NEN 49 C.E., inikdan di Pedro, Santiago, tan Juan​—“bibidbiren bilang saray lusek”​—si apostol Pablo tan si Bernabe na sakey a kimey. Kaukolan dan nodnonoten iray Kristianon mairap bilay legan dan manpupulong ed saray nasyon. (Gal. 2:9, 10) Panon dan gawaen iyan responsabilidad?

Napatnagan ed saray sulat nen Pablo no panon kaimportante iyan kimey ed sikato. Singa bilang, oniay insulat tod saray Kristiano ed Corinto: “Nipaakar ed panagkolekta na kuarta parad saray masanto, unong ya ingganggan ko ed saray kongregasyon na Galacia, ontan met so gawaen yo. Diad kada unonan agew na simba et mangibiig komon so kada sakey ed sikayo diad abung ton dili na antokaman a natipon to no bilang ta sikatoy onaaligwas, ta pian agnagawa so panagkolekta diad isabik. Balet kasabik ditan, siopaman a lalaki ya abobonan yo ed panamegley na saray sulat et ibakik a mangawit ed maaron regalo yo diad Jerusalem.”​—1 Cor. 16:1-3.

Diad komaduan sulat tod saray taga Corinto, inulit nen Pablo so gagala na panagkolekta. Saya et “diad panamegley na pampapara, nasapotan la na saray sulok yo natan iray kulang da.”​—2 Cor. 8:12-15.

Nen sinmulat si Pablo ed saray Kristiano ed Roma manga 56 C.E., ngalngali la nasumpal so panagkolekta. Oniay imbaga to: “Ngalngali ak la manbiahe a mamaarap ed Jerusalem pian manlingkor ed saray masanto. Ta saramay walad Macedonia tan Acaya et aliketan a mangiter ed saray kayarian da bilang kontribusyon parad saray mairap-bilay ed limog na saray masanton walad Jerusalem.” (Roma 15:25, 26) Ag-abayag et asumpal nen Pablo iyan kimey to, ta sanen ompawil lad Jerusalem tan naaresto diman, imbaga tod Romanon Gobernador a si Felix: “Sinmabi ak pian awiten ed nasyon ko iray regalo lapud panangasi, tan iter iray apay ed Dios.”​—Gawa 24:17.

Mapatnag so maabig ya ugalin impanengneng na saray inmunan siglon Kristiano ed imbaga nen Pablo ed saray taga Macedonia. Inkuan ton “aminpigapiga iran akikasi ed sikami pian nawalaan iray pribilehyon mangiter a mabunlok.” Pinaseseg na apostol iray taga Corinto ya aligen itan ya alimbawa da. Inkuan to: “Gawaen komon na kada sakey so unong ed ginetma to ed puso to, ya aliwan ambelat ed liknaan to odino lapud napapasootan, ta aaroen na Dios so maliket a mangiiter.” Antoy amakiwas ed saray kongregasyon a mangipanengneng na ontan ya inkabunlok? Say rason et aliwa labat a pian “daakan a mangitarya ed pankaukolan na saray masanto noagta panlapuan met na dakel a balikas na pisasalamat ed Dios.” (2 Cor. 8:4; 9:7, 12) Say inkamabunlok tayo et walaan met na miparan gagala. Seguradon bendisyonan nen Jehova a Dios so maabig tan mabunlok ya espiritu tayo, tan say bendisyon to et makapayaman.​—Uli. 10:22.

Singa ed panaon nen apostol Pablo, dakel natan so “mangibibiig,” odino mangigagana na kuarta tan ipepelag ed contribution box ya amarkaan na “Worldwide Work.” (1 Cor. 16:2) Kada bulan, ipapawit na kada kongregasyon so atugyop ya kontribusyon diad branch office a makansakop ed bansan kawalaan da. Sarag yo met ya direktan ipawit so donasyon yo diad korporasyon ya uusaren na Saray Tasi nen Jehova diad lugar yo. Pian naamtaan no antoy manunan korporasyon ya uusaren na Saray Tasi nen Jehova ed bansa yo, ipangasin kontaken so branch office ya makansakop ed bansan kawalaan yo. Saray address na branch office et naromog ed www.pr418.com. Niraya so klase na donasyon a sarag yon ipawit:

SARAY OUTRIGHT DONATION

• Pandonasyon na kuarta, alahas, odino arum nin ankablin personal a kayarian.

• Mangilaktip na sulat a mangibabagan say kuarta odino ankablin bengatla et outright donation.

DONASYON A WALAAY KONDISYON

• Pangidonasyon iya na kuarta a say kondisyon et naala na samay angidonasyon no kaukolan to.

• Mangilaktip na sulat a mangibabagan say donasyon et walaan na kondisyon.

CHARITABLE PLANNING

Likud ed pangidonasyon na kuarta tan ankabli iran personal a bengatla, wala ni arum a paraan na panagdonasyon a makagunggona parad kimey na Panarian ed interon mundo. Nabasa iratan ed ontumbok a parapo. Antokaman so paraan a labay yon usaren, ipangasin ontawag nin unona ed branch office ya akansakop ed lugar yo pian naamtaan no anton paraan na panagdonasyon so walad bansa yo. Lapud nanduruma iray legal a totontonen ontan met ed babayaran a buis, importantin onkonsulta ed kualipikadon tax tan legal adviser antis a manpili na sankaabigan a paraan na pandonasyon.

Insurance: Pandonasyon panamegley na pangikargay ngaran na korporasyon ya uusaren na Saray Tasi nen Jehova bilang beneficiary na life insurance policy odino retirement/pension plan.

Saray Deposito ed Bangko: Saray deposito ed bangko, kasulatan nipaakar ed deposito, odino deposito ed panretiro a bayaran kayari ipatey na indibidual et nayarin imatalek odino ingaran ed korporasyon ya uusaren na Saray Tasi nen Jehova unong ed saray kakaukolanen na lokal a bangko.

Saray Stock tan Bond: Donasyon iya ed korporasyon ya uusaren na Saray Tasi nen Jehova bilang outright gift odino panamegley na Transfer on Death agreement.

Lote tan Abung: Say lote tan abung a nayarin ilako ya indonasyon ed korporasyon ya uusaren na Saray Tasi nen Jehova, balanglan diad panamegley na outright gift, odino life estate (manayam ditan anggad mabilay) no residential property.

Gift Annuity: Say kuarta odino insurance ya indonasyon ed korporasyon ya uusaren na Saray Tasi nen Jehova ya inyuksoy na nandonasyon, odino siopaman a pangipiyaan to et makaawat na espisipikon tinaon a bayar na annuity legay bilay. Say angidonasyon et makaawat na income-tax deduction diad samay taon a niyareglo so gift annuity.

Testamento tan Saray Trust Fund: Saray kayarian odino kuarta so nayarin ipatawir ed korporasyon ya uusaren na Saray Tasi nen Jehova panamegley na sakey a legal a testamento, odino pangingaran ed korporasyon bilang beneficiary na trust agreement. Sayan uksoyan et walaan na pigaran bentaha ed panag-buis.

Ipapatnag na terminon “charitable planning” a kaukolan ya manplanon maong so mandonasyon no dinan ed saraya so usaren to. Pian natulongan iray malabay a mandonasyon ed sankamundoan a kimey na Saray Tasi nen Jehova panamegley na charitable planning, walay sakey a brosyur diad English tan Spanish ya atituloan na Charitable Planning to Benefit Kingdom Service Worldwide. Sayan brosyur et in-publish pian mangiter na impormasyon nipaakar ed nanduruman paraan na panagdonasyon, ya iter natan odino ipatawir sano ompatey imay akanggawa. Saray impormasyon a nabasad sayan brosyur et nayarin ag-onaplikad amin ya situasyon lapud ley ed panagbuis odino arum nin ley ed bansa yo. Kanian, kayari yon basaen iyan brosyur, nepeg ya onkonsulta ed saray legal odino tax adviser. Diad pangusar ed sarayan paraan na panagdonasyon, dakel so akatulong pian suportaay sankamundoan a kimey tayo tan pananulong ed kaparan too, tan dakel met so benepisyo rad buis legan dan gagawaen itan. No sayan brosyur et nipublish ed bansa yo, sarag yoy onkerew na kopya ed sekretaryo na kongregasyon yo.

Parad kaaruman ya impormasyon, sarag yoy onsulat odino ontawag ed Charitable Planning Office, odino kontaken so branch office a makansakop ed bansan kawalaan yo.