Awaten so Ligliwa—Ligliwaen Met so Arum
Lapud ag-itayo perpekto, amin tayo et mansasakit, say arum ni ingen et grabe sakit da. Panon tayon makapansungdo no oniay dadalanen tayon situasyon?
Say sakey ya makatulong et say ligliwan iiter ed sikatayo na kapamilya, kakaaro, tan saray kaagian tayo.
Say maaron balikas na kaaro et singa makarepresko tan makatambal a puyok. (Uli. 16:24; 18:24; 25:11) Balet aglabat nononoten na saray tuan Kristiano so pankaabigan da. Manggagawa met iray paraan ‘pian naligliwa iramay walad amin a klase na kairapan diad panamegley na ligliwa a panliligliwa na Dios ed sikara.’ (2 Cor. 1:4; Luc. 6:31) Naeksperiensya iyan mismo nen Antonio, sakey a manangasikaso na distrito diad Mexico.
Nen naamtaan nen Antonio ya walay sakit ton lymphoma (kanser ed dala), agaylay ermen to. Balet, ginawa toy anggaay nayarian ton nalabanan so emosyon to. Panon? Mangipapatlep na saray Kingdom song insan to kansionen pian nadalepdep to iratan. Sikatoy naliligliwa met sano manpipikasin maksil tan manbabasay Biblia.
Balet unong ed si Antonio, say akatulong na baleg ed sikato et saray agagi. Inkuan to: “No onkakapuy kami nen akulaw ko, kerewen mid sakey a kanayon min elder ed kongregasyon ya onlad abung tan ipikasian to kami. Akatulong itan pian naligliwa kami tan ondeey nonot mi. Diad tua,” so kuan to, “pisalamatan mi suporta na pamilya tan kaagian mi ta lapud sikara et aganggano min alabanan iray negatibon liknaan.” Talagan pisalsalamatan toy panangaro tan panangasikaso na sarayan kaaro to!
Say sakey nin makatulong ed panaoy kairapan et say masanton espiritu. Imbaga nen apostol Pedro ya say masanton espiritu na Dios et “regalo.” (Gawa 2:38) Say tutukoyen dia nen Pedro et sanen alanaan na masanton espiritu iray patumbok nen Kristo nen Pentecostes 33 C.E. Balet, sarag tayo met ya naawat itan a regalo natan. Diad tua, say masanton espiritu et agnanaupot, kanian agta maabig no lanang tayon kerewen itan?—Isa. 40:28-31.
IYANSAKIT IRAMAY ONDADALAN ED IRAP
Dakel ya irap so inanosan nen apostol Pablo, tan wala ra may pankanawnawan sikatoy ngalngali la ompatey. (2 Cor. 1:8-10) Balet, agto masyadon ninonot so ipatey to. Sikatoy aligliwa lapud amta ton sikatoy tutulongan na Dios. Insulat to: “Narayew komon so Dios tan Ama na Katawan tayon Jesu-Kristo, say Ama na maaron panangasi tan say Dios na amin a ligliwa, a manliligliwa ed sikatayo diad amin a kairapan tayo.” (2 Cor. 1:3, 4) Ag-inabuloyan nen Pablo ya sikatoy natalo na saray problema. Imbes, lapud saray subok ya sinungdoan to, naaralan toy milikna, kanian amta to no panon ya ligliwaen iramay ondadalan ed irap.
Sanen inmabig lay Antonio, sikatoy pinmawil ed pribilehyo to bilang manangasikaso na distrito. Dati lan ipapanengneng toy panangiyansakit ed saray agagi, balet manlapu lad samay impansakit to et mas panggugunaetan dan sanasawa ya bisitaen tan pasesegen iray mansasakit. Singa bilang, sanen binisita nen Antonio so sakey ya agin grabe sakit to, naamtaan ton sayan agi et agto la labay so miaral. “Aliwan say agto la inaroy Jehova o saray agagi,” so kuan nen Antonio, “balet apektadon maong so emosyon to lapud sakit to kanian isipen ton anggapo lay kana to.”
Say sakey ya akapaseseg ed sayan agi et sanen sikatoy impanpikasi nen Antonio diad aminsan ya impantutuyaw na saray agagi. Anggano say pakalikna na sayan agi et agto sarag, pinmayag lanlamang. Oniay kuan nen Antonio: “Balibali pikakasi to, tan kayari to man et singa duma lan too. Alikna ton wala lamet so kana to.”
On, balang sakey ed sikatayo et walan walay aanosan ton irap. Balet singa kuan nen Pablo, lapud satan et sarag tayo met ya ligliwaen so arum ya ondadalan ed irap. Kanian, komon et tulongan tayo ray agagin maniirap tan aligen tayoy Dios a Jehova, diad panligliwa tayo ed arum.
