1, 2. Antoy maabig ya resulta na pandalepdep ed saray pasingawey nipaakar ed organisasyon nen Jehova?

MAKAPALIKLIKET ya nonoten a kabiangan itayo na balbaleg ya organisasyon ed uniberso. Malinlinew ya adeskribid pasingawey ed Ezequiel kapitulo 1 tan Daniel kapitulo 7 ya si Jehova so mangokontrol ed saray bengatla pian nasumpal so gagala to. Si Jesus so mangidadaulo ed organisasyon nen Jehova diad dalin pian nipulong so maong a balita, naasikasoy espiritualidad na saray managpulong, tan natulongan so arum a mandayew ed si Jehova. Talagan makapanmatalek itayod organisasyon nen Jehova!—Mat. 24:45.

² Kasin mibabansag ka ed sayan onaabantin organisasyon? Kasin say panangarom ed katuaan et tuloytuloy ya ombibiskeg odino onkakapuy la? No itepet mo iratan ed sarilim, ompan naimanom ya onkekesaw ka la odino natatabangan ka lan manlingkor. Posiblin nagawa itan, singa saray Kristiano nen inmunan siglo. Kanian, impanonot ed sikara nen apostol Pablo so inkaseseg nen Jesus. Imbaga nen Pablo ya satan so ontulong ed sikara pian ‘ag-ira onkesaw tan ag-onkapuy so linawa ra.’ (Heb. 12:3) Ontan met ed sikatayo natan, no aligen tayoy alimbawa na organisasyon nen Jehova ya inaral tayod apalabas ya artikulo, napansiansia tayo met so seseg tan makapansungdo itayo.

3. Antoy kaukolan tayon gawaen pian ag-itayo onkesaw, tan antoy aralen tayod sayan artikulo?

³ Balet aliwan satan labat so imbaga nen Pablo ya nepeg a gawaen pian ag-onkesaw. Inkuan ton kaukolan tayoy “manggawa na maabig.” (Gal. 6:9) Pantongtongan tayoy limaran kabiangan na panagdayew tayo ya makatulong ed sikatayon mansiansian maseseg tan makapibansag ed organisasyon nen Jehova. Diad ontan et nanengneng tayo no anto ray papaaligwasen tayo odino na pamilya tayo.

4. Akin ya importantin kabiangan na tuan panagdayew so pantitipon?

⁴ Say pantitipon et importante ed saray lingkor nen Jehova. Dimad tawen, wala ray panaon ya oonlad arap nen Jehova iray espiritun pinalsa. (1 Ara. 22:19; Job 1:6; 2:1; Dan. 7:10) Diad Israel nensaman, sikaray mantitipon pian ondengel tan makaaral. (Deu. 31:10-12) Niyugali na saray Judio nen inmunan siglo so onlad saray sinagoga pian manbasa na Kasulatan. (Luc. 4:16; Gawa 15:21) Nantultuloy ya importantin kabiangan na panagdayew so pantitipon sanen apormay Kristianon kongregasyon, ya anggad natan. Bilang tuan Kristiano, “nonoten tayo so sakey tan sakey pian makapansasagyatan itayo a mangaro tan manggawa na maabig.” Kaukolan ya “manpapasesegan itayo, nagkalalo la ta nanenengneng [tayon] asingsingger lay agew” nen Jehova.—Heb. 10:24, 25.

5. Panon tayon napaseseg so balang sakey ed saray pantitipon tayo?

⁵ Say sakey ya importantin paraan pian napaseseg tayoy balang sakey et diad pankomento ed saray pantitipon. Sarag tayon ibalikas so pananisia tayo diad pangebat ed saray tepet, pangiyaplikad saray Kasulatan, pangisalaysay na antikey ya eksperiensya ya mangidanet ed prinsipyo na Biblia, tan arum ni. (Sal. 22:22; 40:9) On, anggan abayag tayo lan onaatendi ed saray pantitipon, siansian napapaseseg tayo sano narerengel tayoy impapuson komento na saray agagi—maedad man o ugugaw.

6. Panon a makatulong iray pantitipon pian mansiansia itayon aktibo ed espiritual?

⁶ Anto ni arum a rason no akin ya importante so regular ya iyatendid saray pantitipon? Baleg so nitulong na saray aral, asemblea, tan kombension pian makpel itayon makapansalita tan nasarag tayo ray isusumpa odino panangibaliwala ed teritorya tayo. (Gawa 4:23, 31) Ombibiskeg so pananisia tayo no makadngel tayoy paliwawan base ed Biblia. (Gawa 15:32; Roma 1:11, 12) Saray nanaaralan tan panamaseseg ed saray pantitipon so mangiter ed sikatayoy tuan liket tan “kareenan diad panaoy kairapan.” (Sal. 94:12, 13, NW) Idadaulo na Teaching Committee na Mananguley ya Ulop so pangipaparaan ed espiritual iran programa parad pantitipon na saray lingkor nen Jehova diad interon dalin. Talagan pisalsalamatan tayoy amin ya instruksion ya nanaawat tayod sinimban aral diad interon taon!

7, 8. (a) Anto so manunan gagala na saray pantitipon ed kongregasyon? (b) Panon a makakatulong ed sika iray pantitipon?

⁷ Balet, ag-itayo labat onaatendi ed saray pantitipon pian minabang. Say manunan gagala et pian idayew si Jehova. (Basaen so Salmo 95:6.) Talagan pribilehyo so pangidayew ed alay abig a Dios tayo! (Col. 3:16) Kanepegan nen Jehova a sikatoy regular tayon idayew panamegley na iyatendi tan pibiang ed saray teokratikon pantitipon. (Apo. 4:11) Kanian, agla pankelawan no akin a sikatayoy papasesegen ya ‘agpaulyanan so pantitipon tayo, a singa niyugali na arum.’—Heb. 10:25.

⁸ Kasin ipapasen tayo ray Kristianon pantitipon bilang paraan ya uusaren nen Jehova pian makapanmatoor tayo anggad naderal iyan mauges a mundo? No “mas importantin bengatla” ed bilay tayo iray pantitipon, panggunaetan tayoy onatendi anggan busy tayo. (Fil. 1:10) Sirin, agtayon balot aabuloyan ya ag-itayo makapiaral tan agnakaiba iray agagi diad pangidayew ed si Jehova no anggapoy makatunongan a rason.

9. Akin a nibagan importantin kimey so panagpulong?

⁹ Say maseseg a pibiang ed panagpulong so ontulong ed sikatayon makapibansag ed organisasyon nen Jehova. Inggapo iya nen Jesus sanen sikatoy wadiad dalin. (Mat. 28:19, 20) Manlapud saman, say panagpulong tan panaggaway babangatan so manunan kimey na interon organisasyon nen Jehova. Papaneknekan na saray eksperiensya ed panaon tayo ya susuportaan na saray anghel iyan kimey tan igigiya da itayod saray “walaan na dugan kipapasen na puso parad bilay ya andi-anggaan.” (Gawa 13:48; Apo. 14:6, 7) Say manunan gagala na organisasyon nen Jehova diad dalin et say pangorganisa tan panuporta ed sayan sankaimportantian a kimey. Kasin iyuunam iyan kimey ed bilay mo?

10. (a) Panon ya apansiansia na sakey a brother so panangaro tod katuaan? (b) Panon kan natutulongan na ministeryom ya ag-onkesaw?

¹⁰ No maseseg itayod ministeryo, napansiansia tayoy panangarod katuaan. Oniay inkomento nen Mitchel ya abayag lan elder tan regular payunir: “Labalabay kon ipulong so katuaan. Dadalepdepen ko ray balon artikulod Say Panag-bantayan odino Onliing! tan pandinayewan kon talagay karunongan, pakatalos, tan inkabalanse na kada isyu. Labalabay koy manpulong pian nanengneng koy reaksion na  saray totoo, no panon kon naalay interes da. Tutulongan ak na ministeryok a mansiansian mabiskeg. Panggugunaetan kon gawaen so arum nin kimey ko sakbay odino kayari na inyeskedyul kon oras parad ministeryo.” Makapanmatoor tayo met ed sayan kaunoran iran agew no mansiansia itayon busy ed sagradon panaglingkor.—Basaen so 1 Corinto 15:58.

11. Akin a kaukolan tayon basaen tan dalepdepen so amin a publikasyon ya itatarya nen Jehova?

¹¹ Mangitatarya si Jehova na dakel a suplay na espiritual a naakan pian ombiskeg itayo. Nayarin asalim lan imbagay onia kayarim a nambasay publikasyon tayo: ‘Aya so kaukolan ko! Singa iya sulat nen Jehova ed siak!’ Aliwa itan ya nibanbana. Uusaren nen Jehova iray publikasyon pian ibangat tan igiya itayo. Inkuan to: “Bilinen ta ka tan ibangat ta ka ed dalan a nepeg mo a laen.” (Sal. 32:8) Kasin babasaen tan dadalepdepen mon amin iray publikasyon tayo? Ontulong iratan pian magmaliw kan mabunga tan agka onkapuy ed espiritual diad sayan kaunoran iran agew.—Basaen so Salmo 1:1-3; 35:28; 119:97.

12. Panon tayon mas naapresya iray publikasyon tayo?

¹² Maabig no nonoten tayo met iray proseson gagawaen pian naseguron regular itayon makaawat na masustansian espiritual a naakan. Idadaulo na Writing Committee na Mananguley ya Ulop so pan-research, pangisulat, pan-proofread, pamili na litrato, tan pangipatalos ed saray iyiimprintan publikasyon tayo ontan met ed saray ikakargad Web site tayo. Idi-deliver na saray printing branch iray literatura diad saray sakop dan kongregasyon. Akin? Pian napesel ed espiritual iray lingkor nen Jehova. (Isa. 65:13) Komon ta seetan tayon basaen so amin ya itatarya na organisasyon nen Jehova.—Sal. 119:27.

13, 14. Siopa ray onsusuportad organisasyon nen Jehova dimad tawen, tan panon tayon naalig so alimbawa ra?

¹³ Diad samay pasingawey ya niiter ed si apostol Juan, akalugan si Jesus ed amputin kabayo pian milaban ed saray onsusumpad si Jehova. (Apo. 19:11-15) Makapabiskeg na pananisia a sikatoy susuportaan na saray matoor ya anghel tan saray alanaan ya apaoli lad tawen! (Apo. 2:26, 27) Talagan alay abig itan ya alimbawa na panuporta ed uksoyan nen Jehova!

¹⁴ Onsusuporta met so baleg ya ulop ed saray alanaan ya wadia nid dalin tan mangidadaulo ed organisasyon natan. (Basaen so Zacarias 8:23.) Panon tayon nipanengneng ya susuportaan tayoy uksoyan nen Jehova? Say sakey a paraan et diad itulok ed saray mangidadaulo. (Heb. 13:7, 17) Nipanengneng tayo itan diad mismon kongregasyon tayo. Kasin napapaseseg iray agagi ya respetoen iray elder diad saray ibabaga tayo nipaakar ed sikara? Kasin ibabangat tayo ray anak tayon respetoen irayan matoor a lalaki tan dengeley Makasulatan a simbawa ra? Sakey ni, kasin pantotongtongan na pamilya tayo no panon a nasuportaay sankamundoan a kimey diad pandonasyon? (Uli. 3:9; 1 Cor. 16:2; 2 Cor. 8:12) Kasin mitutulongan tayod panlinis tan panmintina na Kingdom Hall? No walay respeto tan pankakasakey, mabulbulos ya iter nen Jehova so masanton espiritu To. Satan ya espiritu so ontulong ed sikatayon ag-onkesaw ed sayan kaunoran iran agew.—Isa. 40:29-31.

15. Akin ya kaukolan tayoy tuloytuloy a milaban pian nitunos tayoy bilay tayod gagala nen Jehova?

¹⁵ Kaunoran, kaukolan tayon itunos so bilay tayod mensahe tayo pian makapanmatoor tan makapibansag ed organisasyon nen Jehova. Nagawaan tayo itan no “seguroen [tayon] naynay no antoy makapaliket ed Katawan.” (Efe. 5:10, 11) Lapud imperpekto tayo, impluensya nen Satanas, tan wala itayod sayan mauges a mundo, naiirapan tayon manggaway duga. Wala rad sikayo inad-aron agagi so inagew-agew ya mipupuligesgesan pian makapansiansian maapit ed si Jehova. Tandaan yon inad-aro To kayo. Agkayo onsusuko! No manbilay itayon mitunosan ed gagala nen Jehova, nawalaan tayoy makabaliksan tan maliket a bilay tan abobonan itayo nen Jehova.—1 Cor. 9:24-27.

16, 17. (a) Antoy nepeg tayon gawaen no akagawa tayoy seryoson kasalanan? (b) Antoy naaralan tayod eksperiensya nen Anne?

¹⁶ Panon to balet no akagawa tayoy seryoson kasalanan? Onkerew tayon tampol na tulong. No iyamot tayo itan, mas onloor so problema. Nonoten imay imbaga nen David sanen inyamot toy kasalanan to: “Saray pukel ko et kinmapuy lapud sanagew ya impanakis ko.” (Sal. 32:3, NW) On, say pangiyamot na seryoson kasalanan et manresultad ermen tan ikesaw ed espiritual, balet “say mangipatua tan mangikaindan ed sikara makagamor na panangasi.”—Uli. 28:13.

¹⁷ Imanoen so eksperiensya nen Anne. * Nen sikatoy tinedyer, manlilingkor bilang regular payunir. Balet ginapoan toy doblin estandarte na kabibilay. Baleg so epekto na satan ed sikato. Inkuan to: “Nakokonsiensia ak. Agak maliket tan nadi-depress ak ya lanang.” Antoy ginawa to? Inkuan to ya aminsan et apantongtongan diad aral so Santiago 5:14, 15. Amoria to ya kaukolan toy tulong na saray elder. Oniay nanonotan to: “Saraman a teksto et reseta nen Jehova parad saray mansasakit ed espiritual. Aliwan mainomay ya inumen so tambal balet ta epektibo. Inyaplikak iraman ya simbawad Kasulatan, kanian inmabig ak.” Kalabas na pigaran taon, apapawil nen Anne so seseg tod panaglingkor ed si Jehova tan malinis so konsiensia to.

18. Antoy nepeg a determinasyon tayo?

¹⁸ Talagan sakey a pribilehyo so pambilay ed sayan kaunoran iran agew tan magmaliw a kabiangan na baleg ya organisasyon nen Jehova! Agtayo ibabaliwala iray itatarya to. Imbes, kaibay pamilya tayo, panggunaetan tayon atendian a regular so amin a pantitipon na kongregasyon, maseseg a manpulong ed teritorya tayo, tan pabliey amin ya espiritual a naakan ya nanaawat tayo. Kaukolan tayo met a suportaan iramay mangidadaulo tan manbilay a mitunosan ed mensahe tayo. No gawaen tayo iratan, makapibansag tayod organisasyon nen Jehova tan ag-itayon balot onkesaw ed panggaway maabig!