NEN Pebrero, sinmabi so 122 a payunir diad South Lansing, New York, pian manaral ed koma 17 klase na Gilead School. Kaibad sarayan prospektibon misionero et di Lowell Turner, William (Bill) Kasten, Richard Kelsey, tan Ramon Templeton. Si Lowell tan Bill et parehon taga Michigan, si Richard et taga Iowa, tan si Ramon et taga California, ingen ta nagmaliw iran maapit a sankakaaro.

Kayari na limaran bulan, eksayted iran amin sanen naamtaan dan si Brother Nathan Knorr manlapud headquarters so mitongtong ed saray estudyante. Impatnag na apatiran brother so panlabay dan manlingkor a saniiba ed sakey a bansa​—no bilang ta posible. Kasin naamtaan da la natan no iner so asainmin da? On!

Mas eksayted ira sanen iyanunsio la nen Brother Knorr ed interon klase no iner so asainmin da. Saray inmunan tinawag ed entablado et saramay apatiran brother a mannerbiyos, balet akainawa ira sanen naamtaan dan saksakey a lugar so laen da! Balet iner? Asurprisa tan tinmipak iray kaklase da sanen niyanunsion manlingkor irad Germany.

Pandinayewan na amin a Tasi nen Jehova so katooran na saray agagid Germany manlapud 1933 a manpatuloy diad uley nen Hitler. Nanonotan ni na dakel ya estudyante so impangiparaan day pananginay kawes tan CARE (Cooperative for American Remittances to Europe) iran package parad saray agagid Europe kayari na World War II. Saray agagid Germany et balibalin ehemplo na mabiskeg a pananisia, determinasyon, inkakpel, tan talek ed si Jehova. Anonotan ni nen Lowell so imbaga tod saman: ‘Personal mi lan nakabat irayan matoor a brother tan sister.’ Kanian agla pankelawan ya eksayted iran ontawag ed saman a labi!

Nen Hulyo 27, 1951, say barkon Homeland a manlapud New York so luganan na apatiran sankakaaro ed 11 agew ya biahe ra paonlad Germany. Si Brother Albert Schroeder, sakey  ed saray instruktor na Gilead tan ag-abayag et nagmaliw a membro na Mananguley ya Ulop, so angibangat ed sikara na pigaran salitan German. Lapud wala ray German a pasahero, inisip dan mas naaral day lenguahe. Balet ta sananey a dialekto na Germany so uusaren da. Agnatalosan!

Diad Martes, Agosto 7, kayari na mabanal a biahe, akasabi ran siansia ed Hamburg, Germany. Anengneng day epekto na guerra ya agawa anem taon ni labat so apalabas. Naermenan irad anengneng da, tan nambiahe ran sanlabi paonlad Wiesbaden, say kawalaan na branch office diad saman a panaon.

Diad kabuasan na Mierkoles, akinengnengan irad si Hans, say sankaunaan ya Tasin akabat dad Germany. Inabet ira nen Hans ed istasyon na tren insan to ra impatnubang ed Bethel, impaasikaso to rad maedad lan sister ya agto amtay man-english. Inisip na sister a makapantalosan ira no ikasil toy boses to. Balet anggan makmaksil lay boses to, ag-ira nin siansia makapantalosan. Maong labat ta sinmabi si Brother Erich Frost, say branch servant, tan imbano to rad salitan English. Kalkalnan dinmakep so situasyon.

Sanen manampot lay Agosto, inmatendi ran apat ed sankaunaan ya kombension ed lenguahen German, say “Clean Worship” Assembly diad Frankfurt am Main. Say sankatageyan a bilang na inmatendi et 47,432 tan 2,373 so abautismoan. Lapud satan et lalon binmiskeg so seseg tan pilalek na sarayan brother ed panagpulong. Balet kalabas na pigaran agew, imbaga nen Brother Knorr ya mansiansia irad Bethel tan diman la ra mantrabaho.

Lapud ta labalabay nen Ramon so panagmisionero, agton tampol inawat so panlingkor ed United States Bethel. Tan agbalot naisip di Richard tan Bill a manlingkor irad Bethel. Balet say agamoran dan liket diad asainmin da so angombinse ed sikaran amta nen Jehova no  antoy sankaabigan. Talagan makabat so itulok ed panangigiya to nen say panggawad panlabayan tayo! Saray walaan na onian panmoria et maliket a manlingkor ed si Jehova antokaman odino inerman so pangi-asainan tod sikara.

Dakel ed pamilyay Bethel diad Germany so malabay a nawalaan na saray Amerikanon membro pian mangibangat ed sikaran man-english. Balet aminsan diad dining room, sayan iilaloan da et ag-agawa. Mapuersan imbaga nen Brother Frost ed salitan German so sakey a seryoson bengatla. Dinmeen so amin tan dakel ed sikara et akatuek. Anggaman agnatatalosan na apatiran brother so imbaga to, amoria dan saman ya anunsio et nipaakar ed sikara. Kanian sanen maksil ya imbaga nen Brother Frost ya “VERBOTEN!” (“Sebel!”) tan inulit-ulit to ni, apagaan ira. Antoy ginawa da akin et onmay imbaga to?

Sanen asumpal la ran angan, amin da et linman tampol ed saray kuarto ra. Oniay inkuan na sakey a brother ed sikara: “Pian natulongan yo kami, kaukolan a naaralan yoy mansalita na German. Kanian imbaga nen Brother Frost ya anggad agkayo ni makapansalitay German, VERBOTEN ed sikayo so pansalitay English.”

Tinmulok a tampol iray Bethelite. Aglabat iya akatulong ed saray apatiran brother a naaralay German, noagta tinmulong met iyad sikaran namoria a parad pankaabigan da so itulok ed simbawa na maaron brother anggaman diad unona et mairap itan a gawaen. Mapatnag ed imbaga nen Brother Frost ya manunad sikato so pankaabigan na organisasyon nen Jehova tan say panangaro tod saray agagi to. * Agpankelawan no akin a sikatoy inad-aro dan apat!

Say maabig ya alimbawa na saray matakot ed Dios ya kakaaro so mangibangat ed sikatayon magmaliw a mas maapit a kaaro nen Jehova. Akatulong ed apatiran brother iray matoor ya agagin German, balet akaaral met irad sakey tan sakey. Oniay imbaga nen Richard: “Wala ray amta nen Lowell ya salitan German kanian mainomay toy akaaral, balet sikamin talo et talagan nairapan. Tan lapud sikatoy sankatatkenan ed sikami, sikatoy pantetepetan mi nipaakar ed  lenguahe tan mangidadaulo ed sikami.” Oniay nanonotan met nen Ramon: “Asurprisa kami nen inyopresi na sakey a Swiss brother so melag ya abung to diad Switzerland parad unonan bakasyon mi kayari sakey taon! Duay simban agkami mansalitay German! Balet agko naisip ya kaiba mi manayay Lowell. Impilit ton manbasa tan pantongtongan mi daily text a kinabuasan, diad salitan German! Tan anggapoy agawaan mi ta talagan impilit to. Balet walay naaralan mi. Tulok kad panangidaulo na saray mangiyaansakit ed sika, anggano no maminsan et agmo labay. Sayan panmoria so akatulong ed sikami diad dakel a taon tan mas mainomay mi ontulok ed teokratikon panangigiya.”

Naaralan met na apatiran sankakaaro ya apresyaen so abilidad na balang sakey, a singa ibabaga na Filipos 2:3: “Mapaabeba so nonot yo, ya ipasen yon mas atagey so arum nen say sikayo.” Ipapalima dad si Bill iray kimey ya amta dan mas nagawaan to. Oniay nanonotan nen Lowell: “No walay seryoso odino mairap a desisyonan, say aasinggeran mi et si Bill. Sikatoy iilaloan min manggawad saratan ta kulang kami pakpel odino agmi iratan sarag a gawaen.”

Nantutumbokan iran angasawa. Say pankakaaro da et base ed panangarod si Jehova tan ed sigpot-panaon ya ministeryo, kanian nandesisyon iran mangasawa na saramay mangiyuuna ed si Jehova. Lapud sigpot-panaon ya serbisyo, naaralan dan mas maliket so mangiter nen say mangawat tan nepeg ya iprayuridad so Panarian nen saray personal a panlabayan. Kanian nananap iray sister ya wala met ed sigpot-panaon a serbisyo a singa sikara. Nanresulta itan ed apatiran mabiskeg tan maliket a panangasawa.

Pian say pankakaaro odino panangasawa et magmaliw a matalona, kaukolan ya kaibay Jehova ed relasyon. (Ecl. 4:12) Anggan inateyan na asawa si Bill tan Ramon, naeksperiensya ray liket tan suporta na matoor ya kaasawaan da. Siansian nagagamoran di Lowell tan Richard iyan suporta, tan si Bill ya angasawa lamet, et makabat a nampili na asawaen to pian makapansiansia ed sigpot-panaon a serbisyo.

Diad tinmumbok iran taon, nauman so asainmin da. Walay niasain ed Germany, Austria, Luxembourg, Canada, tan diad United States. Kanian, matalag la ran makapan-uulop. Balet anggan arawi rad sakey tan sakey, mankukumustaan ni ran siansia, mililiket irad saray bendisyon tan miaakis irad saray kairapan a naeeksperiensya na balang sakey. (Roma 12:15) Pabpablien tan pisalsalamatan tayo iray ontan a kakaaro. Regalo ira nen Jehova ed sikatayo. (Uli. 17:17) Mataltalag la ray ontan a kakaaro natan. Balet dakel iratan diad saray tuan Kristiano. Bilang Tasi nen Jehova, panliliketan tayoy pikakaaro  ed saray agagi ed interon mundo, tan manuna ed amin, ed si Jehova tan Jesu-Kristo.

Singa sikatayo met, sarayan sankakaaro et walaan na saray problema​—impatey na asawa, sakit, pangasikasod saray maedad lan atateng, pangasikasoy anak legan a walad sigpot-panaon a serbisyo, panagpaga ed balon asainmin, tan itatatken. Balet singa ed naeksperiensya la na sarayan sankakaaro, mankakaiba man ira odino andi, amta ran tulongan ira nen Jehova pian natalonaan da ray problema.

Talagan makapaseseg ira di Lowell, Ramon, Bill, tan Richard lapud ta anggan manedad ni labat ira nensaman na 18, 12, 11, tan 10 et indedika da lay bilay dad si Jehova tan linmoob irad sigpot-panaon a serbisyo sanen manedad ira na 17 anggad 21. Inyaplika da imay ibabaga na Eclesiastes 12:1: ‘Nonot mo so Manamalsam dia ed saray agew na inkaugaw mo.’

No sakey kan kalangweran a brother, awat moy imbitasyon nen Jehova ya onloob ed sigpot-panaon ya serbisyo. Insan misalamat ka ya lapud agnaparaan a kaabigan to et naeksperiensyam so liket ya alikna na sarayan apatiran sankakaaro​—say panlingkor ed sirkito, distrito, odino zone; panlingkor ed Bethel, kaibay pagmaliw ya Branch Committee; pambangat ed Kingdom Ministry tan Pioneer Service School; tan pampaliwawa ed baleg odino melag iran kombension. Seguradon malikeliket irayan brother ta nilibo so atulongan lapud kimey da! Agawaan dan amin iratan lapud kalangweran ni ra labat et inawat da lay maaron imbitasyon nen Jehova a manlingkor ed sikato ya interon kamarerwa.​—Col. 3:23.

Natan, di Lowell, Richard, tan Ramon et saniiba lamet a manlilingkor ed branch office, diad Selters, Germany. Makapaermen ta inatey si Bill nen 2010 legan a sikatoy manlilingkor bilang espisyal payunir diad United States. Ngalngali 60 taon ya impankakaaro so pinultot na patey! Balet agbalot lingwanan nen Jehova iray kakaaro to. Segurado itayon diad uley na Panarian to, amin ya impankakaaron temporaryon pinultot na patey et nipawil.

Antis ya ompatey si Bill, oniay insulat to: “Diad loob na 60 taon ya impankakaaro mi, anggapoy nanonotan kon aliwan marakep ya agawa. Say impankakaaro mi et talagan pinabpablik.” Tan oniay inyarum na taloran kakaaro to: “Singa kakkagapo ni labat.”