IMBAGA nen Jesus ya ‘anggapoy anggan sakey a bato na templo nen Jehova ya natilak ya akatapew ed sakey a bato.’ Agawa iyan propesiya sanen saray sundalo na Roma ya indaulo nen Tito et dineral day Jerusalem nen 70 C.E. (Mat. 24:2) Ag-abayag, implano nen Emperador Julian ya ipaalagey lamet so templo.

Si Julian so unor ya paganon emperador na Roma. Sayan kaanakan nen Constantine the Great et imbangat na saray mankuan ya Kristiano. Balet nen nagmaliw ya emperador nen 361 C.E., impanengneng ton agto labay itan a bangat tan say mauges ya kagagawa na Kakristianoan. Diad saray libron nipaakar ed history, sikatoy tinawag ya “Apostata.”

Kabkabusol nen Julian iramay mankuan ya Kristiano. Nayarin say sakey a rason et nen anem taon to, anengneng ton pinatey da so ama tan kakanayon to. Unong ed saray historian, pinaseseg nen Julian iray Judio ya ipaalagey lamet so templo ra, ta iisipen ton prueba iya a si Jesus et palson propeta. *

Talagan labay nen Julian ya ipaalagey lamet so templo. Balet agsegurado iray historian no kasin nigapo to itan. Tan no bilang ta agapoan to, agsegurado no akin et nitunda. Antokaman so agawa, say segurado et pinatey si Julian anggapo ni duay taon kayari ton nagmaliw ya emperador, tan aglan balot nipaalagey so templo.