“SAY salita na Dios et mabilay tan mabisbiskeg.” (Heb. 4:12) Ipapanengneng na sayan imbaga nen apostol Pablo a say salita na Dios et walay pakayari ton sabiey kapusoan tan umaney bilay na totoo.

Balet, sanen ginmapo so apostasya kayari impatey na saray apostol, nagmaliw ya aliwa so panmoria na totoo ed pakayari na mensahe na Biblia. (2 Ped. 2:1-3) Diad inlabas na panaon, imbangat na saray lider na simbaan ya wala kunoy misteryoson pakayari na Biblia. Walay libron insulat nen Professor Harry Y. Gamble nipaakar ed “misteryoson impangusar ed Kristianon sulsulat.” Inkuan to ya nen komatlon siglo et imbangat na Ama na Simbaan ya si Origen ya “anggan say tanol labat na sagradon salita et walay pakayari to: no diad mahiko na saray pagano et walay pakayari na saray salita, di mas mapuersay pinuyanan iran salita ya nanlapud Dios.” Insulat nen John Chrysostom nen kasampotay komapat a siglo ya “antakot ya onasingger so diablo ed abung ya walay Ebanghelyo.” Inkuan to met ya wala ray mangikukuwintas na bersikuloy Ebanghelyo bilang anting-anting. Inkuan ni nen Professor Gamble ya unong ed Katolikon teologo ya si Augustine, “no ansakit so ulom, sarag moy mangiyan na kopyay Ebanghelyo nen Juan diad danganan”! Kanian manisia la laingen iray totoo ya walay misteryoson pakayari na Biblia. Sika ey, kasin uusaren moy Biblia bilang anting-anting o pampasuerte ya manalimbeng ed sika?

Uusaren da met so Biblia ed bibliomancy. Anto itan? Atan imay gagawaen na arum ya basta dan bukayen so sakey ya libro, kaslakan et say Biblia, tan basaen day sankaunaan ya bersikulon nanengneng da ta atan kuno so ebat ed problema da. Alimbawa, unong ed si Professor Gamble, aminsan et nadngel nen Augustine so boses na ugaw ed kaabay da ya say kuan to et: “Alam tan basam, alam tan basam.” Kanian inisip nen Augustine ya say Dios so mangibabakid sikaton bukayey Biblia to tan basaen so unonan bersikulon nanengneng to.

Wala ray kabat mon no walay problema da et manpikasi rad Dios, insan da basta bukayey Biblia lapud panisiaan dan amay sankaunaan ya bersikulon nanengneng da so ebat ed problema da? Tua, labay day patulongan ed Biblia balet aliwan ontan so manepeg ya pangusar ed Kasulatan.

Impaseguro nen Jesus ed saray disipulo to ya sikatoy mangibaki na “mananulong, say masanton espiritu.” Intuloy to: “[Satan] so mangibangat ed sikayo na amin a bengatla tan mangipanonot ed sikayo ed amin ya imbagak ed sikayo.” (Juan 14:26) Kanian natulongan itayo na Biblia no amta tayoy karga na satan, aliwan panamegley na bibliomancy.

Dakel so totoon manisiad bibliomancy tan ed arum nin maaniton panangusar ed Biblia. Ibabaga balet na Biblia ya aglabay na Dios so mahiko o panangusar na anting-anting. (Lev. 19:26; Deu. 18:9-12; Gawa 19:19) Tua, “say salita na Dios et mabilay tan mabisbiskeg,” balet nepeg ya dugay pangusar tayod satan. Natulongan itayo na Biblia no aralen tayo itan, aliwan bilang anting-anting. Say katuaan ya walad Biblia so tinmulong ed dakel ya gawaey duga, itunday marutak ya panagbilay, aroey pamilya da, tan nakaaroy Autor na Biblia.