakar ed si Jesus diad saray nasyon. Manlapu lad saman, tinawag nen Pablo si Jesus a “Katawan,” tan nantultuloy a tinmulok ed si Jesus ya anggad impatey to. (Gawa 22:6-16; 2 Cor. 4:5; 2 Tim. 4:8) Si Pablo et aliwan singa saramay arum ya angibagaan nen Jesus na: “Akin sirin et tatawagen yo ak na ‘Katawan! Katawan!’ balet ta agyo met gagawaen iray ibabagak?” (Luc. 6:46) Iilaloan nen Jesus ya amin a lingkor to et magmaliw a matoor ed sipan da a singa si Pablo.

6, 7. (a) Akin ya inuman nen Pablo so plano ton ibisitad Corinto, tan akin ya agmakatunongan so impankritiko na arum ed sikato? (b) Antoy nepeg tayon panmoria ed saramay aturon mangidaulo ed sikatayo?

⁶ Maseseg ya impulong nen Pablo so  mensahe na Panarian diad interon Asia Minor tan Europa, a mangileletneg na balo iran kongregasyon tan ombibisita ed saratan. No maminsan, kaukolan toy mansamba pian paneknekan a tua iray insulat to. (Gal. 1:20) Sanen inkuan na saray arum a taga Corinto a si Pablo et agnapanmatalkan, oniay indepensa to: “Napanmatalkan so Dios a say sasalitaen mi ed sikayo et aliwa ya On insan Andi.” (2 Cor. 1:18) Sanen isusulat itan nen Pablo, sikatoy akaalis lad Efeso tan manbiabiahe lad Macedonia paonlad Corinto. Say unonan plano to et ombisita lamet ed Corinto antis ya onlad Macedonia. (2 Cor. 1:15, 16) Balet singa saray ombiabiahen manangasikaso natan, no maminsan et kaukolan dan umanen so iskedyul na ibisita rad kongregasyon. Sarayan pananguman et aliwan parad ag-importantin bengatla odino sarilin pankaabigan, noagta gagawaen da iya no walay emergency. Diad situasyon nen Pablo, say agto imbisitan tampol ed Corinto et parad pankaabigan na kongregasyon. Panon?

⁷ Naamtaan nen Pablo a wala ray problema na kongregasyon ed Corinto. Agnankakasakey iray agagi, tan kokonsintien day arum a membro na kongregasyon a manggagaway imoral. (1 Cor. 1:11; 5:1) Pian ipetek ira, sikatoy angipawit na mabiskeg a simbawa diad inmunan sulat tod saray taga Corinto. Tan imbes ya onsipot a tampol ed Efeso paonlad Corinto, inikdan to ray panaon ya niyaplikay simbawa to pian sano onsabi et magmaliw a mas makapaseseg so ibisita to. Diad komaduan sulat to, impaliwawa nen Pablo so rason na impanguman toy plano to. Oniay inkuan to: “Say Dios komon so mantasi sumpad dilin kamarerwak, ya agak ni linma ditan ed Corinto ta pian agkayo lalon manermen.” (2 Cor. 1:23) Agtayo komon aaligen iramay nankritiko ed si Pablo. Imbes, ipanengneng tayoy aralem a respeto ed saramay aturon mangidaulo ed sikatayo. Kaukolan tayon aligen so alimbawa nen Pablo, a singa impangalig tod Kristo.​—1 Cor. 11:1; Heb. 13:7.

8. Akin et maabig ya alimbawa ed sikatayo si Rebeca?

⁸ “Labay ko so mila.” (Gen. 24:58) Sarayan salita so inyebat nen Rebeca ed ina tan agi to sanen sikatoy mabulos ya akila ed sakey ya estranghero a manbiahe na 800 kilometro pian magmaliw ya asawa nen Isaac ya anak nen Abraham. (Gen. 24:50-58) Say On nen Rebeca et On, tan pinaneknekan ton sikatoy nagmaliw a matoor ed Dios bilang asawa nen Isaac. Kabaliksan na saya a manlapu la nen sikatoy akiasawa ed si Isaac, kaukolan toy manayam bilang sangkaili diad Insipan a Dalin. Lapud katooran to, sikatoy benendisyonan na Dios a magmaliw a sakey ed saray panlapuan na insipan a Bini, si Jesu-Kristo.​—Heb. 11:9, 13.

9. Panon a tinoor nen Rut so salita to?

⁹ “Andi noag ingen mipawil kami ed sika ya angga ed baley mo.” (Rut 1:10) Saya so aminpigan imbaga na saray Moabitan manugang nen Noemi a di Rut tan Orpa. Si Noemi et sakey a balo a nanlapud Moab pasempet ed Betlehem. Lapud pamipilit nen Noemi, anempet si Orpa ed lugar a nianakan to. Balet say Andi nen Rut et talagan Andi. (Basaen so Rut 1:16, 17.) Sikatoy nansiansian kaiba nen Noemi, anggaman kabaliksan na sayan taynan toy pamilya tan palson relihyon to ed Moab. Sikatoy nansiansian matoor a lingkor nen Jehova tan abendisyonan ed impagmaliw ton sakey ed saray limaran bibii ya asalambit nen Mateo a panlapuan na Kristo.​—Mat. 1:1, 3, 5, 6, 16.

10. Akin et maabig ya ehemplo ed sikatayo si Isaias?

¹⁰ “Wadia ak, ibaki mo ak.” (Isa. 6:8) Antis iyan imbaga nen Isaias, anengneng toy  sakey a maglorian pasingawey nen Jehova ya akayurong ed trono To a walad tagey na templo na Israel. Legan na sayan pasingawey, oniay nadngel nen Isaias ya imbaga nen Jehova: “Siopa so ibakik, tan siopa so onla a nipaakar ed sikatayo?” Sakey iyan imbitasyon pian magmaliw a pinagkasangiyan nen Jehova a mangipasabi ed saray mensahe tod rebelyoson totoo to. Tinoor nen Isaias so imbaga to​—say On to et On. Diad loob na 46 a taon, sikatoy matoor a nanlingkor bilang propeta, angideklara na saray mapuersan mensahe na panangukom, ontan met ed balibalin sipan ed kipawil na dugan panagdayew.

11. (a) Akin ya importantin tooren iray sipan tayo? (b) Siopa ray nagmaliw a manamasakbay ya alimbawad sikatayo lapud agda impanoor ed sipan da?

¹¹ Akin ya impaisulat nen Jehova irayan alimbawa diad Biblia? Tan akin et importantin tooren tayoy sipan tayon On? Papasakbayan itayo na Biblia a siopaman ya “agmatoor ed saray paknaan” et kabiangan ed saramay “manepeg ya ompatey.” (Roma 1:31, 32) Si Faraon na Ehipto, say Judion Ari a si Zedekias, tan di Ananias tan Safira et pigarad saray totoon abitlad Biblia ya ag-anoor ed sipan da. Aliwan marakep so nansumpalan da, tan manamasakbay irayan alimbawa parad sikatayo.​—Exo. 9:27, 28, 34, 35; Eze. 17:13-15, 19, 20; Gawa 5:1-10.

12. Antoy ontulong ed sikatayon tooren iray salita tayo?

¹² Lapud manbibilay tayo lad “kaunoran iran agew,” apaliberan tayo na totoon ‘agmatoor,’ totoon “singano walay debosyon da ed Dios balet agnapatnagan ed bilay da so pakayari na satan.” (2 Tim. 3:1-5) Anggad posible, kaukolan tayon paliisan iratan a mauges a kaulop. Tan naynay a miulop ed saramay mansasagpot ya tooren so sipan dan On.​—Heb. 10:24, 25.

13. Antoy sankaimportantian a sipan a ginawa na saray papatumbok nen Jesu-Kristo?

¹³ Say sankaimportantian a sipan na sakey et say dedikasyon tod Dios. Saramay malabay a magmaliw a patumbok nen Jesus et mamitlon tetepetan pian naamtaan no talagan desidido iran gawaey kakaukolanen ed sikara. (Mat. 16:24) No katongtongen na duaran elder so sakey a toon labay to lay magmaliw ya agbautismadon manangipalapag, kaukolan dan itepet ed sikato, “Kasin peteg a labay moy magmaliw a sakey ed Saray Tasi nen Jehova?” Tan no sikatoy onaaligwas lad espiritual tan labay to lay manpabautismo, sikatoy katongtongen na saray elder tan itepet dad sikato, “Kasin indedikam lay inkasika ed si Jehova diad pikakasi?” Tan diad agew na bautismo, amin a kandidato et tepetan na, “Base ed bagat nen Jesu-Kristo, kasin nagbabawi kayo la ed saray kasalanan yo tan indedika yo lay inkasikayo ed si Jehova a Dios pian gawaen so  linawa to?” Diad arap na saray inmatendi, insipan dan manlingkor irad Dios ed andi-angga.

14. Anto ran tepet so panapanaon tayon itepet ed sarili tayo?

¹⁴ Balo ka man odino abayag ka lan manlilingkor ed Dios, kaukolan mon panapanaon ya usisaey sarilim tan itepet iraya: ‘Kasin itutultuloy kon aaligey Jesu-Kristo diad panotoor kod sankaimportantian kon On? Kasin itutultuloy kon uunoren si Jesus diad pangiyuunak ed panagpulong tan panaggaway babangatan a kimey?’​—Basaen so 2 Corinto 13:5.

15. Diad anto ran aspekto na bilay importante so panoor ed sipan tayo?

¹⁵ Say pagmaliw a matoor ed dedikasyon tayo et mankabaliksan a nepeg tayo met so magmaliw a matoor ed arum nin bengatla. Singa bilang: Kasin wala lay asawam? Sirin itultuloy mon tooren so mabmablin sipan mon aroen tan asikasoen so asawam. Kasin nampirma ka na sakey a kontrata odino nanaplay kad sakey a teokratikon pribilehyo? Gawam iray responsabilidad tan toor mo ray sipan mo. Kasin inimbitaan kan mangan na sakey a mairap bilay? Agmo itan kakanselaen no walay angimbitad sikan mas mainaway bilay to. Odino kasin insipan mon pawilen so sakey ya akatongtong mod teritorya? Sirin, gawam so anggaay nayarian mon tooren so On mo, tan seguradon bendisyonan nen Jehova so ministeryom.​—Basaen so Lucas 16:10.

16. No agtayo atoor so sipan tayo, antoy nepeg tayon gawaen?

¹⁶ Ibabaga na Biblia a bilang agperpekton totoo, “amin tayo et naynay a nalilingo,” nagkalalo la diad panguusar tayoy dila tayo. (Sant. 3:2) Antoy gawaen tayo no amoria tayon agtayo atoor so imbaga tayo? Diad Ganggan na Dios ed Israel nensaman, walay mapangasin probisyon parad saramay “bengatbengat a mansamba.” (Lev. 5:4-7, 11, NW) Wala met so maaron probisyon parad saray Kristianon akagawa na ontan met a kasalanan. No ipatua tayoy kasalanan tayod si Jehova, mapangasi to itayon perdonaen panamegley na Atagey a Saserdote tayo, si Jesu-Kristo. (1 Juan 2:1, 2) Balet, pian mansiansiay panangabobon na Dios ed sikatayo, kaukolan a paneknekan tayon magbabawi tayo diad agpangulit-ulit ed saratan a kasalanan tan gawaey anggaay nayarian tayon resolbien iray problema a resultay agmaalwar a panagsalita. (Uli. 6:2, 3) Siempre, kaukolan a mannonot tayo nin maong no kasin say gawaen tayon sipan et natoor tayo.​—Basaen so Eclesiastes 5:2.

17, 18. Anton marakdakep ya arapen so nagamoran na saramay mansasagpot ya manoor ed sipan da?

¹⁷ Talagan marakdakep ya arapen so nagamoran na amin ya mandadayew ed si Jehova a manotoor ed saray sipan da! Parad saray 144,000 ya alanaan, mankabaliksan iya na imortal a bilay diad tawen, a kaibay Jesus tan “manuley ira bilang arari a kaiba to diad sanlibon taon.” (Apo. 20:6) Parad saray minilyon a totoo, mankabaliksan iya na pakagamor na bendisyon diad uley na Panarian nen Kristo diad paraison dalin. Ditan et natulongan iran nagamoray pisikal tan mental ya inkaperpekto.​—Apo. 21:3-5.

¹⁸ Panamegley na panmatoor tayod unor ya subok diad pansampot na Milenyon Uley nen Jesus, agtayo lan balot panduaruwaan so sipan na siopaman. (Apo. 20:7-10) Amin ya On et On, tan amin ya Andi et Andi. Amin ya manbilay lad satan et sigpot a mangalig ed maaron Ama tayo ed Tawen, si Jehova, say “Dios na katuaan.”​—Sal. 31:5.