1, 2. Siopa ray tutukoyen nen Pedro a “pinili,” tan akin ya tinawag to ran “miaayam” labat?

MANGA 30 taon kayari na impawil nen Jesus ed tawen, nansulat si apostol Pedro ed “saray sangkaili a manaayam ed nanduruman lugar ed Ponto, Galacia, Capadocia, Asia, tan Bitinia, saray pinili.” (1 Ped. 1:1) Malinew a say tutukoyen nen Pedro a “pinili” et saramay kapara ton alanaan tan ‘nianak lamet diad sakey ya agmanganggan ilalo’ a manuley kaiba na Kristo diad tawen. (Basaen so 1 Pedro 1:3, 4.) Balet akin et tinawag to irayan pinili bilang “sangkaili tan miaayam”? (1 Ped. 2:11) Tan akin et kaukolan ya interesado tayod saya anta daiset met labat a Tasi so apili bilang alanaan?

² Duga labat a natawag a “miaayam” iray alanaan nen inmunan siglo. Ontan met ed saray alanaan natan, say panayam dad dalin et aliwa met a permanente. Impaliwawa nen apostol Pablo, a kabiangan na “melag a pulok,” a saray alanaan et manayam ed tawen. Inkuan to: “Sikatayo balet, say kanepegan tayo bilang mibabaley et walad tawen, a ditan so panlapuan na samay tatalaranan tayon manangilaban, say Katawan tayon Jesu-Kristo.” (Luc. 12:32; Fil. 3:20) Lapud sikaray ‘mibabaley ed tawen,’ sano ompatey ira, nawalaan iray imortal a bilay diad tawen. (Basaen so Filipos 1:21-23.) Kanian nibagan “miaayam” labat ira ed sayan mundon uuleyan nen Satanas.

3. Anton tepet so ikonsidera tayo nipaakar ed ‘arum a karnero’?

³ Balet, panon toy ‘arum a karnero’ ey? (Juan  10:16) Kasin ibabangat na Biblia a permanente iran manayam diad dalin? On, manayam ira ditan ed andi-angga! Balet natan et ipapasen met iran miaayam labat ed sayan mundo. Akin?

4. Antoy agnayarian a patundaen na saray lider ed mundo?

⁴ Legan a manbibilay tayo ni ed sayan mauges a sistema nen Satanas, amin, kaiba iray Kristiano et tuloytuloy a manirap lapud impanrebelde nen Satanas ed si Jehova. Nabasa tayod Roma 8:22: “Amta tayo a say amin a pinalsa et saniiban oneey-ey tan nasasakitan anggad natan.” Tan anggan labay iyan patundaen na saray lider ed mundo, scientist, tan humanitarian, agda itan nayarian.

5. Manlapu la nen 1914, antoy ginawa na minilyon a totoo, tan akin?

⁵ Manlapu la nen 1914, minilyon so mabulos a manpapasakop ed pinili na Dios ya Ari, si Jesu-Kristo. Agda labay so onsuporta tan magmaliw a kabiangan na mundo nen Satanas. Imbes, uusaren day bilay tan kayarian da pian suportaay Panarian na Dios.​—Roma 14:7, 8.

6. Akin a nibagan sangkaili iray Tasi nen Jehova?

⁶ Saray Tasi nen Jehova et maong a mibabaley diad masulok a 200 a bansa. Balet inerman so kawalaan da, ipapasen day sarili dan sangkaili. Mansiasiansia iran neutral ed politika tan ed saray problema na bansan panaayaman da. Natan ni labat et ipapasen da lay sarili da bilang mibabaley na balon mundo na Dios. Maliket ira ta asingsingger lan mangangga so temporaryon piaayam dad sayan mauges a mundo.

7. Iner so permanentin panayaman na saray lingkor na Dios, tan panon?

⁷ Asingger lan deralen nen Jesu-Kristo iyan mauges a mundo nen Satanas. Ekalen na gobierno na Kristo so kasalanan tan ermen diad dalin. Ontan met ed amin ya manrebelde ed inkasoberano nen Jehova. Saray matoor a lingkor na Dios et nawalaay pankanawnawan manayam  a permanente ed Paraison dalin. (Basaen so Apocalipsis 21:1-5.) Diad satan, ‘amin a pinalsa et nibulos ed impakaaripen ed kabubulok pian magmaliw ya ananak na Dios a walaan na maglorian kawayangan.’​—Roma 8:21.

8, 9. Ipaliwawa no antoy labay ya ibaga nen Pedro nen imbaga ton ‘paliisan iray pilalek na laman.’

⁸ Impaliwawa nen Pedro no antoy iilaloan ed saray Kristiano sanen inkuan to: “Inad-arok iran agagi, a sangkaili tan miaayam ed sayan mundo, bilinen ta kayo a paliisan yo iray pilalek na laman, a sarayan mismo et milalaban ed kamarerwa.” (1 Ped. 2:11) Insimbawa to iya ed saray alanaan a Kristiano, balet kaukolan met iyan tuloken na arum a karnero nen Jesus.

⁹ Wala ray pilalek ya aliwan mauges no peneken ed paraan a mitunosan ed ganggan na Amalsa. Mangarum iya na liket ed bilay. Alimbawa, wala ray natural a pilalek, singa say pangan na mananam a naakan tan inumen, pibiang ed makarepresko iran aktibidad, tan pakawalaay maong iran kaulop. Ontan met ed natural a pilalek ed sekso na sakey ed asawa to. (1 Cor. 7:3-5) Balet, say tutukoyen nen Pedro et say “pilalek na laman” a “milalaban ed kamarerwa.” Diad arum a patalos na Biblia tinukoy iya bilang “mauges a pilalek na laman” (Maung a Balita) odino “makasalanan a pilalek” (New International Version). Kanian, nepeg a paliisan so antokaman a pilalek ya agmitunosan ed gagala nen Jehova tan mangapektad maabig a relasyon ed Dios. Ta no andi, nipeligroy bilay tayo.

10. Anto ray pigaran patit ya uusaren nen Satanas pian magmaliw a kabiangan na mundo to iray Kristiano?

¹⁰ Say gagala nen Satanas et pian pakapuyen so determinasyon na saray tuan Kristiano a mansiansian “miaayam” labat ed sayan sistema na mundo. Say pakawalaan na dakel a materyal, panangayat na imoralidad, pagmaliw a sikat, ugalin magmaliw a manunaan, tan nasyonalismo et patit ya uusaren nen Satanas a nepeg tayon paliisan. No determinado tayon paliisan irayan mauges a pilalek na laman, papaneknekan tayon agtayo labay so magmaliw a kabiangan na mauges a mundo nen Satanas. Ipapanengneng tayo met ya temporaryo tayo labat a miaayam ed sayan sistema. Say talagan labay tan pansasagpotan tayo et say panayam a permanente ed balon mundo na Dios.

11, 12. Antoy pangipapasen na arum ed saray sangkaili, tan antoy ibabaga na arum nipaakar ed Saray Tasi nen Jehova?

¹¹ Inyarum ni nen Pedro ed bersikulo 12 no antoy iilaloan ed saray Kristiano bilang “miaayam,” inkuan to: “Pansiansia yon maabig so ugali yo ed limog na saray totoo ed mundo, ta anggano ibabaga ran manggagawa kayoy mauges, igloria ran mismo so Dios diad agew na panusisa to lapud nanenengneng da iray maabig a gawa yo.” No maminsan, saray sangkaili odino miaayam labat ed arum a bansa et babalawen. Lapud duma irad saray kakaabay da, ipapasen iran mauges a totoo. Say panagsalita, kakikiwas, panangawes, tan anggan say itsura ra et duma. Balet no manggawa ray maong, no maabig so ugali ra, napaneknekan ya  aliwan tua so ibabaga na saramay mamabalaw ed sikara.

¹² Duma met iray tuan Kristiano ed pigaran aspekto, singa say paraan na pitotongtong tan panagpili na panagligliwaan. Mabetbet a say panangawes tan panag-ayos da et pakapatnagan a duma irad karaklan. Lapud saraya, iisipen na arum ya mauges ira. Balet, wala met iray mandinayew ed maabig ya ugali ra.

13, 14. Panon a say karunongan et “napaneknekan a matunong diad panamegley na saray gawa na satan”? Iyilustra.

¹³ Ontulong so pangipatnag tayoy maabig ya ugali pian anggapoy nibagan mauges ed sikatayo. Anggan si Jesus, say toon angipanengneng na perpekton alimbawa na katooran ed Dios et palson inakusaan. Sikatoy tinawag na arum ya “masiba tan mainum na alak, a kaaro na saray managsingil na buis tan managkasalanan.” Balet lapud maabig ya ugali to, pinaneknekan ton aliwan tua iray akusasyon dad sikato. Imbaga to: “Say karunongan et napaneknekan a matunong diad panamegley na saray gawa na satan.” (Mat. 11:19) Tua met itan natan. Singa bilang, wala ray manaayam ed abay na Bethel diad Selters, Germany a maniisip ya dumay kabibilay na saray walad Bethel. Balet indepensa ira na mayor na Selters diad impangibagan: “Saray Tasin manlilingkor ditan et dumay paraan na kabibilay da, balet ta agda guguloen so bilay na arum.”

¹⁴ Ontan met so inkomentod Saray Tasi nen Jehova ed Moscow, Russia. Inakusaan ira a manggagaway mauges. Ibabaga na arum a dederalen day pamilya, iimpluensyaan day arum a manbikkel, tan agda aawaten iray medikal a tulong. Balet nen Hunyo 2010, nandesisyon so European Court of Human Rights (ECHR) diad Strasbourg, France ya agmakatunongan so impanebel na Moscow ed Saray Tasi nen Jehova ya mandayew tan mantitipon. Imbaga na ECHR ya anggapoy magenap ya ebidensya na saray korte ed Russia pian paneknekan a walay mauges ya ginawa na saray Tasi. Nalmoan ya inusar na saray korte ed Moscow iray istrikton ley pian sebelan iray Tasi nen Jehova.

15. Anton prinsipyo so tutumboken na saray tuan Kristiano?

¹⁵ Tutumboken na Saray Tasi nen Jehova so sakey nin kakaukolanen parad saray Kristiano ya imbaga nen Pedro. Oniay insulat to: “Nisengeg ed Katawan, manpasakop kayo ed amin a totoon walad pakauley: balanglan diad sakey ya ari bilang atagtagey odino ed saray gobernador.” (1 Ped. 2:13, 14) Anggan ag-ira kabiangan na sayan mauges a mundo,  mabulos a manpapasakop iray tuan Kristiano ed saray manuley na gobierno ed “relatibon posisyon da,” unong ya imbilin nen Pablo ed sikara.​—Basaen so Roma 13:1, 5-7.

16, 17. (a) Antoy paneknek ya agtayo manrerebelde ed gobierno? (b) Antoy aaminen na saray arum a lider na gobierno?

¹⁶ Manbibilay iray Tasi nen Jehova bilang “miaayam” ed sayan sistema na bengatla, balet aliwan lapud labay dan sumlangen so gobierno. Agda kokontraen odino pibabalian iray opinyon na arum nipaakar ed no siopa so nepeg a manuley odino no panon a resolbiey problema na totoo. Aliwan singa saray arum a relihyoson grupo, agmibabali iray Tasi nen Jehova ed politika. Agdan balot didiktaan iray lider na gobierno ya umanen so paraan na pananguley da. Kanian, anggapoy plano dan manrebelde ed gobierno odino kombinsien so arum a gawaen itan.

¹⁷ Diad panutumbok dad bilin nen Pedro ya “igalang yo so ari,” ipapanengneng na saray Kristiano ya rerespetoen tan igagalang da ray walad posisyon. (1 Ped. 2:17) Aminen na saray lider na gobierno ya agda nepeg a pampagaan iray Tasi nen Jehova. Singa bilang, si Steffen Reiche, sakey a datin membro na gobiernoy Germany diad Brandenburg tan nagmaliw a membro na German parliament so angibagan: “Say ugalin impanengneng na Saray Tasi nen Jehova diad saray kampo tan prisoan et kakkaukolan anggad natan parad demokratikon gobierno, singa say inkapekder da sumpad SS tan panangasi rad saray kapara ran priso. Sarayan ugali et importante ed saray mibabaley na bansa tayo lalo ta ondarakel so totoon maruksa ed saray dayo, ontan met ed saray dumay sisiaen odino opinyon dad politika.”

18. (a) Akin a natural labat ed sikatayon aroen so amin ya agagi? (b) Antoy reaksion na saray totoo ed Saray Tasi nen Jehova?

¹⁸ Oniay insulat nen apostol Pedro: “Aro yo so amin ya agagi yo, ontakot kayo ed Dios.” (1 Ped. 2:17) Saray Tasi nen Jehova et walaay dugan takot ed Dios, kanian sikatoy agda labay a napaermen. Maliket iran manlilingkor ed si Jehova bilang kabiangan na interon mundon impanaagi a walaan na miparan gagala. Kanian, natural labat ya ‘inaro day amin ya agagi ra.’ Satan ya aroan dad sakey tan sakey et pandinayewan na saray aliwan Tasi. Alimbawa, pandinayewan na sakey a tour guide a mantratrabaho ed American travel agency so panangaro tan tulong ya impanengneng na saray Tasi ya inmatendi ed internasyonal a kombension diad Germany nen 2009. Inkuan ton diad dakel lan taon to bilang tour guide, diad saman to labat anengneng so onman ya aroan. Oniay imbaga na sakey ed saray Tasi ya in-tour to: “Puro pandinayew tan liket so imbaga to.” Wala met la kasi nadngel mon onia ran reaksion ed saray totoon akaimaton ed kombension?

19. Antoy determinadom a gawaen, tan akin?

¹⁹ Unong ed naaralan tayo, papaneknekan na Saray Tasi nen Jehova a sikaray “miaayam” labat ed sayan mundo nen Satanas. Tan maliket iran mansiansian ontan. Mabiskeg so ilalo ra tan matalek iran asingger la ran magmaliw a permanentin manayam ed balon mundo na Dios. Kasin ontan met so iilaloan mo?