1, 2. (a) Antoy pinaneknekan nen Jehova ed nasyon na Israel? (b) Anton tepet so naebatan ed sayan artikulo?

NEN panaon nen Nehemias, inamin na sakey a grupo na saray Levita diad pikakasi ran saray atateng da et aminpigapigan ‘agdinmengel’ ed saray ganggan nen Jehova. Anggaman ontan, aminpigan pinaneknekan nen Jehova a sikatoy ‘Dios a manamerdona, maabagey tan mapangasi, matantan a manpasnok, tan daakan ed kaabigan na linawa.’ Siansia nin impanengneng nen Jehova so agnaparaan a kaabigan ed saramay nibulos manlapud impakaaripen diad panaon nen Nehemias.​—Neh. 9:16, 17.

² Nepeg tayon tepetay sarili tayo, ‘Antoy kabaliksan na panamerdona nen Jehova ed siak?’ Pian naebatan iyan tepet, pantongtongan tayoy duaran ari a pinerdona nen Jehova, si David tan Manases.

3-5. Anto ran seryoson kasalanan so ginawa nen David?

³ Anggan matakot ed Dios si David, sikatoy siansia nin akagawa na seryoso iran kasalanan. Duara ed saraya et angapektad sanasawan di Urias tan Bat-sheba. Ansakit so resulta na sarayan kasalanan. Balet, makaaral tayo nipaakar ed panamerdona na Dios diad paraan na impandisiplina tod si David. Nengnengen tayoy agawa.

⁴ Angibaki si David na saray sundalo pian sakopen so kabisera na Ammon a Raba. Saya et manga 80 kilometro diad bukig na Jerusalem ya asingger ed Ilog Jordan. Legan a milalaban iray sundalo nen David, sikatoy walad tagey na palasyo tod Jerusalem tan anengneng toy Bat-sheba a manaames, a say asawa to et walad bakalan. Talagan agustoan nen David  si Bat-sheba, kanian impatawag tod palasyo tan akikalugoran ed sikato.​—2 Sam. 11:1-4.

⁵ Nen naamtaan nen David a malukon si Bat-sheba, impatawag toy Urias ya ompawil ed Jerusalem, agla pigan makapiakdol ed si Bat-sheba. Balet, agbalot linmoob si Urias ed abung to anggan sikatoy ingganggan nen David. Kanian, sekreton sinulatan na ari so komandante na saray sundalo to ya ipuestoy Urias diad ‘arap na pinasyan bakal’ tan paulyan da. Tampol ya apatey na saray kalaban si Urias, unong ed labay a nagawa nen David. (2 Sam. 11:12-17) Kanian aglabat akikalugoran si David noagta impapatey to met so inosentin si Urias.

6. Antoy ginawa na Dios nen nankasalanan si David, tan antoy ipapatnag na saya nipaakar ed si Jehova?

⁶ Siempre, anengneng nen Jehova so amin ya agawa. (Uli. 15:3) Anggaman inkasal na ari si Bat-sheba, “say bengatla a ginawa nen David [et] akapasanok ed Jehova.” (2 Sam. 11:27) Antoy ginawa na Dios ed sarayan seryoson kasalanan nen David? Imbaki toy propeta Natan ed si David. Bilang Dios a manamerdona, labay ya ipanengneng nen Jehova so panangasi tod si David. Agta makapaseseg a naamtaan ya mabulos itan a gawaen nen Jehova? Agto pinilit si David ya ipatuay kasalanan to, noagta impasalaysay tod si Natan so sakey ya ilustrasyon a mangipanengneng no panon kauges iray ginawa to. (Basaen so 2 Samuel 12:1-4.) Maabig itan a paraan pian resolbien so sakey a seryoson problema.

7. Antoy reaksion nen David ed ilustrasyon nen Natan?

⁷ Parad ari, agmakatunongan so agawad ilustrasyon. Sinmanok si David ed samay mayaman a laki ed ilustrasyon tan inkuan to: “Unong a si Jehova mabilay, say laki a nanggawa na saya sikato so manepeg ya ompatey.” Inkuan ni nen David a samay biktima na ontan ya ag-inkahustisya et kaukolan a bayaran lapud agawad sikato. Balet imbaga nen Natan ed si David: “Sika [iman] so laki.” Kanian bilang epekto na kasalanan to, “say kampilan” et ag-onarawi ed abung to tan wala ray probleman naeksperiensya na pamilya to. Sikato met so napabaingan lapud saray kasalanan to. Amoria nen David so kabelat na ginawa to tan inamin ton: “Nankasalanan ak a sumpa ed Jehova.”​—2 Sam. 12:5-14.

8, 9. Panon a napatnagan ed Salmo 51 so walad puso nen David, tan antoy naaralan tayod saya nipaakar ed si Jehova?

⁸ Napatnagan ed insulat a kansion nen Arin David a talagan sikatoy nagbabawi. Nabasad Salmo 51 iray impapuson pikakasi tod si Jehova a mangipapanengneng a mas ni ginawa to nen say impangipatuay kasalanan to. Nagbabawian to met iratan. Say sankaimportantian ed si David et say relasyon tod Dios. Oniay impatua to: “Dia ed sika labat, so nankasalananan ko.” Onia ni kinerew tod si Jehova: “Palsaen mo dia ed loob ko so sakey a malinis a puso, O Dios, tan mamasimbalo ka na matunong ya espiritu dia ed loob ko. . . . Ipawil mo ed siak so gayaga na panangilaban mo, tan ampayaen mo ak na mabulos ya espiritu.” (Sal. 51:1-4, 7-12) Kasin impapuso tan mabulos mo met ya ipapatua ed si Jehova iray lingom?

⁹ Ag-impaliis nen Jehova si David ed ansakit iran resulta na saray kasalanan to. Alikna iratan nen David legay bilay to. Ingen, lapud nagbabawi si David tan say  puso to et “maralit tan mansibsibkel,” sikatoy pinerdona nen Jehova. (Basaen so Salmo 32:5; Sal. 51:17) Amta na Makapanyarin Amin a Dios so tuan nalilikna tan rason na sakey no akin ya akagaway kasalanan. Kanian, imbes ya abuloyan ton nasentensiaan na patey si David tan Bat-sheba unong ed Mosaikon Ganggan, impanengneng nen Jehova so maaron panangasi tod sikara. (Lev. 20:10) Pinili ni ingen na Dios so anak dan si Solomon ya onsublay ya ari na Israel.​—1 Awa. 22:9, 10.

10. (a) Antoy sakey nin rason no akin a pinerdona nen Jehova si David? (b) Anto ray basiyan na panamerdona nen Jehova?

¹⁰ Nayarin say sakey nin rason no akin a pinerdona nen Jehova si David et lapud panangasin impanengneng tod si Saul. (1 Sam. 24:4-7) Unong ed si Jesus, say pantrato nen Jehova ed sikatayo et akadependid panagtrato tayod arum. Oniay imbaga to: “Agkayo la manguukom ta pian agkayo naukom, ta sikayo so ukomen unong ed paraan na panguukom yo, tan sikayo so sukaten unong ed sukat a panusukat yo.” (Mat. 7:1, 2) Talagan makapaliket a naamtaan ya perdonaen nen Jehova iray kasalanan tayo​—anggan saray seryoson kasalanan a singa say pikakalugoran o panagpatey! Gawaen to itan no mainomay tayoy mamerdona, no ipatua tayo iray kasalanan tayo, tan no manguman tayo. Iter nen Jehova so “makapainawan panaon” ed saramay impapusoy panagbabawi ra.​—Basaen so Gawa 3:19.

11. Anto ray ginawa nen Manases a mauges ed pakanengneng nen Jehova?

¹¹ Pantongtongan tayoy sakey nin salaysay ed Biblia a mangipapanengneng ed mabulos a panamerdona nen Jehova. Manga 360 taon lay apalabas sanen ginmapon nanari si David, sinmublay ya Ari si Manases ed Juda. Talagan mauges so 55 taon ya impanuley to. Sikatoy dinusa nen Jehova lapud makapadimla iran ginawa to. Singa bilang, sikatoy angipaalagey na altar parad si Baal, nandayew ed “amin ya ehersito na tawen,” pinoolan to ray anak to bilang apay ed saray palson dios, tan angidaulo na espiritismo. On, sikatoy “nanggawa na dakel a kaugsan dia ed pakanengneng nen Jehova.”​—2 Awa. 33:1-6.

12. Panon ya impatnag nen Manases a sikatoy nagbabawi?

¹² Agnambayag, sikatoy inawit ed Babilonia tan diman impriso. Nayarin diman to anonotan iramay salita nen Moises ed Israel: “Sano nagogonigon kayon maong tan nagawa irayan amin a bengatla  ed sikayo diad ontumbok iran panaon, ompawil kayo ed si Jehova a Dios yo tan talinengen yoy boses to.” (Deu. 4:30, NW) Nagbabawi si Manases. Panon? Sikatoy “nampaabeba na balbaleg” tan “nampikasi” ed Dios (a singa nanengneng ed pahina 21). (2 Awa. 33:12, 13) Agnisulat no antoy eksakton impikasi nen Manases ed si Jehova, balet nayarin mipara itan ed pikakasi nen Arin David a walad Salmo 51. Antokaman so ginawa to, talagan anguman si Manases.

13. Akin a pinerdona nen Jehova si Manases?

¹³ Antoy ebat nen Jehova ed pikakasi nen Manases? “Inebatan To tan dinengel To so ikekerew [nen Manases na] panangasi.” Singa si David, amoria nen Manases so inkaseryoso na kasalanan to tan talagan nagbabawi. Kanian sikatoy pinerdona na Dios tan impawil ton ari ed Jerusalem. Bilang resulta, “binidbir nen Manases a si Jehova so tuan Dios.” (2 Awa. 33:13, NW) Talagan makapaseseg iyan kaaruman a paneknek a say mapangasin Dios tayo et mamerdona ed saramay talagan magbabawi.

14. Antoy pangibasiyan nen Jehova ed pamerdona tod nankasalanan?

¹⁴ Pigara labat ed saray lingkor na Dios so onkekerew na perdona parad seryoson kasalanan ya agawaan da a singa di David tan Manases. Balet naaralan tayod sarayan alimbawa, ya anggano seryosoy kasalanan, say Dios et akaparaan a mamerdona ed saramay talagan magbabawi.

15. Akin ya aliwan automatikon mamerdonay Jehova?

¹⁵ Siempre, agtayo nibagan automatiko lan peperdonaen nen Jehova so amin a totoo. Ikompara tayoy ugali di David tan Manases ed saray agmatulok ya totood Israel tan Juda. Imbaki na Dios si Natan pian katongtongey David tan ikday pankanawnawan  manguman. Mapaabeba ton inawat itan a tulong. Sanen si Manases et walad makapagonigon a kipapasen, sikatoy apakiwas a magbabawi. Balet, mabetbet a saray taga Israel tan Juda et agmagbabawi. Kanian ag-ira pinerdona nen Jehova. Imbes, aminpigapiga ton imbaki iray propeta to pian ibagay nalilikna nen Jehova ed isusumlang da. (Basaen so Nehemias 9:30.) Tan anggan sanen akapawil la iramay naaripen ed Babilonia, nantultuloy nin angibaki si Jehova na saray mensahero a singa di Esdras tan Malaquias. Sano tutuloken na totooy panlabayan nen Jehova, magmaliw iran maliket.​—Neh. 12:43-47.

16. (a) Antoy nagmaliw a resulta na ag-impanbabawi na bansan Israel? (b) Anton pankanawnawa so niiter ed indibidual a kabiangan na bansan Israel?

¹⁶ Sanen imbaki si Jesus ed dalin tan abayaran lay kasalanan, agla inawat nen Jehova so panagbagat na ayayep na saray Israelita. (1 Juan 4:9, 10) Impatnag nen Jesus so panmoria na Ama to sanen wadiad dalin diad impangibagan: “Jerusalem, Jerusalem, say managpatey na saray propeta tan managtupak na saramay nibaki ed sikato,​—aminpiga a labay kon tiponen komon iray anak mo, a singa panitipon na nganak ed saray siwsiw to diad saray payak to! Balet agyo labay.” Kanian inyarum to: “Nia! Paulyanan la na Dios ed sikayo so abung yo.” (Mat. 23:37, 38) Kanian sayan makasalanan tan agmagbabawin nasyon et sinalatan na espiritual ya Israel. (Mat. 21:43; Gal. 6:16) Balet panon to iramay indibidual a kabiangan na bansan Israel? Minabang irad panamerdona tan panangasi nen Jehova no manisia rad Dios tan ed dondon bagat nen Jesu-Kristo. Niiter met itan a pankanawnawa ed saramay inaatey ya ag-akapanbabawi sano napaoli ira ed paraiso.​—Juan 5:28, 29; Gawa 24:15.

17, 18. Panon tayon nagamoray panamerdona nen Jehova?

¹⁷ Panon sirin so nepeg tayon ikiwas ed mabulos a panamerdona nen Jehova? Seguradon labay tayon aligen si David tan Manases. Nepeg tayon aminen ya makasalanan tayo, magbabawi ed saray lingo, impapuson onkerew na panamerdona nen Jehova, tan ipikasin ikdan to itayo na malinis a puso. (Sal. 51:10) No seryosoy kasalanan tayo, nepeg tayo met so onkerew na tulong ed saray elder. (Sant. 5:14, 15) Grabe man odino andi agawaan tayon kasalanan, makaligliwan nonoten ya si Jehova et ‘Dios a mapangasi tan maaro, mapalna ya onsanok, daakan ed maaro ya abig na linawa, tan katuaan, a mangigagana na maaro ya abig na linawa ed saray nilibo, manamerdona na inkauges, tan impakasumpa, tan kasalanan.’ Ontan nin siansiay Jehova.​—Exo. 34:6, 7.

¹⁸ Insipan nen Jehova ed saray magbabawin Israelita a talagan perdonaen to ira. Inkuan ton saray kasalanan da et singa “eskarlata,” balet ta paputien to iratan a singa “niebe.” (Basaen so Isaias 1:18.) Anto sirin so kabaliksan na panamerdona na Dios ed sikatayo? Mankabaliksan iya na sigpot a kaperdona na kasalanan, basta interon puso itayon magbabawi.

19. Antoy pantongtongan tayod ontumbok ya artikulo?

¹⁹ No si Jehova et akaparaan a mamerdona ed sikatayo, akaparaan tayo met kasin mamerdona ed arum? Kasin perdonaen tayo met iramay akagaway seryoson kasalanan a talagan nagbabawi? Tulongan itayo na ontumbok ya artikulo ya usisaen so puso tayo pian naalig tayoy Ama tayon si Jehova, ya ‘maong tan akaparaan a mamerdona.’​—Sal. 86:5.